شيييييير بنات لكل حلقة
🌸حنايا الخاطر 🌸
للكاتبة / 🌸مريم الشيخ 🌸
الحلقة الرابعة ...
بعد اسبوعين ...
فاقت سارة تشبح لتلفونها لقت مسج ..
صباح الحب يا عمري يا مراتي اليوم فاتحتنا والا انسيتي نوضي يلا بلا كسل
سارة نطت من مكانها واتمتم يااااااربي احلى يوم في حياتي بس ناقص بابا وماما ياريتكم بجنبي توا ياريتك ماما لبستيني البودري بيديك وتمسح في دموعها ع خشة غالية ..
___
غالية .... شن بنيتي علاش تبكي اليوم بتنقرا فاتحتك
سارة .... شي غير تفكرت بوي وامي يا عميمة وانهمرت بالبكي قدمت غالية وحضنتها وقعدت تبكي معاها
غالية .... ابكي كان البكي يريحك لكن والله بوك وامك مرتاحين في قبرهم وحاسين بيك كيف فرحانه سلم بنيتي مااتنكديش ع روحك تو تشبحك اوخيتك تتنكد حتى هيا .
سارة تمسح في دموعها وينهم البنات امالا ؟؟
غالية ... البنات يغلفو في حاجات الفاتحة هي وراس بنيتي اغسلي وجهك واطلعي حتى عماتك برا وكل مرة ايخش حد يسال عليك ..
سارة : حاضر هي غير ناديلي ندى خلها تلبسني الردي عارفاتك مش فاضية عميمة
غالية : حاضر هي تو اناديهالك و وشوشتها في ودنها باللها عليك سويرة قوليلخا مانبيش عرايك بينها وبين بنت عمها من بكري كلمة بكلمة هي وياها
سارة : هههههه حاضر تو نكلمها المفعوصة هادي ماااتوب من عركة بوي ليها
غالية : لسانها طويل .. ضحكت وطلعت
ع طول سارة خدت التلفون واتصلت ب سليم
سليم : ياااااا صباح الورد يا وردتي
سارة : حبيبي انت صباح الفل يا غالي
سليم : اسمعي تلفوني حنسكره لعند غدوة ايوه
سارة : تبي انموت امالا
سليم : تحبيني سارة ؟؟
سارة تلفتت للمرايا وتنهدت اي انحبك امالا شن
سليم : اهو شوي تاني تبدي مراتي يا غالية
سارة : ربي ما يحرمنا من بعض
خشت ندى بقوه
ندى : تراااا را را شن شن يا يابتي ممنوع ره الوحدة تكلم خطيبها قبل ما يتزوجو تحشمي وسكري
سارة اتفنص فيها وتضحك : باهي حبيبي بعدين انكلمك
سليم :طمنيني عليك كل شوية اه ايوه
سارة : حاضر حبيبي يلا في امان الله
سليم : انحبك .. سلام
ندى تضبط في سارة : تحبيه هلبه سرو
سارة قعمزت عاللسرير تصدقي لو قلتلك مش عارفه
ندى : كيف ؟؟
سارة : مش عارفه بجدد لما نحكي معاه نبدا فرحانه ولما انسكر نبي نعاودله ونستاحش فيه وقلبي يرقص لما انشوفه ممكن حبيت خوفه عليا وحسيته هكي سند ليا بما ان بابا متوفي وخوت ماعنديش .. بس في احساس خوف مش عارفه كيف نوصفه يعني مش مرتاحه
ندى : سرو نزعل منك ره امالا عبدو ومنير شن وبابا اللي يحبك اكثر حتى منا احني وبعدين شن خوف ماخوف ياسر من التشاؤم
سارة : ماااتفهميش غلط والله عمي من كثر ماانحبه معوضني عن حنان الاب وعمتي غالية وانتم بس في نقص في حياتي ندى
ندى : فاهمه عليك والله حبيبتي ربي يبعتلك ايام حلوة لين تنسينا حتى احني
ندى : به به غير نوضي هيا انلبسلك البودري
فالصالة البنات ايوتو والمنظومة رابخة وهداك الغني والحاجة عاد ترقص ع رجل وحدة فرحانه ببنية ولدها و ذهيبة عيت وهي تلوي ع هديكا المنظومة و النساوين يوتو للقفة اللي بتجي وكل حد لاهي بحاله
أنت تقرأ
حنايا الخاطر(ليبية_منقولة)
Action- ردبالك حلاوة الكلام ، تنسيك انه هدا مُجرد كلام💆🏻♀️🦦. ﮼حنايا،الخاطر👀💋. للكاتبة: ﮼مࢪيم،الشيخ👀💋. ؏ـشࢪوטּ حلقة👀💋. ﮼قراءة،جميلةة👀💋.
