'ချာတိတ်၊လာကြိုရင် အဆာပြေစားဖို့ မုန့်ဝယ်ခဲ့မယ်၊စားချင်တာရှိရင်ပြောထားနော်'
စာသင်တာလိုက်နားထောင်ရင်း ဖုန်းမှန်ပြင်မှာ ပေါ်လာသည့် စာကြောင့် ပြုံးချင်ချင်ဖြစ်လာသည့် မျက်နှာကို မနည်းဘရိတ်အုပ်ထားရသည်။
သူအားတဲ့ရက်တွေဆို အပို့အကြိုလုပ်ပေးမယ်လို့ ပြောထားသူက မနက်မအားရင်တောင် ညနေ ကျောင်းဆင်းချိန်အမီ ကျောင်းရှေ့ကို ရောက်လာတတ်သည်။
ကလပ်သွားရင်လည်း သူပဲလာခေါ်ကာ အိမ်ကိုလည်း သူပဲပြန်လိုက်ပို့ပေးသည်။
ကိုယ်မပေးနိုင်သေးတဲ့အဖြေကိုလည်း အတင်းမတောင်းဘဲ ဒီအတိုင်း ကိုယ့်အလိုကိုလိုက်ရင်း ဘေးမှာနေပေးနေတာကလည်း ဒီလူကြီးကို သူပိုပိုပြီး ငြိတွယ်နေရတဲ့အချက်တွေထဲက တစ်ခုပါပဲ။ရှိန်းဟာ အပေါ်ယံမှာ ဘာမှမပြောင်းလဲသည့် ကောင်လေးတစ်ယောက်လိုဖြစ်နေပေမဲ့ အတွင်းစိတ်ဟာတော့ ခဲမှန်ဖူးသည့်စာသူငယ်လိုပင်ဖြစ်သည်။
သူ လင်းရိပ်ကို ရူးသွပ်စွာသဘောကျခဲ့သည်၊လင်းရိပ်မကြိုက်မှန်းသိတာတောင် တောက်တဲ့လို ကပ်တွယ်ခဲ့သည်။နောက်ဆုံး သူငယ်ချင်းတွေ မြှောက်ပေးတာကို လက်ခံပြီး သူ့ခန္ဓာကိုယ်ကိုပါ လင်းရိပ်ဆီအပ်နှင်းဖို့ ကြိုးစားခဲ့သေးသည်။
ဟိုတယ်က တစ်ယောက်တည်းပြန်ထွက်လာရချိန်မှာ သူဝမ်းနည်းရသလို၊နောင်တလည်းရသည်။အဆိုးဆုံးကတော့ night lifeအသိုင်းအဝိုင်းမှာ ထိုကိစ္စကနာမည်ကြီးပြီး သူ့ကို ထိုကိစ္စကြောင့် ပတ်သက်ဖို့ ချဉ်းကပ်လာတာတွေပဲဖြစ်သည်။ဒါတွေကို အကြောတင်းတင်းနဲ့ ဘာမှမဖြစ်သလိုနေပြရင်း ကျော်လွှားခဲ့ပေမဲ့ အခန်းထဲမှာ တစ်ယောက်တည်း ဝမ်းနည်းပက်လက်ငိုခဲ့ရသည်။ကိုယ့်ကိုမချစ်တဲ့သူတစ်ယောက်ကို ပြန်ချစ်လာနိုး တွယ်ကပ်ရင်း အရှုံးတွေချည်းသာ ရခဲ့သည်။
အပျော်တွဲမှန်းသိပေမဲ့ သဘောကျစိတ်နဲ့ လောဘတက်ခဲ့မိတာဟာ သူ့အမှားမို့ နောက်တစ်ကြိမ်ထပ်မမှားအောင်သာ သူဆင်ခြင်ခဲ့သည်။
လာပတ်သက်သမျှလူတိုင်းသည် သူ့ကို အပျော်ကြံမှာဆိုတဲ့စိတ်နဲ့ ဘယ်သူ့ကိုမှ မယုံရဲခဲ့တာတွေဟာ ဒီလူကြီးအပေါ်မှာတော့ ဖြည်းဖြည်းချင်း လျော့ပါးလာသလိုခံစားရသည်။သူ့နှုတ်ထွက်စကားတိုင်းကို သေချာမှတ်ထားပြီး အားလုံးဖြည့်ဆည်းပေးတတ်သူကို သူလည်း တဖြည်းဖြည်း ငြိတွယ်လာမိနေတာပဲ ထင်ပါရဲ့။
YOU ARE READING
ပင်လယ်ပျော်၏ချစ်ပုံပြင်(Completed)
RomanceA love story between the Seaman and teenage boy -ministory-