علاقات زائفة

البارت التاسع والسبعون 79

مـتت مامِشـتِكي 

وعُرفـت اسـراري النـاس ..

شـآمِـت گايـللهُم كاتلـينه ..

_____

بنان : ياستار حبيبتي خليت ايدي على راسها صايره نار ، يمه اسم الله روندة ،بسم الله الرحمن الرحيم ، ولج حبيبتي شنو تحسين فدوه..

روند : ألم بأحشائي عبالك سجينه وتكطع بلحمي ...

بنان : صبري اصيح جراح.

روند : لا لتكليلة خاف يخترع خطيه..

بنان : شو سكتي خايفه عليه لعد تموتين احسن..

كمت طلعت اركض لا حجاب لا دنيا عقل مضل براسي ..

رحت لغرفتهم دكيت الباب حيل بدون توقف ..اجاني صوت جراح يصيح.

ياستار ياربي ، سترك الهي ،. فتح الباب ، باوعلي بدون كلام فهم السالفه تخص روند ،،ركض لشقتهم رحت وراه لكيته كاعد يم روند  لزم راسها ..

جراح : حرارتها نار ، لا ياالله هاي من شوكت هيج مصخنه.

بنان: ماعرف نمنه جانت زينه حرارتها كعدت على صوتها تتأوه لكيتها سابحه بالمي لزمتها مصخنه وتهذي..

جراح : حبيبتي شنو تحسين كلبي.

روند : موجوعه ضهري يموتني..

اجتي مسرة ..

مسرة : ها خير شصاير..

بنان : ضهرها يوجعها ومصخنه..

مسرة : يا خطيه اسم الله.

جراح : مسره جيبي السويج والمحفظة وملابس بسرعه..

راحت والتفت عليه.

جراح : يرحم اهلج جيبيلها ملابس خلي اخذها للمستشفى..

بنان : صار ..

طلعت الها ملابس وجيت اريد ابدل الها اخذهن مني وكال  .

جراح : عاشت ايدج عوفي الباقي عليه..

نطيته الملابس ورحت وكفت على صفحه اباوع ايده ترجف كوه مسيطر .. لبسها واجتي مسرة ، اخذ منها الملابس ، واني طلعت بره علمود يبدل براحته ، وره شويه فات شايلها ومسرة وراهم ، طلعت وصلت للدرج صحت وره جراح..

بنان : انتضروني ابدل واجي وياكم ..

مجاوبني نزلت مسرة وتلبس بعبايتها.

مسرة : ميحتاج اني راح اروح وياهم وانتي عينج على بناتج.

بنان : وشلون يهدالي بال عفيه خلي اجي وياكم ..

عاط جراح..

جراح : يلااااااا مسره فضيني..

مسرة : جيت جيت، من رخصتج حبيبه..

بنان : عود خابري على عمتي طمنيني لان ماعندي موبايل اتصل عليكم..

مسرة : ان شاءالله ان شاءالله..