🌸حنايا الخاطر 🌸
للكاتبة / 🌸مريم الشيخ 🌸
الحلقة الخامسة عشر ....
ركبو هما الزوز وصكر منير باب الشقة وخش وخلاها عالباب واقفه وخش للدار حط تلفونه ورمي الجاكيت تبعه وهي قاعدة واقفه
طلع من الدار لقاها قاعدة قدام الباب ومصدومه
منير وقف فالممر : خشي خيرك قاعدة واقفه عالباب
سارة خشت وماعرفتش كيف تتصرف
منير : خشي غيري حوايجك الدار فاضية قاعدة
وقعمز عالصالون وحط رجليه عالطاولة وقعد يتفرج ولا كأنه عريس
سارة مصدومه خشت للدار وسكرتها وقعمزت عالسرير مش مستوعبة ناضت وقفت عالمرايا تشبح لروحها وتتكلم : اوكي صح مش جميلة زي مرته الاولى بس مش خاصني شي علاش هكي تصرف معاي
منير مقعمز ويستنى فيها يبي يغير حوايجه ومضايق مش متقبل ولا مرا
سارة نحت القفطان وخدت روب ابيض طويل وفيه فتحه لفوق وسواريه لبساته ولبست الطرف التاني فوق ونحت التسريحه وخلاته مطلوق وخففت من الروج داراته هادي وحطت رايحه قنينة وطلعت
قعمزت بحدا منير
منير يبي يحاول يكون معاها طبيعي بس في شي داخله مش قادر
سارة : انديرلك شي تاكله
منير : لا عاد قداش بنتعشى مرة
سارة : امممم به قهوة والا نسكافي
منير : تلفتلها ملامحها جذابه نحى عيونه من عليها ع طول .. عادي ديري تو نشرب
ناضت سارة للمطبخ حطت القهوة عالنار وحطت يدها ع خدها عالرخامه : باهي مش ع اساس هو يبي قصدي علاش الحركات هادي وسارحه لين القهوة تبزعت عالغاز انخلعت نشفت القهووة وحطت حلو معاه وجابت السفرة لقاته مهناش
حطت السفرة ومشت جيهة الدار لقتها مسكرة طقطقت
منير : نعم
سارة : القهووة واتية
منير : انغير في حوايجي تو نطلع
سارة : اوكي .. ومشت قعمزت عالصالون تكلم في روحها تو بالله هادي ليلة عرس هيا
طلع منير لابس شورت أكحل وتيشرت مايل لاخضر الداكن
قعمز
سارة : تشبحله عاجبها هلبا شكله وليها فتره اتحس في شي ناحيته اعجاب والا حب تخلط عليها وزادت لما طلبها من عمها عاجبها كيف طريقة لبسه وانه واضح هلبا ومعاملته مع اهله وخواته
سارة : امم باهي شن تعشيت
منير يتفرج : تعشيت كسكسي مش مدايرين عشي لوطا هدذا اللي تعشيته
سارة : باهي علاش انفعلت
منير شبحلها ماانفعلتش عادي انجاوب فيك غير انتي متحسسة
سارة : انت صوتك هكي حسيته
خدي باكو االدخان وحط روقعد يدخن : لا هذا صوتي تعودي عليه
ناضت من بحداه وخشت للدار دموعها في عيونها وع طول نزلو وقعمزت قعدت تبكي
لوطا البنات يضحكو وفرحانات
مونيا : الحمدلله هذا وين تريحت ع سارة
ندى : ومش اي راحه هذا منير اللي بيطيرو عليه البنات كلهم وغزيل و واسلوب وجنتل ومن النوع اللي يدلع المرا غير واعر شوية بس
هند : صراحه اني انفضل الرجاله الواعرين انحسهم فيهم رجوله
مونيا : في اللي واعر عالغلط
هند : لا توا زي منير واعر فالشي اللي يستاهل بس الباقي تطلب عيونه يعطيهملها
هداية : اني نتوقعهم يسافرو برا
مودة : اسمعو راهو اني مش مسئوله عمتي غاللية وامي من بكري يعاركو يبوكم اضمو الحوسة
ندى : ايييي علينا لاحقين عليها
أنت تقرأ
حنايا الخاطر(ليبية_منقولة)
Action- ردبالك حلاوة الكلام ، تنسيك انه هدا مُجرد كلام💆🏻♀️🦦. ﮼حنايا،الخاطر👀💋. للكاتبة: ﮼مࢪيم،الشيخ👀💋. ؏ـشࢪوטּ حلقة👀💋. ﮼قراءة،جميلةة👀💋.
