أسرار العيون

1

بارت واحد تاريخ 7/2
تكبت هاذا السطر وانا احتسي كوب من القهوه السوداء استمتع ايها القارئ بكوب من الشاهي الأحمر او كوب من القهوه لاجل التركيز

في صباح تحديد حايل تتواجد عائلة هاديه ويتناقشون
بيت ابو الذيب الصراخ الي كل صباح لازم يصير قبل مايروح كل واحد لدوامه
الذيب يصرخ بصوت عالي : امجد وينك قسم اعيد اربيك
ابو ذيب يضرب ذيب بعصاته : تربي مين ابو ميت عشان تربيه
قرب الذيب وهو يتالم ويضحك حب راس ابوه وهو يقول: محشون يالغالي ولله يطول بعمرك
قربت ام ذيب وهي تضحك قالت: يلا كلكم جهز الفطور
قام هتان من النوم وهو يمسح عيونه: ياعيال عايض ماتخلون الواحد ينام زي العالم وش ذا البيت المزعج
كان يتكلم وقدامه اخوانه بس مايدري ان ابوه وراه وتجيه ضربه علي كتفه من عصا ابوه وهو يقول: يالي ماتستحي علي وجهك ولا تنتخي تقول ذا الكلام وابوك موجود
انصدم هتان من ابو وهو يقرب ويبوس راسه ويقول:معليش يا القائد مادريت انك موجود
ويطالع باخوانه الي طاحو ضحك عليه تكلم الابو وهو جالس ياكل مع عياله قال: اخخخ ياليلى اشتقت لفيصل سنوات وانا ماشفته
دمعة يوم ليلى وهي تتذكر موت اختها ساره وولدها حمد: الله يلوم الي يلومه بعد الي صار محد راضي يصدق
تكلم تميم: يبه وش قصة عمي فيصل؟
كل عياله ركزو يبون يسمعون القصه
تكلم ابو ذيب وهو ماسك دموعه يقول: قبل سنوات اخوي فيصل اخذ خالتكم ساره يحبها وجابو حمد وملاك واسرار وسهام هذاك اليوم طلعو حمد وساره وصار لهم حادث كانو بناتها صغار اول ماجانا خبر انصدمنا وطرنا للمستشفى مستحيل انسى وجه فيصل طول حياتي
قال ذيب: كمل يبه
كمل ابوه وقال: بعد اسبوع جانا خبر موت حمد وبعد يوم موت ساره فيصل ماصدق وجلس ايام وهو منصدم كان يحاول يتعايش مع بناته وحاول ينسى بس ماقدر وقال بيسافر برا حايل وراح لندن من هذاك اليوم وهو مختفي
رد تميم وهو يقول : وش صار علي الي تسبب ب الحادث
والكل صار يسال ابوه
رد ابو ذيب قال: تنازل عنه
الكل منصدم و قالو: كيففففف
قال ابوهم: تدرون الي يومكم هاذا مدري ليش
قال أمجد: طيب يبه بناته معاه صح ليش اخذهم ليش ماخلاهم هنا
رد ابوه : عشان مايبيهم يتذكرون اوجاعهم ولا الي صار معاهم
قامت ليلى من علي الاكل وهي تبكي علي حال اختها وبناتها
كانو بيلحقونها عيالها بس مسكهم ابوهم قال: يلا كل واحد الي دوامه انا بشوف امكم
سكتو وكل واحد متجه لدوامه
قام ابو ذيب وراح عند ليلى ‏حضنها وهو يقول: تعوذي من ابليس ياليلى خلاص هاذي الدنياء ادعي لهم  ب الرحمه
قالت ليلى وهي تبكي: الله يرحمهم بس يا عايض قاعده افكر ببنات اختي كل هاذي السنوات وانا افكر مو قادره انسى متي يرجعون مقدر اتحمل بدونهم هذولا امانه من امهم عندي
قال عايض وهو يمسح دموعه: الله يرجعهم ب السلامه
قالت ليلى:امين
فجاة دخلو عيالها ذيب وامجد وتميم وهتان وابراهيم وهم يغنون:هيله يارمانه هيله يارمانه والحلوين زعلانين والحلوين زعلانين مين يراضيهم
ضحكو عايض وليلى علي عيالهم
قال ابو ذيب: ليش مارحتو يلا روحو قبل تتاخرون
قال ابراهيم: الله يا الدنياء تطردنا عشان ليلى
قال عايض: واجحذكم بريال عشان ليلى
ضحكو وهم يطلون وكل واحد علي دوامه
______________________________
بيت ابو محمد قابل
كانو يفطرون تحت ضحكاتهم ومزحهم مع بعض
دخل ابو محمد وهو يقول: ازعجتونا اسكتو
سكتو كلهم وكل شوي واحد يقوم من الطاوله لين فضة كلها
قالت ام محمد: استانست بعد ماخربت صباحهم خليهم يسولفون
سكت ابو محمد لانه عارف غلطه
قام و راح عند كل واحد من عياله ومسكهم قبل يروحون دواماتهم وجلستهم علي الطاوله
وهو يقول: يلا كملو فطورك وسولفو علي
انصدموا كلهم علي تغير ابوهم فجاة
صارو يسولفون ويضحكون وابو محمد يسمع سوالفه ويضحك
قال يوسف: يمه عندك اخت اسمها ساره
انصدمت نوره من سواله و قابل صدمته اكثر
قامت نوره وهي تبكي انصدمو عيالها قال ابو محمد: بقولكم قصتهم
قال القصه كامل الكل انصدم محد مصدق كلهم راحو عند امهم الي تبكي بحرقه علي اختها وبناتها
قال ابو محمد : يلا يلا الكل لدوامه
راحو كلهم وقرب لساره جلس جنبها وكان ساكت سندت ساره راسها علي كتف قابل وهي تبكي من قلب قالت: مدري وينهم اشتقت لهم ياقابل اشتقت ل ساره
انصدم قابل انها حاطه راسها علي كتفه بس قال وهو يحط يده علي كتفها وهو يحضنها : تعوذي من ابليس
جلست تبكي وهو بحظنه بس مايدرون علي العيون الي تراقبهم بصدمه
قالت وتين وعيونها شوي وتطلع من مكانها: متاكدين ذا ابوكم
ردم كلهم وقالو لا
محمد: اشك انه مسحور اول مره بحياتي اشوفه كذا لا ويحضن امي
سيف قال: انا اقول كذا بعد شكله مسحور
رد يوسف: افكر اروح اخرب عليهم
مسكوه وهو يضحك وطلعو كل واحد لدوامه ويدعون ان الله يخليهم لبعض
_________________________________
بيت ابو فواز
كان يهاوش وناوي يضرب فواز بس وهج وفايزه ماسكينه ويفرقون بينهم
قال ابو فواز وهو يصارخ: تعال ياحيوان تدخن يا الكلب
فواز وهو شوي بيغمى عليه بس ماسكته وهج قال: يبه توبه وربي توبه خلاص طابت النفس منه
قال ابو فواز : ليش يالكلب ناوي تطيب النفس عشان تشرب المرض
ركض فواز اول ما احس انه امه ماسكه ابوه وهو يركض برا الحوش بيهج لدوامه كان ناوي ابو فواز يركض وراه بس مسكوه
قالت وهج : خلاص يبه تعوذ من ابليس بيتوب خلاص
قالت ام فواز: بغيت تذبحه يارجال
رد وهو كان يشرب ماء تركه : يعنى تبيني اشوفه يشرب ذا السم واسكت انا بغيت اموت منه تبيني اخلي ولدي يشربه
ردت ام فواز: ادري والله ادري بس بتفاهم مو ضرب الحين بيعاندك وبيشربه امسكه بعدين وتفاهم معاه بهدوء
سكت ابو فواز وحس عنه غلطان وقرر بليل يتفاهم مع ولده عشان يعرف ليش يشربه
______________________________
في هذاك البيت الي مليان حقد وكره
صرخة ام وائل وهي تتهاوش مع ابو وائل
قال: انا ندمان اني تزوجت وحده مثلك حقوده وحسوده بناتك صارو نفسك
ردت قالت: طلقني اجل انا الي ندمانه اني تزوجتك ومافي احسن من بناتي
سكتو عيالهم وهم ياكلون وكل واحد راح دوامه تعودو  علي هواش اهلهم كل صباح
_________________________________________________________
في مكان بعيد جدًا تحديد لندن كان في بيت دافي مليان حب
قال ابو حمد وهو يسوي فطور لبناته: يلا ياحلوات بيجيكم اطلق فطور
قربو بناته ملاك و اسرار وسهام وهم يحضنون ابوهم الي ماحسسهم ب النقص او فقدان الام كان ابوهم وامهم واخوهم وصديقهم كان يخليهم يسوون الي يبون واثق فيهم كانو بناته مستحيل مايقولون له كل مشاكلهم كان يعطيهم حلول ويساعدهم بدراستهم وبكل شي بحياتهم مستحيل يخبون علي ابوهم شي
جلسو وقامو ياكلون ويضحكون من قلب سكتو فجاة وهم يتذكرون اخوهم وامهم الي ماتو كانو شوي ويبكون بس ابوهم قال وهو يمازحهم وهو هموم الدنياء علي صدره: ماودكم كل وحده تروح للجامعه حقتها برتاح منكم آبي هدوء
ضحكو البنات قالت ملاك: افااا يبه ماتبيني انا مو ملاكك توقعتها من بناتك بس ماتوقعتها منك
ضحكو قالت اسرار: ماش ابونا مايبينا شكله قريب بيطردنا من البيت
ضحكو كلهم قالت سهام: بكرا اصير محاميه وارفع عليكم قضيه بحقوق الطفل
كلهم ضحكو عليها وقال ابوهم : انا الي برفع قضيه عليكم يلا يلا لا تتاخرون عن للجامعه
تقدمو البنات ويسلمون علي ابوهم طلعو وكل وحده اخذت سيارتها وكل وحده علي جامعتها
سكت فيصل وهو يحس انه بينهار وهو للحين ما استوعب فكره موت زوجته وولده
قام وراح يصلي وهو يبكي ويدعي ربه عشان يرتاح من الهم الي عليه وقرر انه يكلم عضيده واخوه عايض ابو ذيب اخذ الجوال ودق عليه
كان ابو ذيب جالس ب صالة بيتهم وهو مستغرب من الرقم الي يدق عليه قرر يرد وقال: مين معاي
رد فيصل: افااا ياخوي نسيتني
انصدم عايض وهو يحس بيغمى عليه قال: فيصل!!! وينك مختفي وينك كل هاذي السنين
رد فيصل وهو يبكي: ياخوي تعبت مو مستوعب للحين الي صار الهموم علي صدري كل مالها وتزيد
رد عايض: افااا وانا اخوك اشيل همومك الي  بصدرك واحطها بصدري بس ارجع
فيصل قال:مقدر ياخوي بناتي كبرو وكل وحده بالجامعه ومقدر اخليهم
رد عايض: تعال وجب بناتك يكملون دراستهم عندي ابي اشوفهم يكبرون قدامي كافي عمري الي راح وانا ماشفتهم بناتي هذولا
فيصل قال: اخاف اجي واجيبهم ويتذكرون الي صار لهم تعبت سنوات وانا احاول اخليهم ينسون
قال عايض: مستحيل ينسون وانا اخوك اسمع انا ‏بنظف بيتك الي قدام بيتي يا الجار وانتظر ذلك لليوم الي اشوفك تطلع منه
رد فيصل: والله اشتقت لك ياخوي ماكنت اقدر اكلمك واكلم اخواني وانا بهاذي الحاله
رد عايض: معذور وانا اخوك شخبارك وشخبار بناتي
ضحك فيصل وقال: الحين بناتي صارو بناتك ماعليه البنات كلهم بخير وانا مدري اذا بخير ولا لا
تنهد عايض وهو يقول: انتظرك وانتظر اليوم الي اشوفك فيه
جلسو يسولفون ساعات وقفلو من بعض
_____________________________
هذاك اليوم يصادف يوم الخميس يعنى تجمع العائله عند ابو الذيب
تجمعو الحريم الا ام وائل وبناتها ماجو الرجال كلهم كانو موجودين بمجلس ابو ذيب سوالف وضحك
قال ابو ذيب بصوت عالي: فيصل كلمني اليوم
الكل انصدم خاصة ابو محمد وابو فواز اخوانه وصارو يركضون عند ابو الذيب ويسالون وش صار
جلس يقول وش صار ب المكالمه والكل حزن علي حالهم ويدعون انه يرجع باسرع وقت
_____________________________
جلس ابو حمد فيصل يفكر بكلام اخوه عايض انه يرجع بس كيف وبناته تعودو علي العيشه هنا وكيف ردت فعلهم اذا راحو هناك واذا تذكرو الي صار بامهم واخوهم
________________________
في بيت ابو الذيب بليل كانو عياله متجمعين مع بعض يسولفون
تميم: ياعيال تتوقعون يرجع عمي فيصل
رد هتان: ما اتوقع اذا بيرجع ما اتوقع بيجيب بناته
الذيب كان بعالم ثاني يحاول يتذكر بنات عمه حمد فجاة ضربه امجد براسه وهو يضحك
امجد وهو يضحك: ياخوي وينك تهوجس
ضحكو العيال قال الذيب: قاعد احاول اتذكر بناته بس ماش
رد تميم وهو يضحك: تبي تتزوج وحده منهم
ضحكو علي وجه الذيب الي انصدم وقام معصب وناوي يضرب تميم
وصارو العيال يفرقون مابينهم وتميم يضحك وخايف من اخوه بس دقايق سمعو صراخ ابوهم
الكل جاه هبوط ونامو فوق بعض داخل ابو الذيب وهو معصب ويشوفهم نايمين قرب من ابراهيم
وضرب كتفه قام وهو يسب الي ضربه اول مارفع راسه كان ابوه من الخوف حس مايقدر يوقف علي رجوله ابو ذيب: انا تسبني يا السلوقي
قرب ابراهيم من ابوه ويبوس راسه: معليش يبه احسبك واحد من العيال اعذرني
ولف شاف اخوانه ميتين ضحك وطايحين علي بعض كان منقهر منهم
قال ابو ذيب: يلا نامو عشان نصلي الفجر ب المسجد وتلحقون علي دواماتكم
كل واحد اتجه لغرفته ونام الا ذيب الي كان للحين يحاول يتكر عمه فيصل وبناته لين سرقة عيون النوم ونام
________________
في بيت ابو فواز
فواز كان متعمد يجي متاخر عشان ابوه مايضربه اول مادخل حس ان البيت نايم قرب بيطلع للدرج سمع
صوت ابوه وحس قبله بيوقف
ابو فواز: فواز تعال بكلمك
قرب فواز وهو خايف وجلس قدام ابوه
تكلم ابو فواز: مين الي علمك علي هاذا المرض
سكت فواز وهو منحرج من نفسه وعلي الي سواه
كمل ابو فواز: شوف انا مراح اتحكم فيك انت كبير ورجال وتعرف مصلحتك بس لا تطيح فيه ياولدي
هذا مرض
قرب فواز من ابوه وهو يبوس راسه ويقول:خلاص يبه وعد بحاول اتكره بس لا تزعل علي
ابتسم ابو فواز وهو يدعي له
———————————-
في مكان بعيد كانت عايلة ابو حمد
البنات جالسين مع بعض ويسولفون
اسرار: يالله يابنات خلاص تعبت من الجامعه متي نخلص
ردت ملاك وهي تضحك: وراك مشوار طويل ياحلوه
كانت سهام بعالم ثاني كانت تقرأ كتابها وهي مركزه
اسرار: سهام بسم الله عليك ارتاحي تعبت بدالك
لفت سهام لها وهي تنزل ‏نظارة القراءة حقتها نظرتها بقرف وهي تقول: هذا ثقافه ياجاهله انتي وياها
ضحكو البنت عليها قامت ملاك وهي ناويه تكمل الرسمه حقتها
ردت اسرار: يلا خذلك اخت عيونها طارت ب الكتب والثانيه ناويه ترسم وانا وش اسوي
قربو ملاك و سهام من اسرار وهم يدغدغوها وصوت ضحكاتهم ماليه البيت
دخل ابوهم وهو يضحك عليهم وقال: يلا يلا اتركو بنتي ونامو وراكم جامعه بكرا
قربو البنات من ابوهم وكل وحده تبوس راسه وراحو لغرفهم
جلس ابو حمد وهو يفكر ببناته والمستقبل المجهول وكلام اخوه عايض

انتهيت من كتابه هاذا السطور اتمنى ان تعجبكم روايتي الاوله وهل من الممكن ان استمر فيها
هل هاذا السطور ملهمة لبعضكم؟
اشكرك عزيزي القاري لآنك وصلت الي هنا.