#زهرة_فؤادي1
مها حولي الزاكي
بعد ما الحفله خلصت ، ساقوني عشان أجهز نفسي للجرتق ، لبست فستان أحمر لا طويل لا قصير و فوق ليهو التوب ، بعدها أختي و بنات أهلي و رتاج صحبتي ظبطوا لي المكياج و لبسوني إكسسوارات غير الكنت لابساهم مع الزفاف ، بعدها ختوا لي الجدله و الطاقيه الذهبيه و بخروني و بخروا لي شعري ، قلت ليهم ماف رجال حـ يحضروا الجرتق دا صح ؟؟ رشا أختي قالت لي ايوه عشان حيكون في رقيص عروس و كدا ، قلت ليها شنووو !! جنيتي انتِ !؟ أنا مش قلت ليكم ما عايزا رقيص عروس و العباطه دي كلها ! رتاج قالت لي و نحنا كنا بندرب فيك و نرقص معاك عشان شنو قايله !؟
قلت ليها أنا كلمتكم و قلت ليكم لو عايزين ترقصوا أرقصوا ساي و أنا ذاتي برقص معاكم لكن دا كلو ما بعملوا يوم الجرتق و إنتوا عارفين كويس إني رافضه الحاجه دي بس استمريتوا و عملتوا رايحين نظام عايزين تختوني أمام الأمر الواقع و كدا هه ، رتاج قالت لي والله العظيم ماف راجل يا مها غير ناصر و المعازيم ذاتهم معظمهم مشوا بعد ما الحفله خلصت ، قلت ليها بغض النظر عن منو الحيحضر الجرتق أنا ما حأرقص و إنتهينا ...قعدوا يحنسوا فيني مسافه و أنا في موقفي ، في الآخر قنعوا مني ، رتاج قالت لي بيييس عليك !! هسي لو رقصتي مالك !!؟ قلت ليها ما عايزا و إنتهينا ....
أنا ما بجامل و خالص ما بعمل حاجه ما بحبها أو بحسها ما بتناسبني ، المهم غطوني بالقرمصيص و طلعوا بي الصاله ، طبعاً وشي كان مغطى بس هم قايدني لحد ما قعدوني في سرير عليهو قطعة حرير ، أول ما قعدت هم بدوا يزغردوا و يغنوا ، رتاج قالت ليهو افتح ليها وشها يا ناصر ، لمن رفع القرمصيص عن وشي ياداب إتنفست كويس لأني كنت حاسه نفسي كاتم و متضايقه شديد من الحاجات اللابساها دي ....بعدها بدوا البنات يغنوا و يصفقوا ، قلت افففف متين يخلص دا كلو ، ناصر كان سامعني قرب مني و قال لي شي طبيعي تضايقي لأنك ما بتستحملي فكرة انك تكوني أنثى لدقيقه واحده بس .... طبعاً غاظني كيف ، قلت ليهو مش أنثى ليك انت دا !؟ طبيعي اتضايق ، إبتسم و قال لي أنا ما محتاجك والله ، أنا في 1000 بت بتتمناني قلت ليهو و للأسف كلهم شدة ما مسخوتات وحده منهم دعوتها استجابت و بقيت نصيبها ماف ، قال لي ايوه حاجه بتحير لكن انتِ شكلك قُمتي لي الليل عديل ، قلت ليهو ههه ما تتظارف ، قادر تتخيل اني ممكن اقطع نومتي و أصحى في الثلث الأخير من الليل عشان أدعي انك تكون نصيبي ؟!😂😭
قبل ما يقول حاجه جابوا لينا كبايتين لبن ، هو مسك كبايه و أنا مسكت كبايه ، قال لي بصوت واطي العاده دي بالذات أنا ما بحبها عشان كدا حأشرب اللبن طوالي و اعمل رايح و اقول ليهم إتأخرنا ، قلت ليهو احسن ذاتو أنا ما ناقصه رش بالبن ، المهم هو طوالي شرب من اللبن و أنا قايلاهو حـ يبلعو و كنت متطمنه إنو ما حـ يرشني بس فجأه أحس ليك بكميه كبيره من اللبن على وشي لمن إتخلعت و كلهم قعدوا يضحكوا فيني و هو كان متكيف شديد!!....بقيت منططه عيوني و أنا مخلوعه !!...رتاج قالت لي طوالي إتسدي حقك يا ميمي ..يلا أشربي من اللبن ...ولا كذبت الكبايه كلها دفقتها فيهو في كسر من الثانيه لمن هو اتخلع لأنو كان مفتكر إني حأشرب بقه بس من الحليب و ما حأقدر أرشو بيها بس فاجأتو لمن رشيتو بالكبايه كلها .... طبعاً الناس ماتت من الضحك ، قايلننا بنهظرر و مبسوطين ، خالتي سارا قالت ليهم بتنا و حقها ما بتخليهو ، أم ناصر يلي هي فريده قالت ليها ولدنا ذاااتو ما هين لكن هي غفلتو ، وحده من بنات أهلو قالت ليهو أعمل حسابك من هسي يا دودي ، طبعاً لمن قالت ليهو دودي عاينت ليهو بشماااته كدا نظام طول و عرض تقول ليك دودي ! و علاقة دودي بإسم ناصر شنو !!!طبعاً هو فهمني ، قال ليها لا لا ما تخافي يا هيفاء و طوالي عاين لي بنظرة تحدي ...
.المهم كملنا كل المراسم و بعدها جا وقت إننا نمشي ، في اللحظات ديك الرجال جوا و أساساً أنا خلاص غطيت نفسي و شعري ، أبوي أخد ناصر على جنب كدا و بقى يتكلم معاهو و أنا هنا حبوبه بتوصي فيني ساي ، أمي قالت ليها بنات الزمن ديل ما بحتاجوا توصيه يا أمي ، خالتي سارا قالت ليها ما محتاجه لأنو ناس رتاج ما قصروا ، رتاج قالت ليها في حاجات زي دي نهاي ما بنقصر 🙈
المهم كلهم طلعوا معانا برا الصاله ، لحد ما وصلنا العربيه ، طول المسافه دي رتاج كانت شغاله لي بصوت واطي : انتِ ما عايزا تبكي ولا شنو !؟ قلت ليها أبكي ليه ؟ قالت لي حيييا أنا منك و بقت تقرص فيني ، قالت لي خلي عندك إحساس شويه هسي حـ يقولوا انك شفقانه شديد و طايره السما عشان كدا ما بكيتي ، قلت ليها وااااي أنا منك ، أجيب دموع من وين يعني !...قالت لي من السوق ، قلت ليها ياخ ما تقرصي و أنا ما عايزا أبكي ، أجي!!
طبعاً مع جملتي دي ناصر إتلفت علي و هو شغال يبشر للمعاهو و أنا و رتاج كنا بنتهامس ، أمي قالت لي رتاج دي إلا تسوقيها معاك ، رتاج قالت ليها بري يا خالتو راجل و مرتو البوديني معاهم شنو 🙈
المهم ودعناهم و ركبنا ، ناصر هو الكان سايق ، لمن إتحركنا طوالي بديت أقلع في الإكسسوارات ، بعدها قلعت الهيلز و ختيتو ورا و كمان القرمصيص و خاتم الأنف و الجدله و الطاقيه الذهبيه كووولهم طلعتهم ، ناصر قال لي ماف داعي للشفقه ، قلت ليهو سوق سواقتك....بعد طلعت الهشك الكنت لابساهو دا كلو ياداب قدرت أتنفس كويس ، ما باقي لي تاني إلا التوب أقلعو و أرتاح ، بعدها بقيت أتهبب ساي و اتأفأف و هو عامل نفسو ما شايفني ، قلت ليهو ياخ عربيتك دي ما فيها تكييف ! قال لي أنا بردان عشان كدا ما حأفتحو ، قلت ليهو برد ؟؟ جادي انت ؟ قال لي ايوه جادي ، قلت ليهو ايوه عشان انت ما كنت لابس البلاوي الأنا كنت لابساها دي ، واااي أنا من السخانه ، ياخ افتحو و ريحنا !!
شغل التكييف و قال لي مفروض ما أفتحو عقاباً ليك بسبب كباية اللبن الدفقتيها فيني !! قلت ليهو تستاهل لأنو انت البديت الخساسه دي ....ما رد علي تاني ، ركز بس مع سواقتو ، فتحت تلفوني و دخلت التيك توك ، و أنا بشوف فيهو كدا فجأه ظهر لي فيديو لـ ناصر و معاهو 3 بنات في مطعم ، لفت التلفون عليهو و قلت ليهو فراشاتك حـ يفقدوك ، قال لي كيف ؟؟
قلت ليهو عشان عرست و حـ تنشغل عنهم ، ضحك و قال لي أنشغل عنهم بشنو ؟؟ ما تقولي لي بيك إنتِ ؟؟
طبعاً حسيتو أحرجني الحيوان فـ طوالي سكته و بقيت أشوف في باقي الفيديوهات لحد ما وصلنا بيتو ، لمن نزلنا هو دخل طوالي و أنا وقفت أتلفت و أعاين ساي بعدها دخلت طبعاً ما عرفتو مشى وين ، مشيت فوق و أول غرفه لاقتني دخلت فيها ، لقيتو راقد و بتكلم بالتلفون ، ربعت ليهو يديني و قلت ليهو حاجاتي وين ؟؟
أشر لي بس و فهمت إنو قصدو في الغرفه الجنبو ، طلعت و دخلت الغرفه لقيت شنطي و حاجاتي كلها موجوده ، دخلت إستحميت و جيت رقدت و اتغطيت لأني كنت تعبانه شديد ، تاني يوم طوالي صحيت متأخره و بـ مغص أصلاً هو من أمبارح بليل ، فتشت شنطتي عشان ألقى مسكن بس ما لقيت مع إني نبهتهم و قلت ليهم ختوا لي حاجاتي كلها في الشنطه دي ! حتى الأدويه! بس شكلهم نسوا....
لمن الوجع إشتد نزلت تحت و بقيت افتش على المطبخ لحد ما لقيتو ، لمن دخلت ما كان فيهو حاجه التقول بيت عزابه و هو فعلاً كذلك ، قلت ماف حل غير إني أطلع أشتري احتياجاتي من أقرب صيدليه ، شلت لي قروش و طلعت و بقيت لافه و بفتش على صيدليه لمن ما لقيت وقّفت وحده و قلت ليها لو سمحتي ماف صيدليه قريبه هنا ؟؟ قالت لي في و وصفت لي أقرب وحده فإكتشفت إني خليتها وراي فـ تاني رجعت ، المهم اشتريت العايزاهو و لمن رجعت البيت و أول ما دخلت جوه ناصر جا نازل ، قال لي مشيتي وين و دا شنو الفي الكيس الأسود دا ؟!
قلت ليهو قنبله ، قال لي ما لقيتي طريقه تنتحري بيها غير دي ؟
قلت ليهو انتحر شنو أنا عايزا افجر فيك البيت ، قال لي بالتوفيق ، المهم إتحركت و مشيت على السلم و هو لسه كان واقف فيهو ، لمن جيت ماره بجنبو ، قال لي جادي معاك أنا فيهو شنو الكيس دا ؟
قلت ليهو حاجه ما بتخصك يا دودي و طوالي مشيت دخلت الغرفه و قفلت الباب ، المهم بعد حكاية نص ساعه كدا مشيت المطبخ عشان اعمل شاي بس اتذكرت انو ما فيهو حاجه تتأكل أو تتشرب ، بقيت واقفه و مستاءه لحد ما ناصر جا داخل و هو شايل معاهو أكياس ، قلت ليهو لبن البدره و الحبشاي أهم شي ان شاء الله تكون جبتهم ، حـ أصدع لو ما شربت شاي ، قال لي لو كنت عارفك حـ تصدعي ما كنت جبتهم ، قلت ليهو براااي كنت حأمشي أجيبهم ، المهم عملت الشاي و هو كان قاعد في الصفره ، كبيت لنفسي و إتلفت عليهو و قلت ليهو أكب ليك ؟؟ قال لي دا سؤال ليك ؟؟
المهم كبيتو و مديتو ليهو مع بسكويت ، قعدنا نشرب الإتنين بس كل واحد مشغول بحاجه ، أنا بشرب و بفكر في آخر كلام دار بيني و بين غسان و ناصر ماسك تلفونو و بتبسم ساي...
المهم اليوم دا عدا عادي ، تاني يوم ناصر طلع من بعد الضهر و ما جا راجع تاني إلا الساعه 10 مساء ، لمن زهجت من القعده في الغرفه نزلت تحت ، لقيتو بشاهد ساي و هو خالف رجل على رجل ، كان شغال فلم ظابط في MBC 2 و الفلم دا انا بحبو شديد ، فطوالي قعدت و بقيت أعاين بحماس للشاشه ، هو طوالي غير القناة ، قلت ليهو ياخ غيرتو ليه يغير نظرك ، أرجع ليهو ! قال يغير خلقتك ، غرفتك ما فيها شاشه !! قلت ليهو و انت غرفتك ما فيها شاشه ؟؟
قال لي أولاً أنا قعدت هنا قبليك تمام ، تانياً الشاشه دي من قبيل قافله ليه ما جيتي ليها ؟؟ و تالت حاجه البيت بيتي !
قلت ليهو و أنا مستأجره عندك يعني !! ما دا بقى بيتي برضو ، قال لي بقى بيتك ؟؟ اهااا يعني انتِ مبسوطه لأني عرستك و بيتنا بقى واحد ! 😊
قلت ليهو أنبسط شنو انت متخلف ، دا الواقع بقول كدا ، قال لي إحترمي نفسك و كلمة متخلف دي ما أسمعها تاني ، قلت ليهو لساني متعود عليها و ما حـ اقدر اتحكم فيهو يعني حتسمعها كتير ، قال لي ما بتقدري تتحكمي فيهو معناها ينقطع طوالي ، لويت ليهو خشمي و قلت ليهو جيب MBC 2 ، عاين لي و سفهني ، شميتو شديد ، قمت من مكاني و مشيت منو و أنا بطنطن لمن وصلت السلم ، إتلفت عليهو و قلت ليهو متخللللف ، فجأه أحس ليك بشبشب في وشي ، إتغظت شديد ، شلت الشبشب و فنيتو بيهو بس ما صابو ، قلت ليهو بلا يخمك ياخ و طوالي رجعت غرفتي و أنا بنبذ فيهو ، لقيت تلفوني برن ساي ، خالتي سارا هي الكانت متصله ، رديت عليها و قلت ليها سارا كيفك ، طبعاً خالتي ما كبيره في العمر ، عمرها 30 سنه ، لسه ما عرست ، قالت لي كويسه الحمدلله انتِ كيفك و ناصر كيفو ، قلت ليها كويسين ، قالت لي آسفه على الإزعاج لكن رتاج دي وين ما قادره ألم فيها و تلفونها مغلق ، قلت ليها لأنها غيرت شريحتها ، قالت لي طيب رسلي لي رقمها الجديد ، قلت ليها تمام لكن ليه ؟؟
قالت لي بكرا في بيان صحفي للشرطة في قاعة الصداقه بخصوص مقتل الطالب عماد ، عايزاها تمشي تغطي الحدث ، قلت ليها لكن ماشه أنا يا سارا !! قالت لي جنيتي ولا شنو ! , انتِ عروس أسبوع ما تميتيهو ماشه وين ؟؟
قلت ليها و يعني ؟؟ خالتو دا شغلي و أنا ما بخليهو تحت أي ظرف ، قالت لي ناصر ما عندو مانع ؟خليتو السفر يعني ؟ قلت ليها على كيفو هو !...قالت لي شنووو ، قلت ليها لا لا قصدي ما عندو مانع ، قالت لي كلميهو يا مهاوي بعد داك لو سمح ليك اتصلي علي ، قلت ليها طيب و قفلت منها ، بعد دقيقه اتصلت عليها و قلت ليها ناصر ما عندو مانع ، قالت لي و السفر ؟؟ قلت ليها أجلناهو لأنو هو ذاتو عندو شغل ضروري ما بقدر يسافر و يخليهو ، قالت لي طيب بكرا المؤتمر الساعه 10 ، قلت ليها تمام و قفلت منها....
إتصلت على لؤي ، رد علي من أول جرس ، قال لي حتى و انتِ في شهر عسلك ما عايزا تخليني في حالي 🥲 ، قلت ليهو ظريف ... إستعد لـ بكرا ، قال لي يا بت انتِ مش عرستي ؟
قلت ليهو هو عرس ولا سجن مؤبد !!...المهم يا لؤي بكرا من الساعه 8 جيب كاميرتك و خليك جاهز ، قال لي المؤتمر الساعه 10 ، و 8 دي بدري شديد و أنا اليوم من الصباح شغال و تعبان ، هسي دي دخلتي البيت ، قلت ليهو طيب من 9 قال لي متأكد لو اتكلمت معاك تاني في موضوع الوقت دا حتقولي لي طيب من 9:5 يعني كدا كدا ماف مهرب منك ، ضحكت و قلت ليهو أوعى تتأخر فاهم !؟ قال لي تمام يا زوله ....
المهم بعد قفلت منو صورت فيديو قصير كـ عادتي كنت بقول فيهو :
بالنسبه لي المكسب الحقيقي هو إنو يكون في شخص محل ثقه موجود في حياتك ، شخص ممكن تراهن عليهو و ما يخيب ظنك ، شخص كل مره يثبت ليك انك أبداً ما غلطت و ما اتسرعت لمن أديتو مكانة رفيعه في قلبك و حياتك ، شخص دائماً قادر يكون متواجد معاك ، لو ما جسدياً فـ معنوياً ، شخص دائماً بطمنك سواء بأفعالو أو بكلامو ، شخص بعرفك زي معرفتك نفسك أو أكتر ، شخص قادر يحتويك و يعرف زعلك من نبرة صوتك أو من تصرفاتك أو حتى من عيونك ، يعني من دون ما تتكلم ، شخص عدو الأول زعلك و ضيقك ، شخص بحبك في كل حالاتك و تحت أي ظرف.....بالنسبه لي دا الشخص الممكن تراهن عليهو 💜
بعدها نزلتو في التيك توك ، المهم نمت و صحيت الصباح بدري طلعت ملابسي و كويتهم ، رغم انهم مكويات بس كان فيهم شوية كرفسه ، دخلت المطبخ لقيت ناصر بعمل في الشاي فـ قعدت أشرب فيهو ، رتاج إتصلت علي و قالت لي صباح الخير يا عروس ، قلت ليها أهلين كيفك ، قالت لي كويسه اها اليوم حـ تمشي تغطي المؤتمر ؟؟
قلت ليها ايوه ، قالت لي يا بت إنتِ في شهر عسل ! مفروض هسي تكوني بتخططي مع راجلك حـ تسافروا وين ، قلت ليها دا كلام فارغ ساي ، قالت لي ميمي إنتِ ليه كدا ! يا بت أنا لو مكانك باخد إجازه سنه عديل ، ضحكت و قلت ليها بتعمليها انتِ ، المهم يا ريري أنا ما بقدر أخلي شغلي ، قالت لي طيب تمام اها ناصر تعاملو معاك كيف ؟؟
طبعاً هو قاعد قدامي و ما عايزا اقول أي كلمه تحسسو اننا بنتكلم عنو ، قلت ليها تتوقعي كيف يعني !!؟ ضحكت و قالت لي انتوا اكتر إتنين ما بتطيقوا بعض ، ما عارفه عرستو كيف 😂😂
المهم بعد قفلت منها ناصر كان بقطع في خضار و فواكه و شكلو عايز يجهز الفطور ، طوالي فتحت الإسناب و جبت أقبح فلاتر و قعدت أصورو بيهم و هو ما منتبه ، طبعاً آخر فلتر كان بتاع خنزير و شكلو كان قاسي شديد فـ قعدت أضحك و هو مع ضحكتي دي عاين لي و قال لي بتعملي في شنو إنتِ ؟ بتصوري صح و طوالي جا علي ، طلعت سريع من الإسناب ، لمن قلع مني التلفون لقى الشاشه قافله ، قال لي الرمز شنو سرررعه ! قلت ليهو خايف تطلع قبيح في الصور ولا شنو ، شكلك ما واثق في نفسك ، قال لي لو كنت قبيح ما كان قعدتي تصوري فيني ، عارف نفسي مكسرك والله و انك منبرشه فيني ....ضحكت و قلت ليهو بتحلم ، قال لي تمام صورتيني ليه ؟
قلت ليهو ساي ، قال لي ماف حاجه اسمها ساي يا شابه ، انا ليه ما حصل صورتك ؟؟ عشان انتِ ما بتهميني و ما مركز معاك أساساً ، قلت ليهو هييي هييي محسسني إني ميته فيك ! قلعت منو تلفوني و فتحتو و وريتو الصور ، قلت ليهو هسي دي صور ينبرشو فيها ؟؟ طبعاً بقى يعاين لمنظرو في الصور و هو مخلوع ! قال لي دي حساده منك بس ، قلت ليهو حساده يا ملك جمال العالم ؟!!...قال لي دا إعتراف صريح منك ، قلت ليهو دي منو الخدعتك و قالت ليك انك سمح ؟؟
قال لي أولا أنا شايف نفسي سمح و تاني حاجه كل البشر شايفين الحاجه دي ، قلت ليهو أنا ما شايفاها ، قال لي لأنك ما من البشر ، قلت ليهو ايييوه لأني ملاك 😌💅
عاين لي بإستهتار كدا و قال لي احذفي الصور دي ، قفلت التلفون و قلت ليهو لو قدرت تفتحو أحذفهم طوالي ، قال لي ما مهم و طوالي رجع يطبخ ، قلت ليهو لمن تخلص جيب لي الأكل في غرفتي ، أداني نظره كدا حسسني بيها انو شويه كدا و حيجي يكفتني ، المهم رجعت غرفتي ، جهزت نفسي و لبست إسكيرت أسود و قميص أسود منقط بالأبيض و شعري عملتو ضنب حصان و لبست طرحه كبديه و شبط أسود واطي و شنطه صغيره كبديه و عملت مرطب في شفايفي و واقي شمس و سرحت حواجبي ، لمن نزلت تحت و دخلت المطبخ لقيتو بفطر سااااي ، عاينت ليهو بغيظ و طوالي قعدت أفطر معاهو ، هو قام قبليني ، المهم لمن خلصت غسلت الصحاني و رتبت المطبخ بعدها طوالي إتجهت على الباب ، قلت ما حأكلمو ماشه وين و هو أساساً شايفني مجهزه نفسي و أكيد عارف إني طالعه و براهو ما عايز يسألني ، المهم لمن طلعت برا البيت لقيتو واقف جنب عربيتو و بتكلم بالتلفون ، شكلو طالع ، لؤي إتصل علي و قال لي أنا طلعت اجيك ولا طلعتي ؟؟
قلت ليهو ياداب طلعت من البيت حأطلع ليك في شارع عام و أوصف ليك تجيني وين ، المهم قفلت منو و اتحركت لمن جيت ماره بجنب ناصر قال لي على فكره أنا ذاتي طالع ، قلت ليهو لا لا أطلع ساي ما تستأذن مني ، طبعاً اتغاظ مني غيظه ، بنبسط شديد لمن استفزو و أغيظو زي ما هو بعمل معاي من زمان ، قال لي على راحتك أنا مالي و مالك ، المهم مشيت و وصفت لـ لؤي يجيني وين ، فعلاً جاني ركبت معاهو و إتحركنا....
يتبع.....
بسم الله نبدأ
