حنايا الخاطر(ليبية_منقولة)

الحلقة 8

🌸حنايا الخاطر 🌸
للكاتبة / 🌸 مريم الشيخ 🌸
الحلقة الثامنة ....

ندى : مش عارفه بجد لتوا مافتحتش الموضوع مع سارة
باسم : لينا شهر نحكو مع بعض معقولة ما حستش بيك
ندى : سارة حتى لو حست ماتتكلمش من لما خوك توفى معادش عندها نيه في شي

باسم : اني علاقتي بيك مانبيهاش اطول عالتلفون زي ماقلتلك العيلة عاجبتني من لما خوي الله. يرحمه ناسبكم ..

ندى : ان شاءالله خير

باسم : غير حاليا اهلي قاعدين حازنين ع سليم الله يرحمه وحتى اني مانقدرش ناخد خطوة جدية فالوقت هذا
ندى : اصلا عندهم الحق عالاقل عام من حقهم

في دار البنات

سارة تمسح في دموعها وشادة يدين نبيله تصدقي اني قريب كل يوم نحلم بيه تصدقي اني استحشته هلبا اتصدقيني لو انقولك ياريتني شربت معاه هديكا الليله ومتنا مع بعض يا نبيله اني بنموت متقطعه غير انكابر ..

نبيله اضبطت سارة وقعدت تبكي : خلاص سرو توا ليه 5 شهور متوفي حاولي تنسي وتبدي حياتك من جديد مسحت دموع سارة وقالتلها : اسمعي اني بنخش دورة تمريض خاطري فيها شن رايك تخشي معاي عالاقل تنسي اللي انتي فيه توا ..

سارة : انتي فاش واني فاش يا نبيلة

خشت عليهم ندى
نبيله : بالله ندوش تعالي اقنعيها نبي انخش دورة تمريض نبيها تخش معاي
ندى قعمزت جنب سارة اي والله فكرة اطلعي من القوقعه اللي حاطة روحك فيها ..

سارة تشبح لندى .. قوقعه ؟؟ اني عادراتك لانك مش في مكاني مش حاسة باللي حاسة بيه ..

ندى : كيف مش حاسة ؟؟
نبيلة : بالله خلاص سكرو الموضوع فكونا من العراك سرورة فكري وغدوة قوليلي باش انسجلك معاي

عبدو حاط يديه في جيوبه :  كيف كيف انتي من قالك الكلام هذا؟؟

هند : توا كنت نسمع في بابا وماما وهما يتكلمو
عبدو : تي البنت قاعدة مصدومه وهما يدورولها في عريس والله بوي كان يهني روحه بس و يخلي البنت في حالها ..
هند : هو تبي الحق راهو حل يا ناري
عبدو : والنبي ضمي فمك وينها امي
هند : داخل
خش عبدو لقاهم مقعمزين
عبدو : خير يا بوي شن حالك
مفتاح : الحمدلله
عبدو : حق اللي سمعته ؟؟

مفتاح : شنو اللي سمعته

وغاليه تعض في شواربها و تغمز ل عبدو ماتبيشي يناقش بوه

غاليه : انصبلك طاسه شاهي عبودة ؟؟

عبدو : اني ننشد خيرك تغيري فالموضوع يما

مفتاح : انشد خيرك
عبدو : حق تبي منير ياخد  سارة
مفتاح : وانت مالك وماله
عبدو : اني ننشد شن حرام النشدة ومقعمز نص ركبه.. والحاج مفتاح طارتله حس ان ولده يستجوب فيه قعمز بعد ماكان متكي  ..

مفتاح : اي بنزوجهم لبعضهم شن عندك قداي ..

عبدو : يا بوي البنت قاعدة مصدومه قصدي حرام عليكم اللي اديرو فيه خلوها في حالها ..