زهرة فؤادي

13

#زهرة_فؤادي13
مها حولي الزاكي

تاني يوم أول ما فتحت عيوني لقيت ناصر في وشي ، غمضت عيوني و فتحتهم و استحضرت الحصل ، إبتسم و قال لي صباح الخير يا كل الخير ، إبتسمت ليهو بخجل ، قال لي من قبيل منتظرك تصحي عشان اصبح عليك لأني طالع ، قلت ليهو ماشي وين ؟! قال لي الشغل !!
إتوسدت يدو و جريت الغطى علينا الإتنين و قلت ليهو لا انا ما عايزاك تمشي ، ضحك و قال لي ما اتوقعت يجي يوم و تقولي كدا ، عندي شغل مهم ، ضيقت ليهو عيوني و قلت ليهو أمشي طيب ما اأخرك عن شغلك ، قال لي أنتِ أهم من شغلي ، كلو ولا زعلك ، قلت ليهو ناصر بالجد لو شغلك مهم أمشي ، قال لي عايزا تتهربي صح ؟؟ ماف شي بخلصك مني اليوم.....

المهم في اليوم البعدو بعد ما جيت من الشغل ، رشا إتصلت علي و قالت لي لو في البيت أنا جاياك ، قلت ليها تعالي في البيت أنا ، قالت لي تمام باقي لي محاضره وحده بس و أطلع ، المهم بعد حكاية ساعه كدا هي جات ، قلت ليها محاضرتك دي كانت 5 دقايق ولا شنو ؟؟ قالت لي لا بس إتلغت .... طبعاً كان واضح إنها متضايقه ، مشيت جبت ليها مويه و عصير ، عاينت للحنه و الرسم في يديني و قالت لي كدا ياداب حسيتك معرسه ، رسمتي متين ؟؟
قلت ليها قبل يومين و حكيت ليها عن البرنامج و عن اننا كنا معزومين في بيت أهل ناصر ، قالت لي اهااا كويس والله ، قلت  ليها خليك من دا و أحكي لي مالك ؟؟
طوالي قعدت تبكي ، خلعتني طبعاً ، قلت ليها رشويه كدي قولي بسم الله مالك في شنو ؟؟
ما ردت علي كانت بتبكي بحرقه ، ضميتها علي و بقيت أطبطب عليها ، أثناء ما أنا بتكلم معاها و بحاول أهديها شويه ناصر جا داخل ، هي طوالي مسحت دموعها و صلحت قعدتها ، جا سلم عليها و قال ليها نورتي البيت والله و عايني لي بإستغراب نظام في شنو ؟!! هزيت ليهو راسي بس ، قال لي عن إذنكم ماشي أخد لي دوش ، رشا قالت لي جيت في وقت ما مناسب ، فجأه ناصر من السلم قال ليها والله تاني تقولي كدا يا رشا حـ اختلف معاك ، البيت بيتك تجي في أي وقت ماف أي مشكله و أنا طالع فوق لأني عايز أنوم شويه و عايز أديك مساحه انتِ و أختك عشان تاخدي راحتك فـ بس إياك تتحسسي و تقول إنك جيتي في وقت غير مناسب فاهمه ولا لا ؟؟ قالت ليهو فاهمه ، بعد ما مشى قلت ليها ثواني هسي برجع ليك و في المسافه دي هدي لي نفسك عشان تعرفي تحكي لي ، قالت لي طيب ، المهم شلت مويه لـ ناصر و مشيت وديتها ليهو في غرفتو ، لقيتو راقد و مغمض عيونو ، لمن ختيت يدي على جبينو هو فتح عيونو ، قلت ليهو ناصر كويس إنت ؟؟
قعد و قال لي كويس أنا ، قلت ليهو ما ظاهر كدا ، باس يدي و قال لي صداع هسي حـ يروح بعد ما أخد لي دوش ، قلت ليهو ثواني طيب ، فتحت الدرج و طلعت حبوب بندول ، قلت ليهو هاك أبلع من ديل ، أول ما شالهم مني خطفتهم منو و قلت ليهو دقيقه انت ماكل شي ؟؟
قال لي ايوه ، قلت ليهو عشان ما كويس تبلع حبوب و المعده فارغه قال لي لا لا ماكل الحمدلله ، طلعت حبه و قلت ليهو افتح خشمك ، دخلت الحبه في خشمو و أديتو يشرب مويه ، قلت ليهو بعد ما تطلع من الحمام تعال نوم طوالي ، ما ألقاك فاتح اللابتوب أو التلفون ، مفهوم ؟؟ قال لي حااااضر ، قلت ليهو حـ أمشي لـ رشا ، قال لي مالا هي !؟ لأنو كان واضح إنها بتبكي ؟ حاصله معاها مشكله ولا حاجه ؟؟
قلت ليهو ما عارفه والله هسي ياداب ماشه أقعد معاها و أفهم الحاصل ، قال لي تمام بس لو في شي و الموضوع كبير كلموني تمام ؟؟ قلت ليهو تمام ، المهم نزلت ليها تحت و قعدت معاها ، قلت ليها يلا أحكي !!
قالت لي أنا مش قبل كدا حكيت ليك عن حسام أخو فدوى ؟؟ قلت ليها أيوه متذكره ، قالت لي أنا ما قدرت أمسك نفسي و رغم إني ما متأكده إذا عندو مشاعر لي ولا لا بس مع ذلك مشيت و إعترفت ليهو .....قلت ليها شنووووو !!...طيب ردة فعلو كانت شنو ؟؟
قالت لي : ما قال حاجه و صحباتي جوا و قالوا لي لازم نمشي بعد دا ، قلت ليها كنتوا وين انتوا ؟؟ و متين الكلام دا ؟؟
قالت لي قبل يومين ، كنا في بيت ناس فدوى لأنو أبوها عملوا ليهو عمليه ، مشينا ليها أنا و الشله ، بعد ما سلمنا على ابوها و ناس البيت قعدنا في الصالون و كنا بنتونس مع بعض و أنا لمن زيدان اتصل علي طلعت برا عشان جوه كان في جوطه شديده و أصلاً كان معاهم ضيوف غيرنا ، المهم بعد ما اتكلمت مع زيدان و وريتو اتأخرت ليه و قفلت منو حسام جا ماري بجنبي لمن شافني سلم علي و سألني عن أخباري و كدا و بقى واقف بتونس معاي و سألني ليه بقيت متغيره الفتره الآخيره و فعلاً أنا في اخر فتره اتغيرت عليهو لمن حسيت إننا ما مناسبين لبعض و اني برهق نفسي و بستهلك طاقه على الفاضيه ، لمن أصر علي شديد و بقى يتكلم معاي بلطافه ما قدرت أمسك لساني و الفي قلبي قلتو ليهو ، أول ما إعترفت ليهو صحباتي جوا طالعين من جوه مع فدوى سلموا عليهو و قالوا لي خلينا نمشي بعد دا ....قلت ليها يمكن عشان اتفاجأ ما قدر يقول حاجه ، قالت لي كان ممكن يرسل أو يتصل ، قلت ليها ماف مشكله أديهو يومين تلاته كدا و لو طلع بحبك و جا إعترف ليك خير و اذا لا برضو خير لأنك حتكوني عرفتي انتِ شنو بالنسبه ليهو و ما حـ تستهلكي مشاعرك على الفاضي ....قالت لي أنا عرفت موقعي شنو ، أصلاً شنو الخلاني أتخيل إنو ممكن يعاين لـ وحده سمينه زيي !؟ معقوله يخلي البنات ديل كلهم و يجي يحبني أنا !؟؟
قلت ليها رشا مية مره قلت ليها ما تقولي كدا عن نفسك و ما تقللي من قيمتك ! هسي مالك انتِ حلاة الدنيا عليك ، قالت لي ما تكذبي ، أنا بسبب سمنتي دي ما قادره أشوف أو أحس اني سمحه ، ما أنا بس كل الناس شايفين إني عباره عن حاجه ضخمه متحركه....قالت كدا و قعدت تبكي ، قلت ليها عااايني انتِ دا منو القاعد يقول عنك كدا ؟؟ حسام سمعك كلام زي دا ؟؟
بعد مسافه قالت لي لا بس فدوى قالت عني كدا و قالت مستحيل أخوها يعاين لـ وحده زيي ، قلت ليها شنوووو !! فدوى صحبتك ما غيرهااا !!
قالت لي ايوه ، قلت ليها متين قالت الكلام دا و انتِ قلتي ليها شنو لمن قالت ليك كدا ؟؟
قالت لي هي ما قالتو في وشي ، كانت بتقول كدا قدام صحباتنا من يوم حست إني بحب أخوها ، قلت ليها ما قادره أصدق !! معقوله فدوى صحبتك الروح بالروح تقول كدا عنك !! اتصدمت فيها بالجد ، قالت لي أنا ذاتي ما اتوقعتها تقول كدا لكن لو جينا للحق هي كلامها صح ، منو الحـ تقبل إنو أخوها يعرس وحده سمينه زيي !!؟ خليها هي أخوها زاتو ما حـ يقبل ... قلت ليها غاظتني بالجد !! بغض النظر عن كل شي انتِ صحبتها و ما مفروض تقول كلام زي دا عنك !! ما عايزاك لأخوها كوم و كونها تتكلم عنك بالطريقه دي قدام صحباتكم كوم تاني خالص !!
المهم قعدت أواسيها و أحنس فيها ، قالت لي أنا بأي طريقه لازم أنزل وزني دا ، قلت ليها لو عايزا تنزليهو عشان نفسك و عشان حـ تكوني مرتاحه ما عندي مانع بس لو عايزه تجهدي نفسك و تقومي و تقعي و تسلكي كل الطرق الممكنة و الغير ممكنه و تنزلي بيها وزنك عشان حسام ممنوع ! لأنو البحب دا بحبك في كل الحالات ، قالت لي دا كلام فارغ ....بالمنطق كدا ، إذا انت قادر تحب بصدق حـ تحب ليك وحده سمينه ولا وحده وزنها مناسب و قوامها رفيع و أي لبس بطلع عليها شيك و بتكون أنيقه !!
قلت ليها دا بالعقل ، بس البحب هو القلب ، قالت لي هسي انتِ لو كان جا اتقدم ليك واحد سمين بدل ناصر كنتِ حـ تقبلي ؟؟ قلت ليها رشا ...قاطعتني و قالت لي جاوبيني ، قلت ليها لو ما بحبو أكيد ما حـ أوافق عليهو ، قالت لي طيب ناصر دا في البدايه كنتِ ما بتحبيهو بس مع ذلك وافقتي !! صدقيني المظهر واحد من أسباب الحب ، عادي تحبي واحد بس عشان مظهرو لبق و شكلو حلو ، قلت ليها بس انتِ ما شينه و السمنه هي المنفسنه بيك و مقلله ثقتك بنفسك !!
قالت لي المهم عايزا أمشي البيت ، قلت ليها لا حـ تقعدي تتغدي معاي ، قالت لي لا لا حـ أمشي ، قلت ليها يا زوله اسمعي الكلام ! قالت لي فترانه أنا ، قلت ليها تعالي طيب ....دخلتها أقرب غرفه و قلت ليها نومي و أخدي راحتك و ناس البيت أنا حـ أتصل عليهم و أكلمهم إنك معاي ....المهم خليتها في الغرفه و طلعت اتصلت على ناس البيت و كلمتهم إنو رشا معاي ، بعدها بقيت أفتش على اسم فدوى لحد ما لقيتو ، طبعاً كنت زعلانه منها شديد لأني ما اتوقعت منها حاجه زي دي ، ياخ فدوى دي أيام الإمتحانات كانت بتجي و بتبيت مع رشا و بذاكرو سوا و رشا نفس الشي بتمشي معاها بيتهم ، كانوا صحبات شديد بياكلوا و بشربوا سوا و بعد دا كلو فدوى تجي تتكلم عنها بالطريقه دي !!؟؟
المهم إتصلت عليها بس ما ردت ، ما حاولت تاني ، قلت ما مشكله يوم بمشي ليهم في الجامعه لو ما رجعت إتصلت علي ، المهم مشيت غرفة ناصر لقيتو نايم و الغرفه كانت بارده شديد ، خفضت درجة التكييف و غطيت ناصر و جيت رقدت جنبو ، يمكن بعد حكاية ساعه كدا صحيت لمن حسيت إنو سحب يدو الكنت متوسداها ، لمن فتحت عيوني قال لي آسف آسف كنت بحاول أقوم من دون ما أصحيك ، قلت ليهو ماف مشكله ، طمني بقيت كيف ؟ الصداع راح ؟؟
قال لي أيوه ، قلت ليهو الحمدلله ، قال لي أرجعي كملي نومك قلت ليهو لا كفايه ، رشا قاعده و عايزاها تتغدا معانا ، ضحك و قال لي تمام يعني أقوم أطبخ ؟؟
قلت ليهو لا لا نحنا حـ نطبخ ، لمن عاين لي جوه عيوني و إبتسم قلت ليهو قصدي رشا هي الحـ تطبخ ، المهم انت ريح نفسك ، قال لي بالمناسبه رشا الحاصل معاها شنو كلمتك صح ؟؟
قلت ليهو أيوه ، قال لي ماف موضوع خطير صح ؟؟ قلت ليهو أيوه كلو تمام ....المهم نزلت تحت و خليتو في الغرفه ، دخلت لـ رشا لقيتها ياداب صحت ، قلت ليها أرح أطبخي معاي ، قالت لي قولي لي أرح أطبخي لي ، قلت ليها ما فرقت ، المهم الإتنين مشينا المطبخ و هي بدت تطبخ و أنا قاعده في المسطبه و بعاين ليها ، قالت لي هسي لو أنا ما كان جيت و طبخت ليكم حـ تأكلوا شنو ؟؟
قلت ليها ناصر هو البطبخ ، قالت لي بتبالغي ، يا حليلو مسكين والله ، ضحكت بس ، بعدها قلت ليها حـ اعمل الجبنه قالت لي لا لا إياك خليها بعملها أنا ، قلت ليها ما واثقه فيني ؟؟ قالت لي أكيد و انتِ عارفه نفسك و عارفه انك ما بتظبطيها قلت ليها خلاص عرفت 🙂
المهم فتحت الدرج و شلت 2 إندومي و بقيت أعمل فيهم ، رشا قالت لي إنتِ الإندومي دي لسه ما خليتيها ؟؟ قلت ليها ولا حـ أخليها ، قالت لي لاحظي للحساسيه البدت تظهر في وشك بسببها ، قلت ليها مع ذلك ما بقدر أخليها ، المهم عملتها و هي عملت الجبنه و خلتها جاهزه و رجعت تطبخ ، ختيت الإندومي في صحن و قعدت على الطاوله ، قلت لـ رشا تعالي أكلي ، شالت منها شويه و قالت لي ما بحب أكلها كتير ، أول ما كنت حـ أشيل منها كدا فجأه جا ناصر و شال مني الصحن ، قال لي لو أكلتيها ما حـ تخليك تتغدي ، قلت ليهو ما عايزا غدا أديني الإندومي ، قال لي لا ، انتِ بسبب الإندومي دي ما قاعده تأكلي ، رشا قالت ليهو حتى في البيت كانت بتعمل كدا ، الإندومي دي بتاكلها 24 ساعه ، قال ليها المشكله إنها بتكتفي بيها و تاني ما بتاكل شي ، قلت ليهو والله حـ اتغدى بس هسي رجع لي الإندومي ، قال لي لا أكليها بعد الغدا .....قدر ما حنستو و ألحيت عليهو عشان يخليني آكل الإندومي كان رافض !! رشا قالت لي اسمعي الكلام !...المهم في النهايه إستسلمت و قلت ليهم طيب ...رشا قالت لي قربت أخلص ، ناصر قال ليها إستغلت وجودك و خلتك تطبخي صح ؟! قالت ليهو إتخيل ، قال ليها مفروض الواحد قبل يعرس أول شي يسأل إذا البت دي بتعرف تطبخ ولا لا عشان ما يتموسر زي ما أنا إتموسرت ، رشا ضحكت و قالت ليهو ناصر أعمل حسابك ، عاين لي و قعد يضحك ، قلت ليهو ما فات شي ، الشرع محلل ليك 4 حاول تتزوج وحده شيف ، رشا قالت لي بتقولي كدا سااااي بس لو حصل جد ببقى ليك حار ، قلت ليها بري ....ناصر عاين لي بنظره جاده و قال لي متأكده إنو عادي و ما حـ يفرق معاك ؟؟
طبعاً من ملامح وشو حسسني إنو جادي و منتظرني بس اديهو إشاره !! ...كان في سكين على المسطبه ، قلت ليهو شايف السكين ديك ؟؟!
انت بس جرب تعاين يمين ولا شمال عشان تلقاها مغزوزه في نص قلبك .... طبعاً هو و رشا قعدوا يضحكوا ، رشا قالت ليهو حتى الهظار وجعها ، قال ليها ايوه واضح ، قعدت أدندن و أعمل نفسي ما سامعه كلامهم ، المهم ناصر ذاتو بقى يطبخ معاها ، قلت ليهو استعجلوا ياخ !! ما معقوله أنا جايباكم اتنين و بدفع ليكم مبالغ كبيره و مع ذلك انتوا بطيئين !! لو استمريتوا كدا حـ أطردكم و أجيب خدم غيركم .... طبعاً الإتنين إتلفتوا علي ! بعدها قعدوا يضحكوا ، ناصر قال لـ رشا أختك دي صدقت نفسها ، قالت ليهو ليها حق تقول كدا لأنها قاعده سااااي ، ....تااااني قعدت أدندن و أغني و أعمل نفسي ما سامعه كلامهم ....المهم رجعوا يشتغلوا عادي ، أنا اتحركت من مكاني جبت لي مويه و رجعت قعدت مكاني و بديت أشرب في المويه ، فجأه رشا قالت لي مهاااوي ما وريتك غسان امبارح رجع من السفر و اليوم أهلو عاملين ليهو كرامه .... طبعاً لمن قالت لي كدا إتشرقت بالمويه و ملامح وشي كلها إتغيرت !! ناصر قال ليها دا منو قريبكم ولا شنو ؟ قالت ليهو لا لا دا ولد جيرانا....ناصر عاين لي و قال ليها اهااا.... طبعاً كان مستغرب فيني لأني اتشرقت أول ما هي جابت لي سيرتو و لأنو ملامح وشي إتغيرت !!
سرحت بعيد و بقيت أعيد في الذكريات ، نسيت نفسي و كل الناس الحوليني ، ما إنتبهت على نفسي إلا لمن رشا طقطقت لي بأصابعها ، لمن ركزت لقيتهم ختوا الأكل قدامي و قعدوا عشان نبدا نتغدا ، ناصر قال لي سرحتي وين ؟؟
قلت ليهم ولا شي ، رشا قالت لينا والله والله انا جعانه يخوانا خلونا نبدا !!...قلت ليهم أكلوا انتوا أنا ما جعانه! رشا قالت ليييه مالك ؟؟
ناصر قال ليها دي حركات ساي منها عشان شلت منها الإندومي ، قلت ليهو لا لا ما جعانه أنا و طوالي وقفت على حيلي عشان أمشي ، شال صحن الإندومي و ختاهو قدامي و قال لي عارفك عنيده ! ياها الإندومي قدامك أقعدي أكليها ، قلت ليهم نفسي قفلت منها ، ما عايزا حاجه ....قلت كدا و طوالي مشيت خليتهم ، دخلت غرفتي و قفلت الباب علي و قعدت أبكي كل ما اتذكر موقف أو ذكرى مع غسان .....
بكيت كدا لمن صدعت ، بعدها دخلت الحمام غسلت وشي و أول ما جيت طالعه لقيت ناصر في الغرفه ، جا علي و قال لي في شنو قولي ؟؟
قلت ليهو ولا شي و طوالي زحيت منو و طلعت برا الغرفه ، لقيت رشا في المطبخ بتغسل في العده ، قلت ليها ما كان تتعبي نفسك ، عاينت لي مسافه و قالت لي مشكلتي خشمي خفيف ، صدقيني أنا نسيت انك يوم من الأيام كنتِ بتحبي غسان ، من دون ما أفكر أو انتبه إنو ناصر موجود جبت سيرتو ، قلت ليها عادي الموضوع ما خطير ، قالت لي لكن انتِ ....قاطعتها و قلت ليها ما تجيبي لي سيرتو ، المهم غيرنا الموضوع و كلمتها إني اتصلت على فدوى صحبتها بس ما ردت علي و ما رجعت لي ، قالت لي شنووو !! إياك تتصلي عليها تاني و لو رجعت ليك حلفتك يا مها ما تجيبي ليها سيرة الموضوع ، ما تندميني لأني حكيت ليك ...ما رديت عليها ، قالت لي حسام أنا ذاتي شلتو من بالي و ما عايزاهو و ما عايزا أعشم فيهو أكتر ، بس كل العايزاهو منك ما تفتحي الموضوع دا مع زول حتى فدوى ، رجاءً يا مها ما تندميني ، قلت ليها طيب ....المهم بعد المغرب بربع ساعه رشا قالت حـ تمشي قلت ليها لا بيتي هنا اليوم ، أصلا ً أنا لمن اتصلت على ناس البيت كلمتهم انك حـ تبيتي معاي ، قالت لي طيب أحسن ذاتو لأنو أمـي ليها يومين بتسألني مالك و الحاصل عليك شنو و أنا كنت بتهرب من اسئلتها دي ، المهم اليوم حـ اقعد مع نفسي شويه و حـ أحاول أكون أحسن من كدا و أنسى إني إعترفت لـ حسام و إنو أحرجني ، قلت ليها هو الخسران ....المهم رايك شنو الليله نساهر مع بعض و نعمل لينا فشار و نحضر فلم ظابط ؟!
قالت لي يا سلاااام ، المهم مشيت جبت ليها بجامه من حقاتي ، طبعاً ناصر طلع و ما عارفاهو مشى وين ، المهم بعد صلينا العشا ، اتصلنا على خالتو سارا فيديو كول و بقينا نتونس معاها ، قلت ليها سلطان أخبارو شنو ، قالت لي بسلم عليك ، قلت ليها الله يسلمو لي من كل شر ، قالت لي يا بت هوووي إحترمي نفسك ، رشا قالت لينا طبعاً أنا زي الأطرش في الزفه ، طوالي حكيت ليها ، قالت وااااي أخيراً سارا حـ تفك بورتها ، قالت ليها يا بت أنا خالتك ولا ما خالتك ؟؟ قالت ليها خالتو البايره ، قالت ليها برااااي كنت مبوره نفسي لأني ما بقبل بأي زول و السلام و اصبري لي يا كلبه بلم فيك يوم 🙂🤌
طبعاً قعدت أضحك فيهم ، سارا قالت لي رشا دي بايته معاك ولا شنو ، قلت ليها ياداب انتبهتي اننا بنتكلم معاك من نفس المكان و بتلفون واحد !؟
قالت لي صدقي ياداب انتبهت ، رشا قالت ليها عشان فكرك كلو مع سلطان ، قالت ليها برررري هو البكون بفكر فيني حالياً ، عارفه نفسي خاطفه قلبو و مجهجه أفكارو ، رشا قالت ليها و أنا أقول مها جايبه النرجسيه دي من وين ، اتاريها منك انتِ ....المهم إتكلمنا مع بعض كدا لحد الساعه 11 ، سارا قالت لي دي عرفناها هامله ساي و ما عندها زول يلمها انتِ المقعدك معاها شنو للزمن دا ، قووومي شوفي راجلك بوين ، قلت ليها اليوم أنا و هي حابين نساهر مع بعض و نحضر فلم ظابط ، قالت لينا خلاص أقطعوا وشوشكم نعست أنا....المهم بعد قفلت منها طلعت مشيت المطبخ عملت فشار و شلتو جبتو غرفة رشا ، بعدها طلعت و مشيت فوق عشان أشوف ناصر جا ولا لسه لأني قلقت ، لمن ما لقيتو طوالي إتصلت عليهو ، لمن رد علي قلت ليهو ناصر وين انت و ليه طلعت فجأه كدا من دون ما تكلمني !؟ فجأه جاني صوت توته و هي بتقول هاك التلفون يا ناصر دي مها ... طبعاً إختنقت !!...شال منها التلفون و قال لي مها ...بالشده حركت لساني و قلت ليهو اتأخرت ، قال لي فعلاً للضروره ، لمن أرجع البيت بحكي ليك ، تربسوا باب الشارع عليكم ، قلت ليهو طيب ، المهم مشيت تربست الباب و رجعت لـ رشا قالت لي تعالي الفلم قرب ، طبعاً كنا فارشين على الأرض و خاتين مخدات ، قالت لي مالك ؟؟
قلت ليها ولا شي ...قالت لي طيب ناصر وين ؟؟ قلت ليها برا البيت ، طلع ضروري و قال حـ يرجع بعد شويه ، قالت لي ما متناقشه معاهو ؟؟ قلت ليها لا ، قالت لي طيب ليه زعلانه ؟؟ قلت ليها ياخ أنا ما زعلانه ، قالت لي خلي الغتاته ، أنا مش قاعده أحكي ليك !؟
المهم في الآخر حكيت ليها و وريتها بـ حركات توته و لصقتها في ناصر لكن ما حكيت ليها بالنبذ القالتو لي ، قالت لي بالجد البت دي لصقه و ما عندها كرامه و ناصر ليه مديها وش بعد ألفاظها و حركاتها دي كلها !! و هسي الوداهو ليها شنو ؟؟قلت ليها ما عارفه قال لي لمن أرجع بحكي ليك ، قالت لي دي شنو البت الشومه دي و و و المهم قعدت تنبذ فيها ، قلت ليها خلينا منها الفلم خلاص بدا.....المهم بقينا نحضر ساي و نحنا طافين الإضاءه ، بعد نص ساعه كدا سمعنا صوت الجرس ، رشا قالت لي دا منو الجاي في زمن زي دا !؟ قلت ليها أكيد ناصر ، قالت لي ما معاهو مفاتيح ؟؟ قلت ليها الباب متربس من جوه إلا أمشي أفتحو ليهو ، قالت لي ثواني حـ أمشي معاك ، المهم مشينا الإتنين عشان نفتح الباب ، رشا قالت لي واااي أنا خايفه ، دي نفس اللقطه الحضرناها قبل شويه في الفلم لمن البت فتحت الباب و نط فيها وحش ، قلت ليها أسكتي ياخ و طوالي فتحت الباب و أنا خاته يدي على قلبي و رشا خاته يدها على خشمها ، أول ما شفنا ناصر إرتحنا شويه ، رشا قالت ليهو متنا من الخوف ، ضحك بس و قال اتفضلي يا توته .... طبعاً لمن جات داخله أنا وشي جاب ألوان و طوالي عاينت لـ ناصر ، راسها كان ملفوف بـ شاش و كانت بتعرج برجلها و وشها فيهو جروح ، قالت لينا سلام كيفكم ....رشا بس الردت عليها ، ناصر قفل الباب و سندها و دخلها جوه و أنا واقفه في مكاني ، رشا قالت لي دي هي ؟؟
قلت ليها ايوه ، قالت لي دا شنو أنا ما قادره افهم !! ناصر جايبها معاهو ليه ، ما عندها أهل هي !!...ما رديت ، عاينت لـ نفسها و قالت لي واااي ما انتبهت على نفسي !! عايني أنا طلعت قدامو بـ بجامه و من دون طرحه كمان و بجامتك أصلاً ضيقه فيني ، .... طبعاً ما كنت مركزه مع كلامها ، حسيت بـ بركان جواي ، يعني معقوله بعد النبذ النبذتو لي و لأهلي و تهديدها الوسخ داك ناصر بكل بساطه جايبها البيت !؟ بعد مسافه قلت لـ رشا خلينا نمشي نتم فلمنا و طوالي مشيت قدامها ، قالت لي لو هم قاعدين في الهول أنا ما حـ أدخل قدام ناصر كدا ، دخلت الهول و لقيتهم ماف ، قلت يكون ما قصر لو دخلها معاهو غرفة نومو 😊
إتلفت على رشا و قلت ليها خشي ساي ماف زول في الهول و طوالي مشيت دخلت الغرفه ، رشا جات لاحقاني و قالت لي مشوا وين ديل ؟؟
قلت ليها ما عارفه و ما تركزي معاهم خليهم يعملوا العايزنوا ، بعد شويه كدا ، ناصر إتصل علي ، عملت التلفون صامت ، اتصل كتير بس ما رديت عليهو ، بعدها بشويه سمعنا صوت الباب ، رشا طوالي لفت نفسها بأقرب قطعة قماش لقتها ، لمن مشيت فتحت الباب لقيتو ناصر و كان واقف يمين الباب و بعيد عنو شويه عشان رشا و كدا ، قلت ليهو خير ؟؟ قال لي اطلعي عايز اتكلم معاك ، قلت ليهو ما فاضيه أنا عندي فلم عايزا أحضرو....طوالي جراني من يدي و سحبني معاهو ، قلت ليهو فكني ياخ ، قال لي وطي صوتك و ماف داعي نتناقش أو نعمل مسرحيه قدام الناس ، أرح فوق عشان نتفاهم ، قلت ليهو نتفاهم في شنو ؟؟
ما رد علي ، دخلني غرفتو و قال لي توته دي حصل معاها حادث ، و عشان ما عندها زول إتصلت علي و أنا مشيت ليها في المستشفى ، قلت ليهو أهلها وين ؟؟ قال لي أهلها في الولايات و هي جات هنا قرت الجامعه و اشتغلت كانت بتسافر ليهم من فتره للتانيه ، قلت ليهو المكان الكانت قاعده فيهو دا ما كان ممكن توديها ليهو بعد ما طلعت من المستشفى!؟ و بما إنها طلعت في نفس اليوم معناها ضربه خفيفه ....قال لي ليها يومين في المستشفى قاعده براها و ما فكرت تتصل علي و تكلمني لأنها خجلانه بسبب آخر موقف حصل و أصلاً هي ما عرفت إنو دي إنتِ الخاشه بصفحه وهميه إلا يوم اتصلت عليها و شاكلتها ، قلت ليهو و الليله خجلها راح عشان كدا إتصلت عليك ؟؟؟ ياخ دي وحده كذابه و مستهبله ساي و ممثله بارعه ، قال لي بالجد البت عامله حادث 😊
قلت ليهو اقنعني بس انها ما بتعرف زول غيرك تلجأ ليهو ، قال لي البتعرفهم كتار بس توته حساسه ما بتحب تتعب الناس معاها و ما ساهل عندها إنو تطلب مساعده من زول ، قلت ليهو بالله !! لو هي كدا ليه اتصلت و كلمتك ؟!! ولا انت حاله خاصه ؟؟
قال لي ايوه انا حاله خاصه 😊
ربعت يديني و قلت ليهو تمااام ربنا يهني سعيد بـ سعيده ، إذا انت نسيت الكلام القالتو عني و عن أهلي و اتجاوزتو أنا مستحيل أنساهو ليها و صحي الجمره بتحرق الواطيها..... كنت حأطلع بس مسكني من يدي و قال لي أنا ما جبتك هنا عشان تمشي مني و انتِ زعلانه ، قلت ليهو أنا ما زعلانه ...الكلام واضح و فهمت اللازم أفهمو ، قال لي الحاجه الوحيده المفروض تفهميها هي اني ما شايف غيرك و مكانتك عندي ماف زول بياخدها ، انتِ براك في كفه و الباقين كلهم في كفه تانيه ، توته صديقه وفيه ، وقفت معاي كتير و ما قصرت مني و جمايلها أنا ما ناسيها ليها و متى ما جاتني فرصه حأردهم ليها ، قلت ليهو بس ما على حسابي أنا يا ناصر !!
قال لي كيف على حسابك ؟؟ أنا بتعامل معاها عادي جداً جداً و مستحيل هي تاخد مكانك و الكلام القالتو ليك أنا ما ناسيهو بس كمان ما بقدر أنكر حقيقة انها ما كانت عارفه إنو دي انتِ !؟ ما هي بس انا كمان ما كنت حأعرف لو ما جيتي انتِ بنفسك و قلتي لي ، قلت ليهو ما عارفه بس البت دي أنا ما برتاح ليها ، ضحك و قال لي انتِ ما اظن في زول بترتاحي ليهو ؟!
سكته مسافه و قعدت أعاين ليهو.....
سحبني عليهو و قال لي خليك واثقه إني مستحيل أبدلك أو أخلي زول ياخد مكانك ، انتِ بقيتي جزو لا يتجزأ مني ، ما بقدر استغني عنك حتى لو أنا عايز كدا ، أنا أدمنتك عديل و ما قادر اشيلك لا من عقلي لا من بالي و ....فجأه سمعنا صوت الباب ، قال لي خربوا علينا اللحظه ، لمن فتح الباب زي ما إتوقعت طلعت توته لأنو رشا مستحيل تجي و تضرب لينا باب غرفتنا ، قالت ليهو آسفه يا ناصر بس ما لقيت الحبوب الجبتها لي قبيل ، قال ليها ختيتها في غرفتك ، بتكوني ما شفتيها ثواني أشوفها ليك ، لمن ناصر مشى ، قالت لي آسفه لو أزعجتكم يا مها ، والله ما قصدي ، ما قلت ليها حاجه ، قالت لي أنا جايه اعتذر منك على الكلام القلتو ، والله ما كنت عارفه إنو دي انتِ ، بالجد لو كنت عارفه صدقيني كلمه وحده غلط ما كانت حـ تطلع مني ليك .....ما رديت عليها ، طلعت من الغرفه و مشيت لـ رشا و قعدنا نحضر في الفلم ، طبعاً أنا عامله نفسي مبسوطه و مركزه مع الفلم بس من جواي حاسه بنار و مغيوظه من وجود الزفته ديك ، و  خالص ما إتعاطفت معاها ، تلفوني كان جنبي ، بعد شويه جاني إشعار إنو في رسايل في الواتس ، طبعاً أنا نسيت الشبكه فاتحه ، فتحت التلفون و دخلت الواتس ، لقيت رساله من ناصر ، قال لي تعالي عايزك ...ما رديت على رسالتو ، كان متصل الآن ، قال لي أنا نعسان و مُصر ما أنوم إلا و انتِ جنبي ...قلت ليهو شكلنا حـ نرجع لنظامنا القديم ، انت في غرفه و أنا في غرفه ، قال لي عشان شنو ؟؟ ....الكلام و الشرح القلتو ليك قبيل داك كلو سمعتيهو و طلعتيهو في نفس الوقت صاح ؟؟
قلت ليهو البت الحشريه دي أنا ما بحبها و هي عن قصد جات و دقت لينا الباب ، قال لي اعتذرت منك ؟؟ قلت ليهو اعتذارها ما مقبول ، قال لي ما عارف اقول ليك شنو ، لو افترضنا انها عملت كدا قاصده و انها بتحبني عديل أنا وضحت ليك هي شنو بالنسبه لي و على فكره هي في مقام أختي و البعملو ليها دا واجبي ، مهما حصل بيناتنا ما بقدر أديها ضهري لمن تحتاجني ، المهم خليني نقفل الموضوع دا لأنو صدع بي ، قلت ليهو تصبح على خير لأني ما جايه 😊
قرا رسالتي و ما رد علي ، رشا عاينت لي بس ما قالت حاجه و واصلنا فلمنا عادي لحد نهاية الساعه 1 ، أول ما الفلم خلص رشا قالت لي يلاااا على غرفتك ، قلت ليها عايزا أنوم معاك هنا ، قالت لي لييييه ؟؟ قلت ليها ساي بس ، قالت لي كالعاده متناقشه مع ناصر صح ؟؟
ما رديت عليها ، قالت لي ما تكوني هبله و إياك تتشاكلي معاهو و تخاصميهو بسبب العواليق الجات دي ، إياك تديها فرصه و تخليها تقرب منو ، هي هدفها تعمل مشاكل بيناتكم و تفرقكم و انتِ حالياً بتعملي ليها العايزاهو ، خليك مفتحه و ما تبقي غبيه ...قلت ليها ما مهم ، أنا بس عايزا أنوم معاك ....المهم لمن رقدنا و كنا حـ ننوم ، رشا قالت لي أنا ما شفت أغبى منك ، قلت ليها نومي نومي عليك الله !!
طبعاً هي نامت و أنا بقيت صاحيه و بتقلب يمين و شمال ، بعد مسافه نزلت براحه من السرير و فتحت باب ، فجأه جاني صوت رشا و هي بتقول لي عليك الله أقفلي الباب دا معاك كويس و سلمي لي على ناصر .... طبعاً إتخلعت و حسيت بإحراج ، قلت ليها أنا ماشه أشرب ، قالت لي عليك الله يا مها أمشي ساي ماف داعي للحركات دي 😂🙂
المهم قفلت الباب و مشيت على غرفة ناصر....
اول ما وصلت غرفتو كدا ، غيرت رأيي و قلت ما حأمشي ليهو خليهو يزعل يطرشق ، دخلت غرفتي و نمت ، تاني يوم الصباح كالعاده كلنا صحينا بدري ، إلا الشومه ديك ، قلت أحسن ذاتو ما عايزا أصبح بـ وشها ، طبعاً رشا هي العملت لينا الشاي ، المهم جهزنا نفسنا و ركبنا مع ناصر ، رشا كانت بتتونس مع ناصر و أنا ساكته ساي ، طبعاً ركبت معاها ورا ، قالت لي خالو إيهاب قال بعد بكرا حـ يمشي تعارف ، قلت ليها ايوه ، قالت لي أمـي قالت نحنا ما نمشي ، حـ يمشوا معاهو حبوبه و أمي و أبوي و اتنين من أعمامو ، قلت ليها أنا عايزا أمشي والله ، قالت لي أمي قالت لا ، قلت ليها لا دي ليك انتِ و سارا ما أنا ، رشا عاينت لـ ناصر و قالت ليهو انت ماشي ؟؟ قال ليها إيهاب كلمني لكن ما معروف والله ....المهم بعد وصلناها جامعتها ودعتنا و نزلت ، بعدها أنا و ناصر عم الصمت بيناتنا ، لمن وصلني ، قال لي ما تتأخري أول ما تخلصي تتصلي علي طوالي ، قلت ليهو أصلاً ما حأقدر اتأخر حتى لو عايزا لأنو في كائن غريب و دخيل قاعد في بيتنا ....قال لي مها....ما انتظرتو يكمل كلامو طوالي نزلت و مشيت ، طبعاً طلعت متأخره غصب عني ، و هو إتصل علي كتير بس نهاي ما رديت عليهو ، في آخر مكالمه رديت و هو طوالي قال لي أنا منتظرك برا أطلعي ، قلت ليهو أنا في البيت حالياً ،اتوكل ساي ، قال لي ليه ما اتصلتي علي ؟؟ قلت ليهو مزاج 😊 قال لي تمام و طوالي قفل الخط ....انتظرت شويه كدا عشان هو يمشي بعدها طلعت و أول ما إتحركت كدا فجأه جا قطع طريقي بعربيتو ، نزل القزاز و أشر لي عشان أركب ، ما عاينت ليهو و طوالي إتحركت من جنبو ، تاني دور عربيتو و وقفها في طريقي ، نزل و قال لي الناس بتعاين لينا ، أركبي من دون درامات و كلام كتير....لمن إتلفت فعلاً لقيت الناس بتعاين لينا ، اتحركت ركبت ورا و قفلت الباب بقوه ، جا ركب و دور عربيتو ، بس خالص ما اتكلم معاي و أنا خشمي ما فتحتو ، لمن وصلنا البيت أول ما جينا داخلين لقينا توته في الجنينه ، كانت قاعده في النجيله و ماده يدها للنافوره ، ناصر بس السلم عليها بس انا لا ، دخلت طوالي ، بعد اتدوشت و صليت المغرب توته جاتني داخله ، كانت مشربكه أصابعها ، وقفت جنب الباب و قالت لي ممكن أدخل ؟؟....ما رديت عليها ، دخلت و قالت لي أنا آسفه للمره التانيه و عارفه إعتذاري بالنسبه ليك ما كفايه و يمكن حالياً انتِ متضايقه من قعادي معاكم في البيت ، للسبب دا انا يومين ما كلمت ناصر بس في الآخر اضطريت أكلمو لأني براي ما كنت بقدر أهتم بنفسي و غير كدا سيد الشقه الكنت ساكنه فيها طردني منها ، ما عارفه إذا ناصر قال ليك الحاجه دي ولا لا ، المهم أنا والله ما عايزاكم تزعلوا من بعض بسببي ، قلت ليها لو بالجد ما عايزا دا يحصل ما كان جيتي معاهو هنا ، قالت لي ناصر هو الأصر علي ، المهم أنا جايه أودعك لأني حأمشي بعد دا و شكراً ليكم ما قصرتوا ، قلت ليها أطلعي و أقفلي معاك الباب ، فجأه ناصر ظهر و واضح إنو كان واقف من قبيل لأنو الباب مفتوح ، ما قال حاجه بس كان بعاين لي بحده ، توته قالت ليهو أنا ما عايزاك تزعل منها ولا هي تزعل منك بسببي ، والله ما برضيني اخرب بيت صديقي و أخوي ....قالت كدا و طلعت و ناصر طوالي مشى وراها ، قلت ليهم قطر عجيب يودي و ما يجيب ....
المهم إتصلت على رتاج و حكيت ليها الحصل ، قالت لي تعبت من غباءك ....صوتها كان متغير ، قلت ليها في شنو يا رتاج ؟؟ كويسه انتِ ؟ قالت لي ايوه كويسه بس عندي وجع حلق و صداع ، قلت ليها سلامتك يا رب خلاص أقفلي و ارتاحي...
من ناحيه تانيه ناصر لحق توته و قال ليها ثواني ماشه وين انتِ ؟؟
قالت ليهو ما مهم المهم إني أمشي من البيت دا ، قال ليها مها قد تكون حاده شويه ، لكن صدقيني هي ما كدا و.....قاطعتو و قالت ليهو انت كنت واقف جنب الباب و سمعت كلامها ، صدقني مهما اعتذرت منها ما حتقبل إعتذاري ، ناصر أنا لو كنت عارفه إنو دي مها والله ما كنت حـ انبذها أو اسيئ لأهلها ! انت عارفني ينفعل بسرعه و ما بسكت لمن يجي زول و يشاكلني بس مع ذلك لو كنت عارفه إنو دي هي عشانك بس ما كنت حأرد عليها ، المهم أنا هسي حأمشي ما عايزا تحصل أي مشكله بسببي ، قال ليها حتمشي وين و بتاع الشقه طاردك ؟؟
قالت ليهو حأمشي أشيل حاجاتي و اسافر لأهلي لأني بالجد تعبت و ما عايزا أرجع تاني ، أخد نفس و قال ليها توته روقي شويه و ما تتسرعي و اصلاً وضعك دا ما بسمح ليك انك تسافري و غير كدا مخليه شغلك و أحلامك لمنو ؟؟ منو الكان بقول إنو عايز يشتغل و ينجح و يأسس نفسو عشان يرفع راس أهلو ؟؟
بكت و قالت ليهو أعمل شنو طيب انا ما عايزا اتقل على زول و اسبب مشاكل ، عايزا أرجع أهلي بس و اندفن هناك ، أنا دي اول مره احس نفسي وحيده و ما معاي زول 💔
قال ليها ما تقولي كدا أنا معاك و مستحيل أخليك براك ، قعدت تبكي بس ، طلع و قال ليها ألحقيني ، المهم مشوا الإتنين سوا

طبعاً أنا كنت في السلم و سمعت كلامهم كلو ، زعلت شديد و إتمليت ، قلت خليها ان شاء الله تضوي ليهو ، المهم قايلاهو حـ يوديها مكان تاني بس إتخيلوا إنو جابها تاني و هي شايله شنطها !! قلت معناها مشوا المكان الكانت ساكنه فيهو و خلاها تجيب حاجاتها ، الزمن داك الساعه كانت 9 م ، لمن مشى غرفتو لحقتو و عملت قومه و قعده ، قلت ليهو جايبه بس عشان تحرق لي دمي ، قال لي أنا تعبت من الكلام الكتير ، قلت ليهو ما لقيت ليها مكان تاني غير البيت دا !! على الأقل كنت تأجر ليها شقه أو أي زفت تقعد فيهو مدام خايف عليها و شايل همها جايبها هنا ليه !؟؟
توته جات داخله على حس أصواتنا ، قالت لينا يا جماعه انا....قاطعتها و قلت ليها بصوت عالي انتِ خليك ساكته و أبلعي لسانك دا عشان ما أجي اقطعو ليك و حركاتك دي اعمليها لـ ناصر ما لي أنا ....طوالي قامت طلعت و ناصر ما قال لي حاجه ، شال مفاتيحو و طلع من البيت و أنا طوالي شلت لي شنطه صغيره لميت فيها ملابسي و جيت نازله ، توته كانت بتبكي في الهول ، لمن شافتني جات علي و قالت لي ما تطلعي و تخلي لي بيتك ، لزيتها و قلت ليها عليك الله زحي من وشي ، قالت لي مش مشكلتك كلها أنا ؟؟
قلت ليها انتِ شايفه شنو ؟؟ قالت لي خليك في بيتك و أنا الحأطلع ، فعلاً دخلت لملمت ملابسها و جات طالعه و هي بتعرج ، طلعت و قفلت الباب ، طبعاً كنت بعاين ليها لحد ما مشت ، للحظات حسيت بالذنب و قلت البت مسكينه ما عندها زول هنا و عامله حادث ، تاني قلت مالي و مالها البت دي ما هينه و بتعرف ديشليون ولد ما لقت غير ناصر عشان تجي بيتو ؟؟!
المهم رجعت فوق و رجعت ملابسي في الدولاب بعدها مشيت المطبخ أكلت و مشيت الهول و قعدت أحضر ، لمن الساعه 11 و حاجه جات ، ناصر جا داخل ، طبعاً عامل نفسو ما شايفني ، طلع فوق طوالي ، بعد ربع ساعه كدا جا نازل و قال لي توته وين ؟؟ من دون ما أعاين ليهو قلت ليهو ما عارفه ، نهرني و قال لي سألتك جاوبي مشت وين ؟؟
طبعاً زعلت و إتخلعت و اتضايقت لأنو نهرني بسببها ، ما رديت عليهو ، طلع تلفونو و بقى يتصل عليها و هي ما بترد ، طوالي شال نفسو و طلع عشان يمشي يشوفها ، أنا حسيت بوخزه في قلبي ، ما بحب المنافسه في حاجه بتخصني ، ما بأقبل بأي شكل إنو تجي وحده و تشاركني فيهو ، ما بعرف حاجه اسمها صديقتي أو زي أختي ....دموعي نزلت مسحتها و قلت ما حأبكي بسبب الزباله ديل و ما أنا البرضى إني اتخت في كفه وحده مع الكلبه دي و لا حـ أخيرو بيناتنا ولا حأنتظرو يجي و يعيد و يكرر لي نفس الكلام في محاوله فاشله منو إنو يقنعني إنو الزفته دي مسكينه ، طوالي طلعت فوق لميت حاجاتي و طلعت ، قلت حأطلب ترحال بس مشيت بعيد عن البيت عشان خفت يجي راجع يلقاني واقفه جنب الباب ، طبعاً الشارع كان ضلام ، فتحت الشنطه عشان اطلع تلفوني إكتشفت إني ما شلتو معاي ، قلت بعد المسافه القطعتها دي كلها ما حأرجع تاني ....كنت زعلانه شديد و مقهوره و ما عملت إلا الفي بالي ، قلت بما إني قربت للظلط حـ أركب مواصلات بس لو لقيت ، مشيت وقفت في الظلط و بقيت منتظره المواصلات بس الظلط كان فاضي و ما بنكر إني كنت خايفه و أصوات الكلاب كانت موتراني ، فجأه شفت نور عربيه من بعيد في الظلط ، لمن العربيه قربت مني زحيت شويه من الظلط بس العربيه جات و وقفت جنبي ....رجعت لـ ورا و استعديت عشان أجري لأني خفت شديد ...

بيني وبينك  حديث بلا صوت
  بيني وبينك  روح تحوم حولك ..
  بيني و بينك قلب ينبض لك وحدك
فلا أحد يشتاق لك مثلي
و لا احد ينبض قلبه خوفاً عليك كما ينبض قلبي
فكن بخير لأجلي..💜

يتبع.....

ماف بارت تاني