အချစ်နယ်နိမိတ်ဆီ ခင်ဗျားကိုခေါ်သွားချင်တယ် (𝐂𝒐𝒎𝒑𝒍𝒆𝒕𝒆𝒅)

ƤAƦƬ ④

အပိုင်း - ၄

ဘေစင်ထက်ရှိ မှန်မှတဆင့် မြင်နေရသောရုပ်ပုံလွှာကို သပ်သပ်ရပ်ရပ်ဖြစ်အောင်ပြင်လိုက်ရင်း မော်ကွန်းပြုံးမိလိုက်သည်။ ပြီးမှ ခုနကမှဝယ်လာသော စာအုပ်လေးများကိုလက်မှကိုင်ရင်း Toilet အပြင်ဘက်သို့ထွက်လိုက်သည်။ ခဏနေလျှင် ရုပ်ရှင်ပွဲစဉ်စတော့မည်ဖြစ်တာကြောင့် ရုံထဲသို့ဝင်ထိုင်နေတော့မည်။

လွန်ခဲ့တဲ့ရက်ပိုင်းလောက်က ဒီးဒီးတစ်ယောက် Online Shopping Page တစ်ခုကနေပြီး ရုပ်ရှင်လက်မှတ် မဲပေါက်တာကြောင့် ဒီနေ့ ဒီနေရာသို့ မော်ကွန်းရောက်နေရခြင်းဖြစ်သည်။ 

ရုပ်ရှင်လက်မှတ်က တစ်စောင်တည်းဖြစ်တာကြောင့် အတွဲလိုက်သွားချင်ကြသော ဒီးဒီးနဲ့ ရတုတို့က အဝေမတည့်ဖြစ်ကာ သူ့ကိုပေးကမ်းစွန့်ကြဲလိုက်သည့်အပြင် ပွဲချိန်ကလည်း ကျောင်းပိတ်ရက်ဖြစ်နေသည့်အတွက် သူဝမ်းသာအားရ လက်ခံလိုက်ခြင်းပင်ဖြစ်သည်။ 

ရုပ်ရှင်လက်မှတ်အပြင် Taxi ခ နဲ့ အအေးဖိုးပါ ပေးလိုက်တဲ့ ဒီးဒီးကိုကြည့်ပြီး အနည်းငယ်သံသယဖြစ်မိသော်လည်း ကုန်းဆင်းရ နည်းလား ဆိုသည့်အတွေးကိုဦးတင်ပြီး ဒီနေ့ဒီနေရာသို့ရောက်ရှိလာခဲ့ခြင်းဖြစ်သည်။

လက်ထဲကလက်မှတ်ကိုကြည့်၍ အချိန်နဲ့နေရာကို ပြန်စစ်ကြည့်နေတုန်း ထောင့်ချိုးမှရုတ်တရက်ထွက်ပေါ်လာသော လူတစ်ယောက်ကြောင့် ရှောင်ချိန်မရတော့ဘဲ တည့်တည့်ကြီးဝင်တိုက်လိုက်ရတော့သည်။

"အ..."

မျက်နှာဖုံးလေးတွေ တွန့်ကျေမှာစိုးသည့်စိတ်ကြောင့် လက်ထဲမှာ ဖွဖွလေးကိုင်လာသော စာအုပ်နှစ်အုပ်သည် ဝင်တိုက်မိသောအရှိန်နဲ့အတူ ကြမ်းပြင်ပေါ်သို့ကျသွားလေသည်။

"တောင်းပန်ပါတယ်... ကျွန်တော်ဖုန်း​ပြောရင်း  ဟင်  ကိုရတု"

အသက် ၁၈ နှစ်လောက်သာရှိဦးမည့် ကောင်လေးတစ်ယောက်။ အနီရောင် ရှပ်အင်္ကျီနဲ့ အနက်ရောင်ဘောင်းဘီလေးကို လူငယ်ဆန်ဆန်ဝတ်ဆင်ထားပြီး သူ့ကို ရင်းနှီးဖော်ရွေသောအပြုံးများဖြင့် ပြုံးပြနေလေသည်။