حُب الأقنعة

البارت العاشر

جوري: شنو شكو
مصعب: ابني بالمستشفى
جوري: اروح وياك
-ماسمعني جر دشداشة من التعلاكة ونزل يركض مافهمت شصاير
بقيت كاعدة انتظرة حتى موبايلة ناسي
صار وجه الصبح وهو ماجاي قلقت علية بدلت ملابسي ونزلت استحي ادك الباب على احد ومااعرف غرف اخوانة رحت الغرفة سراب ودكيتة
هالة: منو
جوري: اني جوري
هالة : فوتي
جوري: هالة اسفة كعدتج بس بالي يم مصعب اتصلو علية كالولة ابنك بالمستشفى ولهسة ماكو خبر وناسي موبايلة ردت اكعد احد من الولد بس مااندل غرفهم
هالة: تعالي وياي
جوري: راحت هالة الغرفة ودكت الباب طلع اخو مصعب الوسطاني وسولفتلة
-طلع موبايلة وخابر احد ظاهر احد خوالة
سليم : انطوني عنوان المستشفى راح اروحلهم
جوري: راح سليم واني بقيت منتظرة خبر وهالة يمي
صار ساعتين من راح سليم ومااكو خبر معقولة صاير شي للطفل
-جنت كاعدة بالصالة ونزل سرمد
صباح الخير جنتنا
جوري: صباح الخير
-سرمد امس بليل اتصلو على مصعب ابنة بالمستشفى وصار وجه الصبح ومااجى وسليم راحلة صار ساعتين وهم ماكو خابر سليم لان مصعب مماخذ موبايلة

سرمد : غير تكعدوني تكلولي تاركيني نايم صدك جذب
-
اتصلت بسليم
-ها سليم شصاير
شنوو هذا الصياح شبي أيسر
سليم: تعال للمستشفى محتاجك
جوري: راح سرمد واني كلشي مافااهمة شبيهم واليروح بعد ماينطي خبر بقيت كاعدة بالصالة كعدو كلهم شافوني كاعدة ووجهي اصفر هالة حجتلهم ووصتهم مايكولون لأمها حتى ماتتخربط
يتصلون على سرمد وسليم ميردون
للساعة ب11 باليل دخل مصعب وشايل ابنة ووجهة تعبان وماحجى ولاكلمة صعد كبل عبالي بي شي الطفل ميت ومصدوم
دخل سرمد وسليم
-كالو اتركو لاضغطون علية بالكلام
-الي فهمتة الطفل عايش بأهمال بيت جدة وفاتح جيس مبيدات وماكل منة
متوقف قلبة ومتلاحكي بالصدمات الكهربائية
اخذت كلاص ماي وحباية بندول وصعدت انطيتهن الة بدون مااحجي بشي وهو اخذهن وهو ساكت حاط الطفل على الجرباية وهو مكابلة كاعد على كرسي الطفل منطي مهدئات ونايم
جوري: كوم نام بصفة اني افرش بلكاع مارد علية
-لزمتة من جتفة وكتلة كوم وياي
-نام على الجرباية وغطيتهم وهو ساكت
فرشت بلكاع وبقيت اتكلب الى ان سمعت انفاس مصعب تغيرت عرفتة نام رفعت راسي شفتة نايم وحاضن ابنة غطيتهم ورجعت لفراشي اتمددت ونمت
نايمة وحسيت الباب تندك كمت مشيت على كيف وفتحتة حتى ميحس مصعب ويفز
هالة: يكول عمو سليم كعدو يسوري ننطي العلاج
جوري: مصعب منومة بحضنة هسة اجيبة واجي
-جوري رجعت للغرفة لكيت الطفل كاعد بس ممسوي صوت خطية هادء مادري مسطور من العلاج استغربني اني منو
-وخرت ايد مصعب من عندة على كيف وأخذتة شلتة
طلعت للصالة انطيتة العمة حاطيلة كانونة بيدة ورادو ينطو علاج خاف وكام يبجي حطيتة بحضني والعب ويا خليتة يلتهي وأشرت السليم وعمة حطلة الابرة بجة شوية وسكت
جوري: شنو اوكلة شنو كال الدكتور
سليم :سوائل كال وكلو
جوري: اخذتة وياي للمطبخ وهالة لازمتة سويتلة شوربة خضروات وتمن مهروس سامعة للجهال زينة
-عم عم
جوري: اخذتة بحضني و يسوي عم عم خطية جوعان
-بردت الشوربة وبديت اوكل بي وهو هادء كلش وحباب كلساع ابوسة من خدة ويبتسم
مصعب: اببببنننني وين ابببنيي
جوري: سمعت صوت مصعب جاي من الصالة يعيط كالولة بالمطبخ يم جوري اجة دفر الباب ويصيح علية
مصعب : منو كلج تاخذي ياساق...ة منو كلج تاخذي
جوري: بقيت بمكاني مصدومة والطفل فز من الصوت حضنتة وحجيت اولاً احترم نفسك لتعلي صوتك ثانياً الطفل جان لازم ياخذ علاج وجوعان ميت جوع شوفة شلون خلص طاسة الشوربة
مصعب: لج ساف ة عبالج مادريت متفقة وي ابوج حتى توكعيني وتهددوني بأبني
جوري: اجة جرني من شعري وصعدني بالسيارة بملابسي ورجعني ببغداد والطريق كلة يفشر ويغلط بس ماضربني ابد
وصلنا البغداد ذبني بببيت شمس وراح
جوري: وكفت بالباب ودموعي تجري مااعرف شكللهم رحت البيتنا خليت طفل من شارع يفتحلي الباب يطفر اخذت فلوس من غرفتي وعندي ملابس بالغرفة بدلت وطلعت اخذت تكسي ورحت البيت حسام
وصلت ميتة تعب
خديجة : هلة يلحبيبة شبيج
جوري: بسرعة وين ابو ايمن محتاجتة
فوتي هسة اخابرة
جوري: فتت وبقيت انتظر حسام صار العصر اجة
حسام : هلا شلونج كالتلي ام ايمن رايدتني
خديجة: رايحة اجيبلك كلاص مي
جوري: حسام خلنحجي وحدنا خلي نطلع بسرعة
حسام : وين شكو
جوري: نطلع وافهمك امشي ماكو وقت للتفسير
حسام : تمام امشي
-صعدنا بالسيارة
جوري: حسام اتحرك منا
حسام: فهميني شكو
جوري: خطتنا انكشفت ومصعب عرف وهسة هسة لازم نطلع لأربيل وتشتريلي خط اخابر من عندة ابوية
حسام: شلون عرف
جوري: مااعرف مااعرف راح للمستشفى لأبنة اجة متغير 180 درجة كعد الصبح جرني وغلط علية وفشر وجابني البغداد
-حسام فدوة نطلع هسة لأربيل نوصل الأبوية قبل لايوصلة مصعب
حسام: ادري ياجوري ماخايفة على روحج
جوري : لا ماخايفة يلا اطلع
-طلعنا الاربيل واني بالي يم مصعب وادعي الرب يحمي
-------------------
مصعب: خابروني رحت للمستشفى ابني متسمم صار الصبح قلبة توقف وانهد حيلي بقيت اصيح وافرفح لحد ماممرضة سوتلة صدمات كهربائية واستقر القلب
رحت للسيارة وحاط بيها موبايل الدوام شفت جايتني مكالمات
مصعب: الو ها محمد صار شي جديد
محمد: سيدي عرفنا خط السيم كارت ومكان يوسف دخو ديتواصل ويا بنته جوري يوسف دخو وبتواريخ قريبة
مصعب: وشنو نوع التواصل
محمد: مكالمات
مصعب: حولهم الية هسة
محمد: تمام سيدي
مصعب: احس اجتني صاعقة على راسي كل الي اتمنى يطلع هل الشي الكالة محمد جذب
-ورة دقايق وصلوني تسجيلات صوتية الها بصوتها وهي تتفق ويا ويكللها راقبي تحركاتة حيلي انهد وعقلي توقف عن التفكير بين ابني وبين بت گلبي الطعنت بية والجذب ماحبتني
ردت اروح اقتلها خلاص بس اذكرت ابني هستوة الله طلعة من حلك الموت
- رحت يم ابني وانتظرت الدكاترة يسمحولة بالخروج واخذتة ورجعت للبيت واني مااريد اشوف وجها دخلت للبيت وشفتها كدامي باوعتلها وكلت هاي السميتها بنتي وغدرت بية هاي العزيتها اكثر من روحي ذبيت حسرات وصعدت بخطوات متباطئة خليت ابني على الجرباية وكابلتة وروحي عليلة خنجر ومطعون بصدري حتى الهوى ضاع علية تمددت يم ابني ونمت حسيت مااريد اسوي شي غير استوعب الصار فزيت الصبح وابني ماهوة بحضني نزلت للصالة اصيح كالولي عند جوري فقدت دخلتلها للمطبخ جريتها من شعرها للسيارة بس مانطاني كلبي اضربها ويا جرت شعرها و گلبي وجعني طلعت حركتي بالغلط والفشار رجعتها البغداد وشمرتها يم بيت شمس ورجعت مثل الطير اليذبحون بي بسجينة عمية لاهو ميت ومخلص ولاهو عايش ويتنفس
كعدت اجر جكارة بعد جكارة لحد ماصارن بالعشرين باكيت
كسرتيني واني شفتج اهلي وناسي ماجذبتي يجوري من كلتي اخذ حقي بيدي بعدك ماشايف شي واني الحسبتج انظف من ابوج واني الحسبتج بنتي مو بنت ابوج اخخخ ياخنجر گلبي
________________________
حسام: وصلني خبر مصعب جان مراقب موبايل ابوج ويعرف تحركاتة
جوري: ميخالف مصعب هسة ببغداد من اوصل الاربيل اعرف اصرف ماراح يلحك يوصل
-انت جهز نفسك وشغلك لو اموت لو اعيش بهل حرب الدخلت بيها
-بعد ست ساعات طريق وصلنا الاربيل دخلنا المركز اربيل
جوري: جابلي حسام خط وموبايل حطيت رقم ابوية واتصلت
-الو بابا اكو اشياء مهمة لازم اكولها انزل القرية عنكاوا يم بيت عمو جرجيس
يوسف: امان ؟
جوري: باوعت الحسام وكتلة اي امان
_________________
مصعب: رجعت للشقة وكعدت ادخن لليل رحت للكنتور اشمر بغراضها بالكاع الحد ماشمرت جاكيت ووكعن من عندة الاظرف الجانن بسيارتي شجابهن لهنا
-قربت للكاع وشلتهن باوعتلهن هنة نفسهن ردت اشمرهن
-اتراجعت وكعدت بالكاع سندت ظهري على الكنتور كعدت بتعب وحيلي مهدود لزمت رسالة بتاريخ 2003
_____________________
نوران : بعد ماعشت ويا زوجي وحاولت اتأقلم ويا اهلة الصعبين زوجي توفى بسنة ال 2003 واني حامل بالشهر الخامس
-وصل خبر اليوسف انو زوجي اتوفى ورجع يضايقني وعرف مكاني مااعرف شلون المهم اني جنت مربية ولد زوجي راد بوسف يأذيهم بس عرفهم ولد زوجي مو ولدي فتركهم من بدت بطني تكبر صار يزيد تهديدة انو يقتل الي بطني وياخذ ثار ابنة مني ويوجع كلبي واهل زوجي مايسون شي يخافون من عندة
الى ان اجى يوم الولادة وولدت يم قابلة وصار عمر بنتي شهرين
وبيوم جنت طالعة القحها اجت سيارة طبكت وجرو بنتي من حضني بقيت بالاشهر اني ريد اطلع اروح اليوسف اعرفة هو القتلها بس اهل زوجي حبسوني لان يخافون من عندة وخاف احفادهم يتأذون جنت ارسل رسائل بيد ابن زوجي جان عمرة 12 سنة انطي عنوان البيت الجنت عايشة بي ويا يوسف ويدزهم بيد الساعي

احدى الرسائل:
_________________
من نوران 2003
يوسف رجعلي بنتي بس اريد اعرف ميتة لو عايشة والرب مو اني القتلت يوحنا لاتعاقبني ببنتي رجعليها واقتلني بمكانها طفلة بريئة هستوها مولودة ماتعرف شي عن الحياة يوسف والعذرا گلبي متفرفح اريد بنتي بس اشم ريحتها بس اطمأن هي عايشة بس طمني والعذرا يوحنا مات بسبب اهمالك مو بسببي مات بسبب طردتك النا بليلة ظلمة
--------------
مصعب: وهواي رسائل تتوسل بيهن الى ان قريت رسالة تهددة بيها تروح المركز الشرطة وتسولفلهم على اعتدائاتة عليها وعلى الامور الكاعد يمارسها وانو منضم الجماعة تروج مواد مخدرة وبعد هل رسالة مااكو ولا رسالة استغربت
-يعني هسة جوري بت يوسف لو بت نوران سنة الرسائل نفس سنة مواليد جوري ونوران ماذكرت بالرسائل هو مزوج حتى يخلف بهل سنة؟ زين يجوز ازوج وبت نوران قتلها وجوري فعلا بنتة

-خابرت محمد
مصعب: محمد يوسف عندة اخت اسمها نوران ازوجت خارج بغداد سنة 1992 شردت من يوسف اريد تروح للمنطقة وتسأل عنها الى ان يوصلوك الخيط وين شردت
محمد : اسمها الثلاثي سيدي
مصعب: نوران دخو سامي عمم اسمها بوحدة بيانات المحافظات
محمد: تمام سيدي
مصعب: بأسرع وقت اريد تعرفلي خيط عنها
محمد :تأمر سيدي
اجاني اتصال من ام ايمن
مصعب: جاوبت بتعب تفضلي خيتي
خديجة : حسام وجوري يمك من العصر جوري اجتنا وجانت رايدة حسام واختفو بعد ماشفتهم رحت اجيب ماي طلعت للصالة مالكيتهم ثنينهم
مصعب: طفرت من مكاني
-شنوو حسام وجوري ويا بعض
-عقلي افتر والنار صعدت براسي اخذت موبايلي وطلعت ادور واتصل على حسام......

يتبع.....