#زهرة_فؤادي9
مها حولي الزاكي
بعدها عدة الأيام و ناصر إتغير 180 درجه على الأقل قبل ما يتغير كان لمن يحس أو يشوف إني محتاجه مساعده بجي يساعدني من دون ما أطلب منو ، أما هسي فـ بقى ما شغال بي حتى لمن نكون الإتنين قاعدين في البيت ما عندنا شغل بحسسني كأنو ماف زول غير دانه معاهو في البيت ، يوم من الشغل طوالي مشيت بيت أهلي ، قبلها رسلت ليهو و كلمتو إني حأمشي ، ردي علي بـ 👍 ، قلت ليهو أنا بس كلمتك عشان أهلي ما يعملوا لي موضوع ، ما رد على رسالتي دي رغم إنو قراها ، المهم لمن مشيت البيت لقيت الأسره الكريمه كلها مجتمعه حتى ناس حبوبه معاهم ! قلت ليهم دي شنو الخيانات دي !! ليييه ماف زول كلمني ! خالي قال لي ما محتاجه يكلموك ، ما شاء الله الحاسة السادسه شغاله ، أول ما حسيتي بينا مجتمعين جيتي جاريه ، قلت ليهو خييير ان شاء الله ، حبوبه قالت لي أخيراً خالك قرر يستقر و يعرس ، رشا قالت لي يا سلاااام أخيراً حيكون في عرس في الأسره ، عاينت لـ خالي و قلت ليهو اوووو خبر قنبله والله ! أخيراً يا خالو ....قال لي كلمة خالو دي بتحسسني إني عجوز و أنا في الحقيقه قدرك ، ضحكت و قلت ليهو طيييب يا إيهاب ، قال لي أيييوه كدا ، زيدان قال لي للسبب دا انا ما حصل قلت ليهو يا خالي 😂
رشا قالت لينا خلونا من دا و ورينا يا خالـ ...قصدي يا إيهاب متين نبدا تجهيزات !؟ أمي قالت ليها أول شي خلينا نمشي نشوف البت و أهلها و نتعرف عليهم بعد داك الفيها الخير بتبقى ، أبوي قال ليهو حدد لينا يوم بس و حتلقانا كلنا وراك ، قال ليهو ما بتقصر والله ، رشا قالت ليهو عليك الله ورينا صورتها ، قال ليها للأسف ما عندي ، سارا قالت ليهو كذااااب يا إيهاب بس ما مشكله أنا معاي صورتها ، قال ليها جبتيها من وين ؟؟ قالت ليهو بيناتنا أصدقاء مشتركين و الشمارات واصلاني من بدري ، قلت ليها المهم ورينا صورتها .... فتحت تلفونها و ورتنا صورة البت ، ما شاء الله طلعت قمر ، سمحه سماحه لمن غلط ، قلت ليهو توووحفه يا إيهاب طلعت بتعرف تختار ، قال لي نحنا كمان بنلعب! حبوبه قالت لينا كدي أدني التلفون دا النشوفها ، أديناها التلفون عاينت ليها مسافه و قالت ليهو سمحه غيتو لكن الأخلاق أهم شي ، ضحكنا ضحك على كلامها ، رشا قالت ليها بعد الجمال دا كلو تقولي:" سمحه غيتو "شكلك يا حبوبه حتكوني النسيبه الشريره الما بعجبها العجب و الصيـام في رجـب ، قالت ليـها يا بت هووووي هي لو مشت عديل أنا بمشي ليها عديل و لو قعدت تلف و تدور عندي معاها كلام تاني ، أمي قالت ليها خوفتي إيهاب قبل ما يجيبها ذاتو ، حبوبه قالت ليهو كدي النسألك يا إيهاب البت دي شغاله شنو ؟؟ قال ليها ممرضه ، قالت ليهو اهاااا كنت دايراها دكتوره عديل لكن الله غالب ، رشا قالت ليها المهم كادر طبي و بعدين يا حبوبه انتِ ليه مشرطه إنها تكون دكتوره ؟؟! قالت ليها ولدي دكتور ولازم يعرس دكتوره زيو ، قلت ليها ليه هم عايزين يعرسوا ولا يفتحوا عياده ! سارا قالت لي أمي عندها هوس إسم دكااااتره ، لو عليها كانت عايزانا كلنا نقرا طب و كل أسرتنا يكونوا دكاتره ، حبوبه قالت ليها ياريت والله بس انتوا ما سمعتوا مني....
المهم لمن جا زمن الغدا ، رشا و أمي و خالتي سارا هم الطبخوا و أنا بس كنت بتونس مع ناس أبوي و حبوبه ، بعد ما إتغدينا أمي قالت لي يلاااا يا شاطره قومي على العده دي و غسليها ، قلت ليها شنوووو ! قالت لي كمان قولي ما بتعرفي تغسلي العده ! حبوبه قالت ليها مها دي دلعت روحها براها و مشكلتنا اننا خليناها على راحتها هسي عدس ما بتعرف تعملو ، رشا قالت لي راجلك دا غيتو مسكين ساي ، سارا قالت ليها بدل ما هي تطبخ ليهو هو البطبخ ليها و أكيد فوق دا مستحمل حركاتها و لسانها الطويل ، قلت ليهم خلااااص مش العده دي بغسلها لكن بطلوا تنمر ، وقفت على حيلي و قلت ليهم لو بتغسلوني العده تاني ذااااتو ما بجيكم....قالوا لي أحسن شي و قعدوا يضحكوا....
مشيت المطبخ و قعدت أغسل العده في الحوض و أنا بتأفأف ساي ، رشا جات داخله و عملت شاي و شالتو ودتو ليهم ، طبعاً أنا هنا شغاله و هم هناك بتونسوا و صوت ضحكهم واصلني و العده دي حالفه ما تخلص ، خالتي سارا جات داخله و هي شايله كبابي الشاي ، قلت ليها وااااي تاني جايبه لي زياده ، قالت لي خلاص حأساعدك فيهم ، قلت ليها لاااا أنا خلاص قربت أنتهي ، جاياني في النهايه عشان تمشي تقولي إنك غسلتي معاي ، قالت لي على راحتك ، طبعاً رشا كانت بتصور فيني و أنا ما جايبه ليها خبر ، لمن إنتبهت قلت ليها بتعملي في شنو انتِ كمان و طوالي رشيتها بالمويه ، قالت لي الصور و الفيديوهات دي حيصلوا لـ ناصر ، سارا قالت ليها قولي ليهو شوف نسابتك بعذبو مرتك كيف ، قلت ليهم ما عندكم موضوع بس ، المهم هم طلعوا و أنا كملت باقي العده و طلعت ليهم و أنا بعاين بـ حسره على يديني ، قلت ليهم شوفوا يديني بقوا كيف بسبب عدتكم دي ، حبوبه قالت لي عشان ما معوداهم على الشغل ،...فتحت شنطتي و شلت مرطب مسحتهم بيهو ، فجأه رشا قعدت تضحك ، كلنا عاينا ليها ، قلت ليها جنيتي ولا شنو ؟!!
قالت لي رسلت صور و فيديوهات ليك و انتِ بتغسلي العده و بتتزهجي لـ ناصر ، قلت ليهو شوف نحنا بنعذبها ليك كيف ، قال لي عذبوها لي كووويس و جيبوها راجعه ، حبوبه قالت لي خجلت ليك والله ، أمـي قالت الغلط غلطي أنا خليتها على راحتها و ما علمتها شي ، رشا قالت ليها كل شغل البيت كنتوا رامنوا فيني ، زيدان قال ليها ياااا بت ما تكذبي ، لو شغل البيت كلو كنتِ ماسكاهو انتِ إذاً جوليا دي كانت بتعمل في شنو ؟؟
أمـي قالت ليهو صح رشا ما كانت ماسكه شغل البيت كلو لكنها أحسن من مها مية مره ، على الأقل مره مره بتدخل المطبخ و بتتعلم ليها طبخه طبختين ما زي الناس البأكلوهم في خشومهم ، طبعاً كلهم قعدوا يضحكوا و يشمتوا فيني ، قلت ليهو أبوووي اتكلم مع مرتك و أولادك و نسيبتك و حميانك ديل 😭😭
أبوي قال ليهم خلاص أسكتوا خلوها ما تبكوها لينا ...
المهم غيرو الموضوع و بقينا نتونس عادي ، فتحت تلفوني و دخلت الواتس ، لقيت مصطفى مرسل لي ، أصلاً هو من اليوم الكان مفروض أمشي و اقابلو مع ناس سارا رسل لي بس سفهتو فـ بقى كل يومين أو تلاته برسل لي ....خالتي سارا كانت قاعده جنبي ...قلت ليها مصطفى دا تاني ما عايزين منو حاجه صح ؟؟
قالت لي مصطفى منو ؟؟
قلت ليها صاحب ناصر و ولد عم مؤتمن داك ياخ ، قالت لي اهااا اتذكرتو ، ما اظن تاني نحتاجوا في حاجه ، كل المعلومات العرفناها منو و الإتوصلنا ليها برانا وصلت للجهه الصح و هي هسي شايفه شغلها و قريباً حتظهر الحقيقه ، قلت ليها كويس عشان أحظرو ، قالت ليييه ليييه مالو ؟؟! قلت ليها زعاااط و معاط ، برسل لي على طول و أنا سافهاهو ، قالت لي برسل ليك بخصوص شنو يعني !؟؟ قلت ليها قلة أدب منو ساي ، قالت لي خلاص أحظريهو طوالي ، فعلاً دخلت دردشتو قريت رسايلو من اليوم داك ، اول وحده كاتب لي فيها كيفك ليه ما جيتي مع ناس خالتك ان شاء الله كويسه و بعدها بيومين مرسل لي سلام كيفك و بعدها بـ تلات أيام مرسل لي ممكن أفهم ليه بتتعاملي معاي كدا ؟؟ اليوم البعدو مرسل لي انتِ وحده مصلحجيه لمن تحتاجيني بترسلي لي طوالي و أول ما تنتهي المصلحه بتسفهيني.....و رسالة اليوم كاتب لي فيها ممكن تفهميني بتعملي كدا ليه ؟؟!
طبعاً كان متصل الآن و ظهر لي إنو جااااري الكتابه فـ طوالي حظرتو....
ختيت التلفون على جنب كدا و إتلفت لـ ونستهم ، في اللحظات ديك كانوا الرجال بتكلموا براهم و النسوان براهم ، حبوبه قالت لي اهااا انتِ يا فلانه !!؟ قلت ليها مااالي !!؟ رشا قالت ليها ما كانت سامعه كلامكم كانت مركزه مع تلفونها ، سارا قالت لي ديل بتكلموا عن بت منو كدا ما عارفه قالوا معرسه ليها سنتين و حاجه و ما جابت طفل و بسيرتها إتذكروك انتِ ، قلت ليهم أنا أربعه شهور ما كملتها من عرست خلي السنتين !! حبوبه قالت لي ماف حاجه كدا ولا كدا ؟؟! قلت ليها حبوووبه ياخ !! أمي قالت لي حبوبتك معاها حق ، في شنو !؟؟ مالكم انتوا المانعكم شنو !؟ عشان لو في شي أحكوا لينا !؟ رشا قالت ليها دي خصوصيات يا أمي و عاينت لـ ناس أبوي الما كانوا جايبين خبرنا ، قلت ليها والله يا أمي ماف أي حاجه من الفي بالك ، كل القصه اننا هسي ما فاضين للحاجات دي كلها ، حبوبه قالت لي أقعدي قولي كدا لحدي ما تلقيهو بكرا عرس ، الراجل بتمسك بالولد....قلت ليها نحنا الإتنين متفاهمين و متفقين على الحاجه دي و لو هو فكر أو ناوي يعرس خليهو اليعرس سااااي أنا ما مانعاهو .... سارا قالت لأمي وااااي أنا من بتك المسيخه دي !! أنا ما عارفه الراجل دا مستحملها كيف !! أمي قالت لي مها خلي حركاتك و أمورك البتسوي فيها دي و أمسكي بيتك و راجلك عديييل ، قلت ليهم خلااااص حاضر ، تمام ، أوكي ...شوفوا ليكم موضوع غيري الله يرضى عليكم ...سارا قالت لي بالمناسبه ، بتك حماتك لسه قاعده معاكم ؟؟
حبوبه قالت ليها دي منو كمان ؟؟
قالت ليها نازك أخت ناصر مقعده بتها الصغيره معاهم ، أمي قالت لي صحي ؟؟ من متين ؟؟ قلت ليها ليها 3 أسابيع أو أكتر ، قالت لي ليه أمها مخلياها مالا يعني ؟؟!
قلت ليها قالت مشغوله و ما بتقدر عليها هي و أخوها ، و بتها ما بتقعد مع أولاد عماتها و أعمامها لأنهم بضربوها ....حبوبه قالت لي دي نهااااي ما حجه ليها ! سمعنا بالخاله البتمسك أولاد أختها و بالحبوبه البتمسك أولاد بتها أو ولدها لكن دي أول مره اسمع لي بـ وحده بتودي شفعها الصغار لأخوها الياداب معرس عشان يمسكهم ليها !! أمي قالت لي قلبها دا ما بيوجعها !! البت صغيره والله فكيف قدرت تبعدها عنها و تنوم من دونها !! سارا قالت ليها نسوان الزمن دا الواحده مستعده تجدع أولادها في أي مكان في سبيل انها تاخد راحتها و ترتاح من جوطتهم ، حبوبه قالت لي إذا هي أمهم ما اتحملت جوطتهم و ما قدرت تمسكهم منووو الحـ يمسكهم ليها ؟؟....حبوبه عاينت لي و قالت لي عايني لي هنا اول ما ترجعي طوااالي تكلمي راجلك خلي رجع البت لأمها ، ما معقوله ترمي مسؤولية بتها عليك ، قلت ليها بري ما عندي بيها شغله و البت ماسكها خالها يا حبوبه ، هو البحميها و البنضفها و البهتم بأكلها و شرابها ، حبوبه قالت لي دي قلة أدب والله ! نازك دي دايره ليها دقه ، سارا قالت لي لمن تمشوا الشغل بتخلوها مع منو ؟؟ قلت ليها ناصر بسوقها معاهو ، رشا قالت لي نازك ليه ما ودتها بيت أهلها إذا ما عايزا تخليها مع نسابتها ؟؟! حبوبه قالت ليها دي حقاره و حقد و حسد منها بس و بعدين نسااابتها ديل لو كان كوعبيتهم دي شنو ديك أكيد مستحيل يأبوا بت ولدهم و ما يرضوا يمسكوها و يخلوها معاهم! ، أمـي قالت لي أنا شايفه انها كان توديها بيت أهلها بس ، فريده و مدثر أكيد ما حيقصروا منها !! قلت ليها قالت ديلك برضهم مشغولين و ماف زول فاضي ، قالت لي و انتوا فاضين يعني ؟؟
حبوبه نادت أبوي و قالت ليهو عليك الله تعال اسمع الكلام دا ، كلهم اتلفتوا ، أبوي قال ليها كلام شنو ؟؟؟
طوالي حكت ليهو ، قال ليها ما عارف اقول شنو إذا خالها ماسكها و ما عندو مانع ماف مشكله ، قالت ليهو كيف يعني ماف مشكله ، دي حسااااده و حقاره من حماة بتك ، خالي إيهاب قال ليها يا أمي ما تكبري الموضوع ، ماف مشكله و الموضوع ما خطير ، ما تعملوا من الحبه قبه....
المهم بعد شويه كدا سمعنا صوت الجرس ، مشى زيدان فتح الباب ، بعدها سمعناهو بسلم بصوت عاااالي و بقول وين مختفي يا زول !..رشا قالت الجا منو يا ربي !!؟
فجأه ناصر جا داخل مع زيدان ! طبعاً إتفاجأت ! أول شي سلم على ناس أبوي بحراره كدا بعدها جا سلم على ناس أمي و حبوبه .... أنا كنت آخر وحده ، و هو بسلم على خالتي سارا خااالص ما عاين لي ، عامل نفسو ما شايفني ، حتى لمن مد يدو و سلم علي ما عاين لي ! مشى قعد جنب ناس أبوي و بقى يسألهم عن حالهم و أحوالهم و كدا ، خالي إيهاب قال ليهو غطست غطسه شديده ، قال ليهو حقيقة والله معليش قصرت منكم بس كنت مضغوط والله و جاري مع الشغل ، أبوي قال ليهو العفو يا ولدي و عذرك معاك ، حبوبه قالت لي قووومي ضيفيهو و طوالي مشت قعدت جنبو ، قلت لـ ناس أمي بصوت واطي ألحقوا حبوبه دي ما تقوم تمشي تفتح ليهو موضوع دانه و مواضيع ما ياها و تحرجو و تحرجني معاهو قدام ناس أبوي ! قلت كدا و إتلفت عاينت لـ حبوبه و عملت ليها حركات بـ وشي ، لوت لي خشمها بس ، طبعاً ناصر كان منتبه معانا ، أمي قالت لي قومي ساي حبوبتك ما حتقول ليهو حاجه ، قلت ليها ان شاء الله ياخ !
المهم مشيت المطبخ جبت ليهو مويه و عصير ، لمن جيت ختيتهم قدامو خالي إيهاب قال لي هسسسي لو دا أنا ما كان ضيفتيني و خبري ما كان جبتيهو ، قال كدا و قعد يضحك ، رشا قالت ليهو انت ناصر يا إيهاب ؟!!.... طبعاً حمرت ليهم الإتنين ! جنهم تشغيلات حتى قدام أبوي !! قلت ليهو اقسم بالله حبوبه هي القالت لي كدا ، قال لي خلااااص خلاص صدقتك 😂
المهم قعدت مكاني ، بعد شويه كدا حبوبه قالت لي أمشي اعملي ليهو جبنه ....كشرت ليها وشي !! لمن حمرت لي قلت ليها حبوبه انتِ عارفه جبنتي ما بتنشرب ، قالت لي صحي والله نسيتي ، قومي يا رشا أعمليها ليهو ، ناصر قال ليها لا لا شاربها والله ، قالت ليها خلاص جهزي ليهو الغدا ، قال ليها برضو متغدي ، قالت ليهو لا والله تااااكل غصب عنك يا ولدي ، أمشي يا رشا ، المهم رشا مشت جهزت ليهو الأكل و جابتو ليهو ، أنا تاني خليتهم بتونسوا و بقيت شغاله بتلفوني ، لمن فتحت الفيس ، لقيت مصطفى مرسل لي من قبييل برضو حظرتو و بقيت أتصفح عادي ، طبعاً سامعه حبوبه بتتكلم مع ناصر عن الأطفال و بتقول ليهو هم البحلوا الدنيا و البيت ، وجودهم نعمه والله ... طبعاً أنا عارفاها قاصده شنو بس عملت رايحه و خالص ما عاينت ليهم ، في الآخر لمن فترت من التلميح قالت ليهو اهااا ما ناوين تبقوا تلاته !؟...هنا برضو ما رفعت راسي عشان أعاين ليهم ، قال ليها ان شاء الله ، قالت ليهو أي ان شاء الله الوليدات نعمه والله ....فجأه كدا تلفوني رن ....دا مصطفى الكان متصل ، قلت كماااان شوف الحيوان دا ،كنصلت المكالمه ، لمن تاني إتصل فكرت أحظرو بس قلت إلا أرد عليهو و اطمم ليهو بطنو ساعتها براااهو حيوقف حركاتو دي ....شلت التلفون و طلعت بيهو الحوش برا ، مشيت وقفت جنب الوضايه لأنو أصلاً المغرب قرب ، فـ قلت لمن أخلص أتوضا بالمره ، المهم اول ما فتحت الخط قال لي عليك الله أسمعيني ....قلت ليهو خييير !!؟
قال لي ليه حظرتيني ؟؟
قلت ليهو ببساطه لأني ما بحب الناس اللصقه و الخاينه و العايزا تعمل فتن ، قال لي ليييه من البدايه ما قلتي كدا ؟؟ ولا خلاص عشان مصلحتك معاي خلصت ؟!
قلت ليهو اقول ليك شنو من البدايه ؟ و أصلاً انت عايزني اعمل ليك شنو مثلاً ؟؟ ما تنسى إنو انت الرسلت لي و انت الجبت لي ولد عمك ، قال لي أديني من وقتك ، قلت ليهو عشان شنووو يعني ؟؟!
قال لي انتِ عارفه كويس عشان شنو ، قلت ليهو لا والله ما عااارفه من الآخر كدا قول عايز مني شنو ؟؟ لأنو أنا بالجد الحركات دي مـ....ما خلاني أتم كلامي ، قال لي بحبك !!
قلت ليهو متخلف انت ؟؟! تحبني لشنو يعني و بأي منطق ! يعني مخلي بنات الناس ديل كلهم و جاي تحب ليك وحده متزوجه لا و كمان متزوجه صحبك ! شوف ما تتعب نفسك ساي حركاتك دي أنا من البدايه كنت عارفاها و فاهماك كويس ، انت واحد خاين و باطل و زباله كمان و هدفك تعمل مشاكل بيني و بين ناصر و لمن عملت اسكرين شوت مظهر فيهو بروفايلي و خاتيهو إستوري اتأكدت من ندالتك ، حب شنو الإنت بتتكلم عنو دا !! قايلاني هبله و ما بفهم ؟؟....
قال لي اعمل شنو يعني فجأه لقيت نفسي بحبك ، ضحكت بشماته و قلت ليهو عاين ما تضيع زمن أمشي شوف ليك وحده غيري و ألعب بيها ، قال لي صدقيني الموضوع ما في يدي أنا من أول يوم عرفتك و شفتك فيهو حبيتك ، قبل ما تعرسي كنت متابعك في الميديا ، قلت ليهو يلااااا اقطع وشك لأني حـ أحظرك ، قال لي بس خليني أتم كلامي ، ناصر الإنتِ هسي بتقولي علي خاين لأني كنت صحبو هو ذاتو بخونك ، عارفه سبب الخلاف البيني و بينو شنو !؟
قلت ليهو ما عارفه و ما عايزا أعرف ...قال لي ناصر كان بحب وحده من شلتنا من زمان و كلنا عارفين الحاجه دي و هي للأسف حبتني أنا و لمن ناصر جا و طرح ليها رفضتو و قالت ليهو أنا بحب مصطفى فهو من دون ما يسمع مني إتهمني إني دخلت بيناتهم رغم معرفتي بحبو ليها و أنا والله قدر ما حاولت أبرر ليهو و أشرح ليهو إني ما كنت عارفها بتحبني و أساساً أنا لا حصل لمحت ليها لا علاقتي بيها عميقه لأني عارف دي زولة صحبي و شينه في حقي أخت عيني عليها ، قلت ليهو عااادي ما انت هسي خاتي عينك على مرتو !!...قال في فرق بين الحالتين ، في الحاله دي ناصر ما بحبك لأنو عندو غيرك بس انا بحبك و.....قاطعتو و قلت ليهو و بعدين مع الدراما الرخيصه دي !!؟؟ قال لي البت أنا شاكلتها و خربت معاها وش و تاني ما عرفت عنها حاجه لأنو بسببها علاقتي بـ ناصر باظت و هو مع الأيام شكلو نساها بس لسه ما راضي يسامحني ، حالياً هو شكلو بحب تاليا أو زي ما بقول ليها توته لأنها وقفت كتير معاهو و ساعدتو عشان يتجاوز حبيبتو الأولى.....ضحكت و قلت ليهو و هسي انت بتقول لي الكلام دا كلو ليه ؟؟!
على فكره أنا ما غبيه و عارفاك كويس ، قال لي صدقيني أنا ما قلت غير الحقيقه ، قلت ليهو حتى لو الكلام حقيقه ما فااارق معاي و شكراً على العربي الصرفتو ، قال لي يا مها....قاطعتو و قلت ليهو حاجه وحده عايزاك تعرفها ، مهما قلت و مهما عملت أنا ما عندي ليك حاااجه عشان كدا إحترم نفسك و لم باقي كرامتك دي و إتخارج ، قال لي ناصر بخونك والله ، قلت ليهو خليهو يخووني أنا راضيه! قال لي حـ تندمي على كلامك دا والله ، قلت ليهو بتهددني يعني ؟؟ قال لي لا لكن.....قلت ليهو شوف يا اسمك....قال لي خلاص نسيتي اسمي !؟
غمضت عيوني بزهج و قلت ليهو اقطع وووشك ، قال لي افهمي انا بحبك ، قلت ليهو يحبك جرب و.....قبل ما اقول حاجه ناصر شال مني التلفون ، عاين في الرقم و قال ليهو اسمع يا حيوان ، تاني لو إتصلت في الرقم دا صدقني حـ تندم على اليوم الجيت فيهو على الدنيا دي ..... طبعاً أنا بقيت أعاين ليهو بخلعه و هو كان جايط معاهو شديد ، في الآخر قال ليهو والله العظيم تعمل كدا يا مصطفى أنسى انك في يوم كنت صاحبي ، لو ما دفنتك حي ما أبقى إسمي ناصر....قفل الخط في وشو و طوالي حظرو ، قال لي عشان تاني تتعاملي معاهو ، قلت ليهو ناصر خليني أوريك الحصل و طوالي حكيت ليهو من البدايه و وريتو قصة الطالب عماد و مؤتمن ولد عم مصطفى و حكيت ليهو برسايل مصطفى الكان برسلها لي و فهمتو إني كنت بسفهو و في الآخر حظرتو و هسي رديت عليهو عشان أحسم الحاصل دا كلو ....هز لي راسو بس و رجع لي التلفون و كان حيمشي ، قلت ليهو أنا حكيت ليك عشان بس ما تفهمني غلط ، إتلفت علي و قال لي حيفرق معاك لو فهمتك غلط ؟
قلت ليهو أكيد ، أنا ما بحب الناس تفهمني غلط و تتهمني بحاجات أنا ما عملتها ، ما رد علي طوالي مشى ، أصلاً في الفتره الآخيره بقى ما شغال بي كتير و من اتغير دي أطول فتره يقيفها معاي ....قلت في نفسي ياخ مالك و مالو ، ما عايز يتكلم معاي أو يتعامل معاي خلااااص على راحتو ، الموضوع ما خطير ....قلت كدا بس قلبي كان ماكلني و مغيوظه منو غيييظ ما عادي....
المهم بعد المغرب ناصر قال ليهم نحنا حنمشي بعد دا ، أمي قالت ليهو عليك الله ما تنقطع مننا ، قال ليها لا لا ان شاء الله حأجيكم على طول ، المهم قدمونا لحد الباب و رجعوا ، ناس حبوبه قالوا حـ يبيتوا مع ناس أمي بس خالي رجع ، المهم ركبنا و إتحركنا و الإتنين كنا ساكتين ، كسرت الصمت الحاصل و قلت ليهو دانه وين ؟؟ قال لي مع أمها ! قلت ليهو جات ساقتها يعني !؟ قال لي لا أنا رجعتها ليها ...قلت ليهو ليييه ياخ كنت تخليها ، قال لي أمها قالت عايزاها ، قلت ليهو راجلها جاي ولا شنو ؟ قال لي يمكن .... طبعاً أنا متلفته عليهو و بتكلم معاهو وهو سايق و بعاين قدامو بس .... بعد شويه تلفونو رن ، شالو و قال يا توته حالياً سايق برجع ليك لمن أصل البيت ، خت تلفونو و بعد مسافه تاني شالو و عمل إتصال ....قال عشان عارفك حتكوني زعلتي إتصلت عليك ....اعمل شنو يعني ، حأتكلم معاك و أنا سايق بس لو عملت حادث أوعك تقعدي تتبكي....
أظنها قالت ليهو لا خلاص ركز مع سواقتك و ارجع لي بعدين لأنو نزل التلفون و خلاهو مكانو ،.....ما عارفه بس زعلت و إتمليت قدرتي ، فسرت دا و قلت إنو ما خاتي لي إعتبار و ما مدي أي قيمه أو تقدير للزواج دا ، يعني هو لو كان بحبها لييه ما عرسها ؟! ليه ما قال لأبوها أنا بـ زولتي و ناوي أعرسها !!....المهم لمن وصلنا البيت نزلت قبليهو لمن وصلت قريب لباب الهول كدا سمعت صوت نبيح كلاب صرخت و طوالي جريت على ناصر و أنا خاته يديني على إضنيني ، قلت ليهو مش قلت ليك الكلاب ديل طلعهم من هنا ، واااي ياخ أنا بكره حاجه إسمها كلاب ، عندي فوبيا منهم ، قال لي أنا طلعتهم ما عارفهم دخلوا كيف ، قلت ليهو حتى الكلبه الكانت والده طلعها زي ما قلت ليك ، المهم مشى طلع الكلاب و أنا طوالي دخلت جوه ، بقيت لافه في غرفتي و أنا بنبذ في توته و بقول إنها وحده ما مربيه و رخيصه و وسخه و حيوانه ...
المهم بعد العشا نزلت تحت ، لقيت ناصر خاتي لابتوبو قدامو و شـغال بيهو ، عيني على الابتوب و عين على الشاشه ، قعدت و طوالي شلت الريموت من جنبو ، ما قال لي حاجه ، غيرت القناة الكان فاتحها و برضو ما قال حاجه ، غيرت كدا لمن زهجت في الآخر وقفت في قناة و ختيت الريموت على جنب ، قلت اففف يااااخ !! برضو ما عاين لي ، قلت لييه المكان دا مسخن كدا !!...ما رد علي ، قلت ليهو ناصر ما سامعني !؟؟
قال لي براك شايفه التكييف شغال و الجو بارد ، اعمل ليك شنو يعني إذا انتِ حاسه بسخانه و الجو بارد !!؟
قلت ليهو غلطاااانه أنا لأني اتكلمت معاك.....ما قال لي حاجه و رجع عاين لـ لابتوبو.....لمن خلاص إتمليت من الغيظ و سفهتو المتكرره لي فرقت معاي و حرقتني ، قلت ليهو ناصر انت زعلان مني ؟؟
من دون ما يعاين لي قال لي لا ....قلت ليهو طيب مالك ؟
قال لي مالي ؟؟
قلت ليهو ما عارفه بس حاساك متغير ، قال لي إحساسك غلط ، طبعاً بتكلم معاي و هو مركز في لابتوبو ، في الآخر زهجت لمن حسيت إنو ما عايز يتجاوب معاي ، مشيت غرفتي و قفلت الباب علي ، شلت تلفوني و دخلت التيك توك تحديداً حساب ناصر و بقيت أشوف في الفيديوهات العاملها ، قلت في نفسي سماحتو دي أنا من زمان ليه ما كنت شايفاها ؟!! كل ما أشوف ليهو فيديو بعيدو أكتر من مره و أنا بتبسم ساي ، بعدها دخلت الفيس و برضو خشيت حسابو و بقيت اشوف الصور و البوستات المنزلها ، في آخر بوست كان كاتب : نبتسم رغم كل الإنكسارات ، لكن نبقى نبحث عن الأمان فى مكان ما ربما نجده ...
بقيت أقرا في تعليقات البنات الكلها إنبراشات لحد ما لقيت كومنت وحده كاتبه ليهو : على فكره يا ناصر انت مصدر أمان لناس كتيره 💜
لمن عاينت للإسم لقيتو مكتوب ، توته الكتكوته ، قلت وسسسخ ! أكيد دي هي لأنو مخلي كل الناس و رادي عليها هي بس ، قال ليها للأسف يا توته مصدر الأمان ما لاقي الأمان ، كاتبه ليهو نط خاص ...في نفسي قلت ليها ينط فيك ضب ان شاء الله ، طبعاً البوست دا قبل 3 أيام ، قلت بكون قال ليها شنو في الخاص !! دخلت صفحتها و لفيت فيها بوستاتها كلها حب و غرام و كلام فارغ ، قلت ههه دي كلها تلميحات لـ ناصر ، أنا الما بعرفها كويس من بوستاتها الواضحه دي فهمتها انها قاصده. ناصر .... أصلاً تكون تلميحات ليه ؟؟ أكيد هو عارف مشاعرها و أكيد هو بحبها كمان !!
فكرت مسافه كدا و تاني قلت مالي و مالهم ، كنت حأخلي التلفون و أشوف لي شغله غيرو بس روحي كانت محرقاني شديد ، طوالي مشيت عملت لي صفحه وهميه و دخلت صفحة توته و شلت منها كم صوره كدا و قلت تصبر لي الكلبه خطااافة الرجال...
.
مُغرمة بشعرهِ الأسود ، وأهوىٰ سمارهُ و عينيهِ و عُقدة حاجبهِ ، و ضحكتهُ القمريّة ، مُغرمة جدًا به 🦋💜
لكاتبه
يتبع.....
