လွှမ်းရိပ်စံအိမ် { လႊမ္းရိပ္စံအိမ္ } [Completed]

အခန်း { ၆ }

🏡 လွှမ်းရိပ်စံအိမ် 🏡

အခန်း { ၆ }

ဟောင်းပြီး သံချေးများ တက်နေသည့် စက်ဘီးလေးကို စီးကာလာမည့် လွှမ်းရိပ်လေးကို အိမ်ရှေ့မှနေ၍ မင်းစံအိမ် ထွက်မျှော်နေမိသည်။

စောင့်မျှော်နေသောကြောင့်လား မသိ အချိန်ကုန်သည်က နှေးလွန်းသည်ဟု မင်းစံအိမ် ထင်မိသည်။

ညစ်ပတ်အိုးလေး လာမည့် တောင်ဘက်လမ်းကို လည်ပင်းလေးရှည်ကာ လှမ်းကြည့်ရင်း မင်းစံအိမ် မျှော်နေမိသည်။

.

"ဘောလိုပဲ... သောက်ခဲတွေကလည်း ဒီနေ့မှ ပေါတာကွာ"

မျှော်နေသည့် တစ်ယောက်သောသူကြောင့် လွမ်းရိပ် စီးနှင်လာသော စက်ဘီးသည် ခဲလုံးများကို ခဏခဏ နင်းမိပြီး ယိမ်းယိုင်၍ နေသည်။

.

လမ်းတွင် စက်ဘီးနင်းရသည်မှာ အဆင်မပြေသည့်ကြားထဲ မင်းစံအိမ်ကို တွေ့လိုက်ရ၍ လွှမ်းရိပ် စိတ်များနောက်ကျိသွားရသည်။

လူကို ခနဲ့သဲ့သဲ့ ပြုံးကာ ခပ်လှောင်လှောင် လာကြည့်နေသည့် ဘဝင်ရူးကောင်​၏ မျက်ခွက်ကြီးကို လွှမ်းရိပ် ပစ်ထိုးလိုက်ချင်ပါသည်။

"အဟွန်း! မင်းက လူကသာ ငယ်တာ...  ရည်းစားကြထားတတ်တယ်နော်"

ပန်းတွေကိုင်ပြီး ရပ်နေသော ရှည်မျောမျောနှင့် ပိန်မဲနေသည့် ညစ်ပတ်အိုးကို ကြည့်ကာ မင်းစံအိမ် ပြောလိုက်လေသည်။

ရှေ့ကကောင် ဘာ​ကို​ဆိုလိုမှန်း မသိသည်ကြောင့် လွှမ်းရိပ် မျက်မှောင်တွန့်ကာ စဉ်းစားနေမိသည်။

"အဟား.. ဘာလဲ မင်း ရည်းစားထားတာကို ငါ သိသွားလို့ ကြောက်နေတာလား"

လွှမ်းရိပ်မှာ ယခုချိန်ထိ မင်းစံအိမ် ဘာတွေပြောနေမှန်း မသိသေးပါ။ မဟုတ်မှ အဲ့ကောင် ရူးသွားသည်လား။

"ဟေ့ကောင်! ပန်းဖိုး မပေးပဲ ဘာဇာတ်တွေ လာကနေတာလဲ"

မသိချင်‌ယောင်ဆောင်နေသည့် ညစ်ပတ်အိုး​ကြောင့် တွေ့မြင်ခဲ့သည်များကို မင်းစံအိမ် တည့်တိုးပြောလိုက်သည်။