#زهرة_فؤادي6
مها حولي الزاكي
خليت التلفون و مشيت قعدت في الهول مع رشا ، كانت فاتحه الشاشه بس سرحانه بعيد ، قلت ليها رشا ! ما انتبهت لي ، عليت صوتي و قلت ليها رشاااااا يا بت و طقطقت ليها أصابعي قدام عيونها ، انتبهت و قالت لي في شنو !؟؟
قلت ليها سرحانه وين انتِ ؟؟
قالت لي في الشاشه ، مركزه مع المسلسل ، قلت ليها كذاااابه ، أحكي لي في شنو !؟
قالت لي ياخ ماف حاجه ، قلت ليها ما عايزا تحكي لي زي زمان مش ؟! تماااام يا زوله خليك كدا ...
بعد مسافه قالت لي مش بتعرفي فدوى صحبتي ، قلت ليهو أيوه بعرفها فدوى ، مالا ؟؟؟
قالت لي بتردد عندها أخوها ...اسمو حسام ، قلت ليها اها مالو !؟؟
قالت لي ما عارفه بس بحسو بلمح لي ، قلت ليها كيف يعني ؟؟
قعدت تحكي لي عن معاملتو ليها و كيف انو مركز معاها و مهتم بيها بس لسه ما صارحها بحاجه ، قلت ليها طيب المشكله شنو ؟؟
قالت لي أنا شايفه انو هو كتير علي ، عايني أنا سمينه كيف و هو زول رياضي و ما شاء الله عليهو ، يعني رغم إني حاسه إنو حسام عندو مشاعر لي بس مرات كتيره بكذبها و بقول معقوله يخلي البنات الجميلات و الرشيقات الحوليهو ديل كلهم و يعاين لي أنا العباره عن كتله من اللحم !!
قلت ليها ياخ أنا بتضايق كتير لمن تقولي عن نفسك كدا و تحتقريها ! أنا ما شايفه فيك عيب ينفر الناس منك ! كمان يا عسل انتِ السمن دا الناس بتفتش ليهو تفتيش هسي أنا ذاتي لو لقيت لي طريقه بزيد وزني.....إتنهدت و قالت لي فعلاً النار بتحرق الواطيها و اليدو في النار ما زي اليدو في المويه ، قلت ليها رشويه ، صدقيني انتِ جميله في كل حالاتك عشان كدا ما تعملي لنفسك نفسيات ساي و تتعقدي ، انتِ جميله و عسل ، حلاااتك يا ناس و طوالي ضميتها علي و قلت ليها على فكره كلامي دا ما مجامله مني ولا مواساة و انتِ عارفه انك حلوه صح ؟؟
قالت لي أنا سمينه و السمنه الشديده شينه ، قلت ليها تاااااني !! عايني انتِ براك شايفه نفسك كدا بس باقي الناس عكسك تماماً و حسام أكبر دليل على كلامي دا ، لاحظي إنو خلى البنات كلهم و الرشيقات زي ما قلتي و جاك انتِ و دا معناهو إنو السمن ما مشكله و ما عايق ، سكتت ما ردت علي ....بعد مسافه قلت ليها أهم شي يكون جادي ، يعني ما عايز يلعب و خلاص ، و على فكره أنا شايفاك لسه بيبي و صغييره على الحاجات دي ، رفعت راسها مني و ضحكت و قالت لي بيبي انتِ دي ، أنا الحاجات الفاهماها و العارفاها انتِ لسه ما سمعتي بيها 🙈😂 قلت ليها كلبه ، قالت لي حسام ما زول لعب ، هو انسان محترم شديد و تعاملو مهذب و راقي و و و .....بقيت ساكته و بسمع فيها و هي بتحكي لي عنو ، كانت مبسوطه و عيونها مليانه لمعه ، حسيت زي الكأنها منتظره زول يقعد معاها القعده دي عشان تحكي و تفضفض ليهو ، لمن خلصت لقتني بعاين ليها ساااي فإتوترت ، ضحكت و قلت ليها والله شكلك انتِ المركزه معاهو ، إبتسمت بس ، قلت ليها فدوى دي لو صحبه بالجد مفروض تحسم الحاصل دا كلو و تعرس ليك أخوها 😂 قالت لي هي ما عارفه بالحاجات دي و ما حصل قلت ليها ....قلت ليها غررريبه ! لأنو عادة الوحده أول ما تحب أو تكرش على أخو صحبتها بتحكي لصحبتها فـ بالتالي صحبتها بكون عندها علم و بتحاول تقربهم من بعض ....سكتت ما إتكلمت ....قلت ليها متشاكله مع فدوى ولا شنو ؟؟
قالت لي لا ....قلت ليها رشووويه طيب في شنو أحكي لي !!
قالت لي أنا ما بحب اقول حاجات زي دي لزول عشان ما يضحكوا علي أو يشمتوا فيني ، يعني اتخيلي لو صحباتي عرفوا إني حابه حسام دا حـ يستغربوا و يشمتوا فيني لأننا ما مناسبين لبعض .....قلت ليها لو شمتوا فيك معناها ديل ما يستاهلوا تقولي عنهم صحبات ، ماف صحبه بتشمت في صحبتها ، ماف صحبه بتكسر صحبتها و بتقلل من قيمتها ، قلت ليها ما شماته علنيه كدا ، لكن اكيد حـ يستغربوا و يعلقوا على الموضوع حتى لو كان بينهم و بين نفسهم ! يعني حسام دا في كفه و أنا في كفه تانيه خالص ، قلت ليها لو قلتي كدا تاني حـ أكفتك .....فتحت تلفونها و دخلت معرض الصور ، قالت لي شوفي الفي النص دا حسام ....شايفه هو كيف و أنا كيف ؟؟! متخيله أنا قدامو شكلي بكون عامل كيف ؟؟ زي الدب بالظبط ، بقيت أشوف في صور حسام ، قلت ليها شكلو الكلام دخل الحوش ، صورو دي جبتيها من وين ؟؟
قالت لي هو بخت صورو استوري ، قلت ليها و كمان عندك رقمو ! قالت لي أيوه ، مره فدوى تلفونها كان قافل كهربه و كانت محتاجه تتصل على أخوها ضروري فإتصلت ليهو بتلفوني ، قلت ليها و من هناك بقى يرسل ليك ؟؟!
قالت لي لا إلا لو في حاجه ضروريه ، مثلاً لو فدوى اتأخرت و هي ما بترد على تلفونها و كدا فهمتي ؟!
قلت ليها ايوه ، المهم راجل أختي طلع كساااار لكن ما أسمح منك ، قالت لي كسري لي تلج كويس ، قلت ليها جاااده أنا يا هبله ، المهم بعدها اتونسنا شويه لحد ما أبوي جا ، بقينا نتونس التلاته و ناخد و ندي في الكلام ، رشا مشت عملت لينا شاي و كيك و جات راجعه ، المهم بعدها صليت العصر و كنت حأدخل غرفتي بس رشا قالت لي ماشه وين أرح اعملي معاي الغدا ، قلت ليها جوليا مشت وين ؟؟ قالت لي أمي أمبارح أدتها إجازه و هي طوالي مشت أهلها و أساساً أمي قالت تاني ما حتجيب لينا شغاله ، قلت ليها ليييه لييييه ؟؟؟
قالت لي طبعاً دا كلو بسببك انتِ 🙂
قلت ليها كيف بسببي !؟ قالت لي عشان جوليا كانت بتطبخ و بتعمل لينا أي شي ، انتِ ما كنتي بتعملي حاجه عشان كدا طلعتي طبخ ما بتعرفي تطبخي و أمي من يوم العزومه قالت انك حـ تفضحيها مع نسابتك لأنك ما بتعرفي لشغل البيت ، قلت ليها جوليا دي حالياً حتفيدكم انتوا ما أنا لأني ما قاعده معاكم ، أبوي قعد يضحك و قال لينا الفاس وقعت في راس رشا رغم انها شبه بتعرف تطبخ ما زيك يا مها ، رشا قالت ليهو بالظبط كدا يا أبوي ، يعني تااااني حأشتغل كل شي في البيت ، ضحكت و قلت ليها اي أحسن ليك عشان بعدين ما تكوني زيي 🤣
قالت لي المهم أرح المطبخ ، قلت ليها طيب أجيب تلفوني و ألحقك ، أبوي قال لي اتعلمي من أختك ....المهم مشيت غرفتي و شلت تلفوني ، فتحت الشبكه و دخلت الفيس بس لاحظت في رسايل في الواتس ، لمن دخلت الواتس لقيت اول شي رسايل في قروبنا حق القناة و رسايل من رتاج و رسايل في القروب الفيهو أهل ناصر ، و كمان في رساله من ناصر ، استعجلت و فتحتها ، كان كاتب لي : إتعلمي انك ما تعملي حاجه غصب عنك تمام ؟😊
عملت ليهو استفهامات بس ما كان داخل ، طبعاً في القروب داك نازك لسه كانت بتتكلم ، لمن دخلت لقيت كميه من الرسايل و شكلو في نقاش حصل في غيابي ، النقاش كان بين وائل و نازك اختو ، لاحظت انها اتكلمت كتير في الرسايل الفوق عشان كدا رد عليها و قال ليها نازك كفايه و هي حالفه ما تسكت و طبعاً بنات أهلها شغالين لـ وائل أختك معاها حق ، قريت رسايلهم كلهم و اتغظت منهم غيظ ما عادي ....رسلت ليهم : "هااااي يا حلوين ، في شنو ، ليه الحفله دي كلها ، كنت نايمه و ما جايبه خبر 😴🥱 "
في نفس اللحظه هيفاء قالت لي اقري الرسايل عشان تفهمي الحاصل ، قلت ليها ما فاضيه أنا أديني المختصر المفيد ، نازك جات ناطه و قالت لي من الآخر و من دون كلام كتير هسي دي ترجعي بيتك ، قلت ليها برجع لمن أحسن إني عايزا أرجع ، قالت لي المعرساهو دا ما حيوان عشان تخليهو عيان في البيت و تمشي ، أنا لو كنت عارفه كان مشيت ليهو ، قلت ليها الزمن القضيتيهو ردحي في القروب دا كان وداك ليهو و جابك ، كنتِ ما عارفه لكن عرفتي فـ بدل ما تعملي المهزله دي كلها احسن تمشي تشوفي أخوك ، قالت لي مش انتِ مرتو !!؟
قلت ليها لا 🙂
قالت لي عايني أنا ما عايزا أكتر معاك ، ارجعي بيتك و إنتهينا ، جات وحده من بنات أهلها و قالت لي عيب البتعملي فيهو دا ،يا مها ، قلت ليها ليه بعمل في شنو أنا ؟؟
وحده تانيه قالت غيتو يا نازك الجاتكم تختاكم ، هيفاء قالت لي يا مها حتى لو كنتِ متناقشه مع ناصر في وضع زي دا مفروض تتنازلي و تمشي تشوفيهو ، قلت ليها هيفاء ! انتِ بتعرفي طريق بيتو ولا لا ؟؟ قالت لي بعرفو ، قلت ليها إذاً أمشي ليهو و طمني نفسك و أختو عليهو ما تعملوا لي وجع راس ، نازك عملت تاق لـ وائل و قالت ليهو شايف لئامتها و ردودها ولا لا ؟؟
ورده قالت ليهم يا جماعه ماف داعي للكلام دا كلو و ناصر هسي أنا معاهو في البيت و هو بقى كويس اتطمنوا ، نازك قالت ليها عرسو دا أخير عدمو ، أنا شايفه انو أحسن ليهو يرجع و يسكن في بيت أبوي ، أفضل من إنو يكون مريض براااهو في بيتو و ماف زول جايب ليهو خبر ...
طبعاً تاني ما رديت عليهم ، لمن طلعت من دردشة القروب لقيت ناصر قرا رسالتي حقت الإستفهامات بس ما رد علي ، في نفس اللحظات دي كانت في رسايل نازله في قروبنا الخاص بينا أنا و سارا خالتي و إلهام و معانا واحد من الصحفيين كبير كدا اسمو ساجد ، من الرسايل اكتشفت إنهم مشوا و قابلوا شلة الطالب عماد القال عنهم مؤتمن صاحب عماد و ولد عم مصطفى انهم شله ما كويسه ، قلت ليهم سلام كيفكم ، اها قدرتوا تتوصلوا لحاجه ؟؟
فجأه رشا جات داخله و قالت لي كنت عارفه انك ما حتجي يا اتكاليه ، قلت ليها والله طلع لي موضوع مهم ، قالت لي خلاص تمام لمن اجهز الأكل حـ اناديك قلت ليها طيب....
إلهام سجلت لي ريكورد كانت بتقول لي فيهو : أهلين يا ميمي ، ايوه قدرنا نتوصل لكذا حاجه أولا أصحاب عماد ديل فعلاً طلعوا شله فاسده و ظاهر عليهم انهم بتعاطوا مخدرات و اتأكدنا من الحاجه دي ، تاني حاجه إنهم كانوا مع عماد لحد آخر يوم يعني قبل وفاتو بـ 5 ساعات ، سألناهم شاكين في منو و إذا في زول ممكن يكون سبب في وفاة عماد فـ قالوا إنو عماد ما عندو عداوه مع زول ....نحنا قعدنا مع بعض و حللنا كلامهم و ختينا ألف احتمال بس أكتر احتمال وارد انهم هم السبب بس السؤال البطرح نفسو ليييه كتلوهو ؟؟؟
قلت ليها بما انهم ناس بتعاطوا و كدا في الكتل و النهب و كل الحاجات السيئه دي بتكون ليهم زي شراب المويه ، ما عايزا سبب قوي ، يمكن اتشاكلوا معاهو !! أو يمكن هو رفض يتعاطى معاهم أو كان ناوي يفضحهم ....
قالت لي ورونا صوره ليهم قبل ما يمشي منهم و من الصوره واضح انهم كانوا مبسوطين و ماف خلاف بيناتهم و أنا بنفسي اتأكدت انو الصوره دي حقيقيه و اتأخدت قبل وفاتو بـ 5 ساعات ، الصحفي ساجد قال ليها ما معروف يمكن صاحبو الإسمو مؤتمن هو الكتلو ، سارا قالت ليهم طيب بالنسبه للتلات ملثمين الدخلوا العماره و ما طلعوا !!
ساجد قال ليها معناها ديل من سكان العماره ، قلت ليهو ما ضروري يكونوا ساكنين فيها يمكن طلعوا تاني يوم عادي لأنو الناس ما اكتشفت إنو عماد ميت إلا بعد يومين ، قال لي طيب قضوا اليوم دا في شقة منو من السكان ؟؟
إلهام قالت الموضوع بقى كالآتي :
يا إما هم ساكنين في الشقه أو بعرفوا زول ساكن في الشقه و كانوا قاعدين معاهو و بعدها طلعوا ....قلت ليها لو طلعوا مش كان حيكونوا ظاهرين في كاميرات المراقبه ؟؟
ساجد قال لي أكيد ما حيطلعوا بنفس الهيأه الدخلوا بيها و أكيد ما حيطلعوا التلاته مع بعض ....حـ يبدلوا ملابسهم و يطلعوا عادي زيهم زي باقي سكان العماره ، قلت ليهم جوه العماره ماف كاميرات !! في الممرات و السلالم و الأصانصيرات !!قال لي في بس ما قدرنا نتحصل عليهم ، غالباً كل المعلومات مع الشرطه ...
سارا قالت ليهم اليوم في بيان للشرطه في نادي الضباط و حاسه انهم المره دي قدروا يتوصلوا لحاجه ....
قلت ليهم ننتظر بكرا و نشوف ...
المهم بعدها رسلت لـ لؤي ، قلت ليهو بكرا خليك جاهز ، قال لي رسالتك دي منتظرها من قبيل 😂
قلت ليهو المؤتمر الساعه 11 ، قال لي معناها نكون حضور من 9 ، قلت ليهو كنت عايزا اقول ليك 8 لكن خلاص خليها 9....
المهم بعدها مشيت اتغديت و أمي ذاتا جات عشان كدا قعدت اتونس معاها ، رشا كانت شايله تلفونها و بتشوف فيهو ، فجأه قالت لي ميمي !!! دا شنووو دا ؟؟!!
قلت ليها شنو ؟؟ قالت لي الفي القروب ! متشاكله مع نازك !...أمي قالت ليها شكلة شنو ؟؟ قلت ليها ما تركزي يا أمي و طوالي حمرت لـ رشا ، أمي قالت ليها اتكلمي يا بت !! رشا عاينت لي و قالت ليها لا لا يا أمي ماف حاجه بهظر ساي ، أمي طوالي خطفت منها التلفون و قرت كل الرسايل الفي القروب ، رجعت لـ رشا تلفونها و قالت لي بزهج أنا تعبت منك ! قلت ليها يا أمي ....قاطعتني و جاطت فيني شديد و قالت لي مدام راجلك عيان ليه ما رجعتي بيتك ؟! بتجيبي الكلام لنفسك ليه ؟؟ عايزا تصلي لشنو انتِ بس فهميني ؟!....المهم بدت تصرخ فيني و قالت إني مهمله و ما بتحمل مسؤوليه و عندي عدم مبالاة ما عادي ، على حس الصوت أبوي جا و قال يخوانا في شنو ؟؟
أمي قالت ليهو تعال اتكلم مع بتك دي لأني تعبت منها و طوالي حكت ليهو ، أبوي جا قعد و قلع نظارتو ، عاين لي مسافه بعدها قال لي حأديك فرصه عشان تدافعي عن نفسك ، يلا اتكلمي 😊
قلت ليهو يا أبوي أنا ما كنت عارفه إنو عيان لأنو ما قال لي و لمن مشيت منو كان كويس و بالنسبه لـ نازك اختو أنا والله ما كنت عايزا أتكلم معاها بالطريقه ديك بس هي استفزتني و بقت ماسكه سيرتي في القروب و كمان معاها بنات أهلها ، قال لي أنا ما عندي شغله بـ مشاكلكم كـ بنات ، قلتي انك ما كنتِ عارفه صح ؟؟ قلت ليهو أيوه ، قال لي تمام لمن عرفتي ليه ما مشيتي ؟؟
قلت ليهو لأنو ما تعبان شديد يا أبوي ! حمى عاديه و كلنا بتجينا حمى و صداع و حاجات خفيفه زي دي ، قال لي هو قال ليك كدا ؟؟
طبعاً تاني ما قدرت أكذب فـ سكت ، أمي قالت ليهو أنا خايفه إنها تكون ما اتصلت عليهو أساساً ....قالت كدا و كلهم عاينوا لي عشان أنفي ليهم الكلام دا و اقول ليهم اتصلت عليهو بس برضو ما كذبت....أمي هاجت و قالت لي انتِ عايزا تخربي بيتك مش و عايزا نسابتك يتكلموا فيك ...اعمل ليها شنو البت دي يا ناس اعمل ليها شنو أنا تعبت منها !!، أبوي قال لي متناقشه معاهو ولا شنو ؟؟ قلت ليهو لا ، قال لي تمام في شنو ؟؟
قلت ليهو ولا شي يا أبوي ، قال لي تمام ، أمشي لملمي حاجاتك و أمشي بيتك ، رشا قالت ليهو يا أبوي....قاطعها و قال ليها خليك ساكته ، عاين لي و قال لي كلامي واضح صح ؟؟
رشا قالت ليهو بتطردها يا أبوي !!؟ قال ليها بنهره أيوه بطردها عايزاني أخليها على راحتها يعني !! تمشي و تجي على كيفها و تعمل العايزاهو ؟؟!.... طبعاً قربت أبكي ...بكل هدوء مشيت غرفتي ، شلت ملابسي و دخلتهم في الشنطه ، لبست لي عبايه و طرحه و جيتهم طالعه ، الزمن داك المغرب أذن ، من دون ما أعاين ليهم اتجهت على الباب ، أمي قالت لي خلي أبوك يوصلك ، ولا رديت عليها ، فتحت الباب و طلعت الحوش ، رشا جات لاحقاني و قالت لي يا بت ما تشتغلي بكلام أبوي ، قلت ليها البيت بيتو و هو حر ، قالت لي طيب على الأقل خلي أبوي يوصلك ، قلت ليها لا ما عايزا و طوالي إتحركت من جنبها لحقتني جنب باب الشارع و هي بتبكي ، قالت لي والله ما كنت قاصده ، لساني فلت و من دون ما انتبه سألتك قدام أمي ، قلت ليها ما مشكله أنا ما زعلانه منك ، فتحت الباب و طلعت ، قالت لي اطلبي ترحال ، فعلاً طلبتو ، رشا وقفت معاي لحد ما جا بتاع الترحال ، بعدها ركبت و مشيت البيت ، لمن وصلت حاسبتو و نزلت ، ما كنت ناويه أرجع عشان ناصر ما يقول جيت عشانو بس كمان لو ما رجعت أهلي حيعملوا لي مشكله و موضوع طويل عريض ، طبعاً ما كان معاي نسخه من المفاتيح لأني نسيتهم هنا و غير كدا الباب أكيد متربس من جوه لأننا أحياناً كتيره بنتربسو ، المهم ضغطت على الجرس ، بعد مساااافه الباب إتفتح و ناصر طلع في وشي !!..
حصلت لحظات صمت بيناتنا ، كنت بعاين فيهو و في عيونو الواقعه ، واضح إنو تعبان شديد ، جنبو كان في دانه الما انتبهت ليها إلا لمن قالت مها جااات ، ناصر طوالي دخل ، سلمت على دانه و سقتها من يدها و دخلت بيها جوه ، ناصر مشى غرفتو طوالي ، أنا كمان دخلت غرفتي و ختيت شنطتي على جنب ، دخلت أتدوشت و جيت صليت المغرب ، بعدها شلت تلفوني و قعدت في نص السرير ، فجأه رشا اتصلت علي ، لمن رديت عليها قالت لي وصلتي ؟؟ قلت ليها ايوه ، المهم قعدت تعتذر مني و قالت لي ما تزعلي من أمي و أبوي و و و .....المهم إتكلمنا مسافه و قفلنا من بعض ، بعدها فتحت الفيس لقيت رتاج عامله لي تاق في بوست واحده منزله صورة ناصر في قروب منبرشات و كاتبه جيبوا لي زيتو ، دا منو يا بنات 😭
طبعاً البنات كل واحد عاملهـ تاق لصحباتها و كاتبه ليهم تعالوا ما يفوتكم ، في بنات بعرفوا ناصر و قالوا ليها معلومات عنو ، وحده قالت ليها دا مشهووور معقوله ما بتعرفيهو ، قريت معظم تعليقاتهم و قلت ديل ما عندهم موضوع ، بعد شويه كدا رتاج نزلت بوست فيهو صورتي أنا و ناصر حقت العرس و قالت ما عارفه اقولها ليكم كيف يا بنات بس دا ناااااصر و دي زوجتو عشان كدا استكينوا 😏🤚 طبعاً كانت عامله لي تاق في البوست ...
البوست خلال نص ساعه بقى زي حلة الفشار ، كلهم شابكنها ما مشكله حتى لو معرس بتشلب ، واحده قالت ليها برررضو ما بنخليهو لو عندو دستة أطفال ، طبعاً غاظوني شديد ، بعدها بـ 5 دقايق وحده منزله صوره لي و صوره لـ ناصر و كاتبه وااااي ما مصدقه انو مها الإعلاميه مرتو ، وااااي يا بنات 😭 لكن حلوين شديد مع بعض ، عملت ليها لاااف على البوست و علقت ليها بـ قلب ، جات ردت علي و قالت لي بختك والله ، بعدها البنات اتلموا في الكومنت حقي و بقوا شغالين لي بالجد حلوين ربنا يخليكم لبعض و واحده كاتبه لي واااي ياريتني لو مكانك ، الله يديني راجل زيو كدا ، وحده قالت ليهم بتبالغوا يا بنات ، غيتو البوره لا دين لها....
المهم بعد شويه كدا باب الغرفه دق ! ما عارفه بس إتوقعت يكون ناصر ، ما مشيت فتحتو طوالي ، انتظرت الدقه التانيه بعدها مشيت فتحتو ، لقيت ورده في وشي ، طبعاً نسيت إنها جات قعدت مع أخوها عشان عيان ....للحظات حسيت نفسي محرجه منها ، قالت لي كيفك ؟؟ قلت ليها كويسه ، قالت لي طيب انزلي عشان أنا ختيت الأكل ، قلت ليها ما جعانه ، قالت لي طيب و طوالي مشت ، قفلت الباب و فتحت الشاشه و بقيت أقلب في القنوات ، كنت زهجانه و متضايقه شديد ، زيدان اتصل علي ، لمن رديت عليهو ، قال لي ناس البيت حكوا لي الحصل و أنا أساساً من قبيل شايف الرسايل في القروب بس قلت لحد ما أرجع البيت و اتفاهم معاك ، فهميني بس انتِ مشكلتك شنو ؟؟ عشان الراجل دا لو ما نافع معاك أو بتعامل معاك معامله ما كويسه عشان كدا انتِ نافره منو اقدر أتصرف و ننهي الحاصل دا بالتي هي أحسن ، قلت ليهو ماف شي ....قال لي يعني دي حركات منك ساي صح ؟؟
ما رديت عليهو ، قال لي إذاً أبوي خااالص ما غلطان و أنا لو مكانو كنت عملت كدا ، انتِ إتدلعتي أكتر من اللازم عشان كدا بتتصرفي من دون ما تفكري و ما خاته إعتبار لأي زول ولا حتى لـ راجلك المعاك في نفس القروب ، قلت ليهو زيدااان !! انت ما شايف أختو و بنات أهلو اتكلموا معاي كيف !!؟ قال لي ديل خليهم على جنب أنا مشكلتي معاك في حتة انك بتتصرفي على كيفك و ما محترمه راجلك و ما خاته ليهو إعتبار عشان كدا أنا أول شي سألتك إذا في مشاكل بيناتكم ، قلت ليهو ماف مشاكل لكن أنا ما بسكت لأي زول بهيني حتى لو كانت أختو أو أمو عديل ، قال لي إياك ، إحترمي نفسك و ماف داعي للمشاكل ، قلت ليهو أنا ما عارفه ليه كلكم واقفين ضدي ؟؟
قال لي نحنا واقفين ضد التصرفات الغلط البتعملي فيها دي !! لاحظي لحد اللحظه ناصر دا ما شكى لينا منك و على فكره أنا حاسي انك كذبتي لمن قلتي انك كلمتيهو انك حتقعدي معانا ! قلت ليهو كلكم سمعتوهو لمن امي إتصلت عليهو و قال ما عندو مانع ، قال لي من صوتك واضح انك بتكذبي ، خلاص انا اتأكدت انك ختيتيهو أمام الأمر الواقع و هو لو ما كان بالجد راجل ما كان سكت ليك و تم ليك كذبتك عشان ما يطلعك كذااابه قدامنا و أنا بحترم ليهو التصرف دا ، انتِ بتعملي دا كلو ليه ؟؟
قلت ليهو ما عملت شي أنا !! يعني عيب ولا حرام كوني أمشي بيت أهلي ، قال لي من دون ما تستأذني من ناصر ؟؟
قلت ليهو ما ضروري هو ذاتو لمن يطلع ما قاعد يكلمني ....أخد نفس و قال لي طيب دي مشاكل و نقاشات عاديه بتحصل بين كل الناس خلي المتزوجين يعني ماف داعي أول ما تتناقشي معاهو تشيلي شنطتك و تطلعي من دون ما تكلميهو ، لو بقيتوا تتهربوا من مشاكلكم دي حـ تتحلى كيف ؟؟
قلت ليهو خلاص فهمت يا زيدان ، قال لي ربنا يهديك و يكملك بعقلك !....المهم بعد قفلت منو فكرت في كلامو كويس بعدها صليت العشا و جيت رقدت و إتغطيت بس ما نمت ، بقيت اتقلب يمين و شمال لحد الساعه 10.... نزلت من السرير و فتحت باب الغرفه براااحه و مشيت وقفت جنب غرفة ناصر ، إترددت ادق ليهو الباب ولا لا ، بعد مسافه دقيت ليهو الباب ، جاني صوتو و هو بقول الباب مفتوح ، أخدت نفس و دخلت طوالي ....كانت فاتح الشاشه و بحضر و هو راقد في السرير ، عاين لي و رجع عاين للشاشه ، شربكت أصابعي و بقيت متوتره ، ما عرفت أرجع و لا أواصل مشي ، بعد تردد مشيت عليهو و قلت ليهو ناصر كيفك ؟؟؟
ما رد علي ، قلت ليهو مشيت للدكتور ؟؟....برضو ما رد علي ، حسيت نفسي محرجه ....إتحركت من جنبو و كنت حأطلع بس تاني جيتو راجعه و قلت ليهو أنا والله ما كنت عارفه انك عيان !....إتلفت علي و قال لي تمام المشكله وين ما فاهم ؟؟
قلت ليهو انت متضايق مني ؟؟
قال لـيه عملتي شنو ؟؟
قلت ليهو لأني ما كنت عارفه انك عيان ، قال لي و لو كنتِ عارفه حـ يفرق بـ شنو !؟
أخدت نفس و قلت ليهو فعلاً ما حتفرق بـ حاجه أصلا غلطانه أنا الجيت أعتذر منك ، صدقني لو ما أهلي شاكلوني و زيدان هسي اتكلم معاي في الموضوع ما كان جيتك أساساً ، قال لي أطلعي و اقفلي الباب وراك ....طوالي طلعت و قفلت الباب بقوه و مع قفلتي دي دورده كانت في وشي ، طبعاً إتخلعت ، كانت شايله ليهو أكل و عصير ، زحيت طوالي من قدامها و دخلت غرفتي ، قلت أكيد بتكون عرفت إنو أنا و ناصر ما بننوم في نفس الغرفه ....
المهم تاني يوم طوالي صحيت بدري كـ عادتي ، اتدوشت و اتسوكت و صليت ، لمن نزلت تحت ما لقيت زول ، كانوا لسه نايمين ، دخلت المطبخ و عملت لي شاي ، بعدها قعدت في الهول ، ورده جات نازله و قالت لي صباح الخير ، قلت ليها أهلين صباح النور ، قالت لي ناصر لسه ما صحى ولا شنو ؟؟ قلت ليها لسه ، فجأه هو جا نازل و هو شايل دانه و بهظر معاها و هي تضحك ساي ، ورده قالت ليهو أكيد ساهرت بيك ، قال ليها بالعكس نامت طوالي ، قالت ليهو أنا غلبتني عديل ، قدر ما حاولت أنومها أبت في النهايه جبتها ليك ، قال ليها اييوه دي حبيبة خالو و ما بتسمع كلام زول غيرو ، مش كدا يا دندون ؟؟ قالت ليهو آي ، طبعاً جوا قعدوا و أنا حسيت الجو متوتر ، ورده مشت جاب ليهم الشاي و جات قعدت و بقوا يشربوا و يتونسوا و أنا حاسه نفسي زي الكلمه الشاذه وسطهم ، ورده قالت لي اليوم عندك شغل ؟؟
قلت ليها ايوه ، قالت لـ ناصر معناها دانه دي إلا أسوقها معاي الجامعه ، قال ليها لا خليها حأسوقها معاي الشغل ، قالت ليهو والله حتتعبك ، غيتو إلا تديها للسكرتيره أو تخلي وحده من الموظفات تمسكها ليك 🤣🤣🤣
في نفسي استغربت ! يعني نازك مخليه بتها هنا ليه ؟؟! مشت وين يعني ؟ ، فجأه تلفون ورده رن ، قالت دي نازك ، ردت عليها ما عارفه قالت ليها شنو بالظبط بس ورده عاينت لي و قالت ليها ايوه ....متأكده انها جابت سيرتي و أكيد سألتها أنا رجعت ولا لا ....بعدها قالت ليها بتك كويسه لكن معذباني ، غيتو أنا اليوم راجعه بيتنا و ناصر هو الحيتحمل عذابها 😭😂 بعدها أدت التلفون لـ دانه عشان تتكلم مع أمها ، أنا كنت عايزا اسألهم نازك مشت وين تاني و خلت بتها بس قلت أكيد حـ يفهموني غلط ، بعد ما قفلوا منها ، ورده قالت ليهو نازك تلدي و انت تربي يا ناصر ، ضحك و قال ليها اعمل شنو أنا خال طيب و مسكين ، قالت ليهو بكرا حـ تجيب ليك مؤيد ، يعني حـ تضطر تخلي كل إلتزاماتك و شغلك عشان تربي أولاد أختك 😂 قال ليها مش دانه و مؤيد ديل !؟ لو قعدوا معاي لحد آخر يوم في عمري ما عندي مانع ، قالت ليهو ما كدا بس الشفع مسؤوليه ، هسي أنا بحبهم و بعشقهم حد الجنون و أي حاجه بس بري ما بقدر اتحمل مسؤوليتهم ، ماف غير الأم بتتحمل مسؤولية أولادها لحد ما يكبروا ، التربيه و المسؤوليه صعبات والله عشان كدا نازك بدت تتهرب منهم ، قال ليها نازك دي من يومها ما بتتحمل مسؤوليه ، قالت ليهو هو راجلها سافر متين ؟؟ قال ليها ليهو اسبوع ، قالت ليهو اهاااا عشان كدا جابت ليك دانه ، باس دانه على خدها و قال لـ ورده حبابها دندون ، قالت ليهو بكرا لمن تجيب ليك أطفال الوضع حـ يختلف .... طبعاً هنا حصلت صنه و أنا اتشرقت بالشاي ، كلهم قعدوا يعاينوا لي ، ورده قالت لينا ولا ما مخططين تجيبوا أطفال ، شلت كبايتي و بسكويتي و قلت ليهم عن إذنكم و طوالي مشيت المطبخ و أنا قلبي شغال دق دق و حاسه التوتر إتملكني ، شربت الشاي دفعه وحده و أصلاً هو ذاتو برد لأني من قبيل بسمع في ونستهم ، بعدها طوالي مشيت غرفتي جهزت نفسي ، لبست بنطلون جينز و سرحت شعري ..... لمن جيت نازله لقيت ورده ذاتها مجهزه نفسها ، قالت لي أنا كمان طالعه الجامعه ، قلت ليها طيب نطلع سوا ، قالت لي ناصر منتظرنا برا حيوصلنا معاهو ، طبعاً ما قدرت أقول ليها ما ماشه معاكم ، المهم لمن طلعنا الشارع لقيناهو واقف قال لـ ورده بزهج بتعملي في شنو من قبيل ! ما معقوله التأخير دا كلو .... طبعاً أنا كأنو ما شايفني ، جا قفل الباب بالمفاتيح و مشى قدامنا ركب العربيه ، طبعاً أنا اتحسست و حسيتو قاصدني أنا بكلامو دا و أصلاً واضح انو زهجان مني ، ورده قالت لي أرح نركب قبل ما ينزل تاني و يتزهج فينا ، قلت ليها ااااا خلاص أمشوا انتوا أنا نسيت حاجه جوه حأدخل أجيبها ، قالت لي نسيتي شنو ؟؟ في اللحظه دي ناصر ضرب لينا بوري ، قلت ليها أمشي أمشي ياخ عشان ما ينزل يكفتنا ، قالت لي طيب استعجلي ، قلت ليها ما تنتظروني.....طلعت المفاتيح و فتحت الباب ، الوقت داك ورده وصلت ناصر و كلمتو بشباك العربيه إني نسيت حاجه ، دخلت طوالي و مشيت قعدت في الهول عشان هم يمشوا ....بعد شويه قلت خلاص أكيد مشوا ، أول ما شلت شنطتي و قفت على حيلي كدا و وصلت باب الهول ناصر جا داخل !! إتلاقينا جنب الباب ، كان بعاين لي بنظرات حاده ، يعني نفس نظرات أمبارح ، أصلاً من جيت و هو ما طايقني ، قال لي بحده أطلعي قدامي ، طلعت من الهول و أنا ساكته ، قفل الهول و أنا لسه واقفه ما مشيت على باب الشارع ، إتلفت علي و قال لي خير !! قلت ليهو حـ أطلب ترحال إنتوا أمشوا ، قال لي تمام أطلعي من البيت عايز أقفلو ، المهم طلعنا الإتنين و هو قفل الباب و طوالي مشى ركب عربيتو و إتحرك و أنا بقيت واقفه في الشارع.....
من ناحيه تانيه ناصر أول ما دور العربيه ورده قالت ليهو ناصر دقيقه مها ما ماشه معانا ؟؟! قال ليها ما ماشه خليها على راحتها ، قالت ليهو كيف ! في شنو يا ناصر !!
ما رد عليها و كان سايق بسرعه ، ورده تاني ما قدرت تتكلم معاهو لحد ما وصلها جامعتها ، أول ما نزلت هو طوالي إتحرك ، دانه قالت ليهو خالو انت مالك زعلان ؟....قال ليها ما زعلان ، وقف جنب أقرب بقاله و اشتري ليها حلويات و مويه ، بعدها واصل لحد الشركه ، أول ما وصل لاقى أبوهو مدثر في وشو ، دانه جرت ليهو و قالت ليهو جدووو ، فتح ليها يدينو و شالها و باسها على خدها ، لمن ناصر جاهو سلم عليهو و قال ليهو قالوا لي بقيت مربي أطفال ، قال ليهو اتخيل بس يا حاج ! ضحك و قال ليهو نازك دي اتكاليه لو بقيت تمسك ليها أولادها على طول صدقني تاني حـ تخليهم معاك ، قال ليهو قالت دانه ما بتسمع كلامها و عامله ليها شغب و لو خلتها مع نسابتها أولاد عماتها و أعمامها بشاكلوها و في بيتنا ماف زول فاضي كلكم بتطلعوا الشغل عشان كدا جابتها لي ، قال ليهو انت ذاتك مشغول و مرتك مشغوله ! بعدين يعني حتمسك ليها دانه دي لـ متين ؟؟...المهم خلينا ندخل جوه المكتب أحسن من وقفتنا دي ، المهم بعد ما دخلوا مدثر بقى يشاغل في دانه و يلعبها و ناصر زهجان و متضايق ، أبوهو قال ليهو انت اليوم مالك يا ولد زهجان كدا ؟؟؟
قال ليهو ماف شي يا أبوي ، قال ليهو لو تعبان الأفضل إنك تمشي للدكتور ، قال ليهو لا بقيت كويس ....أبوهو سكت مسافه بعدها قال ليهو انت مرتك دي متشاكل معاها ولا شنو ؟؟
مسح وشو بيدينو و قال ليهو ماف كلام زي دا يا أبوي ، قال ليهو عشان نازك دي أمبارح اتصلت على أمك و.....ناصر قاطعو و قال ليهو دي مواضيع بنات ساي يا أبوي ما تركز معاهم و نازك انت عارفها كويس كيف انها بتكبر المواضيع و بتحب المشاكل ، قال ليهو فعلاً و عشان أنا عارف بتي كويس سألتك انت عشان أمك صدقتها و كانت حتتصل و تعمل مشكله مع مرتك بس منعتها ، ناصر قال ليهو كويس انك عملت كدا....
بعدها ناصر مشى مكتبو و بدا يشوف في الملفات و هو لسه بنفس الزهج و زهجو و ضيقو كان بزيد كل ما يتذكر عمايل مها ، لمن تتصرف من عندها من دون ما تكلمو دا غير إنها ما بتسمع كلامو و ما فارق معاها شي ، و يمكن أكتر حاجه ضايقتو كلامها الفي القروب و موقفها قبيل ، بعد مسافه طويله أبوهو جاهو داخل و هو شايل دانه ، قال ليهو هاك بت أختك دي لهتني و ما عرفت أشتغل معاها ، ناصر قام من مكانو و جا شال دانه من أبوهو و مشى قعد بيها ، الشاشه كانت فاتحه و فيها قناة السودانيه 24 أبوهو كان طالع من المكتب بس رجع تاني و قال لـ ناصر ما شاء الله على مرتك ، ناصر رفع راسو و عاين للشاشه بس ما قال حاجه ، أبوهو إبتسم و طلع من المكتب ، بعدها ناصر ما شال عينو من الشاشه.....
يتبع.....
