#زهرة_فؤادي8
مها حولي الزاكي
تاني يوم طوالي إتصلت على خالتي و كلمتها بالحصل لي أمبارح ، قالت لي خلاص ما تجي و مصطفى و ولد عمو أنا و إلهام و ساجد حنمشي نقابلهم ، قلت ليها لا لا حـ أمشي معاكم ، قالت لي ما تخليك عنيده يا مها !! قلت ليها بقدر يا خالتي !!
المهم بعدها بصعوبه قدرت أنزل رجلي على الأرض ، دخلت الحمام و بعدها صليت و سرحت شعري ، أول ما فتحت الباب كدا ناصر طلع في وشي ، واضح إنو كان حيضرب لي الباب ، قال لي بقيتي كيف ؟؟ قلت ليهو كويسه ، قال لي تمام انزلي لأني جهزت الشاي ...هو مشى قدامي و أنا وراهو في السلم بحرك رجلي براحه براحه ، إتلفت علي عاين لي مسافه و جاني راجع ، سندني و قال لي دا كلو بسبب خوفك و عدم إنتباهك ، قلت ليهو البسمعك بقول انت الإتأذيت ما أنا !! مالك متضايق أكتر مني ياخ !!
قال لي طبيعي اتضايق لأني حـ اضطر أكون ليك ممرض ، قلت ليهو شكراً أنا ما طلبت منك تكون لي ممرض ، طوالي فك يدي و نزل قبليني من السلم ، طبعاً أنا ما قلت ليهو كدا إلا لمن كان باقي قدامنا عتبتين 😂 نزلت منهم عاااادي و مشيت قعدت جنب دانه ، بوستها شدييييد و قلت ليها صبااااح الخير يا عسل ، وشها كلو كان عباره عن شوكولاته ، ناصر قال ليها خلااااص كفاك من الشكولاتات دي ، أشربي الحليب ! قلت ليهو انت ذاتك غلطان ما كان تديها الشوكولاتات و الحلويات دي من الصباح ....سفهني طبعاً ، شلت الشاي و قعدت أشرب فيهو ، هو فجأه تلفونو رن ، فتحو و قال توته كيفك .... أنا كويس.....لا لا اليوم ما طالع ....طيب تمام ....بعد قفل منها بقيت أعاين ليهو ساي و هو كان بنضف لـ دانه وشها بالمنديل ، لمن قبضني بعاين ليهو ما أبدى أي ردة فعل ، استمر في البعمل فيهو ، بعد خلصنا شراب شاي شال الكبابي و مشى غسلهم و رصاهم في مكانهم و جا راجع ، تلفونو تاني رن ، من كلامو عرفت إنو بتكلم مع ورده أختو ، قال ليها أمشي جامعتك ساي و ما تشيلي هم دانه لأني اليوم قاعد في البيت ، خليتو بتكلم معاها و وقفت على حيلي ، بقيت اتجرجر كدا لحد ما وصلت السلم ، طبعاً بصعوبه بمشي برجلي ، ناصر كان بعاين لي ساي و هو بتكلم بالتلفون ، منتظرني بس اقول ليهو تعال ساعدني و أنا نهااااي ما حسستو إني محتاجه ليهو ، المهم بـ تلتله وصلت غرفتي و جهزت نفسي ، لبست فستان كتان ساده باللون السماوي و طرحه مخططه و شنطه باللون الأزرق الغامض ، شعري مسكتو بمشبك ، ختيت واقي شمس و سرحت حواجبي ، بعدها عملت إيلاينر و روج وردي و خططت حواف شفايفي بـ قلم غامض ، بحب انو حواف الشفايف أو أطرافها يكون لونها غامض و في النص فاتح 💜
المهم دخلت شلت تلفوني و شنطتي و جيت طالعه من الغرفه ، برضو بعد صعوبه و شقة نفس قدرت أنزل من السلم ، ناصر كان بعاين لي سااااي لحد ما نزلت ، كان شايل دانه و بشاغل فيها ، ختاها على الأرض عشان ما تقع و جا علي ، قال لي ماشه وين ؟
قلت ليهو شغلي ، قال لي اليوم ما عندك ، قلت ليهو اففف حـ تحقق معاي كمان في شغلي !!؟ قال لي أنا ما بحب الكذب ، قولي الحقيقه ماشه وين ؟؟
قلت ليهو أنا ما بخاف عشان أكذب أنا فعلاً عندي شغل في الجريده و بعد ما اخلص ماشه أقابل مصطفى ، قال لي شكلك نسيتي أنا أمبارح قلت ليك شنو ، قلت ليهو و انت منو عشان أشتغل بـ كلامك ، قال لي ما عايز معاك جدال كتير ، أرجعي غرفتك و ماف ليك أي طلعه من البيت دا ، قلت ليهو بزهج يااااخ ما على كيفك ، مسكني بقوه من يدي و كان حـ يجرني معاهو لفوق بس وقف عاين لـ رجلي ، من دون ما يتردد شالني و أنا شغاله اضرب فيهو و اقول ليهو نزلني يااااخ ! وصلني غرفتي ، دخلني و قفل الباب ، بعد نزلني قال لي بنبره عاليه اشوف الليله حـ تطلعي من البيت دا كيف ، قلت ليهو عايز مني شنو انت عشان تقفلني ورا أربع حيطان !!! ياخ مالك بي أمشي أقابل مصطفى ولا غيرو ! أنا قبل كدا قلت ليك أياً كان نوع الخلاف البينك و بينو ما بهمنييي ، قال لي برضو لو كان ماف خلاف بيني و بينو ما حتمشي تقابليهو !
قلت ليهو أنا تعبت منك ! من الآخر قول لي عايز شنو !!؟
قال لي مفروض أنا الأقول الجمله دي !
عايزا شنو أنتِ ؟؟
عايز تصلي لشنو و بتعملي دا كلو لشنو ؟؟
قلت ليهو بعمل في شنو أنا ؟؟!
قال لي عارفه كويس أنا قاصد شنو و عارفه كويس نفسك و الحركات و التصرفات الغلط البتعملي فيها و اللسه مصره عليها ، قلت ليهو زي شنو مثلاً !!؟؟
قال لي ما تستهبلي ، قلت ليهو انت البتستهبل و بما انك فتحت الموضوع دا و بديتو خليني أتمو ليك ....نحنا من البدايه ما بنطيق بعض تمام و دا السبب الخلانا نعرس بعض لـ يقينا التام انو ماف واحد فينا حـ يتدخل في حياة التاني ، أنا هرباً من نقة أهلي و بحثاً عن مصلحتي و مستقبلي وافقت عليك و انت كذلك و الإتنين ما إتغصبنا على بعض و بيناتنا إتفاق ....كوني أطلع من دون إذنك
أرجع وقت ما أرجع
اطلب مساعدة أهلي
أمشي وين و أقابل منو
دي كلها حاجات ما بتخصك ، ليه ؟؟ لأنو دي واحده من البنود الإتفقنا عليها ، هسي لاحظ إني ما قاعده اقول ليك جاي من وين أو ماشي وين ، ما قاعده أحاسبك لمن تجي البيت متأخر ، ما قاعده أحقق معاك و ما قاعده اقول ليك ما تتصل على الإسمها توته ديك أو ما تمشي ليها ، أنا مخلياك على راحتك و ما بحب اتحشر في حياتك فـ ياريت إنت كمان تخليني على راحتي و ما تتحشر في حياتي .....ربع يدينو و قال لي ماف زول منعك من انك تتحشري في حياتي ، عموماً سميها حشريه أو تطفل أو أي مسمه انتِ عايزاهو بس اناااا ما حأبطل البعمل فيهو دا و حأحقق معاك في كل كبيره و صغيره و حأعرف ماشه وين و جايه من وين !....قلت ليهو و إتفاقنا !!؟
قال لي إعتبرينا ما إتفقنا من الأساس ، قلت ليهو شنووو !! يعني ما لقيت ليك موضوع غيري ؟!! خلااااص كل مواضيعك خلصت عشان كدا لقيت نفسك فاضي قلت تتموضع بي ! مش نحنا ما بنطيق بعض ؟؟
قال لي ايوه 😊
طبعاً حيرني !!
قلت ليهو يعني انت ما بتطيقني و ما بتعتبرني مرتك و مع ذلك بتحشر نفسك في حياتي لا و كمان بتضايق لمن أطلع من دون إذنك و امبارح عشان ما إتصلت عليك لمن كنت في القسم اليوم عامل القصه دي كلها !! يعني شنو لو ما كلمتك !!؟ حتفرق معاك في شنو !!؟
قال لي اهاااا طلعتي فاهمه !؟ عظيم والله !! يعني عارفه أغلاطك و عارفه تصرفاتك الهمجيه دي و عارفه الصح من الغلط و مع ذلك غرقانه في الغلط!!
قلت ليهو الغلط وين ؟؟
كوني اتصل على ناس بيتنا و أكلمهم اني في ورطه دا غلط ؟؟
قال لي و أنا حيطه ولا صنم !!؟
طبعاً قالها لي بنهره .....أخدت نفس عميق و هديت نفسي ، غمضت عيوني و فتحتهم و قلت ليهو ناصر شوف أنا خالص ما متعوده اطلب مساعده من زول ما بطيقني ، ما متعوده ألجأ لـ زول ما معترف بي ، عمري ما رخصت نفسي لـ زول و عمري ما دخلت زول في مشاكلي و ما حصل حوجت نفسي لـ زول .....قال لي أنا ما أي زول....
هنا الإتنين سكتنا ، بقينا بس نعاين لبعض ، بعد لحظات قلت ليهو أنا العندي قلتو ليك و شرحت ليك الزواج دا بالنسبه لي شنو في حين انك لحد اللحظه ما بررت لي و ما.....قاطعني و قال لي زي ما قلت ليك ، الإتفاق ملغي ، إعتبري إننا ما اتفقنا أساساً ، قلت ليهو نحنا ما بنطيق بعض و دي حاجه عمرها ما حتتلغي ....قال لي بالنسبه ليك ...
طبعاً تاااني حيرني !!
حسيت لساني إتربط ، للحظات جهجهني بكلامو و وترني ، حسيت إني حأذوب قدامو ، شجعت نفسي و قويتها ، ربعت يديني و قلت ليهو اهاااا فهمت الحاصل ، شكلك ما قدرت تقاومني و للأسف وقعت في حبي ، هه مع انك قبل كدا كنت بتحسسني إني جااااريه وراك و ميته عشان أقول إني مرتك ، بس في الآخر طلعت انت الجاري وراي و ميت عشان أقول إني مرتك ، ههه و ما تنسى انك قلت لي لو حبيتيني مشكله ، و في النهايه انت الحبيتني ، طبعاً ليك حق ، عاذراك أنا ، واااحده زيي كدا منو الما حيحبها !! اخخ مع انك حاولت و جاهدت تكون بعيد عني بس يا حرااام ما قدرت..... طبعاً قلت ليهو كدا بكل ثقه و كنت خاته عيوني في عيونو ، بعد خلصت بقيت منتظراهو يتكلم و هو كان بعاين لي بنظرات إستهتار ، قال لي خلاص خلصتي تأليف !؟؟
معقوله عشان نفيت ليك إني ما بطيقك ألفتي السيناريو دا كلو ولا أصلاً كان عندك جاهز و منتظراني بس متين أحسسك اني بحبك ؟؟! والله من خلال كلامك دا واضح انك بتبذلي أقصى جهدك و موظفه كل إمكانياتك عشان تلفتي نظري و أحبك !!
ضحك ضحكة إستفزاز و قال لي صدقيني لو كنت منتبه لحتة انك متعبه نفسك عشان تلفتي نظري و تخليني أحبك كنت حأعبرك حتى ولو كان تمثيل....
طبعاً حسيتو قصف جبهتي و أحرجني! اتغظت منو غييظ ما عادي بس اتماسكت و ما غيرت ملامح وشي ....إبتسمت نفس إبتسامتو و قلت ليهو هسي انت بتقنع نفسك ولا بتقنع فيني ؟!!
ياخ انت شدة ما ميت فيني أمبارح استغليت حتة إني نمت في غرفتك و على سريرك و كمان شدة ما كنت خايف علي ما قدرت تتحمل تشوفني و أنا موجوعه و جبيني نازف و كمان ما قدرت تتحمل فكرة إني أقابل مصطفى و اتكلم معاهو لأنك بتغير و.....سكته لمن هو قعد يضحك بصوت عالي ، طبعاً إستغربت ، ضحك ضحكه طويله بعدها قال لي جااااده انتِ ؟ يعني الوقت دا كلو انتِ شغاله تفسري تصرفاتي معاك على هواك و توهمي نفسك إني حابيك و ميت فيك ؟😂
أنتِ ما بتعرفيني كويس ، شوفي أنا عدوي لو شفتو محتاج مساعده بساعدو و غير كدا أنا ما طفل ولا بنفس عقليتك عشان أشوفك محتاجه مساعده و بتنزفي و أخليك في حالك عشان زعلان أو متضايق منك ، أيوه أنا متأكد إنو لو دي انتِ علي ما حـ تتلفتي بس تصرفي دا تصرف عاااادي و أي زول لو كان مكاني حيعمل كدا إلا الإنسان القلبو قاسي أو العقليتو محدوده زيك كدا ، أما بالنسبه لإني ما قادر أتقبل فكرة انك تقابلي مصطفى أو تتكلمي معاهو فعلاً معاااك حق ، لا مصطفى لا غيرو ، بعيداً عنك أنا لو كنت متزوج حماااااره عديل ما كنت حأخليها تلف و تطلع و تنزل على كيفها لأنو مرتي هي عرضي ، يعني الموضوع ما ليهو علاقه بيك انتِ شخصياً ، لو كنت معرس وحده غيرك برضو كنت حأعمل نفس الشي فإطمئني و ريحي عقلك من التفكير و التفسير .....
طبعاً كلامو كان قاسي جداً ، أحرجني لدرجه!...إتبكمت و ما قدرت أنطق حرف واحد ! غلبني الرد ! افتكرت إني القالبه الطاوله و إني واضحه و كلامي منطقي و حأقدر أسكتو ! بس هو السكتني و فنّد كل حاجه أنـا فسرتها و حللتها ! أيوه انا حصل و قلت لـ رتاج إنو ناصر ما بحبني و أنا كذلك بس من جواي و خاصة في الفتره الآخيره بقيت أحس إنو بهتم بي ! بس هسي صدمني و جد جد أقنعني إني ولا شي بالنسبه ليهو !!
إتحرك و كان حيطلع من الغرفه بس رجع خطوتين و قال لي طبعاً بعد كلامك دا ياداااب فهمت ليه رسلتي لي الرساله ديك على أساس انك قاصده بيها مصطفى ! ههه كنتِ بتحاولي تستفزيني و توصلي لي فكرة انك متواصله معاهو و هو فعلاً انتِ متواصله معاهو بس الرساله ديك تحديداً كانت مقصوده ، ما قايل نفسي شاغل بالك لدرجة انك صاحبتي صاحبي المتخاصم معاهو بس عشان تستفزيني و تلفتي نظري ،حأقولها ليك تاني الموضوع ما ليهو علاقه بيك انتِ شخصياً ، أي وحده بقت من ضمن عرضي ما مسموح ليها تطلع و تنزل على كيفها و تعمل علاقات مع الأولاد و على فكره تصرفاتك دي كلها بتقلل من قيمتك خاااصة حكاية انك مصاحبه
ولد و انتِ متزوجه عشان تغيظيني😊
قال كلامو دا و طلع من غرفتي ....الكلام القالو لي كوم و كلامو الفي النهايه دا كوم تاني خالص ، حسسني إني وحده رخيصه بتعمل علاقات مع الأولاد !
حسيت قلبي دا بنزف دم عديل ، أنا ما حصل مره زول اتكلم معاي بالطريقه دي ، ما حصل زول سمعني كلام قاسي زي دي ، أنا ما ببكي بالساهل والله بس كلامو وجعني ! قفلت الباب و جدعت الشنطه و رميت نفسي على السرير و بكيت قدرتي و كل ما أبكي دموعي بتزيد زياده ....
أنا يمكن آخر مره بكيت فيها البكيه دي يوم غسان أنهى البينا و سافر ، يومها بكيت بنفس الطريقه دي و أكتر ، يومها حسيت إني ما حأعيش للصباح ، يومي داك شلتو بكى و قلبي دا حسيتو اتفطر من شدة الوجع....رغم انو ماف مقارنه بين الوجعه السببها لي غسان و بين الوجع السببو لي كلام ناصر بس في الحالتين قلبي وجعني 💔
قعدت أبكي كدا لمن صدعت ، ما نزلت من السرير إلا لمن الضهر أذن ، دخلت الحمام غسلت وشي....لمن طلعت صليت الضهر و من غرفتي ما طلعت تاني ، يعني فجأه كدا كل لحظه عشتها في وجود غسان من أيام الأساس و الثانوي و الجامعه إتذكرتها ، اتذكرت كيف كان يهرشني لمن اتسكع في الشارع مع صحباتي و نحنا راجعين من المدرسه ، لمن يلقاني في حفله عامله روج و يقوم يجبرني أمسحو ، لمن أكون مرسله الدكان و هو يلقاني و يقول لي أرجعي و يمشي بدلي ، لحد السنه التانيه لي في الجامعه نحنا كنا زي السمنه على العسل ، ما كنت شايفه راجل غيرو ، قايمه غسان ، قاعده غسان ، ببكي غسان ، بضحك غسان ، حرفياً هو كان جزو لا يتجزأ من يومي و تفاصيل حياتي ما بتخلو منو ، سيرتو كانت على لساني دائماً ، بحكي عنو لصحباتي في الجامعه و لبنات الجيران الأصلاً عارفين البيناتنا ، كل الناس كانت عارفه انو مها لـ غسان و غسان لـ مها ، ما عارفه الحصل شنو فجأه و غير غسان ....
بعد مسافه خالتي سارا إتصلت علي ، قالت لي وين انتِ نحنا وصلنا و منتظرنك ، قلت ليها ما قدرت أجي ، قالت لي أنا كلمتك و قلت ليك ما حتقدري ....صوتك متغير و تعبان شديد كويسه انتِ ؟؟ قلت ليها كويسه بس كنت نايمه ، لو إتوصلتوا لـ شي كلموني قالت لي تمام....
طبعاً كنت جعانه شديد و من الزعل ما عايزا أنزل تحت عشان ما أشوف ناصر ، بعد شويه كدا سمعت صوت الباب ، ما فتحتو إلا لمن سمعت صوت دانه بتقول لي "مها افتحي الباب" نزلت من السرير و مشيت فتحت ليها الباب ، لقيتها شايله صحن إندومي ، قالت لي هاك أكلي ، شلتها هي و الصحن و دخلت بيهم ، بوستها على خدها و قلت ليها انتِ أكلتي ؟؟ قالت لي أكلت....ختيت الصحن على جنب و قعدت اشاغلها شويه ، بعدها نزلت و قالت ماشه لـ ناصر ، قلت ليها ثواني عشان ما تقعي من السلم ، شلت الصحن و مسكتها من يدها و بقيت أمشي مع الحيطه لحد ما وصلنا السلم ، فـ بقيت أنزل براحه براحه و دانه مستعجله لدرجة أنها قربت توقعني ، في الآخر إتفكت مني و نزلت براها و جرت لـ ناصر ، رفعها و قعدها جنبو و بقى يعاين لي ساي لحد ما وصلتو و إتجاوزتو ، بـ سلة روح دخلت المطبخ و ختيت الصحن و جيت طالعه ، قلت ليهو ما تتعب نفسك معاي ، ما رد علي ....رجعت غرفتي و قفلتها علي ، بعد حكاية ساعه كدا رتاج إتصلت علي ، حكيت ليها بالوقعه ، قالت لي خلاص حأجي أشوفك ، قلت ليها جيبي ليك معاك سندوتشات و ياريت ما تخلي ناصر يشوفك جايباهم معاك ، قالت لي ليييه في شنو ؟؟ قلت ليها بحكي ليك بعدين ، هسي أنا بموووت من الجوع ، ألحقيني ، قالت لي أكيد عامله لـ ناصر حركات و مضربه عن الأكل ! قلت ليها شبه كدا المهم ما تتأخري علي و جيبي لي معاك موية صحه ، قالت لي تمام....
المهم بقيت قاعده و أنا جعانه و عطشانه شديد ، فجأه ناصر جاني داخل ، كان شايل معاهو صينية صغيره و كباية مويه ، جا ختاهم جنبي على السرير و قعد ، طبعاً خالص ما عاينت ليهو ، قال لي اهاااا في شنو كمان ؟؟ صايمه ولا شنو ؟؟!
قلت ليهو أيوه صايمه 😊
قال لي أمشي و أجي ألقاك خلصتي أكل ، قلت ليهو ما عايزا ، شيل صينيتك دي معاك و ما تتعب نفسك معاي ، قال لي مع إنو الموضوع ما مستاهل بس انتِ كالعاده بتحبي تعملي دراما و اتنشن !....قلت ليهو تقول إني بعمل علاقات مع أولاد و تجي تقول الموضوع ما مستاهل !! بتعرفني كويس انت عشان تجي تتكلم عني بالطريقه دي ؟؟! يوم متين شفتني طالعه و نازله مع أولاد؟؟ مصطفى أنا قلت ليك عندي شغل معاهو و......قاطعني و قال لي خلااااص هُس أكلي هسي .... طبعاً لمن كنت بتكلم معاهو دموعي جات نازله ، مسحتهم و قلت ليهو ما عايزا ، قال لي مها بطلي عناد !! قلت ليهو ما عايزا يعني ما عايزا ، قال لي ما بتحسي بالجوع انتِ !؟ قلت ليهو كلامك و اتهاماتك قفلت لي نفسي ، أخد نفس و قال لي تمام آسف !!.... طبعاً إستغربت !! خالص ما إتوقعتو يعتذر مني !!
ما رديت عليهو ، قال لي إعتذار و إعتذرت منك تاني في شنو ؟؟
قلت ليهو أول شي أوعدني انك ما تدخل فيني و تاني ما تصرخ فيني و ما تمنعني أمشي شغلي ، قال لي أنا ما منعتك من شغلك بس ختيت ليك شروط و شرحت ليك ....قلت ليهو ما عايزا زول يقيدني ، قال لي أنا ما مقيدك بس من حقي اعرف بتمشي وين و بتجي من وين ، من حقي أعرف أول واحد لمن تحصل معاك مصيبه أو تواجهك مشكله.....لمن لقاني بعاين ليهو قال لي بس ما تكوني بتقولي في نفسك إني بقول كدا عشان بحبك و ميت فيك !!
لويت خشمي و قلت ليهو أكيد لا ! قايل حبك أو كرهك لي حيفرق معاي مثلاً !؟؟ أنا أساساً ما....قاطعني و قال لي أنا بقيت أصدع من الكلام الكتير ، رجاءً ما تخلينا نعيد و نكرر نفس الكلام .
المهم ما تقعدي جعانه ، عاين لي و عاين للصحن ، قلت ليهو ما عايزا....عاين لي مسافه و شال الصينيه و طلع بيها ، طبعاً أنا مييييته من الجوع و العطش و عيني كانت على الأكل و كباية المويه بس العناد و قوة الراس أخليها لمنو !!
المهم بعد مسااافه باب الغرفه فتح و رتاج جاتني داخله ، نطيييت من السرير و استلمت منها الكيس الجايباهو من دون ما أسلم عليها حتى....فتحتو و قعدت آكل بشراهه و هي تضحك ساي ! قالت لي ناصر كان حارمك من الأكل ولا شنو ، قلت ليهو المويه وين ، قالت لي جوه الكيس ، شلتها و شربتها كلها و ياداب حسيت براحه ، لو اتأخرت شويه كدا كان أغمى علي ، بعد أكلت تمام قلت ليها ما عايزا تاكلي ؟؟
قالت لي بعد شبعتي!!
قلت ليها كنت جعانه والله من الصباح لا أكلت لا شربت ، قالت لي ليه في شنو ؟؟
طوالي حكيت ليها الحصل ، ربعت يدينها و قالت لي كالعاده انتِ الغلطانه و فوق ما انتِ كلامك كلو استفزاز و سخريه عايزاهو يقول ليك أي لأني بحبك عملت دا كلو و كنت خايف عليك !!؟
طبعاً ما قلت ليها إني بكيت ، بقت ترغي و ترغي لي في الموضوع ، قلت ليها كفااايه صدعتي بي ! ولد الناس دا أصلاً ما فارق معاي ياخ ، و انتِ ليه مصره دائماً تطلعيهو صح و أنا غلط !!؟
قالت لي لأنك غلط يا مها ، ناصر دا وريني بس عيبو شنو ؟؟
قلت ليها لو فيهو عيب أو لا أنا ما بهمني! أفهمي ياخ إنو عرسنا دا كان إتفااااق ، قالت لي مش قلتي إنو قال ليك إعتبريهو إتفاق مغلي !! على فكره دي مبادره و خطوه كويسه منو ، هو عايز يصلح الوضع بيناتكم و انتِ عايزا تزيديهو سوء !!
قلت ليها يصلحو ليييه و نحنا ما بنطيق بعض و ما منتظرين حاجه من بعض ! قالت لي ليه محسساني انك عايزاهو يقدم ليك أكتر و يحبك مثلاً !!؟
طبعاً اتزهجت فيها ! قلت ليها حبو أعمل بيهو شنو !!؟ أنا لا بحبو لا عايزاهو يحبني كفاااايه علي غسان و العملو ، قالت لي لسه بتجيبي سيرة غسان !! أنسيهو أنسيهو يا مها عشان تقدري تكملي حياتك مع ناصر لأنو ما معقول تقضوا عمركم كدا بعاد عن بعض رغم انكم في بيت واحد ! و غير كدا حـ تقولوا شنو لأهلكم لمن يكتشفوا انكم ما مخططين لحياتكم مع بعض و ما بتفكروا تكونوا أسره ؟؟!!
قلت ليها رتاج ! أنا حرفياً بقيت أصدع من المواضيع دي ، قالت لي تمام حنقفل الموضع لكن أرجوك حاولي تتجاوزي الإسمو غسان دا ! هو حاجه في ماضيك و ما متواجد في حاضرك و ذاتو ما معروف طفش وين !! قلت ليها أنا.....فجأه سكته لمن شفت ناصر واقف جنب الباب ، رتاج إتلبشت أكتر مني و بقت مره تعاين لي و مره تعاين ليهو ، قال لي خالتك منتظراك تحت ، فجأه سمعت صوت خالتي و هي بتقول ليهو صاحيه يا ناصر ؟ قال ليها أيوه اتفضلي و طوالي زح ليها من جنب باب الغرفه ، دخلت و وراها طوالي إلهام ، جوا سلموا علي و قالوا لي حمدالله على سلامتك ، إلهام قالت لي كدي أشوف رجلك مديت ليها رجلي قالت لي كُر علي رجلك وارمه شديد ، قلت ليها خفت من أمبارح ، سارا قالت لـي بحالتك دي كنتِ ماشه الشغل و كمان جايه تقابلي معانا مصطفى!! بتبالغي والله ! رتاج قالت لي بسبب نقتك و كلامك الكتير نسيتيني رجلك و جبينك و الحصل معاك 🙆
قلت ليهم المهم خليكم هنا هسي برجع ولا أحسن ننزل تحت ! سارا قالت لي وين وين !!؟ خليك برانا بنضيف نفسنا يختي ، خليك قاعده ....المهم رتاج و إلهام قعدوا معاي و سارا لملمت الأكياس القدامي و مشت المطبخ جابت مويه و عصير و جات ، قلت ليهم زهجت من القعده هنا أرح تحت ، إلهام ضحكت و قالت ليهم أرح تحت البت دي ما حترتاح لو ما شافت راجلها ... طبعاً قعدوا يضحكوا ، المهم لمن نزلنا تحت ناصر و دانه ما كانوا موجودين ، إلهام قالت لي كمان ما نكون ضايقنا راجلك!! قلت ليها لا لا ناصر مستحيل يتضايق من وجودكم ، المهم عملنا شاي و قهوه و جبنا مكسرات و قعدنا نتونس ، قلت ليهم أحكوا لي الولد قال ليكم شنو ؟؟
إلهام قالت لي حاولنا نستدرجوا بالكلام بس هو لسه مصر على كلامو و قال للمره التانيه إنو علاقتو بـ عماد مقطوعه من زمان ، سارا قالت لي خلاص اتضح إنو بكذب ، رتاج قالت لينا بتتكلموا عن شنو ؟؟...طوالي حكينا ليها ، قالت لينا خلاص معناها صحبو هو الإتسبب في وفاتو ، سارا قالت ليها و الدافع شنو ؟؟! قالت ليها الله أعلم السبب بس شنو الخلاهو يكذب و يقول إنو ما متواصل معاهو و هو حسب الصور القلتوا عنها قبل أسبوعين من وفاتو متصور معاهو !!؟
سارا قالت ليها لسه في حاجات ما واضحه بس أنا متأكده إنو المؤتمر الجاي حيكون آخر مؤتمر بخصوص القضيه دي ، قلت ليها جايبه الثقه دي من وين ؟؟...طوالي إلهام عاينت لـ سارا خالتي و قعدت تتبسم ، قلت ليهم هييي في شنو فهموني ؟؟! قالوا لي ماف شي ....المهم إتونسوا معاي قدرتهم بعدها استأذنوا عشان يمشي ، كنت حأقدمهم لحد الباب بس هم رفضوا ، قالوا لي خليك قاعده ، أول ما وصلوا باب الهول كدا ناصر جا داخل و هو شايل دانه ، قال ليهم بدري يخوانا أقعدوا اتغدوا معانا ، قالوا ليهو لا لا قعدنا كتير والله ، إلهام قالت ليهو آسفين شردناك من بيتك ، قال ليها العفو ماف كلام زي دا والله ، أنا طلعت بـ دانه لأنها زهجت و كانت بتبكي....سارا قالت ليهو دي بت أختك نازك مش ، قال ليها أيوه ، إلهام قالت ليهو دفعتها ليك ولا شنو ! قال ليهم حـ تقعد معاي كم يوم كدا لأنو أمها مشغوله ، طبعاً إلهام كانت حتتكلم تاني و تقعد تسألو بس رتاج طلعتهم و قالت ليهم يخوانا خلونا نمشي بعد دا !!
المهم هم مشوا و ناصر جا داخل و مشى غرفتو طوالي ...
أتحبها ؟
لا
لماذا لا ..؟
عنيـدة ، تتكلم قبل أن تُفكر ، لا تعرف ماذا تقول .. صريحةٌ أكثر من اللازم .. لكن هي خجُولة كثيرًا .. تبكي بسرعـةٍ .. وتضحك أسرع .. غير مفهـومة ، مزاجها متقلب .. لكن
لكن ماذا..؟
هي ناعمـة وبريئة .. وتخلق من مأساتها ضحكة ، ومن مُشكلتها نكتـه .. لاتعرفُ التفكيـر بنفسها .. وأيطّا حنونـة كثيرًا ، كأنها أخذت دور الأمومة مع الذين تحبهم ، لاتأذي ولا تكذب .. ومهما حاولت ملامحها تفضحها .. هي إنسانة غريبة ...!!
كل هذا ولا تُحبها ... !!
نعم لأن مشاعري إتجاهها وارتباطي.، وتعلقي بها فاق مرحلة الحب بل أنا مجنون بها .”💜
لكاتبه
يتبع.......
