حنايا الخاطر(ليبية_منقولة)

الحلقة 7

🌸حنايا الخاطر 🌸
للكاتبة / 🌸مريم الشيخ 🌸
الحلقة السابعة ..

كلنا نعرفو ان في فترة صارت حادثة الخمر " السكير"
المغشوش او بالاحرى المسموم و راحت ضحية هاللعبة القذرة عشرات الناس .. حتى لو الشي هذا غلط مش احني اللي نحاسبو البشر في رب فوقهم يشوف ويحاسب كل حد ع اخطاءه ..  ماكانش المفروض تصير هالجريمة البشعة .. ربي يرحم اللي مات من تحت الشي هذا وربي يغفرلهم خطاياهم ...

_____________________________________

سارة طاحت ع رجليها مصدومة

وعمك مفتاح شادها من كتافها بالقوية من حرارة الموقف..

المبروك ايدف فالدكتور : شن تقول يا دكتور تي وين العريس وين السلطان الليلة عرسه راهو ياناااااااس عريس راااهو وطاح من طوله اغمى عليه وقعد
الدكتور ينادي فالممرضات..
والناس التمت كلها عليهم
وباسم خو سليم يكسر في مرش المستشفى ويعيط واولاد عمه ايهدو فيه ياناري عندهم الحق يهبلو ..

وعبدو ومنير وجعتهم بنت عمهم قعدو واقفين يشبحولها وهيا جامده وخلاص دموع في عيونها بس صوت مافيش وعمها مضبطها ويصبر فيها
..
عبدو يشرين  تلفونه وحاط يده ع راسه : نعم يام وصوته مخنوق

غالية :شن صار وليدي طمني ..

عبدو : الراجل توفى يما وبوي ياخد ويوصي قاللكم دوشة هلبة مانبيش الناس تنخلع نص ليل توا..

غالية : تعيط ياغبارتي السودا ياناري  ع بنيتي اعريس ياناري خيره مناش مات شن اللي قتله قولي يا عبدو قول ..

ندى تخبط في خدودها من مات يام ماتقوليش سليم
غالية تعيط سليم اي ..

مونيا تعيطها عيطة لين الجيران فاقو وغالية تسكت فيها مونيا اتنقز ووووك عليا اوخيتي ياحللليييلي ماعندكش حظ ياناري ع سليم اللي راح في عز شبابه في ليلة عرسه ..

والحاجة تبكي ع بنية ولدها وتشلى .. والجيران التمو اللي يسمع ايجي ..

فالمستشفى..
مفتاح : نوضي بنيتي  نوضي خلي انروح بيك
سارة ولا صوت ولا عيطة : ارفعني لحوش اهل سليم يا بوي ..

مفتاح : باهي غير نوضي هي وشادلها يدها وعبدو يسند فيها ومنير يتفرج مش قادر يديرلها شي
تمشي بصعوبة ياناري راهو واعره اعريسة في ليلة عرسها يموت راجلها ..

في حوش اهل سليم

فاطمة قريب توصل السقف و امل اتنقز واتريش مش مصدقات كانو في الصالة وعرس كان قايم وانقلب عزي والناس اللي هذا مش مصدق ونبيلة من.جيهة ولد خالتها ومن جيهة صاحبتها تبكي وصايرة فيهم حالة ..

####
مفتاح خطم ع حوشه ما يبيش بنته تمشي بروحها خش لقي الحوش يملى ويفرغ وعزي راسم عندهم حتى هما الجيران اللي يسمع يجي
مفتاح ينادي : هند ترا  بري نادي امك فيسع

جت غالية ترعش ياناري من الكارثة اللي صارت : تبكي انعم يا حاج

مفتاح : مش قلتلكم دوشة مانبيش ولاه اعلاش الناس تخلعو فيهم في انصافات الليل ..

غالية : امالا شن تبينا نسكتو يا حلييييلي وجعنا الراجل و وجعتنا سويرة وينها سارة توا يا روحي عليها وتخبط في خدودها ..