حنايا الخاطر(ليبية_منقولة)

الحلقة 14

🌸حنايا الخاطر 🌸
للكاتبة / 🌸مريم الشيخ 🌸
الحلقة الرابعة عشر ..

بعد سنة

غالية : نوضو يا بنات مونيا وهند كلموني واهو جايات فالطريق بيتغدو هما ورجالتهم
ندى : اااخ ياربي امتى نتزوج اني ونبدا انجي زيني زي البنوت
سارة تسمع فيها : هههههههههه زني ع راسه يروح تو تتزوجي
ندى : هو اني بطلت زنين واالله لين كرهني من كثر ماانزن وناضت من سريرها ايييه بالله خليني ساكتة هههههههه
سارة : خالتي فاطمة عيت وهي تقوله تزوج قبل ماتمشي نبي نشوف صغارك شي شي مباش يسمع كلامها.
ندى : تي عارفاته زي الرشادة راسه كاسح ماتقولش خوه سليم الله يرحمه ..

سارة قعمزت اضم في شعرها  الله يرحمه ويغفرله

هداية خشتلهم : اسمعو انا ضميت الجنان وسيقته والحوش ضماته ماما وحناي من بكري تعارك ..

سارة : اهو نايضين ياودي وخشت للحمام

ندى خشت للمطبخ حطت بكرج القهوة عالنار ودارت انفاص ليها و ساره .. عاد هدوكا بكرري فايقين و فاطرين

خشت غالية تحط فالغدي عالنار عاد تاني زيارة ليهم العرايس هند و مونيا

وخشت سارة خدت فنجان قهوة وقعمزت عالكرسي

ندى : تو بالله مش المفروض اني وسارة اللي جايات يام
غالية : هههههههه والله النصيب لا يفرق بين كبير ولا صغير زي الموت

ندى : ع سيرة الموت اولامس فايزة لما جت قالت بوي قاعد يخترف فالليل ويبي يعرف من قتل ولده

سارة : الله لا يردهم هدوكا الايامات موت علي الله يرحمه و طلاق مرت منير

غاليه : ماعييتوش من الهدرزة امبارح  للصبح نسمع في ضحكم هي نوضي يا نديوة جيبيلي غاز الشاهي من الكوجينة اللي برا وسارة ابدي فالمبطن امبطنك ماشاءالله ..

ندى توشوش في سارة : شوفي ماما كيف ادلع فينا تحسابنا متحسسين من خواتنا تزوجو قبلنا هههههه
سارة : تي ع اساس مش متحسسة
ندى ضربتها ع ضهرها : ههههههه والله ماصارت عالاقل اني امصبرة روحي كبدي عليك انتي حتى الدكتور ماصارلك منه وبوي شكله يخططلك في تخطيط جديد وطلعت ..

وسارة ناضت طلعت المفروم من الثلاجة وقعدت تخمم خطة شن اللي تتكلم عليها ندى زعمك ..

الحاجة خشت :  بالك تبو نعاونكم في حاجة بنياتي
سارة : لالا صحيتي يا حناي تعالي قعمزي هدرزي علينا بس
الحاجة : هونا منير فاق ونزل وتوله فطوره لابدا عنده خدمة

سارة  : اهو تو نوتيله اني هي
الحاجة : كلمتي سعاد يا غالية ؟؟
غالية : كلمتها قالت تو نجي
الحاجة : زعما مونيا تجي معاها ذهيبه والا بتجي بروحها هي ورفيقها
غالية : لا بتجي مونيا قالت من الاول قالت مش ماشية لين هي قعدت ااتنقرز عليها..
الحاجة : ومن بيلومها بالله فقدت الكبد تقعد والعه ماتنطفا
غالية : اي والله