#زهرة_فؤادي11
مها حولي الزاكي
إتكلت على الباب و ختيت يدي على قلبي !! ما قادره أستوعب إنو ناصر قال لي كدا !! بقيت ماشه و جايه في الغرفه و حاسه التوتر إتملكني ، إتصلت على رتاج و حكيت ليها قالت لي وااااي يا قادره ! دا تطور ملحوظ و قفزه كبيييره شديد ، دامو يا ميمي فتح معاك موضوع زي دا فالأحسن تتفاهموا و تعيشوا في ثبات و نبات و تجيبوا بنات و أولاد و توته توته خلصت الحتوته ، قلت ليها بس انا يا رتاج ما بقدر على مسؤوليه زي دي !! ما عندي مشكله في ناصر و ما عندي مشكله اعيش معاهو بتفاهم و ما عندي مانع انو يعرف إني بحبو بس قصة نجيب طفل دي ما عاجباني والله ، الفكره بحد ذاتها بتوتر و بتخوف 😭😭
قالت لي ماف شي بخوف يا بت ، هسي ساي بتقولي كدا بس صدقيني بكرا لمن يكون عندكم طفل في البيت حياتكم كلها حـ تتغير للأحسن و بعدين الراجل دا صبر عليك كتير و خلاك على راحتك يا مها فـ ما تبقي أنانيه و أديهو حقو الشرعي !!
المهم بعد إتكلمت معاها إتوترت زياده ، تاني ما طلعت من غرفتي خالص إلا تاني يوم و ما طلعت إلا لمن إتأكدت إنو ناصر طلع ، مشيت شغلي ، و المره دي طولت لأنو كنت بصور حلقتين ، وحده بث مباشر و التانيه حلقه من برنامج مفروض يتعرض في رمضان ، لمن خلصت الساعه كانت 5 ، طبعاً ناصر إتصل علي من قبيل و كلمتو إني حـ أتأخر ، قال لي لمن تخلصي إتصلي علي ، المهم اتصلت عليهو و بعد ربع ساعه جاني ، ركبت و أنا ساكته ، قال لي يومك كان كيف ؟؟ قلت ليهو تمام و تاني ما إتكلمت ، بعد مسافه قال لي عشان ما تضايقي نفسك ساي أنسي الكلام القالوهو ليك ناس أمي و أنسي الكلام القلتو ليك ، طبعاً قال كدا من دون ما يعاين لي ....ما قلت حاجه ، وصلنا البيت و كل واحد مشى غرفتو ، المهم لمن فتحت الفيس و دخلت بصفحتي الوهميه ديك لقيت توته مرسله لي رسايل كتيييره نبذتني فيها نبذ أكعب من الأول و في الآخر قالت لي أنا ما غالبني أجري وراك و أعرف انتِ منو و أجيب عنوان بيتك ، إنقلعي من هنا يا بت.....عشان ما ااجرك ليك ناس يغطسوا حجرك و....🤬... و طوالي حظرتني ، طبعاً حسيت بنار جواي ! اساءت لي و لأهلي شديد و للمره التانيه و آخر جمله قالتها لي خلت يدي ترجف و أنا مستحيل أقبل بحاجه زي دي ، من مكاني داك طوالي مشيت لـ ناصر في غرفتو و أنا واصله أبعد درجه من الزعل و عيوني مليانه دموع ، ناصر لمن شافني وقف على حيلو و جا علي و قال لي في شنو مالك ؟؟
مديت ليهو التلفون و قلت ليهو شوف المحترمه دي قالت شنو عني و عن أهلي و اقرا آخر جمله دي كويس ...هو بقى يقرا في الرسايل و أنا دموعي عشره عشره ، قال لي دقيقه دا شنو دا ؟ يعني انتِ....قاطعتو و قلت ليهو أيوه دي أنا .... طبعاً أخد ليهو كم دقيقه كدا استوعب بيها الحاصل و بعدها قال لي أنا بتصرف معاها ، طبعاً هو زعل أكتر مني و ملامح وشو إتغيرت ، شال تلفونو و طلع برا الغرفه ، سامعه صوتو من تحت الهول كان جايط شديد معاها ، اقسم بالله شاكلها شكل لمن كيفني في الآخر قال ليها تاني ذاتو إياك تتصلي علي أو ترسلي لي ، أنا ما بتعامل مع ناس بتتلفظ و بتتكلم بالأسلوب دا و بتهدد بالطريقه الوسخه و الزباله دي ، قال ليها ياخ كلامك دا لو كان قلتيهو لأي زول كنت حاسبتك فـ ما بالك لمن تقوليهو لـ مرتي و تنبذي أهلها و تقولي ليها تهديد زي دا ؟؟ شفتي التهديد القلتيهو دا في خيالك ما حيحصل طول ما أنا عايش شعره ما حـ تتمس منها !!...المهم العندي قلتو ليك و تاني خلقتك دي ما عايز أشوفها .....
طبعاً أنا كنت ببكي بس بعد كلامو دا بقيت أضحك و لسه دموعي ما نشفت ، كلمة مرتي دي عجبتني شديد ، و جملة طول ما أنا عايش شعره ما تتمس منها حسستني بالأمان و الإطمئنان .....المهم لمن جا راجع لقى دموعي لسه صابه مطره ، كان لسه زهجان ، قال لي خلاااااص الموضوع انتهى ،قلت ليهو هي ليه تقول عني و عن أهلي كدا 😭
قال لي انتِ ذاتك نبذتيها ، قلت ليهو ماف مقارنه بين نبذي و نبذها و أنا أساساً ما اسأت لأهلها و ما هددتها كدا ، قال لي هي كذابه و ما حـ تقدر تعمل ليك شي ، قالت كدا عشان تخوفك ، بقيت بمسح في دموعي و هو بعاين لي ساي ، بعد مسافه قال لي حبيبك دا منو كمان ؟؟
طبعاً عملت رايحه و قلت ليهو حرام عليها تقول لي كدا ، كلامها صدع بي ، رقدت على السرير و قلت ليهو حأنوم و أحاول انسى الكلام المسموم القالتو لي ، رقدت و إتغطيت بسرعه ، جا شال الغطى عني و قال لي ما تتهربي مني ، غمضت عيوني شدييييد ، قال لي مها ، أنا بتكلم معاك ، حبيبك منو ؟؟
برضو ما رديت عليهو ، قال لي بنهره ، بتكلم معاك أنا ....خوفه ساي فتحت عيوني و قعدت في نص السرير و قلت ليهو كذبت عليها ساي كنت عايزا أشوفها إذا عندها حبيب غيرك ولا لا ، قلت يمكن زي ما بتلف و بتدور عليك ، بتلف و تدور على غيرك و بتلعب بيك إنت و باقي أولاد الناس المساكين.....ربع يدينو و قال لي حاولي أقنعيني ، قلت ليهو غيتو دي الحقيقه و ما عارفه أقنعك كيف ، قال لي و بعدين منو القال ليك إني حبيبها أو هي حبيبتي ؟؟! قلت ليهو واضحه ما عايزا ليها شطاره ما شايفها لاصقه فيك كيف و انت ما شاء الله رصيدك كلو مكملو معاها و مع الزيها.....قال لي دي غيره ؟؟
قلت ليهو أكيد لاااا ، جا قعد قصادي في السرير و عاين لي جوه عيوني و قال لي اذا ما غيره شنو ؟؟ قلت ليهو عدم موضوع مني ساي و طوالي رقدت و اتغطيت و أنا قلبي شغال دق دق ، بعد شويه حسيتو راقد جنبي !! جسمي بقى لوح تلج ، شلت الغطى و قلت ليهو هييي هييي المرقدك هنا شنو ؟؟ قال لي على فكره انتِ في غرفتي و راقده على سريري.... فعلاً لمن إنتبهت لقيت دي غرفتو ، أول ما قمت و كنت حأنزل من السرير مسك يدي و قال لي على وين و هو بضحك ساي ؟؟ طبعاً يدي بقت باااارده قلت ليهو ماشه غرفتي ، قال لي معقوله تنومي في غرفه و حبيبك ينوم في غرفه تانيه !!؟.....حسيت برعشه في جسمي و إرتبكت و إتوترت ، قال لي إعترفي إنك بتحبيني ...قلت ليهو أحب فيك شنو و طوالي فكيت يدي منو و طلعت من غرفتو و دخلت غرفتي و قفلت الباب ، ختيت يدي على قلبي و بقيت أتنفس بسرعه كأني من قبيل حابسه أنفاسـي....في اليوم البعدو صحيت بدري و قلت حأطلع قبل ما هو يشوفني عشان ما يـسألني سؤال أمبارح داك ، جهزت نفسي و شلت شنطتي و طوالي طلعت الحوش و أول ما طلعت الشارع لقيتو في وشي !! كان واقف جنب عربيتو ! أشر لي عشان أجيهو لمن وصلتو قال لي أركبي ، طبعاً شكلو زعلان مني ، المهم ركبت و الإتنين كنا ساكتين ، كسرت الصمت و قلت ليهو بكرا بتقدر تمشي معاي عشان نصور حلقتنا في برنامج دردشات ولا لا ؟ قال لي أيوه حأمشي ....في نفس اللحظه رسلت لـ يارا الحاج و أكدت ليها اننا حـ نجي ....
المهم تاني طول الطريق ما إتكلم معاي ، قلت هسي دا مالو !! تاااني عايز يرجع لـ حركاتو ديك و يتعامل معاي بـ جفا !! المهم وصلني مقر القناة ، نزلت و دخلت طوالي ، فجأه جاتني منو رسالة SMS ، كاتب لي فيها : ما تنسي تشرب الشاي عشان ما تصدعي....إبتسمت بسبب رسالتو ، قلت حتى و هو زعلان مني بهتم بي ، بس هو زعلان مني في شنو تحديداً ؟! هل عشان دخلت بحساب وهمي و اتشاكلت مع توته ولا عشان أمبارح لمن قال لي إعترفي إنك بتحبيني قلت ليهو أحب فيك شنو ؟؟!
المهم دخلت القناة ، طبعاً حلقة اليوم حـ نقدمها أنا و رتاج ، و نحنا في الإستديو قلت ليها ما شفتي الحصل شنو أمبارح ، قالت لي شنووو ؟؟! قلت ليها أمبارح أم ناصر و أختو جونا و..........الخ ...قالت لي وااااي وااااي ما بصدق دا كلو حصل !! قلت ليها إتخيلي !! قالت لي طيب ليه بعد ما كشفك ما إعترفتي ليه ؟؟ قلت ليها بري ما ببادر أنا ، مستحيل إني أقول ليهو بحبك ، قالت لي انتِ متخلفه بالجد ! حتقعدوا كدا لمتين يعني ؟؟ قلت ليها لحد ما هو براااهو يجي و يعترف لي ، قالت لي شرط يعني إلا يقول ليك بحبك ؟! تصرفاتو و تلميحاتو دي كلها ما كفايه !؟؟
فجأه الكنترول معاذ جا و قال لينا يا شابات ونستكم دي ما خلصت لأنو الضيف وصل ، عاينا لبعض و ضحكنا لأننا بسبب الونسه نسينا نحنا وين ، المهم قدمنا حلقتنا و كانت موفقه جداً و الضيف كان ظريف و خفيف....
بعد ما خلصنا أنا و رتاج تاني قعدنا نتكلم في الموضوع ، قالت لي أسمعي كلامي و صلحي علاقتك بـ ناصر بعدين المشكله وين لو كان عندكم طفل !!؟ على فكره خوفك ما مبرر خالص ، قلت ليها خلاص أقفلي السيره دي ، قالت لي ناصر ليهو حق يزعل منك ، بعدين لمن ترجعي راضيهو فاهمه ، قلت ليها خلااااص قلنا ، غيري السيره ، قالت لي اهااا بكرا ماشين لـ ناس دردشات ديل ولا لا ؟؟
قلت ليها ماشين ، قالت لي تمام بكرا تعاليني في البيت عشان أظبطك و اختار ليك لبس مناسب ، قلت ليها تمام ، المهم بعدها إتصلت على ناصر قلت ليهو لو فاضي تعالني خلصت شغل أنا ، قال لي تمام ، قلت لـ رتاج إنتظريهو معاي عشان نوصلك معانا ، قالت لي طيب ، المهم إنتظرنا ناصر لحد ما جانا ، سلمنا عليهو و ركبنا الإتنين ورا ، رتاج قالت ليهو بس ما يكون عطلناك عن شغلك ، قال ليها لا ما عطلتوني و أساساً أنا كنت شغال في موقع قريب من هنا ، قالت ليهو انت مهندس مدني صح ؟؟ قال ليها ايوه ، قالت ليهو اهااا و طوالي لكزتني عشان أتكلم ، حمرت ليها بعيوني ، قالت لي بصوت واطي إتكلمي !! قلت ليها بنفس درجة صوتها أقول شنو !؟؟ لاحظت لإنو ناصر بعاين لي بالمرآيه عشان كدا سكته ، المهم لمن وصلناها قالت لينا إلا تنزلوا تسلموا على ناس البيت ، قلت ليها يوووم تاني و غير كدا أنا أصلاً جاياك بكرا ، المهم سلمي لي على ناس البيت و أقطعي وشك ، قالت لي حيوانه أنا تقولي لي كدا !! قلت ليها و متخلفه كمان ، ضحكت و قالت لي انتِ بتقلي أدبك عشان شايفه ناصر معاك ، أصبري لي بكرا بتجيني في البيت ...المهم ودعتنا و مشت ، تاني لحد ما وصلنا البيت ناصر ما إتكلم معاي....
صراحة بقى يفرق معاي و سكاتو بزعلني ، لو ما إهتم بي أو اتكلم معاي بحس زي الناقصاني حاجه ، المهم في اليوم البعدو ناصر قال لي إنو أهلو عازمننا غدا ، قال لي بعد ما تخلصي شغلك حـ نمشي نصور حلقتنا و منها نمشي ليهم في البيت ، يعني اليوم حيكون مليان شديد ، قلت ليهو طيب ....سكتنا الإتنين و أنا كنت منتظراهو يقول لي حاجه تانيه ، كان بشرب في الشاي و بعاين في تلفونو ، قلت ليهو انت و توته إتصالحتوا ولا لسه ؟؟
عاين لي و رجع عاين لتلفونو و ما رد علي ، قلت ليهو عشان ما عايزا علاقتكم تبوظ بسببي ، برضو ما رد علي ، قلت ليهو ما كنت تجوط فيها و ترفع صوتك عليها ، قال لي لو خلصتي شاي خلينا نطلع وراي شغل ، قلت ليهو أنا بتكلم معاك ما تسفهني ، قال لي تمااام حـ يحصل العايزاهو و اليوم حـ أصالح توته ، أصلاً من أمبارح كنت مفكر أتصل عليها بس إترددت .... طبعاً كلامو حسيتو زي السكين ....قلت أصلاً ما كان أجيب ليهو سيرتها بس لو ما كان جبتها ما كنت حأعرف إنو ناوي يصالحها ، الشاي شلت منو رشفه بس و خليتو ، وقفت على حيلي و قلت ليهو خلينا نمشي ، عاين للشاي و قال لي دا مخلياهو لـ منو ؟؟ قلت ليهو ما عايزا ، قال لي أقعدي و أشربي الشاي دا ! قلت ليهو قلت ليك ما عايزا ، عاين لي بحده و سكت ، بعدها شال الكبابي و دخلهم المطبخ و جا طلع قدامي ، المهم ركبنا و مشينا ، خلصت شغلي و اتصلت على رتاج و قلت ليها أهل ناصر عازمننا و هم كلامهم كتير و بحبوا الإنتقادات زي عيونهم و أنا ما عايزا أديهم فرصه ، عشان كدا عايزاك تمشي معاي كوفير عديييل أرسم و اعمل فيشيل لـ وشي و اتظبط و كمان عايزاك تختاري لي توب و تطقميهو لي ، قالت لي من عيوني لكن الزمن حـ يكفي ؟؟ قلت ليها حـ يكفي ، المهم مشينا الكوفير الساعه 10 ، قعدنا فيهو 4 ساعات ، نضفت وشي و عملت جلسه لـ شعري كمان و رسمت رجليني و يديني ، طبعاً ناصر إتصل علي و قال لي خلصتي ولا لسه ؟؟ قلت ليهو ما تجيني مشيت البيت أنا ، قال لي لييه ؟؟ قلت ليهو أكيد ما حـ أمشي بنفس الملابس المشيت بيهم الشغل ! قال لي تمام و قفل ....المهم أنا و رتاج طلبنا ترحال و مشينا البيت ، رتاج دخلت المطبخ عشان تعمل لينا حاجه ناكلها و أنا فتحت دولابي و طلعت كل التياب العندي .... طبعاً ما حصل لبست توب ، المهم رتاج جابت حاجه ناكلها ، بعد خلصنا هي إختارت لي توب زيتوني و إكسسوارات ذهبية و هيلز ذهبي ، دخلت إتدوشت و جيت جهزت نفسي و لبست التوب ، رتاج سرحت لي شعري و مسكتو لي بـ مشبك و عملت ليك ميك اب رهييب ، بعدها لبست الإكسسوارات و الهيلز ، رتاج قالت لي فظيييعه بالجد ، أعلن إنبراشي ، الحنه عسل عسل عليك ، عاينت لنفسي في المرايه و قلت ليها بالجد طالعه رهيييبه ، غير توب الجرتق أنا ما حصل لبست توب تاني ، قالت لي ما شاء الله عسل بالتوب ، الليله ناصر حـ ينجلط من الحلاوه دي كلها....تعالي أصورك ، المهم أخدت لي كم صوره كدا و قالت لي حـ أمشي بعد دا و على فكره بكرا لازم تجيني في البيت ، ناس أمي بسألو عنك ساي ، اليوم كان مفروض تجيني بس استبدلتيني بالكوافير 😑 ضحكت و قلت ليها بجيك والله ما تشيلي هم ، المهم قدمتها لحد الباب ، قالت لي كنت متمنيه أكون قاعده و أشوف ملامح وش ناصر لمن تقيفي قدامو بس حـ احترم نفسي و أمشي عشان ناصر ياخد راحتو في الإنبراش ....المهم بعد مشت رجعت غرفتي و بقيت أعاين لنفسي في المرايه ، ناصر إتصل علي و قال لي أنا قريب للبيت ان شاء الله تكوني جاهزه و ما تتأخري لي ، خليك منتظراني في الهول ، قلت ليهو أساساً أنا جاهزه من قبيل ، المهم ، رتبت شكلي أكتر و شلت تلفوني و مشيت قعدت في الهول ، بعد شويه جا داخل ، وقف عاين لي مسافه بعدها قال لي كويس انك جاهزه ، حـ أطلع أجهز نفسي و أرجع ، قلت ليهو شكلك انت الحـ تأخرنا ، قال لي لا لا ما بتأخر ، بقى ماشي على السلم و هو بعاين لي لحد ما قرب يقع ، ضحكت و قلت ليهو ناصر عااااين قدامك عشان ما تقع ....هو مشى و أنا بقيت أضحك براي ، انتظرتو مسافه بس ما جا ، قلت دا كمان بتمكيج ولا شنو !!..
