#زهرة_فؤادي20
مها حولي الزاكي
طبعاً رشا أدت حسام رقم أبوي و هو اتصل عليهو طوالي و أبوي حدد ليهو يوم عشان يجي فيهو ، فعلاً حدد يوم و جا مع أبوهو و اتنين من أعمامو و قعدوا مع ناس أبوي ، اتعرفوا على بعض و إتكلموا كتير و أهلي عرفوا إنو حسام أخو فدوى صحبة رشا ، أصلاً هم بعرفوا فدوى بس ، المهم أبوي قال ليهم تمام أدونا أسبوعين كدا و حـ نديكم خبر ، أبو حسام قال ليهو أخدوا راحتكم ، في الأسبوعين ديل أبوي و زيدان بحثوا عن حسام و أهلو كويس و ما عرفوا عنهم إلا كل خير ، و أبوي سأل رشا إذا عندها مانع فـ قالت ما عندها مانع و على الأساس دا أدوا حسام الموافقه و حددوا موعد للخطوبه ، يوم كنت بتكلم مع رشا و قلت ليها هاااا إحساسك شنو ؟؟
قالت لي ما عارفه ، قلت ليها كيف يعني ما عارفه ؟؟
قالت لي لأنو أهلو ما موافقين ، فدوى لحد الآن لا رسلت لا إتصلت علي ، واضح إنو كلهم ما مبسوطين و ما عايزني لـ ولدهم ، قلت ليها مُش هو عايزك ؟؟ ما تشغلي نفسك بيهم المهم انتوا عايزين بعض و حتكونوا لبعض ...
.المهم بعدها بدينا نجهز لـ يوم الخطوبه ، قلت لـ ناصر أنا مبسووووطه شدييييد ، قال لي ان شاء الله دائماً كدا ، قلت ليهو عايزاك تمشي معاي نتسوق ، عايزا أشتري كذا حاجه ، قال لي طيب و فعلاً مشى معاي ، اشتريت توبين بإكسسواراتهم و 3 فساتين طقم لـ رشا و توبين لأمي و ناصر إشتريت ليهو جلابيتين و تيشيرت ، قال لي ما قصرتي والله ......
المهم لمن رجعنا البيت قال لي ما قلت ليك ، قلت ليهو شنو ، قال مصطفى النعيم مقدم برنامج شاي لبن إتواصل معاي و طلب اننا نكون ضيوف في وحده من حلقاتو ، قلت ليهو قووووول والله 😍😍
ياخ أنا بعشقك البرنامج دا يا ناصر ، بحبو شديد و شفت ليهو أكتر من حلقه في التيك توك و الموسم الفات كنت متابعه معظم حلقاتو ، اها وافقت صح ؟؟
قال لي ايوه لأنو مسافر الإمارات عشان يصور باقي الحلقات هناك و البرنامج حـ ينعرض في رمضان ان شاء الله ، قلت ليهو وااااي حماااااس حماااااس 😍
قال لي عشان عارفك حـ تنبسطي وافقت طوالي ، بوستو على خدو و قلت ليهو انت عسل عسل والله ، قال لي عارف نفسي 😎 قلت ليهو شكلي عاديتك بالنرجسيه ، قال لي يعني بتعترفي انك نرجسيه ؟؟ قلت ليهو يمكن ، قال لي و أحلى نرجسيه فيك يا بلد ، قلت ليهو خجلتني 🙈....المهم التصوير متين ؟
قال لي بعد بكرا ان شاء الله ، قلت ليهو يا سلاااام ، أنا حـ اختار ليك لبس على ذوقي ، قال لي تمام ، المهم تاني يوم كان خطوبة رشا ، لبست فستان رمادي منفوش و طرحه رماديه و ميك أب خفيف و هيلز وردي شفاف ، طبعاً لمن لقيت رتاج هناك قعدت أحكي ليها عن برنامج شاي لبن ، قالت لي كويس والله ، معناها حـ نشوفكم في رمضان ، قلت ليها اييييوه ......خالتو إنصاف أم رتاج جات و قالت لي عايني يا مها البت الماده بوزها ديك منو ؟؟؟
لمن إتلفت لقيتها فدوى ، قلت ليها دي أخت حسام ، قالت لي و الوراها ديك ؟؟ قلت ليها تقريباً أمو لأنها بتشبهو ، قالت لي بييس عليهم مالم صارين وشوشهم كدا ؟؟
رتاج قالت لي ما موافقين ولا شنو ؟؟ قلت ليها ما عارفه ، قالت لي شميتهم والله ، من قبيل قالبين خلقتهم و واقفين بعيد من الناس و ما شفتي سلامهم مسيخ كيف !! أختك دي حـ تعيش معاهم كيف !! خالتو إنصاف قالت ليها بررري يفرز ليها عيشتها طوااالي و دا مفروض يكون الشرط الأساس في أي عرس ، النسابه ما بنقدروا والله ! يعني إذا من هسي بلولوا في خشومهم بعدين حـ يعملوا شنو !....المهم وقفت معاهم مسافه بعدها مشيت لـ بنات أهلي و بقيت أضيف معاهم ، ورده ذاتا جات و بقت تشتغل معانا و طبعاً نسيبتي و بتها نازك قاعدات بعيد و شكلهم بقطعوا في الغاشي و الماشي ، مشيت سلمت عليهم و قلت ليهم قاعدين هنا براكم ليه تعالوا قدام ، ناس أمي و حبوبه كلهم هناك ، قالوا لي لا لا هنا مرتاحين ، دانه قالت لي خالو وين ؟؟
قلت ليها هسي كان هنا ، قالت لي وديني ليهو ، قلت ليها تعالي طيب ، أول ما شلتها من نازك قالت لي أعملي حسابك ما تحصل ليها حاجه ....ما رديت عليها ، شفت ناصر من بعيد واقف مع ناس زيدان و حسام و باقي الشباب ، قلت لـ دانه ناديهو ، قالت ليهو خااااالوووو بصوت عالي ، طوالي إتلفت عليها و جا علينا و هو بضحك ، قالت لي نزليني ، أول ما نزلتها طوالي جرت عليهو و فجأة إتعترت و جات واقعه ، نازك من هناك جات طايره زي الصاروخ و قالت لي مش قلت ليك اعملي حسابك هسي البت وقعت بسببك ... طبعاً قالت كدا بصوت عالي لمن الناس كلها إتلفتت علينا و هناك دانه تصرخ بأعلى حس ، ناصر رفعها عن الأرض و بقى يحاول يسكت فيها ، جانا و قال لـ نازك مجنونه انتِ ؟؟ بتك الوقعها ليك منو ؟؟
قالت ليهو ما قاصده بس لمن شفتها واقعه قلبي بقى يغلي ، قال ليها لكن هي ما وقعتها !! قالت ليهو عارفه بس ما قدرت أتحكم في نفسي ، عاينت لي و قالت لي أعذريني....لو كنتِ أم زيي كان حسيتي بي .....قالت كدا و مشت ، ناصر قال لي ما تشتغلي بيها ، هزيت ليهو راسي بس و مشيت كملت شغلي ، بعدها جيت راجعه و بقيت أفتش على ندى بت عمي لأنو رشا قالت عايزاها تظبط ليها حاجه ، لقيت شافع صغير و قلت ليهو أمشي نادي لي البت ديك ، قال لي حاضر ، أول ما جاتني قلت ليها أمشي لـ رشا عايزاك ، قالت لي هسي كنت ماشه ليها ، المهم هي مشت قدامي و أنا أول ما إتحركت كدا فجأه غسان طلع في وشي ، قال لي مها في شباب جوا قبل شويه جيبي لي عصير أوديهو ليهم ، قلت ليهو طيب ثواني ، مشيت المطبخ ختيت كميه من الكبابي في صينيه كبيره و مليتهم عصير ، بقيت اتلفت يمين شمال عشان أشوف جوليا الشغاله عشان أديها الصينيه توديها ليهو بس ما لقيتها !! ناديت سماح و قلت ليها شيلي الصينيه دي و أديها للولد الواقف برا لابس قميص كحلي ، قالت لي بررري الصينيه دي كبيره و تقيله والله !شوفي زول من ناس الضيافه !أو نادي الولد يجي يشيلها ، أنا ماشه لأنو رشا منتظراني فوق ، فعلاً طوالي مشت ، ما لقيت زول فاضي عشان أرسلو فإضطريت أمشي أنا ، طلعت ليهو و قلت ليهو تعال شيل الصينيه لأنها تقيله ما قدرت عليها ، قال لي طيب ، فعلاً مشى و دخل المطبخ ، بعد شويه جات بت و قالت لي بنادوك في المطبخ ، لمن مشيت اكتشفت إنو غسان الناداني ، إفتكرت إنو زول غيرو من ناس المطبخ ، قلت ليهو شنووو ؟؟ قال لي ممكن تزيدي الكبابي دي شويه لأنو الناس كتار ، قلت ليهو طيب ، فعلاً طلعت كبابي زياده و مليتهم عصير و ختيتهم ليهو في الصينيه ، أول ما هو طلع كدا أنا طلعت وراهو و فجأه لقيت ناصر في وشي ، عاين لي و عاين لـ غسان ، غسان سلم عليهو و مشى ، قلت ليهو الحصل إنو....قاطعني و قال لي ما حصل شي ما عايز تبرير ، قال كدا و هو مبتسم ، قلت ليهو خفت تفهمني غلط ، قال لي لا لا ، قلت ليهو عايز حاجه ؟؟
قال لي إشتقت ليك و جيت عشان أشوفك ، عاينت وراي و قلت ليهو على فكره في ناس في المطبخ ، قال لي عادي ، راجل مشتاق لـ مرتو ، إبتسمت و قلت ليهو صحي دانه وين ؟؟ قال لي شالتها ورده ، قلت ليهو اها ، قال لي أرح برا ، قلت ليهو ماشه لـ رشا فوق أشوفها جهزت ولا لا ، قال لي طيب انا برا ، المهم لمن مشيت ليها لقيتهم جهزوها ، قلت ليها عسل عسل ما شاء الله ، كانت زهجانه شديد ، قلت ليها بسم الله مالك ؟؟
قالت لي ياخ الفستان دا ضيق !! حاساهو حـ ينشرط عديل !! سماح قالت ليها والله حلو فيك يا رشا ، قالت ليها بضيق ياخ كفايه مجاملات و قعدت تبكي !! بقينا نهدي فيها ربع ساعه كامله و هي تزيد في البكى !!...طلعت برا و ناديت أمي على جنب ، جات و قالت لي أختك دي ما طالعه ولا شنو ؟؟ قلت ليها قاعده تبكي يا أمي تعالي إتكلمي معاها ، قالت لي طيب خليك مع الضيوف حـ أمشي أشوفها ، زيدان جا و قال لي في شنو ؟؟
قلت ليهو رشا بتبكي ، قال لي ليه مالا ؟؟....ما انتظرني أرد عليهو طوالي دخل جوه ، دخلت وراهو طوالي ، وصل غرفتها قبليني و البنات الهناك طوالي طلعوا لمن زيدان دخل ، أمي كانت ضاماها و بتسكت فيها ، زيدان مشى عليها و قال ليها يا بت يا رشا مالك في شنو ؟؟
قعدت تبكي بس ، قال لأمي كدي زحي لي شويه ....جا قعد جنبها و قال ليها مالك في شنو ؟؟في زول زعلك ؟؟
قالت ليهو و هي بتشهق من البكى ، ماف شي بجي فيني ، الفستان دا ضيق و شكلي بيهو زباله ، لو طلعت كلهم حـ يضحكوا علي ، قال ليها بسيطه ، غيريهو بس , قالت ليهو جربت 3 غيرو و نفس الشي ، أصلاً أنا شومه و ما استاهل فساتين زي دي و ما أستاهل ذاتو يخطبوني ، قال ليها أسكتي عشان ما أكفتك ، اطلعي ساي و نشوف دا منو الحـ يضحك عليك ، والله اشوف سنون برا ساي إلا أطين عيشت البضحك دا ، وقفها على حيلها و قال ليها يلا ، ندى قالت ليهو دقيقه دقيقه ، خلينا نظبط ليها مكياجها بعد البكى دا كلو ....
قال ليها تمام حـ اقيف ليك بكرا ، المهم ندى و سماح ظبطوا ليها مكياجها بطريقه إحترافيه و قالوا يها شُفتي إياك تضيعي لينا تعبنا دا تاني ، ما عايزين أي بكى ، مفهوم ؟؟ هزت راسها بس ، أمي ضمتها و باستها على خدها و قالت ليها بتي حلاااااة الدنيا عليها ، ما يسحروها لي ، قلت ليهم ثواني أصوركم ، فتحت التلفون و أخدت ليها صوره مع أمي ، سماح قالت لي صوريني معاهم ، فعلاً صورتهم التلاته و آخر صوره كانت سلفي لينا نحنا الأربعه ، قلت ليهم يلا بعد دا ، فجأه ورده جات داخله و قالت لينا الناس كلها بتسأل عنكم و عن رشا ! اتأخرتوا يا جماعه !!....لمن طلعنا من الغرفه لقينا زيدان جنب الباب ، قلت ليهو هييي يعني انت لسه واقف منتظرنا ؟😂
قال لي ما عرفتكم بتظبطوا ليها مكياجها ولا بترسموا في لوحه !!؟....المهم أرح أرح اتأخرنا على الناس ...جا وقف شمال رشا و أمي كانت يمينها ، ساق رشا لحد ما طلعوا بيها برا ، الأغاني كانت شغاله و أول ما هي جات طالعه الناس بقت تزغرد ، سقناها على حسام ، وقف سلم عليها و قعدوا جنب بعض ، سماح قالت الخواتم ، الخواتم وين يا جماعه جيبوها ....
فعلاً جابوا الخواتم و هم لبسوها لبعض ، كلنا مشينا باركنا ليهم ، طبعاً أهل حسام كانو آخر ناس جوا و باركوا ، عملوها واااضحه ، رشا إتحسست شديد ، حسيتها شويه كدا و حـ تبكي بس حسام بقى يتكلم معاها ، ما عارفه كان بقول ليها في شنو بس زعلها خف و الدموع الفي عيونها إتلاشت ، أنا اطمنت شديد لمن حسيت إنو حسام بحبها شديد و مستحيل يخليها و لو ما كدا ما كان وصل البيت بدون ما يتردد ، كنت واقفه و بعاين ليهم ، حسيت بزول جا و وقف جنبي ، قايلاهو ناصر ، قلت ليهو حلوين شديد مع بعض صح ؟؟
قال لي فعلاً ربنا يسعدهم ، لمن سمعت الصوت طوالي عاينت ليهو لقيتو غسان ، قلت ليهو معليش قايلاك ناصر و طوالي كنت حأمشي ، قال لي ثواني يا مها ، ربعت يديني و قلت ليهو خير ، قال لي أديني من وقتك بس ما حـ اأخرك ، بقيت أتلفت يمين و شمال لأنو ما عايزا ناصر يشوفني معاهو ، قلت عاين خلاص انا هسي ما فاضيه ، قال لي بس عايزك تنسي الماضي و ما تتعاملي معاي بالطريقه دي ، ايوه انا غلطت و كتير كمان بالذات لمن خليتك فجأه كدا و من دون ما أبرر ليك و أديك أسبابي ، حالياً أنا بختنق كل ما انتِ تتعاملي معاي بالطريقه دي كأننا ما كنا يوم جيران أو ما كنا بنحب بعض ، قلت ليهو "كُنا" يعني في الماضي و هسي أنا ما عندي ليك شي و الحمدلله ربنا عوضني براااااجل أفضل منك بمية مره ، قال لي المشكله إني ما بعرف قيمة الحاجه إلا أفقدها ، بعد سافرت و خليت البلد فقدتك شديد ، طول المده ديك ما نسيتك ثانيه ، قدر ما حاول أطوي صفحتك ما قدرت ، اتعرفت على بنات قدر التراب بس كنت بشوفك في كل الوجوه ، جيت راجع بعد قرابة التلات سنوات و إنصدمت لمن عرفت إنك عرستي ، أنا دفعت التمن غالي جداً و هسي بقى ماف شي غير الندم و العتاب ، ما حـ اقدر أغير شي بس حأطلب منك السماح ، قلت ليهو سؤااال بس و ياريت تجاوبني بكل صدق ....خليتني ليه ؟؟
في اللحظه دي ناصر جا ماري بـ جنبنا بس ما إتلفت علينا ، الناس كانوا حولينا كتار ماشين و جاين ، ما عارفه ناصر شافنا ولا لا ، بقيت أعاين ليهو لحد ما مشى و وقف بعيد مع شباب و بقى يتونس معاهم عادي و ما إتلفت علينا ، قلت معناها ما شافنا ، غسان عاين ناحيتو و قال لي ما عايز اسبب ليك مشاكل مع راجلك ، المهم أنا خليتك لمن جات بت و دخلت حياتي و حبيتها أو خليني أقول أوهمت نفسي اني حبيتها أكتر منك ، سافرت و إغتربت عشانها بس برضو ما كان لينا نصيب مع بعض و هي ما قدرت تنتظرني فـ طوالي عرست ، قلت ليهو تستاهل ، إبتسم إبتسامه باهته و قال لي طالب منك السماح و ما عايز يكون في قلبك ذرة كره لي ، قلت ليهو سامحتك ...عارف ليه ؟؟
لأنك بقيت ولا شي بالنسبه لي و لأنو حالياً ما عندي ليك ولا شي و انت رجعت انسان عادي بالنسبه لي ، هسي أنا واقفه و بتكلم معاك بصفتك ولد جيرانا و بس ، دخل يدينو جوه جيبو و أخد نفس عميق و قال لي متمني إنك جد جد تعفي لي ، قلت ليهو والله مسامحاك و اعتبر بيناتنا ما كان في شي و انت عارفني كويس ما بجامل ، لو ما سامحتك ما حأكذب و اقول ليك سامحتك ، قال لي ريحتيني ، و فعلاً النهايات أخلاق ، عموماً ربنا يسعدك و يهنيك يا بت جيرانا ، قال كدا و إبتسم و مشى..... فعلاً غسان بعد كلامو دا انا سامحتو و جد جد بقى لي انسان عادي و رغم الحصل حيكون في إحترام بيناتنا و زي ما قال النهايات أخـلاق و أنا حالياً راااضيه كل الرضى و نهاي ما عتبانه عليهو أو شايله في قلبي منو.....
و أنا واقفه كدا رتاج جاتني و قالت لي غسان دا كان بقول ليك شنو ؟ قلت ليها إعتذر مني و طلب أسامحو و سامحتو ، قالت لي أحسن ، المهم قعدنا برانا في طاوله بعيده عن الناس و بقينا نتونس و نعلق على فساتين البنات ، كانت في سمحه كدا ما شاء الله لابسه فستان كحلي ، رتاج قالت لي دي منو ؟؟ قلت ليها أنا ذاتي ما بعرفها بتكون تابعه لأهل حسام ، بعد شويه البت مشت سلمت على ناس عمتي إنصاف و نازك و قعدت معاهم !! قالت لي شكلها بتعرف نسابتك ، قلت ليها يمكن خلينا من دا ، أنا عايزا اسألك ليه ليك فتره متغيره يا رتاج ؟؟
قالت لي منو ؟؟ اناااا بري لا متغيره لا شي ، قلت ليها عارفه إني لا أطاق و بسبب مشاكلي و شكيتي الكتيره صدقت بيك و زهجتك فـ آسفه ....سكتت ما ردت ، قلت ليها معليش يا رتاج !! تاني ذاتو ما حـ أشكي ليك لأنو أنا و ناصر خلاص اتصالحنا و علاقتنا هسي زي السمنه على العسل 💜
كانت ساكته بس دموعها جات نازله ، قلت ليها رتاج في شنو مالك !؟؟ فجأه أختها رهام جات قالت لي مهاوي مبروووك لـ رشويه ، قلت ليها الله يبارك فيك و عقبالك قالت لي آميين يا رب ، قالت لـ رتاج يلا أمي قالت ليك أطلعي حـ نمشي بعد دا ، قالت ليها طيب ، قلت ليها بدري ياخ ما تمشوا ، قالت لي لا لا والله اتأخرنا ، هسي أمي واقفه لينا ، قلت ليها طيب رتاج هسي بتجيكم ، أختها مشت و هي أول ما كانت حـ تقوم جريتها من يدها و قعدتها ، قلت ليها ما حـ تمشي إلا تقولي لي الحاصل معاك شنو يا رتاج !! في شنو ما تخوفيني عليك !!....قعدت تبكي و تمسح في دموعها ، ختيت يدي على كتفها و قلت ليها أحكي لي يا رتاج مش أنـا صاحبتك ؟؟
ضمتني و قعدت تبكي و لو ما كنا بعاد عن الناس كانوا كلهم حـ ينتبهوا لينا ، بقيت أطبطب عليها و أحاول أهديها ، قالت لي أنا المفروض أعتذر منك يا مها ، الله يخليك سامحيني ، قلت ليها مع إني ما عارفه في شنو لكن مسامحاك بطلي بكى ، فكتني و مسحت دموعها و قالت لي لو عرفتي حـ تتفي في وشي ، قلت ليها انتِ مجنونه ؟؟ رتاج انتِ صحبتي البحبها شديد و مستحيل اعمل ليك تصرف زي دا ، قالت لي عشان كدا أنا قلبي واجعني ، ضميري مأنبني و إحساس الخيانه ما قاعد يفارقني ، حاسه نفسي رخيصه و تافهه ، قلت ليها ما تقولي كدا عن نفسك ...أخدت نفس و سكتت نفسها عشان تقدر تتكلم ، قالت لي مش كنتِ بتتكلمي لي عن ناصر على طول و تحكي لي مواقفكم مع بعض !!...أنا من دون ما أحس ليك نفسي بتخيل إني مكانك ، من دون ما أحس بقيت أفكر في ناصر لدرجة إني بقعد في حساباتو في الميديا بالساعات ، متذكره يوم مثلتي عليهو و قلت انك تعبانه و هو جاك و ساقنا بالعربيه ! و كان خايف عليك ! أنا فجأه قلبي وجعني و بقيت أحس إني شريكه معاك فيهو و لمن وصلتوني و قال لي آسف يا رتاج ما كان قصدي أرفع صوتي عليك ، أنا حسيت روحي إردت لي ، كنت بنبذ نفسي و بشتمها لأنو البفكر فيهو عيب و جرم كبير ، بكره نفسي شديد و بقول ما حـ أفكر فيهو تاني لأنو راجل صحبتي بس اول ما تجي و تحكي لي حاجه حصلت بيناتكم بلقى نفسي سرحت بعيد في خيالي ، لمن آخر مره جيتي و شكيت لي و انفجرت فيك بالجد كنت زعلانه شديد و عايزا أطق لأنك مستخسره ناصر الأنا بتمنى يكون في واحد زيو في حياتي ، بعدها اتغيرت عليك لأني خجلت من نفسي ، روحي حرقتني و ضميري كان بأنبني و كنت كل ما أشوفك بحس إني وحده خاينه و رخيصه ، أنا من شدة حكاويك عنو حبيتو معاك فـ أعفي لي 💔
قالت كدا و طوالي قامت من جنبي و مشت لناس أمها و طلعوا ، كنت ساكته ساي و قاعده في مكاني ! حسيت لساني إتربط و عقلي ما قادر يستوعب الكلام القالتو رتاج !!
حسيت الطاوله دي لافه بي ! كلامها شطب عقلي !!...صحبتي المقربه بتحب راجلي !!
بعدها حفلة الخطوبه مسخت لي ، بقيت ما فاهمه حاجه و ما واعيه للبحصل حوليني ، يعني لغاية ما أنا و ناصر رجعنا البيت كنت بـ نفس الحاله ، لمن ناصر قال لي في شنو ؟؟ قلت ليهو بزهج ماف حاجه و مشيت من جنبو ، جا لاحقني و قال لي لا في شي ، أكيد ما زهجانه من فراغ ، إتلفت عليهو و قلت ليهو ياااخ قلت ليك ماف شي معناها ماف شي ما بتفهم انت !!...هز لي راسو بس و رجع قعد مكانو ، دخلتنا غرفتنا بكيييت قدرتي ، سكت مسافه كدا و بقيت ألوم في نفسي و تاااني بقيت ، ناصر فجأه جا داخل كدا و لقى دموعي عشره عشره ، ما سألني عن حاجه ، شال ليهو غيار و دخل استحمى و جا طالع ، رقد طوالي من دون ما يتكلم معاي ، مسحت دموعي و طفيت الإضاءة و رقدت ، بس النوم جافاني ، بقيت أتقلب في السرير يمين و شمال ، ما قادره أستوعب فكرة إنو رتاج بتحب ناصر !!....كيف نفسها سمحت ليها تحب راجل صحبتها !!
طول الليل بقيت أفكر في الموضوع و دموعي زي الماسوره ، للحظات كرهت رتاج و قلت عليها خاينه ، بس بعد تفكير عميق قلت أنا السبب ....اتذكرت كيف إني يوم من الأيام حبيت و اتعلقت في بطل روايه ، مع إنها مجرد روايه و خياليه كمان بس من شدة مواقف البطل و وصف الكاتبه ليهو حبيت شديد و إتمنيت لو كان شخصيه حقيقيه ....رتاج كذلك ، حبت ناصر لأني بحكي ليها عن على طول و أي حاجه تحصل في البيت بمشي احكيها ليها و كلامو بالنص بقولو ليها ، يعني ناصر دا كـ شخصيه ساي الوحده لو شافتو حـ تعجب بيهو فـ ما بالك لمن يجي زول و يحكي ليك عن الشخصيه دي و يعكس ليك الجانب الرومانسي فيها و كل صفاتو التانيه الما بعرفها إلا أقرب المقربين !!....عشان كدا بقولوا ما تحكي للناس بالحاجات البتحبها و غير كدا أنا بالغت شديد لمن شاركت رتاج كل تفاصيل حياتي مع ناصر في لحظات زعلنا و فرحنا ، يعني إذا أنا بحبو فـ هي شنو الما بخليها تحبو بما عارفه بكل شي عننا كأنو هي أنا !! يعني زي ما قالت إتخيلت أنها أنا !💔
الوجع الحسيتو في الليله ديك ماف وجع بضاهيهو ، إتألمت شديد و حسيت قلبي حـ ينفطر من شدة الزعل و القهر ، لحد الصباح أنا ما ضقت طعم للنوم ، ناصر لمن صحى لقاني صاحيه ، قام و دخل الحمام و برضو لمن جا طالع لقاني في مكاني ما إتحركت ، جهزت نفسو و قال لي أنا طالع و بعدها طوالي مشى ، أنا زهج ساي ما مشيت الشغل ، قربت أكفت نفسي بسبب الحصل ، صحيت مصدعه عديل ، بعد صليت قلت ناصر ما ليهو ذنب ، هسي زعل بسببي و هو ما ليهو دخل في الموضوع ، يعني ذنبو شنو إذا أنا كنت بحكي عنو 24 ساعه لٕـ رتاج و هي حبتو !!
شلت تلفوني و إتصلت عليهو ، في البدايه ما رد بس بعد ما إتصلت كتير فتح الخط و قال لي مهاوي عندي إجتماع ضروري برجع ليك بعد ما أخلص ، قلت ليهو طيب بس ما تزعل مني ، قال لي لحد ما أرجع ليك ، هسي خلي الزعل و أمشي أشربي الشاي ، عملتو قبل ما أطلع ....قلت ليهو ناصر أنا كل يوم بحبك أكتر من اليوم القبليهو 😭😭🥺
قال لي غصب عنك حـ تحبيني يا شاااابه 😂 قلت ليهو بالتوفيق يا باشمهندس ...
قفلت منو و حضنت التلفون و قلت ربنا يخليهو لي ، ناصر في كل مره بثبت لي أنا ما غلطت لمن قبلت الزواج دا و ما غلطت لمن حبيتو ، أنا شدة ما بحبو حاسه إنو إسمو دا منقوش نقش على جدران قلبي ، بحبو أكتر من الحب الحبيتو لـ غسان ، بحبو حد الجنون....المهم بعد شربت الشاي فتحت الشاشه و بقيت أقلب في القنوات ، بعد مسافه ناصر إتصل علي ، رديت عليهو و قلت ليهو خلصت ؟؟
قال لي ايوه ، قلت ليهو حبيت أعتذر منك لأني اتزهجت فيك ، قال لي أنا ما بزعلك منك يا شافعه ، قلت ليهو بس امبارح حسيتك زعلت حتى الصباح و صراحة ليك حق ، قال لي أنا لو زعلت بزعل عشان شايفك زعلانه و متضايقه و انتِ ما عايزا تحكي لي ، قلت ليهو موضوع بسيط كان زاعجني ، قال لي طيب ما تشغلي بالك ، قلت ليهو حاضر لأنو أصلاً اتحلى و شلتو من بالي ، قال لي أحسن شي ، عشان ما تضايقي نفسك و تزعليها ، قلت ليهو ربنا ما يحرمني منك يا ناصر قال لي ولا منك ....المهم اليوم دا عدا عادي ، في اليوم البعدو مشينا عشان نصور حلقة برنامج شاي لبن ، لمن وصلنا ناصر سلم على مصطفى النعيم سلام معرفه كدا ، سلم علي و قال لينا نورتو ، قبل التصوير قعدوا يتونسوا و يدردشوا شويه ، قلت ليهم انتوا بتعرفوا بعض ؟؟ ناصر قال لي ايوه ، بعرف مصطفى من 4 ,5 سنوات كدا ، عاين لـ. مصطفى و قال ليهو على فكره مها ما صدقت لمن قلت ليها حـ نكون ضيوف في شاي لبن ، هي من أشد المعجبين ببرنامج دا يا مصطفى ، لي والله لي الشرف و مبسوط إنو البرنامج نال إعجابك ، قلت ليهو أنا بحب طريقة الحوار و الطريقه البتخلي بيها الضيف ياخد راحتو و يحس إنو في بيتو و يتكلم بكل أريحيه ، صراحة كل شي مريح من ديكور لـ الطريقه البتبدا بيها البرنامج لـ الناس الظريفين المعاك ديل 💜
قال لي يا سلام والله ، مبسوط جداً بكلامك دا و دي شهاده أعتز بيها والله ، ناصر قال ليهو تستاهل كل خير يا مصطفى و ربنا يوفقك....
المهم أول ما بدينا التصوير ، قال لينا مها و ناصر أولاً كيفكم كويسين طمنوني عليكم ، قلنا ليهو كويسين الحمدلله ، قال لينا حـ أدخل في الموضوع طوالي عايزكم تحكوا لي عن طفولتكم ، قلت ليهو أبدا أنا ولا ناصر ، قال لي أي واحد فيكم ، ناصر قال لي أبدي انتِ ، المهم قعدت أحكي ليهو عن طفولتي و قلت ليهو إني نشأت في بيت مليان حب و حنان و محاط بالأمن و الطمأنينه ، نحنا أمي و أبوي بذلوا أقصى جهدهم عشان يأمنوا مستقبلنا ، درسوا و اشتغلوا و صنعوا ليهم إسم و مكانه في المجتمع ، ما بالقروش ، بإحترامهم و كرمهم ما و شهامتهم ، أمي و أبوي هم قدوتي ، وجودهم مطمن شديد ، أنا كنت كل ما اخاف أو اتخت في موقف صعب بتذكر إنو أهلي في فـ بطمن ، يعني بالمختصر عشت طفوله هاديه و جميله ، الحمدلله 💜
قال لي يا سلام والله ، حسيت والله بكل حرف انتِ قلتيهو بحق أسرتك ، فعلاً الأسره المترابطه و المليانه حب و حنان و تفهم بتطلع اطفال سوين و بتضمن ليهم مستقبل على الأقل لو ما كان خالي من المشاكل الهي طبع الحياة تضمن ليهو مستقبل خالي من المشاكل أو العقد النفسيه ، قلت ليهو فعلاً ،أكتر ناس سعيدين في الحياة دي هم النشوا في أسره داعمه ليهم على طول ، الأسره نواة المجتمع و هي الأساس المتين المفروض تتبني عليهو شخصية الطفل الخاليه من الشوائب و العقد النفسيه ، ...قلت ليهو في شخص تاني عايزا أتكلم عنو لو ما حـ آخد من زمن البرنامج ، قال لي لا لا اتكلمي عادي و أخدي راحتك ....قلت ليهو الشخص دا زيدان أخوي ....طفولتي معظمها كانت عباره عن زيدان ألحقني ، زيدان ديل شاكلوني ، زيدان تعال دق لي البنات ديل ، زيدان امشي اشتري لي ، زيدان جيب لي ....زيدان ....زيدان و أنا لحد اللحظه بقول زيدان .....لو كان في مكانه أسمى من مكانة الأخ زيدان كان حيكون فيها ، مهما اتكلمت عنو ما بقدر أوصفو ، 28 حرف أبجدي و أنا ما قادره أوفيهو حقو ، الحروف شويه شديد قصاد وصف أخوي و شهامتو ، كل الحـ اقولو بس إنو ربنا يخلي لينا زيدان حبيب أخواتو و أمو و أبوهو و يارب في كل بيت يكون في أخ زي زيدان ....أما رشا أختي ، رغم إني أكبر منها بس بتحسسني إنو هي أكبر مني ، دائماً بحكي ليها مشاكلي و كل حاجه بتحصل لي ، من زمان متعوده أجي و أشكي ليها و هي تنصحني ، هي و زيدان استحملوني شديد في طفولتنا و صبروا على طبعي الشين 😂 بالإضافه لدلع أهلي براي كنت بدلع نفسي و ببكي في حاجاتهم و هم بكل بساطه بتنازلوا عنها و بدوني ليها ، يعني أنا الإتنين ديل والله ما قادره أوصفهم و أديهم حقهم ، المهم ربنا يحفظ لي أسرتي و يخليهم لي ، وجود الأهل مطمن شديد 💜...قال لي آمين يا رب ...حبيت والله كلامك عن أسرتك و محبتك ليهم ، واضح من خلال كلامك قدر شنو انتوا أسره مترابطه و بتحبوا بعض ، قلت ليهو فوق ما تتصور والله ، لمن جا دور ناصر قال ليهو أنا عكسها ، دلع نهاي ما شفتو بـ عيني ....ضحكنا على كلامو ، قال ليهو زي ما قلت قبل كدا في واحد من البرامج ، أنا كنت مشاغب و لئيم و عنيد و بليد في المدرسه فـ ما كان في مجال للدلع و أصلاً كنت بشوف الدلع دا للبنات و الولد المدلع دا باطل شديد ، مصطفى قال ليهو لمن كبرت ولا في صغرك ؟؟
قال ليهو لا من لمن صغير كنت بكره الدلع شديد و ما بطيق الشفع المدلعين لدرجة انو كان جيرانا كان عندهم شافع قدري ، حلبي و مدلع للطيش كنت كل ما أشوفو أمسكوو أجلدو من دون سبب و اقول ليهو أمشي يا مربى البنات ....ضحكنا ضحك مصطفى قال ليهو حرام عليك ياخ 😂
قال ليهو المهم بيتنا مليان تفاهم و أسرتنا أسره محترمه بتحب التعليم و سعوا عشان يطلعونا زي ما نحنا عايزين و هم عايزين ، ما قصروا مننا لا أنا لا أخواني ، دعمونا و كبرونا بكل حب و للآن بدعموا فينا و الواحد كل ما يتلفت يلقاهم معاهو ، يعني زي ما قالت مها وجود الأهل مطمن شديد فـ ربنا يديمهم لينا ، مصطفى قال ليهو جمعاً يا رب ....
المهم بعدها واصلنا حكاوي و ضحك و فرفشه ، لمن كنا بنتكلم عن علاقتنا و كدا سألنا كيف بنتعامل مع الناس بإختلاف طباعهم و صفاتهم ، قلت ليهو أنا بالمختصر ما بجامل ولا بكتر الكلام أي علاقه حسيتها ما مريحه طوالي ببترها ، ما بحب اللوم و ما بحب المعط الكتير و ما بقدر استحمل أي زول أنا ما طايقه وجودو ، قال لي واضحه شديد بس دا أفضل شي ، قلت ليهو فعلاً الناس ساي بتحب تضايق روحها و تعمل لنفسها وجع راسها يعني ناس ما بنحبهم بنلقى نفسنا بناخد و ندي معاهم في الكلام
صفحات ما بنطيقها لكن بنتابعها !
كلام ما عاجبنا و مع ذلك بنسمعوا !
حاجات بتعكر مزاجنا و بتزعجنا بس بنتكلم فيها !!
قال لي الواحد يعتذل ما يؤذيهو بس ، قلت ليهو أيوه
قال لـ ناصر قول لينا انت ، قال ليهو برضو عكسها ، أنا بالي طول و بتقبل الناس بكل إختلافاتهم و ما عندي مشكله ، الحاجه الوحيده الما ممكن أغض نظر عنها و هي لمن الشخص دا يبدا يستهتر بي أو بـ مقدراتي ، أو لمن يستهين بـ كرامتي و مشاعري و زعلي ، أنا مستحيل استمر مع إنسان بتعامل معاي بمزاجو و ما بحترمني ولا براعي لي ، ما اظن في زول بحب يكمل مع إنسان بقلل من قيمتو سواء عن طريق كلامو أو تصرفاتو و بصغرو قدام الناس ، انسان زي دا أنا مستعد أخسرو طوالي لأني متأكد إني ما قاعد أقصر في حق زول للسبب دا لمن أنهي علاقه بنهيها بكل قناعه ، الما بقدرني و بحترمني ما يلزمني والله....
لمن قال كدا عاينت ليهو ، لمن إبتسم لي ، إبتسمت ليهو ،.....البرنامج كان بسيط و حلو شديد ، في الآخر مصطفى قدم لينا كيك مع شاي لبن ، طبعاً الكبايه كان فيها شعار البرنامج ، في الختام مصطفى قال لينا كانت حلقه مميزه و ممتعه انبسطت بيكم ، قبل ما ننهي الحلقه عندي رسالتين حـ أديكم ليها لو حابين ممكن تقروها بصوت أو ممكن تقروها في سركم ، قلنا ليهو طيب ، أدى كل واحد ظرف ، لمن فتحتو رسالتي بديت أقراها بصوت :
خيب ظنهم و كن أنت
احلم ، واصل ، قاتل ، لا تقف كن أنت بأي ثمن
لا تدعهم يشكلونك كما يريدون
لا تكن صورة لا تليق بك
و شخصية لا تمثلك ...
كن أنت فقط أنت 💜
قلت ليهو حبييييت والله ، في وقتها ، شكراً ، قال لي العفو
ناصر برضو قرا رسالتو الكانت :
الله يعلمُ ما كنت تتمنّى في حياتك ، ويعلمُ كم أحزنك ما لم تتوقّعه من أمورٍ حصلت لك ، و يعلمُ كم يُؤلمك ما أصابك ، و يعلمُ كل ما تُريدهُ و قد تأخّر عنك ، و يعلمُ كل ما أهمّك و قد طال فيه انتظارك..
إطمئن ، الله محيطٌ بكل تفاصِيلك ، بكل ما يؤلمك و يوجعك ، بكل ما يُثقلك و يؤذيك ، الله بصيرُ بكَ و بما تكابدهُ في هذه الحَياة..
لمن خلص قال ليهو برضو في وقتها يا مصطفى تسلم والله ، قال ليهو الله يسلمك ، في خواتيم الحلقه عايز كل واحد منكم يعاين للكاميرا و يرسل رساله لنفسو بعد 5 سنوات :
ناصر عاين للكاميرا و قال إلى ناصر الفي المستقبل : لو ربنا أحيانا للزمن داك أنا متأكد انك للوقت داك حتكون قدرت تتخلص من حاجات سيئه كتيره في حياتك ، متأكد انك حتكون أسست شغلك الخاص و صعدت سلالم النجاح و كمان متأكد انك هسي بضحك لأنك بتشوف في الشريط دا ...
لمن جا دوري :
عاينت للكاميرا و قلت بعد 5 سنوات ان شاء الله حأكون عملت البرنامج الكنت مخططه ليهو ، متأكده انو حـ يكون ناجح و كميه من الناس حـ تدعم البرنامج و بإذن الله كلنا كـ ابناء بلد واحد حـ نقدر بعون الرب نروج لـ سياحتنا بطرقنا المختلفه ، قد نختلف في أشكالنا ، ألوانا ، عاداتنا و تقاليدنا و قبائلنا لكن الأكيد إنو كلنا حـ نتوحد ، رجال و نساء ، صغار و كبار لإعلاء اسم بلدنا ، لمن أكون بحضر في الفيديو دا بعد الـ 5 سنوات متأكده إني حأكون مبسوطه و قاعده نفس القعده دي جنب ناصر ، حـ أتلفت و اقول ليهو : " الحمدلله ،حققت واحد من أكبر أهدافي "
قال لي يا سلام عليك يا مها ، كل لمن سودانا ينادينا حـ يلاقانا حاضرين و ان شاء الله كلنا نصل لأهدافنا...💜
حقيقة مها و ناصر دي كانت من أمتع الحلقات ، أنبسطت بوجودكم والله و بالكلام معاكم.....
لمن كنا في الطريق كالعاده بعد كل برنامج اكون فيهو ضيفه بكون مبسوطه ، قلت لـ ناصر الحلقه دي كانت مميزه شديد ، قال لي فعلاً ، حكينا بكل سلاسه و إستمتعنا بالونسه ، المهم بعدها عدت الأيام عادي ، لحد ما يوم قلت لـ ناصر أنا ماشه لـ حبوبه ، هي زي كل سنه بتحب تعوس الآبرى و أنا كل مره بمشي ليها لأني بحب لمة نسوان حلتهم يتلموا عشان يعوسوا الآبري و هم بشربوا الجبنه ، في بيتنا ماف حاجات زي دي و هنا كمان ، معظم الناس بقت تجيبوا جاهز ، قال لي طيب حـ أوديك ، فعلاً وصلني و قعد شرب الجبنه بعدها مشى ، طبعاً ناس حبوبه كانوا بعوسوا و أنا بصور فيهم ساي ، قالوا لي تعالي جربي قلت ليهم لا لا ما عايزا ، وحده جارتهم قالت ليهم بنات الزمن دا ما بحب الشغل المتعب و القاسي 😂 عشان كلامها دا قلت ليهم طيب خلوني أجرب ، والله أول ما قعدت في البنبر كدا لهيب النار حرقني في رجليني ، شلت مويه و مسحت بيها رجليني و ناس حبوبه قعدوا يضحكوا علي ، شلت شويه من العجين و عملتو في الصاج و بقيت سايطه ساي و أنا ما شايفه حاجه من كترة الدخان ، دموعي سالت زي المطر ، جارتهم ضحكت و قالت لي قومي قومي يا بتي ما بتقدري عليهو ، قلت ليها لا لا بعملها ، غيتو ساعدوني فيها ، لمن استوت قالوا لي طبقيها في الصاج و ختيها في الصينيه ، طبعاً ما قدرت اطبقها ، قلت ليهم سخنه ، لو في جونتيات جيبوهم لي و كمان شربات لـ رجليني لأنو سموم النار حار....ياخ النسوان ديل ماتوا من شدة الضحك ، حبوبه قالت لي رايك شنو نجيب ليك مليات و نلفك بيهم زي المومياء عشان ما تحسي بالحراره ، قلت ليها ياريت والله و كمان جيبوا لي نظاره عشان عيوني ، قالوا لي قومي قومي و خليك في تصويرك ....المهم بدوا من العصر و خلصوا بعد صلاة العشاء ، طبعاً سارا طله ما جات طلعتنا كانت قاعده جوه غرفتها أصلاً هي ما بتحب الآبرى ولا بتحب عواستو بتقول لينا دا تعب سااااي و هلاك للنفس ، المهم بعد ما مشوا نضفنا المكان و رتبناهو ، حبوبه قالت لي تعالي طلعي معاي السرير داك من المظله ، قلت ليها لا انتِ اليوم عشتي الدور و قايله نفسك في البلد 😂😂 الدنيا سخانه ياخ خشي غرفتك و نومي في المكيف ، قالت لي اليوم وقت الله ذكرني البلد خليني أنوم في الحوش الوسيع دا تحت سماء الله ، قلت ليها كويس ، طلعتو معاها و قلت ليها حأخش لـ سارا ، أول ما إتحركت كدا حسيت راسي لافي ، بعدها حسيت إني حـ استفرغ ، جريت الحمامات الخارجيه و إستفرغت هناك ، بعدها غسلت وشي و طلعت من الحمام أخت نفس و وقفت جنبو مسافه ، حبوبه جات و قالت لي المره دي برضو أكلتي طعميه فيها كزبره ؟؟
قلت ليها لا ما عارفه من شنو
قالت لي واضح من شنو لكن لو اتكلمنا إتلومنا ، عاينت ليها و سكت ، دخلت جوه لـ سارا لقيتها بتحضر ، قعدت أحضر معاها، قالت لي خلاص خلصتو خمجكم ؟؟ ضحكت و قلت ليها ايوه ....تاني حسيت نفسي بتلعي و كنت حـ استفرغ بس ما استفرغت ، سارا قالت لي مالك ؟؟ قلت ليها حاسه بطني طامه ، ماشه أشيل لي ليمونه ، قالت لي الزنجبيل كمان بشيل الطمام ، اغليهو و أشربيهو قلت ليها طيب ، المهم مشيت غليت زنجبيل و كبيتو في كبايه ، شلتو و مشيت قعدت معاها و بقيت أشربو ، حبوبه جات داخله و هي بضحك قالت لي لسه الطمام ما خلاك ، قلت ليها لا ، سارا قالت لي حـ يخليك بعد تشرب دا ، حبوبه قالت ليها بتكون أكلت طعميه في كزبره ، عاينت ليها و قلت ليها حبوبه ياااااخ ، قالت لي خلاص بتكون دي عواسة الآبرى عملت ليك طمام ، سارا قعدت تضحك و قالت ليها يا أمي مالك معاها ، قالت ليها البت دي سبب إستفراغها و طمامها معرووووف و أصلاً ظااااهر ، سارا قالت ليها ما فهمت مالا ؟؟ قالت ليها 24 ساعه بتحضري في المسلسلات و ما عارفه مالا ؟؟؟ لمن الوحده في المسلسلات نفسها تلعي و تستفرغ بتكون مالا ؟؟...سارا عاينت لي و قال لي وااااي يا ميمي صحي 😍😍 واحلااااتي يا ناس !!...قلت ليها انتِ بتصدقي كلام حبوبه دا !! قالت لي لا لا ، معناها جد جد والله ، دا أحلى خبر بالجد ، قلت ليهو ياخ زهجتوني ، ختيت الكبايه و دخلت في أقرب غرفه و رقدت و كلام حبوبه بقى يخطر على بالي ، بقيت ماشه و جايه في الغرفه و أنا متوتره ، قلت لا لا ياخ ....ما عايزا ، ما عايزا !!
بالجلاله نمت ، كنت طول اليوم بتقلب في السرير يمين و شمال ، تاني يوم طوالي ناصر إتصل علي بعد شراب الشاي و قال لـ حأجي أسوقك بعد العصر كدا لأنو عندي شغل ، قلت ليهو طيب ، بعدها سارا جاتني و هي لابسه عبايه ، قالت لي في مركز قريب من هنا أرح ليهو عشان نعمل ليك الفحص ، قلت ليها سارا ياخ !! انتِ بتصدقي كلام حبوبه !! قالت لي ما حـ نخسر حاجه لو مشينا و اتأكدنا .... طبعاً أنا كنت خايفه و في نفس الوقت عايزا أمشي عشان اتأكد ، قلت ان شاء الله ما يطلع الفي بال حبوبه ، المهم لبست عبايتي و مشيت معاها ، عملنا الفحص و بقينا منتظرين النتيجه ، طبعاً أنا اطرافي بقت بارده من شدة الخوف و التوتر ، سارا ختت يدها على يدي و قالت لي يا بت دا شنو دا !!؟ اطرافك تلاجه بس ؛!!....ما رديت عليها كنت بهز في رجلي بس ، قالت لي ميمي دا كلو خوف ؟؟ قلت ليها ما عايزا ، ما عايزا يا سارا وااااي أنا من الورطه دي 😭😭
قالت لي ماف شي بخوف و بالعكس دي حاجه سمحه شديد و بتفرح والله فـ مستغربه من حالة التوتر و الهلع الإنتِ داخله فيها دي !!!
ما اتكلمت معاها تاني ، بقيت أهز في رجلي كدا لحد ما النتيجه طلعت ، سارا مشت إستلمتها و قالت لي يلا ندخل الدكتوره ، قلت ليها ما عايزا أدخلني انتِ ، قالت لي أجي !! و لمن تسأل منك اقول ليها قاعده برا !! قلت ليها خشي بس خليها توريك النتيجه و تعالي طالعه ، قالت لي مها بطلي عباطه ، قلت ليها حاسه نفسي مهبطه عديل و من مكاني ما قادره أقوم ، عليك الله يا سارا أدخلي انتِ ، فعلاً دخلت هي ، بقيت أدعي في سري و اقول ان شاء الله ما يظهر حمل ، قعدت أدعي كدا لحد ما سارا جات طالعه....أول ما وصلتني حضنتني و قالت لي مبروووك .....في اللحظات ديك هبطه عديل و حسيت إني بحلم ، بقت تتكلم معاي و هي مبسوطه شديد و أنا خشمي ما فتحتو لحد ما رجعنا البيت ، لمن حبوبه عرفت جاتني فرحانه و حضنتني و قالت لي مش كلمتك يا بتاعة الطعميه بالكزبره !! ما رديت عليهم ....كنت ساكته ساي ، سارا قالت ليها من قبيل حالفه ما تتكلم ، حبوبه قالت لي يا بت يا متخلفه بطلي حركاتك دي !!....طوالي دموعي نزلت عشره عشره ، قمت من مكاني و دخلت أقرب غرفه و قعدت أبكي....
يتبع.....
