YAN UBANCI

        🅿️1️⃣7️⃣⏩1️⃣8️⃣

  Wasu matane guda biyu da suka zo wucewa aka sa su kama Umma Kanden su shiga da ita cikin gida, dak'er suka kama ta dan sai tirtirjewa take tana fad'in

"Ba dai jikan Hamza bane"wannan Abu da take ta fad'a  shi ya sa mutane suka d'auka ko gamo ta yi.

  Ummi Ishalle suna d'aki suna tattaunawa akan wanda ya zo wurin Hindatu,dan daga Hindatun har Ummi Ishalle babu wanda ya san jikan Hamza ne, ya dai gabatar mata da sunansa da buk'atarsa kuma ya fad'a mata shi d'an asalin garin nan ne amma dai ba, a garin yake da zama ba.Itama kuma da ba,a garin take yanzu ba sai bata wani dameshi da tambaya ba ta  dai ji hankalinta ya kwanta dashi.

"Assalamu  Alaikum, ina Ishallen  maza fito k'anwarki ta yi  gamo "D'aya daga cikin matan ta fada tana wani rirrik'e Umma Kanden da karfi kamar za ta saka ta  a turun mahaukata. Ummi Ishalle ce ta fito da daga d'aki da saurinta jin abin da matar ke fad'a.

"Subhanallah Allah mai iko yanzu fa ta  fita  daga gidan nan, oh shi yasa ba,ason fita da magriba, musamman yara ma "ta karashe fuskarta da nuna alamar tausayawa.

"Ke dalla rufewa mutane baki, wane shegen ne ya ce na yi gamo, kuma ta ina muka had'a dangi da ita da za, a kirani da k'anwarta"Umma Kanden tace tana wani zare ido.

"Allah baki lafiya, yanzu muma fitowa muka yi domin zuwa  gidan Hamza za mu yi mu baiwa idanmu nama dan ganin motar nan da ake ta bada labari,mun zo wucewa mu ka ga maza sun taru ana cewa Kande ta yi gamo shine aka ce mu shigo da ita, gata nan idan Malam d'in ya shigo kya masa bayani dan suna cikin masallaci suna karatu"Matar d'aya ta fada.

  Hindatu da tun dazu take saurarensu ta kamo hanya ta fito daga d'aki,ai Kande na ganin Hindatun ta daddage k'arfinta ta hantsilar da matan nan ta tunkaro inda Hindatun ta ke, matan nan ganin ta yi kan Hindatu tana cewa "wlh yau sai dai wata ba ke ba sai na lahantaki karshe in zama ajalinki" wannan dalilin ne yasa matan suka k'ara bin ta suka rik'eta aikwa ta dage ta  naushesu  d'aya   a ciki d'aya a baya. Suma basu yi wata wata suka kai mata kamar yadda ta kai musu nan take dambe ya kaure Ummi Ishalle na k'ok'arin rabasu. Ana haka Malam Buba da labari ya iskeshi bayan ya fito daga masallaci  ya shigo gidan ya ga abin da ke faruwa, kafin a raba fadan Kande ta ci d'an uban duka. Malam ya dakatar dasu ya sallamesu dan said baya son sabgar mata amma Kande kullum bata rabuwa da neman fad'a, amma tsabar masifa da hassada da ke cin ta bata saduda da neman dukan Hindatu ba duk da ta ji jiki.

  Hindatu bayan Ummi Ishalle ta je ta lab'e ganin Kanden  da gaske za ta iya mata abin da ta ambata.Malam Buba ne ya ce

"Wlh kika tab'a yarinyar nan a bakin aurenki "Juyawa ta yi da mamaki take kallonshi  jin wai ita zai saki. Kuka ta fashe da tana jin kamar zuciyarta za ta fito tsabar bak'inciki  so take ta huce haushinta akan Hindatun  ko ta ji dama -dama.

"Haba Malam shin ka san me shegiyar yarinyar nan ta min da ka ke hanani dukanta, ko dan ba ni na haifeta bata shi...

"Rufe min baki ke dai wallahi na ga randa za ki yi  hankali, ace kin zauna a waje gaban maza kina bori kina kiran ba dai jikan Hamza bane, ke kullum sai kin zubar min da mutunci a garin nan yanzu dambe har cikin gida kamar wasu k'ananan yara"

"Haba Malam me yasa ba za ka goyi baya na ba,ace sabo da  tsabar munafinci da asiri ace duk k'asar waje  duk garin Kano ace jikan Hamza bai ga macen so ba sai Hindatu? ya d'akko dank'areriyar mota ya zo wurin wannan wacce ta yi kwantan, ita ba budurwa ba ita ba bazawara ba, amma ta samu saurayi kamar wannan wanda ko Ikilima bata samu irinsa ba"ta fad'i haka wani kukan takaici na taho mata.

"Subhanallah ke  dai Allah shiga lamuranki yanzu akan Ayuba  ya ce yana son Hindatu shine ki ke bak'inciki ni na yi mamakin  abin da  zai saki kuka ashe dai hassada ce da bak'incikin ace kirasa wa za ki yiwa hassada  sai yarki ke ba abin farinciki bane ace namiji kamar Ayuba ya ce yana son Hindatu  ba"Malam  Buba ya fad'a cike da takaici.