قيود عشك الشيخ

قيد الثاني

اني الفتشو كلبه ولكوك ابخير 
ولكوني بكلبك أصلآ ما مخليني

...................

ثقيف::- جابوها واني واكف اجة وياها ابوها وواحد من عمامها دفع دفعوها وراحو جانت لابسة عباية بوشية ما باوعتلها ولا شفت وجها شلوناتة

عقدنا وانا بعد ما تحملت ركبت سيارتي وطلعت بيها للناصرية ما كدرت بعد اتحمل هذا الظلم طول عمري وانا اكولن ما خلي بت تجرب الجربته امي وجان اذا كعدة من كعدات طلبو فصلية اني ادفع فلوس مجانهم بس كون ما ياخذون فصلية تالي انا اخذ الفصلية واعقد عليها اخخخ يا احمد يا خويه جمرتك ادك بصدري

وصلت للناصرية وبوجهي رحت لابو احمد وكلعادة لكيتة بالديوان مالتة سلمت وكعدت

::- شلونك عمي

::- هلا بيك بوية شلونك شنهي الجابك بهذا الوكت

سكتت وجريتلي حسرة شكت كلبي شك ما اعرفن منين ابدي

::- ع هاي حسراتك يرادلنا كعدة طويلة وفنجان كهوة

تبسمت الة وهزيت راسي راح كام صب كهوة واجة كعد كدامي وكال

::- احجي يبوي احجي شنهي الصارلك ما تجيني الا تضيك الوسيعة بيك

::- عمي جابوها

::- منهي

::- الفصلية

باوعتلة عدل كعدتة وكال
::- كون سويت الكتلك علية يثقيف

هزيت راسي::- اي حجي انا العقدت عليها

::- بارك الله بيك بوية تراه الفصلية التجي بت لا حوله ولا قوه ما ردتهه تروح بيد الما يرحم ردتك انت التعقد عليها

::- ليش عمي مو تدري بية انا شنهو رايي بهاي السالفة

تبسم وجها يشع نور يريح النظر::- بوية انا عبن ادري بيك تعرف شراح يصير بيها خليتك تعقد عليه لان ادري شنهي الفصلية وشراح يسوللها بس اذا مرت الشيخ الكل يحترمها وانت تخاف الله بيها اذا راحت للاخوانك النسوان ما ترحمها

سكتت رجع حجة
::- عمي اعرف المريت بي موش سهل واعرفن شلون جان ضغط المرحوم عليك واعرفنك لساتهن الجويات بكليبك ما طابن

::- جويات روحي ما يطيبن ولا يخمدن عمي

تبسم وطبطب ع ايدي وكال::- بعد عمك يجي يوم وتجيني وتكلي طابن انا اعرفنك سبع وكدها

عمي ابو احمد جان رفيك ابوي بايام العسكرية وظل وياه لحد ما اوفاه الاجل وبقيت انا ع تواصل وياه عمي ابو احمد رجال متدين وخلوق واحبة واحترمة واخذ براية جنت اروح محمل هموم وارجع منة مثل الطفل هو هم شيخ عشرية