စေခိုင်းချက်မပါဘဲ အလိုလို စုဆုံသွားသော မျက်ခုံးတန်းတန်းတို့တွင် အလိုမကျခြင်း အငွေ့အသက်များ စီးဝင်နေသလို ။
အိမ်ပြန်ချိန်မှာ ထိုကလေး၏ မျက်နှာကို စက္ကန့်ပိုင်းလောက်မြင်ရဖို့ အလှမ်းဝေးသောမြို့ပြင်ဆိုက်မှ ၃ နာရီကြာ ကားမောင်းလာခဲ့ရသော ကြိုးစားမှုဟာ သည်လို အဆုံးသတ်သွားဖို့များ ဖြစ်နေခဲ့သလား ။
ကောင်လေးမောင်းသော ကား၏ မောင်းသူဘေးမှ ထိုင်ခုံနေရာ ၊ တစ်နည်းအားဖြင့် ယူဂျင်း၏ နံဘေးတွင် ရှိနေခဲ့သော အာရာဟာ စွဲမက်ဖွယ်ကောင်းစွာ ပြုံးရယ်နေခဲ့သည် ။ အာရာ့၏ အပြင်အဆင်က သည်နေ့တော့ တစ်မူထူးနေသလိုပင် ။ မြင်နေကျ ရိုးရှင်းသောစတိုင်မျိုးနှင့် မဟုတ်ဘဲ မျက်နှာကိုလည်း သေချာ ပြင်ဆင်ထားသည် ။ ထို့အတူ ယူဂျင်းသည်လည်း ထိုအခိုက်အတန့်ကို မနှစ်မြို့ဟန်မရှိခဲ့ပါပေ ။
သူ တစ်ခေါက်လောက် မှားဆင်းမိခဲ့သော မှတ်တိုင်တစ်နေရာတွင် မမျှော်လင့်ထားသော ဒုက္ခလှလှဟာ ရေနွေးပူတစ်ခွက်နှင့် ဆီးကြိုနေသလို ခံစားချက်မျိုးရယ်ပါ ။ အပူတပြင်းဖြစ်သွားသော ရင်ဘတ်တစ်နေရာကြောင့် ကားစတီယာတိုင်ကို တင်းနေအောင်ကိုင်လိုက်မိသည် ။
အရာအားလုံးသည် ဂယူကိုယ်တိုင် အကြမ်းဖျင်းရေးသားခဲ့ဖူးသော ဇာတ်ညွှန်းတစ်ပုဒ်တော့ ဖြစ်ခဲ့ပါသည် ။ ထို့အတူ ကိုယ့်ဇာတ်ကိုယ် မနိုင်တော့သော သူ့အဖြစ်ဟာ သနားစရာ မကောင်းဘဲ ရယ်ချင်စရာကောင်းနေခဲ့မှာ သေချာသည် ။
ကိုယ် ချစ်သော လူတစ်ယောက်ကို သူတစ်ပါးလက်ထဲသို့ အသာတကြည်ထည့်ပေးရမည့် အဖြစ်က ထင်သလောက် မလွယ်ကြောင်း သိလိုက်ရသော အချိန်တွင် နောက်ဆုတ်ဖို့ ခဲယဉ်းသွားသလို သူ့မှာ ထိန်းချုပ်ပိုင်ခွင့်မရှိတော့ချေ ။
လက်တွေ့တွင်တော့ သူ ဆုံးဖြတ်ခဲ့သမျှ စီရင်မှုအားလုံးဟာ လုံးလုံးလျားလျား ဦးတည်ချက် လွဲမှားနေခဲ့သယောင်ရှိသည် ။ ဥပမာ - အာရာ နှင့် ယူဂျင်းတို့၏ ပတ်သက်မှု အစဟာ သူ ကိုယ်တိုင် ဖြစ်ခဲ့ပေမဲ့ ထိုဆက်ဆံရေးကို သူ့ သဘောကျ ဖြတ်တောက်ဖို့ မဖြစ်နိုင်ခဲ့သလိုပေါ့ ။
YOU ARE READING
My Blue : 규진
Fanfiction김규빈 한유진 Arranged by Dalkomham_shots Start : 9/3/2023 Published date : 12/3/2023 End : 30/7/2023 ( 12:10 a.m. ) Book Cover - ARTIST : Uhmericano
