زهرة فؤادي

4

#زهرة_فؤادي4
مها حولي الزاكي

جات البت و سلمت علينا أنا و رتاج و نادت وحده تانيه و قالت ليها ديل مذيعات في قناة السودانية 24 ، صحبتها جات سلمت علينا و قالت لي بالجد نحنا من أشد المعجبين بيكم ، خاصة انتِ يا مها ، نحنا متابعنك في السوشيال ميديا كلها ، قلت ليهم حبيباتي والله و يا بختي بيكم ، البت الأولى قالت لي أنا اسمي
قطوف و دي مروج صحبتي ، قلت ليهم عاشت الأسامي ، إتشرفت بيكم والله ، قطوف قالت لي واااي ما مصدقه انك واقفه قدامي ، قبيل كنا بنشوف في فيديوهاتك ...المهم اتونسوا معانا شويه و قالوا لينا إنهم شغالين هنا ، المهم بعدها إتوضينا و دخلنا صلينا ، بعد ما خلصنا طلعنا من المصلى و
طوالي طلعنا في الـ Escalators أو السلالم الكهربائية ، رتاج كانت بتوصف لي على مكان قالت إنو بت أهلها كانت شغاله فيهو ، في اللحظه ديك وصلنا نهاية السلم و هي عشان ما كانت مركزه ما رفعت رجلها فإتعترت و جات واقعه ، رفعتها بسرعه و قلت ليها كويسه انتِ ؟؟ قبل ما ترد علي سمعنا صوت بنات بضحكوا ، لمن إتلفتنا عليهم لقيناهم 3 بنات و وحده منهم كانت توته زولة ناصر ، قلت ليهم البضحك شنو ؟؟ وحده قالت لي بدلع  سوري ما قصدنا نشمت بس الموقف بضحك بالجد ، رتاج قالت ليها لو كان وقعتي إنتِ كنتِ حـ تضحكي ؟؟
ما ردوا علينا ، ضحكوا و مشوا و رتاج قعدت تنبذ فيهم ، قلت ليها البت اللابسه بنطلون جينز ضيق و فاكه شعرها دي فراشه من فراشات ناصر ، قالت لي الواطه أصلاً الرخصه بتشبها ، قلت ليها ناصر 24 ساعه بتكلم معاها ، قالت لي و انتِ ساكته ليهم ليه ؟؟ قلت ليها مالي و مالهم حريقه تحرقهم هم الإتنين ، قالت لي يا متخلفه اقعدي قولي كدا لمن تشلبو منك ، البت دي ظاهر عليها انها مفتحه و قاااادره و ناهره ، قلت ليها ما شغاله بيهم كتير ، قالت لي واااي أنا منك و من دمك البارد دا !!
المهم لفينا كدا و إشترينا كذا حاجه ، لمن جينا مارين بالمكتبه دخلنا  و أنا اشتريت دبدوب و ألعاب ، رتاج قالت لي ديل لمنو ؟؟ قلت ليها لـ دانه بت نازك قاعده معانا في البيت ، قالت لي من متين ؟؟ قلت ليها جابتها أمها امبارح لمن أنا كنت في الشغل ، المهم هي سافرت مع نسابتها عشان عندهم بكى ، قالت لي واااي البت بتكون عذبتك ، قلت ليها بالعكس أصلاً هي معظم وقتها مع خالها و هو ذاتو ما برضى بيها ، المهم اشترينا و نزلنا تحت ، قبل ما نطلع رتاج قالت لي تعال ندخل محل صبايا دا ، أول ما دخلنا كدا لقينا البتين القبيل لاقيناهم في المصلى ، قطوف و مروج ، قالوا لينا نورتوا والله ، إتفضلوا إتفضلوا طبعاً حلفوا إلا يضيفونا ، المهم قعدنا معاهم زي 5 دقايق كدا بعدها قلنا ليهم حابين نشتري و نمشي لأنو إتأخرنا ، رتاج اشترت لبسه كامله بنطلون أصفر فيهو حمالتين و قميص أسود ، أنا اشتريت فستان أبيض عليهو عبارات إنجليزيه باللون الأسود ، يعني بشبه الجريده بالظبط ، في الآخر أصروا شديد اننا نختار أي حاجه هنا كـ هديه منهم ، رغم أننا رفضنا بس البتين كانوا مصرين شديد ، فـ بس اخترت اسكيرتي و رتاج شالت فستان ، قبل ما نطلع قالوا حابين يتصوروا معانا ، المهم إتصورنا و شكرناهم و طلعنا ، رتاج قالت لي البنات ديل عسل حبيتهم بالجد قلت ليها فعلاً ، المهم ركبنا و إتحركنا طوالي ، قالت لي ناصر دا نهاي ما بتصل عليك عشان يشوفك اتأخرتي وين ! قلت ليها برااااك عارفه شكل علاقتنا عامل كيف و قبل كدا قلتها ليك نحنا الإتنين ما بنتدخل في حياة بعض ، قالت لي بالجد بتحيروا!!!
المهم و نحنا بنتونس كدا فجأه تلفوني رن و المفاجأه الحقيقيه إنو المتصل كان ناصر !! يمكن ناصر دا آخر مكالمه كانت بيني و بينو أيام خطوبتنا ، يعني قبل 3 شهور !! أول ما فتحت الخط قال لي وين إنتوا ؟؟ قلت ليهو ماشه على البيت ، قال لي بزهج ليه التأخير دا كلو و ليه ما إتصلتي علي عشان أجي أسوقكم !...في سري قلت أجي !! عاينت لإسمو مرتين و قلت ليهو خير مالك انت هايج كدا ! في شنو يعني ، قال لي بضيق لمن تصلي البيت ، و طوالي قفل الخط ، رتاج قالت لي دا ناصر ؟؟ قلت ليها إتخيلي !! قالت لي جاط فيك عشان اتأخرتي ولا شنو ؟ قلت ليها برضو اتخيلي ! غيتو الليله هو أصلو ما طبيعي إلا يكون شارب ليهو شي ، قالت لي عادي يا بت أمي ما انتِ مرتو في النهايه و حتى لو ما بحبك حـ يخاف عليك و يقلق لمن تتأخري ، قلت ليها الكلام دا ما دخل راسي 🌚
المهم وصلتني البيت و مشت طوالي لأنو أهلها إتصلوا عليها ،  طلعت المفاتيح و فتحت باب السور و دخلت ، باب الهول كان فاتح فأول ما دخلت لقيت ناصر في وشي ، قال لي بدري يا مدام !! قلت ليهو انت مالك و مالي ! مش متفقين ما ندخل في بعض !!؟ قال لي انتِ ما بتهميني و ما فارق معاي تجي الساعه 7 ولا نص الليل ذاتو ما هاميني شديد ، ربعت يديني و قلت ليهو طيب دا اسمو شنو !! قال لي انتِ هبله ياخ ! أنا لو ما دانه ما سائل عنك أساساً ، قلت ليهو اهااا يعني دانه أصرت عليك عشان تتصل علي و تشوفني اتأخرت ليه !؟ صدقتك !
مسح وشو بـ يدينو و زحاني من جنب الباب ، عاين يمين شمال و قال لي دانه وين ؟؟؟
قلت ليهو تسألني أنا منها ؟؟
جا قرب مني و قال لي ما بتظارف معاك أنا ، بطلي سخافه و قولي دانه وين ، عاينت ليهو مسافه و اتأكدت إنو جادي في سؤالو ، قلت ليهو ما عارفه ! دانه ما معاي !! خليتها معاك في البيت !
ضرب الباب بقوه و قال لي كيف خليتيها معاي ! أنا لمن طلعت خليتكم الإتنين قاعدين ، قلت ليهو يعني انت طلعت !! إتعصب شديد و بدا يرفع صوتو علي ، قال لي كيف تطلعي و تخليها براها في البيت ، دامك ما سايقاها معاك ليه ما إتصلتي علي و كلمتيني و ليه لمن اتصلت و سألتك انتوا وين ما قلتي لي إنو دانه ما معاك..... طبعاً نبرة صوتو وترتني ، قلت ليهو ناصر أفهم أنا ما كنت عارفه انك طلعت! زي كل يوم جهزت نفسي و مشيت شغلي ! و لمن قلت لي انتوا وين افتكرت انك قاصدنا أنا و رتاج لأنك أكيد عارف اننا معظم الوقت بنكون مع بعض ، قال لي أنا مالي و مالك انتِ و صحبتك!!من متين أنا قاعد اتصل عليك و أسألك اتأخرتي ليه و وين ؟ !!...انتِ مستهبله بس لأنو اليوم ما عندك شغل أساساً ، قلت ليهو الجدول اتغير و......قاطعني و قال لي لو البت دي ما إتلقت دقيقه وحده ما بتقعديها في البيت دا ....قال كدا و مشى ركب عربيتو و طلع طوالي ، ختيت يديني على راسي و بقيت اقول معناها البت من الصباح مختفيه ، يا ربي تكون مشت وين ....قلقت شديد و ما قدرت اقعد في البيت فـ طوالي طلعت و دخلت على الجيران بسألهم عنها بس كلهم قالوا ما شافوها ، آخر بيت بعد ما طلعت منو في راجل كبير كدا ناداني و قال لي مالك يا بتي ؟؟ قلت ليهو بفتش على طفله ضايعه مني ، قال لي أوصفيها لي لأني قبل نص ساعه كدا شفت بت صغيره ماشه بالشارع دا ، إتلفت عاينت للشارع و قلت ليهو بالجد ؟؟ قال لي والله جد ، غيتو ان شاء الله تكون دي هي ، قلت ليهو صفره كدا و مسرحه شعرتين ؟؟ قال لي اي ، طبعاً ما عرفت هي حتكون لابسه شنو ، لأنو أمبارح بليل بكون ناصر غير ليها ملابسها ، المهم مشيت بنفس الشارع الوصفو لي الراجل و بقيت أتلفت يمين ، شمال و اسأل عنها ، لفيت كدا لمن رجليني وجعوني ، في الآخر قعدت في مسطبه جنب بقاله و بقيت أردد يا رب نلقاها يا رب نلقاها ، كنت حاسه بالذنب و المسؤوليه تجاها رغم إنو خالها هو المسؤول عنها و مفروض بما إنو هي أمانه عندو قبل ما يطلع يتأكد أنا طالعه ولا لا !!
المهم قمت تاني و قعدت ألفلف في الشوارع ، آخر حاجه لاقيت منذر ولد جيران و سألتو إذا شاف دانه أو لا ، قالت لي ما شفتها والله ، ضايعه ولا شنو ؟؟ قلت ليهو أيوه من قبيل ، قال لي بتتلقي ان شاء الله ، ناصر وين هسي ؟؟ قلت ليهو طلع يفتش عليها ، قال لي أرح طيب بفتش معاك ، قلت ليهو تمام ، المهم لفينا كدا لمن فترنا ، بعد شويه ناصر جا ماري بجنبنا بـ عربيتو ، منذر قال لي مش دا ناصر ؟؟ قلت ليهو ما عارفه ، قال لي بكون ما شافنا ، قلت لـ منذر انت أرجع بعد دا ، أنا حأمشي بالشارع التاني داك و منها حأرجع البيت أشوف ناصر إذا لقاها ، قال لي لا لا ما بخليك تلفي بليل براك ، قال لي إتصلي على ناصر ، قلت ليهو بتردد طيب ، طبعاً في اللحظات ديك الناس كانوا جاين من صلاة العشاء ، فجأه سمعت زول قال لي يا بتي انتِ لسه بتفتشي يا بتي  !!
لمن إتلفتنا عليهو لقيتو عمو القبيل داك ، منذر قال ليهو عم جبريل كيفك ، قال ليهو كويس يا ولدي ، قلت ليهو ما لقيت البت لسه يا عمو ، قال لي قالوا البت إتلقت ، قلت ليهو القال كدا منو ؟؟
قال لي الرجال في المسجد ، قالوا إتلقت من قبيل و هسي في بيتهم !!
فرحت و قلت الحمدلله إنها إتلقت و في نفس الوقت زعلت شديد لأنها إتلقت من قبيل و ناصر ما اتصل كلمني و خلاني لافه كدا زي عربية النفايات!!! بما انو رجع البيت و ما لقاني فأكيد معناها إني طلعت وراهو عشان أفتش على دانه !! ...دقيقه دقيقه !! يعني لمن جا ماري بجنبنا كان جايب دانه معاهو !!؟...متأكدة إنو شافني بس مع ذلك ما وقف ساقني معاهو ولا اتصل و قال لي إنو لقى دانه و إنهم حالياً في البيت !
المهم رجعت البيت و أنا واصله الحد من الزعل و رجليني واجعني شديد ، أول ما دخلت الهول لقيتو قاعد مع دانه و بشربها في مويه ....خشمي ما فتحتو ، طوالي جيت ماره بجنبهم و إتجهت على السلم ، دانه كانت بتنادي علي ، قالت لي يا مها أنا رحت و خالو لقاني .... طبعاً قربت أتلفت عليها بس منعت نفسي ، لمن بقت تنادي علي لسه ناصر قال ليها بنبره حاده : دانه !!!!
دخلت غرفتي و قفلت الباب و بقيت أنبذ في ناصر الفقر ، عديم الإحساس و الضمير ، معقوله يخليني لافه في الشوارع و الدنيا ضلام ! يعني حتى لو كنا بنكره بعض ماف داعي للحركه الخسيسه و البايخه دي.....المهم صليت العشا و نمت طوالي ، تاني يوم كان عندي شغل ، قبل ما أطلع كتبت لـ ناصر في ورقه : أنا طالعه و بت أختك دي أبقى عليها عشره ، عشان ما تضيع منك و تجي في الآخر تتهم الناس ، لصقت ليهو الورقه في باب غرفتو و طلعت طوالي مشيت شغلي ، كان عندي برنامج صباحي ، بعد ما خلصت منو إتصلت على رتاج و حكيت ليها ، قالت لي دا غلطكم انتوا الإتنين ، يعني لو بتكلموا بعض قبل ما تطلعوا ما كان البت ضاعت ، المره دي الله ستر و الحمدلله إنها إتلقت ، قلت ليها رمى كل اللوم علي !! قالت لي معليش معليش يا حبيبتي ، قلت ليها و فوقها ما كلمني إنو لقاها و خلاني لافه في الشوارع باليل ، قالت لي هنا جد هو الغلطان ، يعني بما انو لقاها و شافك في الشارع مفروض يقيف و يرجعك معاهو !! ....بالمناسبه أمها حتجي تسوقها متين البت دي ؟؟ قلت ليها ما عارفه يا رتاج أنا لا متواصله معاها لا قاعده اتونس مع ناصر عشان أعرف اخبارها ، قالت لي أمركم عجيب....المهم إتونست معاها مسافه بعدها قفلنا من بعض و رجعت البيت و طوالي دخلت غرفتي ، شلت الدبدوب و الألعاب الجبتهم لـ دانه و مشيت أديتهم ليها ، فرحت شديد بيهم ، كانت براها في غرفة ناصر ، بعدها رجعت غرفتي ...... و أنا بتصفح في الفيس ، لقيت بوستات كتيره في الصفحات الإعلامية بتتكلم عن قضية الطالب عماد فخر الدين و كلها بعنوان : متى ستفك طلاسيم القضيه المبهمه؟
دخلت حسابي و كتبت في صفحتي : رغم وجود كاميرات مراقبة تظهر عدد 3 ملثمين قاموا بدخلوا الشقة السكنية التي قتل فيها الطالب الجامعي عماد فخر الدين إلا ان طلاسيم القضية لم تفك بعد و الشرطه لم توضح من هؤلاء و ما سبب دخولهم الشقه ، يبدو ان ملف هذه القضية سيوضع في رف النسيان كما وضع ما قبله ، أيعقل ؟؟
المهم طلعت من الفيس و عملت فيديو نزلتو في التيك توك كنت بتكلم فيهو عن الصداقه ، بعدها نزلت تحت ما لقيت زول ، طوالي قعدت و بقيت أقلب في القنوات ، بعد شويه ناصر جا و قعد طوالي ، لا عاينت ليهو لا عاين لي ، كنت متوقعه إنو يعتذر مني في أي لحظه بس المغرور ما اعتذر كأنو ما حصلت حاجه....
بقينا ساكتين كدا لحد ما فجأه تلفونو رن ، عاين لي و رد على التلفون ...
كويس الحمدلله انتِ كيفك و أخبارك شنو
لا موجوده ....
تلفونها شكلو بعيد منها ، ثواني أديك ليها ، مد لي التلفون و قال لي دي سارا خالتك ، قلت معناها إتصلت في تلفوني و ما رديت عليها لأني خليتو في غرفتي...
طبعاً لمن رديت عليها كانت هايجه شديد ، قالت لي ميمي دا شنو العملتيهو دا ! قلت ليها سارا بسم الله في شنو ؟؟
قالت لي البوست الكتبتيهو دا حـ يجيب أجلنا ، كل الصفحات العاديه و الإعلاميه إتداولت الخبر الكتبتيهو في حسابك !...قلت ليها طيب المشكله وين ! قالت لي نحنا مش قلنا ليك لسه الخبر دا عليهو شويه !؟ بتتصرفي مع عندك ليه ، قلت ليها خالتو روقي شويه ، يعني لمتين حـ نسكت و بعدين ما تنسي إنو معانا نسخه من كاميرات المراقبه ، قالت لي بس دا ما وقتو ، انتِ عارفه انو بحركتك دي حـ تعرضي نفسك للمسائله !! ، لو سألوك جبتي الخبر دا من وين حتقولي ليهم شنو ؟؟ عارفه انو خبرك دا يعتبر تسريب !!؟
قلت ليها لو إعتبروهو تسريب معناها كدا بكونوا أكدوا صحة الخبر ، قالت لي سرعه أحذفي البوست و اكتب بوست اعتذار قولي انو الخبر غير صحيح و حصل سوء فهم ، قلت ليها لكن يا خالتو ، قالت لي اسمعي الكلام و أنا تاني بعمل حسابي منك و ما حأوريك أي حاجه.....قالت كدا و طوالي قفلت الخط في وشي ، وقفت على حيلي و مديت لـ ناصر تلفونو ، طبعاً من قبيل بعاين لي ساي و عايز يعرف في شنو ، شال تلفونو و قال لي خير في حاجه ؟؟
قلت ليهو لا و طوالي مشيت غرفتي ، لمن شلت تلفوني و دخلت الفيس لقيت البوست بقى زي حلة الفشار ، كميه من الصحفيين و كميه من الإعلاميين الما مصادقاهم ذاتو كانوا معلقين على البوست حقي ، كان في كمية خلق في البوست دا ما عاديه و كمان عدد المتابعين زاد كتير في ظرف ساعه بس ! حذفت البوست زي ما خالتي طلبت بس ما كتبت إعتذار و ما قلت إنو الخبر غير صحيح ، بس ما اتغير شي بعد حذفي للبوست لأنو خلاص انتشر و كان نازل في صفحة الحدث السوداني و العربيه السودان بعنوان : إحدى المراسلات و الإعلاميات تستنكر تأخر الجهات المعنية في فك طلاسم قضية مقتل الطالب الجامعي عماد فخر الدين و ذكرت شئ لم تذكره الجهات المعنية ، حيث كتبت :
رغم وجود كاميرات مراقبة تظهر عدد 3 ملثمين قاموا بدخلوا الشقة السكنية التي قتل فيها الطالب الجامعي عماد فخر الدين إلا ان طلاسيم القضية لم تفك بعد ......الخ
قلت هسي لو كنت منزله بوست حوجه ما كان انتشرت الإنتشار دا كلو ، إتصلت على خالتي سارا و قلت ليها إني حذفت البوست بس الخبر انتشر و لسه الناس بتداول فيهو ، قالت لي هسي دي نزلي اعتذار في صفحتك و وضحي إنو كان في إشكاليه في صحة الخبر و تااااني يا مها ما تتصرفي من عندك ، قلت ليها طيب و طوالي قفلت الخط ، ناصر جا دق لي الباب و دخل ، قال لي في شنو يا شابه ؟؟
قلت ليهو ماف شي ، دخلت الفيس و كتبت في حسابي انو الخبر النزل غير صحيح و إعتذرت و قلت ليهم مبررات واهيه ساي ، بعدها طلعت من الفيس و ختيت تلفوني على جنب ، ناصر كان لسه واقف ، ربع يدينو و قال لي للمره المليون في شنو ؟؟
قلت ليهو بزهج ياخ ماف شي ما بتفهم إنت ، قال لي غلطان أنا و طوالي طلع و قفل الباب بزهج ...
المهم الإعتذار الكتبتو جاب لي كميه من الردم و شتايم و ألفاظ كتيره ، قالوا لي انتِ صحفيه فكيف تنشري خبر قبل ما تتحري الدقه و و و طبعاً دي كومنتات الناس المحترمه شويه ، أما الباقين و بالذات الداخلين بحسابات وهميه كانوا كاتبين كلام استغفر الله بس ! يعني الواحد تحس انو في حاجه محرقه روحو و عايز يفرغ حقدو و غلو في زول بغض النظر عن الزول دا منو !!....بقيت أرد على الكومنتات دي لأنو الكلام بالجد وجعني ، كل ما أرد بجوا يعلقوا و يردحوا تاني و يشتموا فيني ، طبعاً لقيت معظمهم قبل كدا مرسل لي في الماسنجر و منبرش ! و اغلب الرسايل : "ممكن نتعرف ".."أنا معجب بيك والله "..." هاي يا حلوه "....و واحد كدا كاتب لي رساله طول و عرض قايل لي فيها إنو بحبني و شنو ما بعرف ، عملت اسكرين شوت لـ رسايلهم دي و مشيت نزلتها ليهم في الكومنتات و قلت ليهم في العام تنفشوا ريشكم و في الخاص تترقدوا ، طبعاً لقيت مصطفى رادي عليهم و بتشاكل معاهم ، قال ليهم هسي انتوا أولاد ناس ؟؟ بتقدروا تقولوا كلام زي دا لأمهاتكم أو أخواتكم ؟؟.....
انا ما إكتفيت بـ إني أنزل الإسكرينات في الكومنتات و خلاص نزلتها في بوست عديل و تاقيتهم واحد واحد ....في نفس اللحظه دي لقيت رساله من مصطفى ، قال لي ديل عواليق ساي يا مها ما تردي عليهم ، قلت ليهو ما شايفهم بقولوا عني شنو ؟؟ أسكت ليهم يعني ...قال لي لا طبعاً ما تسكتي بس بتقدري تحظريهم من دون ما تتعبي نفسك و تنزلي لـ مستواهم ، انت بت ناس و محترمه و عندك حدود حتى في الكلام ، بس ديل ذرة أخلاق و تربيه ما عندهم و بتلفظوا ساي ، المهم هسي أحظريهم لأنو بالجد كلامهم تافه شديد أنا الراجل ضايقني فما بالك انتِ الأنثى ، قلت ليهو حظرت جزو كبير منهم بس ديل بعد افضحهم و أشمت فيهم......
المهم في البوست حق الإسكرينات ردمتهم قدرتي و تاني ما قدروا يقولوا حاجه لأنو أغلبهم ناس معروفه فـ الميديا فـ انبراشهم لي في الخاص بقى ليهم فضيحه قدام الناس ، بعدها نزلت تحت لقيت ناصر ما موجود ، مشيت غرفتو عشان أشوف دانه برضو ما لقيتها ، قلت يمكن ناصر ساقها معاهو ، دخلت المطبخ عملت لي إندومي و كباية عصير ليمون ، بس برضو كنت مقلقه و قلت اتصل عليهو و اتأكد إنو دانه معاهو ، فعلاً اتصلت عليهو ، رد علي بعد مسافه ، قلت ليهو دانه معاك ؟؟ قال لي ايوه و قفلنا على كدا......
ناصر تاني ما جا راجع إلا الساعه 11 بليل ، جا من دون دانه ، قلت ليهو دانه وين ؟؟ قال لي في بيتهم ، قلت ليهو أمها جات يعني ؟ متين  طيب ؟؟ ....كان بقلب في القنوات ساي ، قال لي يعني لو ما جات حـ أرجعها بيتهم لشنو ؟؟ عليك الله ما تسألي اسئله غبيه ....لويت ليهو خشمي بس و سكت خليتو ، بعد مسافه قال لي شايف رادمنك في الفيس ، قلت ليهو يردمهم بـ ذخيره ان شاء الله ، أنا ذاتي ما قصرت منهم......قال لي هببتي شنو إنتِ ؟؟
قلت ليهو ولا شي ، قال لي على راحتك ما هاميني كتير ، قلت ليهو أيوه واضح إنو ما هاميك ، قال لي أنا بسأل من باب الفضول و العلم ، يعني بما انك ساكنه في بيتي فـ لازم أكون على درايه بالمصايب البتعملي فيها ، لأنو لو وقعت مصيبه ما حـ تقع على راسك براك و أنا حأكون مجبور اتجارى معاك في المحاكم بحكم إنك مرتي....قلت ليهو إتطمن لو حصلت لي مصيبه أو يوم من الأيام وقعت في مشكله انت آخر واحد حـ تعرف بيها و ما تخاف ما حـ أدخلك في مشاكلي ، عندي أب و أخ يسدوا عين الشمس ....عاين لي بطرف عينو بس و بعد دقيقة صمت قال لي بكرا عازم أصحابي ، قلت ليهو تمام ذاتي كنت مفكره أعزمهم ، قال لي إذاً أكتبي لي الحاجات المطلوبه ... اوووبس نسيت انك ما بتعرفي تطبخي ، قلت ليهو غلطت عمري إني قلت ليك إني ما بعرف أطبخ ، قال لي كد كدا كنتِ حـ تنكشفي ، المهم حـ أطبخ أنا و إنتِ كالعاده إتفرجي بس ، قلت ليهو ممكن اعمل العصاير...
المهم تاني يوم بعد ما نحنا الإتنين رجعنا من الشغل دخلنا المطبخ ، هو بشتغل و أنا براقب فيهو ، قال لي دا كورس طبخ مجان ، قلت ليهو الكورس بتاعك دا انا أساساً ما مركزه معاهو ، قال لي حتى لو مركزه مستحيل تعترفي ، مغروره لأبعد درجه ، قلت ليهو أبعد درجه دي حقتك انت ، قال لي أنا لي حق أفتري ، قلت ليهو عشان مالك ؟؟...قبل ما يرد تلفونو رن ، شالو و قال أيوه يا توته !!....لا لا كيف يعني ما حـ تجي !؟....اتصرفي يا زوله لازم تجي العزومه دي بأي طريقه......تمام ، دامك عيانه ما تجي و إنتبهي على نفسك و لو تعبتي شديد أمشي الدكتور على طول و ما تستهيني بالمرض ...
بعد قفل منها قلت ليهو توته ولا منو دي حبيبتك ولا شنو ؟؟؟
قال لي أكتر من حبيبه ...بتسألي ليه ؟؟
قلت ليهو لأني ما قدرت اسمي نوع العلاقه البينك و بينها ، يعني واضح انكم بتحبوا بعض بس هي موقفها شنو من زواجك ؟؟ ما شايفه إنو عندها مانع أو الموضوع مضايقها ، قال لي أنا و توته بنفهم بعض و ماف أي شي بقدر يفرقنا أو يقيف بيناتنا 😊
قلت ليهو هو منو العايز يقيف بيناتكم ، ما تفهم سؤالي غلط ، أنا والله انتوا الإتنين ما شغاله بيكم ، زواجي منك زواج اتفاق و أصلاً أنا و انت من زمان ما بنطيق بعض ، قال لي و لحد اللحظه ، قلت ليهو فعلاً....
المهم بعد حكاية ساعه كدا أصحابو جوا ، زوجاتهم ساعدوني في رص الصفره ، أول ما قعدنا كدا و بدينا ناكل سمعنا صوت الجرس ، ناصر قام و مشى فتح الباب ، بعد شويه سمعنا صوت عالي بقول مفاااااجأه موووش يا دودي !... قال ليها والله أجمل مفاجأه يا توته !...يعني كذبتي علي لمن قلتي عيانه ؟؟ قالت ليهو لو ما كذبت كيف كانت حتكون مفاجأه !؟ ضربها ضربه خفيفه على راسها و قال ليها خوفتيني عليك .... طبعاً بتكلم معاها و هم جاين علينا ، جات سلمت علينا كلنا و قالت لـ أمير صاحب ناصر ، أميييير ممكن تقوم لي من مكانك دا و تخليني اقعد جنب نصُوري ؟؟ قال ليها ماف مشكله و طوالي قام ليها و قعد في كرسي تاني ، طبعاً بيان مرة أمير كانت بتعاين لي ساي ، ناصر قعد و قال يلا واصلوا أكل يا شباب ، وحده اسمها زحل قالت لي ما شاء الله يدك طاعمه ، بيان قالت ليها حرفياً الأكل تحفه تسلم يدك....كلهم شكروا الأكل و أنا كل مره أعاين لـ ناصر لأنو هو العملو ، توته قالت أنا ليه حاسه انو الأكل دا عملو ناصر ؟؟؟ شالت من الكفته و قالت بالجد دا طبخ ناصر !!....ناصر ضحك و قال ليها أنا ذاتي ما فاضي عشان أطبخ ، ضحكت و قالت ليهو حلووو ياداب فهمت ، انت الطبخت الأكل دا و نسبتو لـ مها ، قال ليها أنا....قاطعتو و قالت ليهو عادي عادي ما فيها حاجه ، ما فرقت إذا طبخت انت أو هي الإتنين واحد..... طبعاً أنا شميتها شديد لأنها قاصده تحرجني ، قالت لي بختك يا مها ، بقولوا المحظوظه هي البتعرس واحد عندو نفس في الطبخ ، و ناصر دا ما شاء الله عليهو شيف عديل .... قلت ليها فعلاً عشان كدا دائماً بصر إنو يطبخ هو و ما بخليني أعمل شي  ...قالت لي يعني الأكل دا ما طبختيهو انتِ؟؟
هنا عاينت ليها عشره عشره
ضحكت و قالت لي معليش في البدايه كنت شاكه انو طبيخ ناصر لكن ما متأكده بس بعد كلامك دا خلاص اتأكدت.....واحد من أصحاب ناصر إسمو الطيب ، قال ليها خلاص ماف مشكله ، خلونا ناكل يا جماعه !!
المهم واصلنا ونسه و اكل و طبعاً توته ما بتتونس مع زول غير ناصر ، حتى لمن زول يلفتو عشان يتكلم معاهو هي بتقاطعهم ، حسيتهم شامنها شديد ، المهم بعد ما خلصنا و رفعنا الصفره ، بيان قالت لي أنا بعمل القهوه ، زحل قالت لي و أنا بعمل الشاي ، قلت ليهم طيب ، بديت اغسل في العده و هم بعملوا الجبنه و الشاي ، لمن خلصوا قلت ليهم أمشوا هسي بحصلكم بس ارفع الصحاني ديل ، قالوا لي تمام ، المهم خلصت و طوالي طلعت من المطبخ و مشيت على الهول لمن وصلتهم كدا سمعت صوت الجرس و بما إني واقفه طوالي مشيت فتحت باب الهول ، كان مصطفى ، قال لي شكلي اتأخرت .... طبعا للحظات اتفاجأت بشوفتو لأني ما اتوقعت إنو ناصر يعزمو ، قال لي ما أدخل ولا شنو ؟؟...قلت ليهو لا ، اتفضل ، اتفضل ...المهم دخل قدامي و أنا وراهو ، طوالي عاينت لـ ناصر لقيتو بعاين فيني ، مصطفى سلم عليهم كلهم و لمن جا و مد يدو لـ ناصر ، ناصر ما سلم عليها ، سحب يدو و قعد و قال ليهم معليش اتأخرت ، ناصر حسيتو حـ يقوم يضربو بس صحبو الطيب مسكو من يدو و عمل ليهو حركه نظام خليهو ، كنت حـ أمشي على المطبخ عشان أجهز ليهو أكل بس وقفت لمن قال لي يا مها....لمن إتلفت عليهو قال لي ما تعملي حاجه شبعان أنا والله و حـ أشرب الجبنه دي ، قلت ليهو طيب و جيت قعدت جنب بيان و بدينا نشرب في الجبنه ، مصطفى قال لي على فكره الخبر النشرتيهو عمل ضجه كبيره ، الطيب قال لي فعلاً أنا شفتو في صفحة العربيه الحدث ، بيان قالت انتوا بتتكلموا عن شنو ؟؟ قاموا حكوا ليها ، قلت ليهم كان في سوء فهم و أنا حذفت البوست و إعتذرت ، مصطفى قال لي على فكره أنا مرسل ليك حاجه ليها علاقه بالموضوع دا ، قلت ليهو حاجة شنو ، قال لي شوفي الماسنجر ، قلت ليهو تلفوني فوق ، بشوفو بعدين ، قال لي تمام ، المهم بعدها كلنا قعدنا نتونس عادي مع بعض إلا ناصر ، كان بعاين لـ مصطفى دا عشره عشره ، كأنو عايز بس يمسكو من رقبتو و يكسرها ليهو ، المهم لمن الساعه 5 جات هم إستأذنوا و مشوا ، طبعاً بيان و زحل ما قصروا حاجات الجبنه كلها لموها و غسلوها و رتبوا لي المطبخ و مشوا....
لمن قربت من غرفتي و كنت حـ أدخل فجأه ناصر مسك يدي بقوه و لفتني عليهو ، كان واصل الحد من الضيق ، قلت ليهو في شنو فكني ياخ ، قال لي بتتحديني مش !؟ قلت ليهو اتحداك في شنو ...اخخ يدي بتوجعني ياخ ، قال لي بنهره منو القال ليك أعزميهو !؟ قلت ليهو منو ؟...ضغط على يدي بقوه و قال لي ما تستهبلي علي ، قلت ليهو أصحابك ديل عزمتهم أنا ولا انت !؟ قال لي اقسم بالله تاني تعزميهو أو تدخليهو البيت دا إلا أشردكم انتوا الإتنين  ....لزيتو و قلت ليهو بزهج أولاً أنا ما عزمتو و تااااني حاجه افهم انو أنا ما لي علاقه بالخلافات البيناتكم ، بتكرهو أو بتحبو ما عندي بيك شغله ، فك يدي بقوه و قال لي أنا فاهمك كويس و طوالي دخل غرفتو ، مسكت يدي و بقيت أمسح عليها و أنبذ فيهو ....دخلت غرفتي و أنا زهجانه شديد ، بعدها بمسافه اتذكرت إنو مصطفى قال لي رسلت ليك حاجه ليها علاقه بالقضيه ، فطوالي فتحت تلفوني و دخلت الفيس و على طول الماسنجر ، لقيتو مرسل لي صوره فيها الطالب عماد فخر الدين و معاهو واحد تاني ، رسلت ليهو إستفهامات ، رد علي في نفس اللحظه و قال لي دا مؤتمن صاحب عماد و ولد عمي في نفس الوقت ، ممكن أجيبو ليك عشان تتكلمي معاهو ، يمكن يفيدك في حاجه ....قلت ليهو تمام ، قال لي بكرا رايك شنو ؟؟...قلت ليهو ماف مشكله ، قال لي احدد الزمن و المكان أنا ولا انتِ ؟؟
قلت ليهو أنا ، قال لي وين طيب ؟؟ المهم وصفت ليهو مكان نتلاقى فيهو ، بعدها إتصلت و كلمت سارا خالتي ، قالت لي تمام أول ما تخلصي إتصلي علي ، قلت ليها حاضر ، المهم مشيت القناة و كملت شغلي ، لمن خلصت إتصلت على خالتي عشان تجيني ، فعلاً بعد نص ساعه كدا جاتني بعربيتها ، كانت معاها إلهام ، ركبت و سلمت عليهم ، إلهام قالت لي هو الولد دا منو و لقيتيهو وين ؟؟
قلت ليها دا صاحب ناصر ، المهم لمن وصلنا المطعم لقينا مصطفى منتظرنا مع ولد عمو ، طبعاً مصطفى اتفاجأ لمن شاف خالتي و إلهام جاين معاي ، طبعاً أنا فاهماهو كويس ، عايز يعمل لي حركات و يحاول يتقرب مني و هو مفتكر إنو لمن يحاول يقدم لي المساعده ، حـ أمشي على هواهو و أقابلو وين ما عايز ....المهم وقف سلم علينا هو و ولد عمو ، بعد ما قعدنا قال لينا تاكلوا و تشربوا شنو ، قلت ليهو لا ما عايزين حاجه ، مصطفى قال لي لا ما ينفع و أصر شديد خالتي قالت ليهو خلاص بنشرب عصير بس ، المهم أنا عاينت لـ ولد عمو و قلت ليهو اسمك مؤتمن صح ؟؟
قال لي ايوه ، قلت ليهو طيب ممكن تحكي لي علاقتك شنو بالمرحوم عماد !!....قال لي هو صاحبي ، اتعرفت عليهو في الجامعه قبل 3 سنوات و قعد يحكي لينا عن صداقتهم و مدى عمقها ، خالتي سارا قالت ليهو وين كنت لمن هو إتوفى ؟؟ قال ليها في البيت ، قالت ليهو خبر وفاتو وصلك كيف ؟ قال ليها شفتو في الفيس ، إلهام قالت ليهو شي غريب !! يعني صحبك متوفي ليهو يومين في شقتو و انت ما عرفت خبرو إلا من الفيس !!.…طبعاً هنا كلنا عاينا ليهو ، كان في كباية مويه جنبو فـ طوالي شرب و قال لينا في الفتره الآخيره علاقتي بيهو اتوترت و بقينا ما متواصلين مع بعض ، قلت ليهو و السبب ؟؟
في اللحظه دي جابوا لينا العصير ، الولد كان خايف و متوتر شديد ، خالتي قالت ليهو روق شويه و أشرب العصير ، مصطفى قال ليهو ماف حاجه بتخوف يا مؤتمن و مها دي أنا بعرفها فإتطمن ، مصطفى عاين لي و قال لي مؤتمن دا لسه ما قادر يستوعب خبر وفاة صحبو ، من يوم عرف إنو إتوفى و هو دخل في حاله تانيه....المهم الولد بعد ما راق شويه ، قال لينا إنو عماد في آخر فتره صاحب ليهو شله كدا ما كويسه من داخل و خارج الجامعه ، قال لينا أنا حذرتو من الناس ديل لأنهم من أشكالهم و مشاكلهم البعملوها في الجامعه حسيت انهم شله فاسده و ما كويسه و انو لو عماد باراهم حـ يضيع....هنا مؤتمن سكت و دموعو جات نازله زي الشلال ، واصل كلامو و قال أنا كم مره نبهتو و كم مره اتشاكلت و اتناقشت معاهو بسببهم و لمن كترت ليهو الكلام فصلها مني و بقى سلام ما بسلم علي و لو اتصلت عليهو ما برد و في الجامعه ما بلقاهو إلا في القاعه.... إلهام قالت ليهو الشرطه لمن إستجوبتك قلت ليهم الكلام دا ؟؟
قال ليها قلتو كلو إلا قصة الشله الصاحبهم ، الناس ديل كعبين و خطيرين شديد ....سكت و مسح دموعو و قال لينا ما بنكر إني خفت على نفسي و أسرتي منهم عشان كدا ما جبت سيرتهم ، لأنهم لو عرفوا إني اتكلمت عنهم ما حـ يخلوني في حالي و زي ما كتلوا عماد يمكن يكتلوني أو يكتلوا واحد من أفراد أسرتي ...سارا قالت ليهو طيب هسي الخلاك تتكلم شنو بعد شهر من وفاتو ؟؟ قال ليها ما قدرت أسكت ، كل مره بقول انو الشرطه براها حـ تكشفهم و تقبضهم من دون ما اأشر عليهم بس لحد الآن ما اتمسكوا و عايشين حياتهم بالطول و العرض و صاحبي جوه قبرو بسببهم ، المهم خالتي سارا و إلهام وقعوا ليك فيهو اسئله و أنا بقيت ساكته و بسمع فيهم ، ربعت يديني و رجعت لـ ورا و فجأه كدا عيني وقعت في عين ناصر ، كان قاعد بعيد في طاوله مع توته ، شكلو من قبيل كان بعاين لينا ، ما أبديت أي ردة فعل و هو كذلك ! عاينا لبعض كويس بعدها كل واحد غير زاوية نظرو ، المهم بعد حكاية نص ساعه كدا خالتي سارا قالت لـ مصطفى شكراً ليكم ، حـ نمشي بعد دا و طوالي وقفنا على حيلنا ، مصطفى وقف و قال ليها العفو ياخ و متى ما احتجتوا تستفسروا عن أي حاجه اتصلوا علي طوالي ...إلهام قالت ليهو تمام ، رقمك عند مها مش ؟؟
في اللحظه دي هو طوالي عاين لي ، قلت ليها لا رقمو ما معاي لكن خليهو يديك ليهو عشان تواصلكم يكون مباشر ، إلهام قالت ليهو خلاص أديني رقمك ، فعلاً أداها رقمو و حسيتو اتغاظ مني و أصلاً أنا فاهماهو كويس ، المهم بعدها إتحركنا من جنبهم و طبعاً ناصر يعاين لينا ساي لحد ما طلعنا ، قلت لـ خالتي ماشه معاك البيت ، اشتقت لـ حبوبه ، قالت لي طوالي ، المهم وصلنا إلهام بيتها و بعدها طوالي مشينا بيت حبوبه في الكلاكله ، طبعاً سارا خالتي دي عمرها 30 سنه ، اتخطبت أكتر من مره بس لحد الآن ما واصلت مع واحد ، المهم اول من وصلنا و دخلنا طوالي بقيت أنادي على حبوبه ، جات طالعه و قالت لي البيت نور والله و فتحت لي يدينها ، مشيت ضميتها شدييييد و قلت ليها مشتااااقين مشتااااقين والله يا ست الكل ، باستني على خدي و قالت لي و أنا كمان مشتاقه ليك والله ، سارا قالت ليها و أنا يا أمي نسيتيني خلااااص لمن شفتي بت بتك !! قالت ليها اغلى من الولد ولد الولد ، قالت ليها خلاص يا أمي رسالتك وصلت ، المهم دخلنا جوه و حبوبه قعدت تسألني عن حياتي بعد الزواج ، طبعاً بتهرب من اسئلتها ساي و مرات بغير الموضوع ، قالت لي ما ماشين شهر عسل ولا شنو ، قلت ليها غيتو انتِ يا حبوبه !! قالت لي مالي !! ما الجيل القايم دا كلو قاعد يمشي شهر عسل مالكم انتوا !!؟ قلت ليها مشغولين ، قالت لي الشغل ملحوق ، اتلحلحوا لينا شويه عشان تبقوا تلاته ، عاينت لـ خالتي و قلت ليها حبوبه دي فظييعه ! سارا قعدت تضحك قالت لي بالجد ،، هسي أنا كل يوم زانه في راسي متين تعرسي و متين تجيبي ليك أولاد و و و ....يعني شايله هم عرسي أكتر مني ، حبوبه قالت ليها لو من زمان بتسمعي كلامي كان هسي عندك دستة شفع ، خالتي قالت ليها يا أمي الله ما أراد ! اعمل شنو أنا يعني ؟؟ قالت ليها ما تستهبلي براك بترفضي العرسان ، طيرتيهم كدا لحد ما عمرك وصل الـ 30 ، خالتي إتنهدت و قالت ليها أمي ممكن نقفل الموضوع دا ؟؟!
قالت ليها بس دا الفالحه ليهو ، أنا تعبت منك و تاني ما عندك بيك شغله ، عنك ان شاء الله ذاتو ما تعرسي....قالت كدا و طوالي قامت و مشت لأنها زعلت بالجد ، حبوبه دي من زمان نفسها تعرس لخالتي و تشوف أولادها بس ما حصل ، قلت ليها خالتو ما تضايقي من كلام حبوبه ، قالت لي أنا ما متضايقه من حياتي و عدم الزواج ما زاعجني بس هي ساي مقلقه و متعبه روحها ، قلت ليها أمك في النهايه و عايزا مصلحتك ، المهم حـ أمشي أشوفها .... فعلاً مشيت ليها في غرفتها ، كانت زعلانه شديد لمن ملامح وشها متغيره ، جيت قعدت جنبها و قلت ليها يا حبوبه ما تضايقي نفسك و كل شي قسمه و نصيب ، قالت لي خالتك دي حـ تجنني ، لو كان ماف زول قاعد يجي و يتقدم ليها كان معليش بس سارا دي كميه من الرجال جوا و دقوا بابها و رفضتهم كلهم ، قلت ليها أكيد عندها أسبابها و الزواج يا حبوبه ما أي زول و السلام ، يعني اي زول هي حستو ما مناسب ليها من حقها ترفضو ، قالت لي اقنعيني بس انو كل الرجال الجوها طول الـ 10 سنوات الآخيره ماف ولا واحد مناسب ليها ؟؟
قلت ليها يمكن عندها معايير أو مواصفات معينه لـ شريك حياتها ، قالت لي بعد دا إلا كان عايزا ليها واحد عندو أجنحه ، لأنو السمح جاها ، المقرش جاها ، الدكتور جاها و المهندس جاها ، صاحب الشركات جاها ، المغترب جاها !! عايزا شنو هي بس !! قلت ليها يمكن هي شايفه الأخلاق أهم من القروش ، قالت لي هه يا بت جوها ناس من شدة أدبهم و إحترامهم الواحد عينو ما برفعها عن الأرض بس هي مستهبله ، ما عايزا تعرس بس ، أصلاً كلكن كدا بنات الأسره بتأبن العرس التقول موت !!...قلت ليها هسي أنا مالي يا حبوبه ، كلامك شاملني!!....قالت لي انتِ ذاااتك كما أبوك أصر و نق ليك في راسك ما كنتِ ناويه تعرسي !!....قلت ليها في النهايه عرست ولا لا ؟؟ قالت لي بعد سلة روح يعني لو أبوك خلاك على راحتك متأكده مية سنه ما حتعرسي و خالتك دي زيك عشان كدا أنا بنق في راسها و بصر عليها.....
المهم بقيت أتكلم معاها لحد ما خالي جا داخل ، قال لي و أنا أقول البيت منور كدا ليه !!؟ قمت جريت عليهو و إترميت في حضنو قلت ليهو والله يا خالو الشووووق بحر ، قال لي تحدي والله ، اخبارك شنو ؟؟ قلت ليهو كويسه الحمدلله ، قال لي عرستي و نسيتي خالك !! قلت ليهو مستحييل أنا ماف شي بنسبني ليك حتى لو فقدت الذاكره مستحيل انساك انت ، ضحك و قال لي صيغة مبالغه ، قلت ليهو جد ، قال لي ههه يعني حـ تنسي راجلك و تتذكريني أنا دا !؟
قلت ليهو اي المشكله ويبين يا خالو و بعدين مالك ما واثق من نفسك ولا شنو !؟ ضحك و قال لي كل الثقه لكن انتِ ما تبالغي كمان 😂
المهم مشى سلم على حبوبه و لقاها زعلانه ، قال لي العسل دي الزعلها منو ؟؟ قلت ليهو العسل دي اتناقشت مع بتها و زعلت ، طبعاً حبوبه كانت بتعاين لينا بطرف عينها ساااي ، خالي إيهاب قال ليها دي سارا الزعلتك مش ؟؟! كويس خليها تصبر لي الليله إلا أطيرها ليك من البيت دا ...حبوبه ما إتكلمت معاهو..... طبعاً حبوبه بتموت في التحانيس و جنها دراما 😂🤣
قلت ليهو إيهاب حبوبه دي زعلانه شديد و ما أظنها ترضى بالساهل كدا ، قال لي رايك شنو نشتري ليها شوكلاته و مصاصات ! قلت ليهو لا لا ما أظن سنونها يساعدوها ، إتلفتت علي و قالت لي سنوني مالهم ؟؟ قايلاني عجزت ولا شنو ! يا بت هووووي أنا هسي لو عرست بلدي....... طبعاً في اللحظه دي أنا و إيهاب خالي عاينا لبعض و إنفقعنا بالضحك !! سارا ذاتا كانت واقفه جنب الباب و لمن سمعت كلام حبوبه قعدت تضحك !! قلت ليها وااااي أنا منك يا حبوبه ، قالت لي انتِ ذاتك تاني ما تقولي لي حبوبه ، مكبراني بالغصب و أنا ياداب عمري 39 ، قلت ليها حبوبه 🙂 قالت لي 40 ، قلت ليها حبوووووبه !! قالت لي 45 و تاااااني حرم ما أزيد ، طبعاً ضحكنا فيها ضحك ، سارا جات باست حبوبه على جبينها و قالت ليها معليش يا أمي أعفي لي ، حبوبه قالت ليها خلاص قفلي الموضوع دا ، قلت ليهم أنا جعانه يا جماعه ! من جيت شغاله أحلحل ليكم في مشاكلكم ! إيهاب قال ليهم ليييه لييييه تجوعوا لي أميرتي !! قلت ليهو ايوه أهرشهم يا خالو ، .... طبعاً إيهاب خالي ياداب عمرو 33 سنه و ما معرس ، حبوبه عرست صغيره و جابت بتين و ولد يلي هم أمي و خالتي سارا و خالي إيهاب ....جدي إتوفى من زمان و هي ربتهم براها ، المهم اتغدينا و شربنا الجبنا سوا و نحنا مبسوطين على الآخر ، بعد المغرب قلت ليهم على فكره أنا اليوم ناويه أبيت معاكم ، خالي قال لي ناصر طردك ولا شنو ؟🐸 قلت ليهو يقدر ! سارا قالت لي غيتو الراجل دا عرس لكن كأنو ما عرس ! قلت ليها من الآخر كدا قولوا لي ما عايزنك تبيتي معانا ، حبوبه قالت لي لا ما كدا لكن انتي ياداب عروس ! خليتو شهر العسل قلنا ما مشكله ، نزلتوا شغل طوالي قلنا ما مشكله و هسي عايزا تبيتي في مكان و راجلك في مكان و كمان من دون ما تكلميهو !! بتلعبي انتِ يا بتي !! قلت ليها خلاص يا حبوبه هسي حأرجع بيتي ، طوالي قمت على حيلي و شلت شنطتي ، إيهاب قال لي اقعدي مكانك و بطلي حركات أمي دي ، حبوبه قالت ليهو هسي أنا مالي ؟! قلت ليهو لا أنا ماشه مش انتوا ما عايزني 😔
لمن عاين لي شديد بكل هدوء قعدت ، قال لي هسي الكلام القالتو ليك أمي الغلط الفيهو شنو ؟؟ سارا قالت لي إتصلي عليهو و استأذني منو و لو عايزا تقعدي شهر عديل اقعدي لكن بعد ما تستأذني من ناصر ...قلت ليهم طيب ، طلعت تلفوني و قمت من جنبهم قلت ليهم حـ اتصل عليهو.....طلعت وقفت في الحوش مسافه و بعدها رجعت ليهم ، سارا قالت لي كنتوا بتقولوا في شنو لمن أخدتوا المده دي كلها ؟🙈 حبوبه قالت ليها لو كان عرستي كان عرفتي بقولوا في شنو ، سارا قالت ليها وااااي أنا منك يا أمي ، تاااااني تاااااني رجعنا لنفس الموضوع !!
حبوبه إتلفتت على خالي و قالت ليهو و انت يا أبو الشباب ناوي تعرس متين ؟ إبتسم و قال ليها قريباً بإذن الله ، مشيت قعدت جنبو و قلت ليهو عاين لي هنا يا خالو ، دي منو دي ؟؟ قال لي منو ؟ قلت ليهو الحتعرسها ! قال لي الله اعلم المهم أنا ختيت نية الزواج ، قلت ليهو ابتسامتك دي إبتسامة زول مظبط أمورو ، سارا قالت ليهو دي نهال ولا شنو ؟؟ قلت ليها نهال بت جيرانكم ؟؟ وااااي يا إيهاب طلعت بتعرف تختار ! حبوبه قالت ليهو هووووي نهال شنو ! اوووعك يا إيهاب تكون بتفكر في البت دي ! قال ليها يا حجه نهال شنو عليك الله !! سارا قالت ليهو مالا نهال ! بت عسل و حلاتها و دمها خفيف ، حبوبه قالت ليها و شماره و حوامه و ذاتا ما مناسبه لـ ولدي ، أنا عايزا ليهو دكتوره زيو ....
المهم اتونسنا كدا لحد ما بعد العشاء ، إيهاب اتصلوا عليهو ناس المستشفى و قالوا ليهو في حاله طارئه ، قال لينا اقفلوا ابوابكم عليكم كويس و طوالي طلع و مشى ،  المهم لمن بقينا قاعدين التلاته بنشاهد في فلم و بناكل في مكسرات ، لمن الساعه عشره و نص جات حبوبه قالت نعست و مشت تنوم ، بعد شويه كدا تلفوني رن ، التلفون كان قاعد بيني و بين خالتي ، طبعاً لمن قرت الإسم رفعت لي حاجبها و إبتسمت و قالت لي يا حليلو ناصر شكلو إشتاق ليك ، ردي عليهو يااااخ !!
شلت التلفون و مشيت من جنبها ، أول ما فتحت الخط قال لي وين انتِ ؟؟
قلت ليهو دانه ما معاي ، ناسي إنك رجعتها لأمها ! قال لي عارف ، جاوبي على سؤالي ، متأخره وين للزمن دا ؟! جيت داخل قبل شويه و ما لقيتك في البيت ، قلت ليهو و يعني !!؟؟
قال لي ما تتبايخي ، لو حصل ليك أي حاجه أهلك حـ يسألوني أنا منك ، على الأقل قولي انتِ وين عشان بعدين أعرف اجاوب عليهم ، قلت ليهو أهلي عارفين أنا وين ، قال لي ما عندي ليك أخلاق ، قلت ليهو براك إتصلت علي و.....طوالي قفل الخط في وشي.....اتغظت كيف ، خالص ما حـ أوريهو أنا وين ، صاع و لف قدرتو مع الزفته ديك و ياداب إكتشف إني ما موجوده في البيت ، قلت بس حأخليهو كدا ما فاهم شي و ما عارف انا وين ....إتحركت خطوتين من جنب السلم و كنت ماشه على خالتي بس خطرت على بالي فكره ، أقرب غرفه دخلت فيها و إنتظرت دقيقه بعدها إتصلت عليهو ، فتح الخط بعد مسافه و قال لي خير ، قلت ليهو بصوت راجف و منخفض : ناصر ألحقني .....ألحقني يا ناصر حـ يكتلوني 😭
طبعاً إتجهجه بقى يقول لي وين انتِ و ديل منو ....هسي جاي عليك.....وريني بس وين انتِ ، بقيت عامله نفسي ببكي و ما قادره أتكلم و في الآخر قفلت الخط و عملت تلفوني وضع طيران و قعدت أضحك ، بعدها رجعت لخالتي قالت لي كان ما تجي 🙈
المهم قعدت معاها حكاية 10 دقائق كدا بعدها نعست فـ قلت ليها ماشه أنوم ، طبعاً أول ما رقدت على السرير اتذكرت ناصر ، قلت هه أكيد هو فهم اني بكذب عليهو لأنو لو كان صدقني كان اتصل على ناس بيتنا أو خالتي لأنو قبيل شافني معاها ، المهم إتغطيت كويس و نمت.....

يتبع......