#زهرة_فؤادي3
مها حولي الزاكي
المهم باقي الأيام بقت زي بعض ، بنطلع الشغل الصباح و بنرجع قريب للمغرب أو أبدر من كدا ، مرات أنا بكون اوف و هو شغال و العكس و مرات الإتنين بنكون اوف بس كل واحد في عالمو الخاص ، يوم ما كان عندي شغل فـ كنت زهجانه عشان كدا قررت أمشي لأهلي ، ناصر ما كان موجود ، المهم جهزت نفسي و مشيت ليهم في أمدرمان المهندسين ، نحنا ساكنين فى أركويت و اهل ناصر في امدرمان ، المهم لمن وصلت البيت فتح لي زيدان ، قلت ليهو زيييدو مشتاقين والله ، قال لي ما بالكتير يا زوله أنا ما صدقت إني إرتحت منك ، قلت ليهو جيت مخصوص عشان أضايقك ، ضحك و سلم علي و دخلنا جوه ، قلت ليهو وين الناس ديل !!؟
قال لي الحاج في الشغل و الحاجه برضو لسه ما جات ، قلت ليهو رشا وين ؟؟
قال لي عامله فيها بتقرا في غرفتها ، قلت ليهو طيب حأطلع أشوفها ، بقيت ماشه على غرفتها و أنا بنادي عليها بصوت عالي ، رشاااااا ، رشوووويتي ، جاتني طالعه و هي مبسوطه ، قالت لي مهاوي جيتي متين و جات حضنتني ، قلت ليها جيت هسي...المهم نزلنا قعدنا في الهول و بقينا نتونس و نسأل عن أحوال بعض ، زيدان جا و هو شايل 3 كبابي عصير و كباية مويه و كيك ، شكل الكيك كان بشهي شديد ، قلت ليهو الحتعرسك دي حتكون محظوظه لأنك حـ تطبخ ليها و هي بس حترقد و تنوم مرتاحه 🙂
رشا قالت لي زيك انتِ هسي ، زيدان قال لي جبهتك طااارت بعيد ، قلت ليها كويس يا رشا ، زيدان قال لي ، قالوا لي لمن مشوا ليك طبختي ليهم ! قلت ليهو ايوه ، قال لي والله لو ما أختي كنت صدقتك ، قلت ليهو على راحتك لو ما حابي تصدق ، قعدوا يضحكوا ، رشا قالت لي المشكله انك لسه بتكذبي و مصره إنك طبختي ! يا بت كلنا عارفين إنو دا طبيخ ناصر ما إنتِ ، زيدان قال لي كويس انو نسابتك ما عارفين حقيقتك ، راجلك سترك ، قلت ليهم أف خلااااص ياخ ، قلت لـ رشا ها كيف عامله مع الجامعه ؟ قالت لي ماشي الحال ، طبعاً رشا زي ما قلت ليكم بتقرا تقنية معلومات في جامعة السودان السنه التالته ، و زيدان أخوي عمرو 26 سنه نفس عمر وائل أخو ناصر ، قرا إدارة أعمال و حالياً شغال مع أبوي في الشركه ، المهم رشا أكلت معظم الكيك ، زيدان قال ليها يا سمينه ما خليتي لينا حاجه !.... طبعاً رشا وزنها زايد ، يعني سمينه شويه ، حاولت تنزل وزنها بس ما قدرت ، قالت ليهو سمينه في عينك و طوالي قامت و مشت غرفتها ، قلت ليهو ياخ حرام عليك يا زيدان ! عارفها بتضايق لمن زول يقول ليها كدا ! قال لي عادي ياخ ، قلت ليهو حأمشي أشوفها ، لمن مشيت ليها لقيتها بتبكي ، طبعاً اتفاجأت ! لأنها كانت بتضايق و مرات بتطنش بس ما حصل بكت بسبب زول قال ليها يا سمينه !!
قلت ليها رشويه ليه بتبكي ! زيدان دا عوير ساي ما تشتغلي بيهو ، ما ردت علي ، بكاها زاد ، قعدت جنبها و ختيت يدي على كتفها ، قالت لي كل الناس بتقول عني كدا ، كل الناس بتتنمر علي ، في البيت في الشارع في الجامعه ، أنا تعبت من نظراتهم لي و شماتتهم فيني ، قلت ليها على فكره السمن دا البنات ببلعوا ليهو حبوب ، قالت لي ما عندي بيهم شغله أنا ما عايزا سمن زي دا ، أنا عايزا وزني يكون وسط لا ضعيفه لا سمينه ، حاسه إني كتلة لحم متحركه 💔
قلت ليها ما تشتغلي بزول و حبي نفسك زي ما إنتِ ، قالت لي الكلام ساهل........
غيتو قدر ما حاولت أواسيها ما قدرت ، لمن أمي جات راجعه من الشغل كلمتها بالعملو زيدان ، طبعاً أمي دكتوره بتدرس في عدد من الجامعات ، المهم أمي شاكلتو و قالت ليهو هسسسي دي تمشي تعتذر منها ، قال ليها يا أمي دي حركات منها ساي ، هسي أنا لو زول قال لي يا طويل حـ أزعل ؟ أكيد لا ، قلت ليهو دا انت و دي هي و الإتنين ما زي بعض و الإناث بتختلف عن الذكور ، البتشوفو انت هظار عادي ، غيرك بتأزم بسببو و بالنسبه ليهو ما بكون حاجه عاديه ، قال لي تمام حـ أمشي ليها و فعلاً مشى و جابها معاهو ، جات قعدت معانا بعد ما زيدان راضاها ، أمي قالت لي انتِ و ناصر ما مسافرين ولا شنو ؟؟
قلت ليها والله الإتنين مشغولين و ماف طريقه للسفر ، المهم قعدنا نتونس كدا و كنت منتظره أبوي يجي بس ما جا ، قلت ليهم أنا بعد دا حأمشي المغرب قرب ، أمي قالت لي ناصر جا من الشغل ولا شنو ؟
قلت ليها ما عارفه والله ، قالت لي شنووو !!؟ كيف يعني ما عارفه ، رشا قالت لي أجي ما راجلك هو !!, ، قلت ليهم ما كدا بس عشان هو مرات بجي متأخر و مرات بجي بدري عشان كدا ما عارفاهو حالياً موجود ولا لا ، قالت لي لا اتصل عليك لا إتصلتي عليهو ؟؟ قلت ليها لا ، زيدان قال ليها بكون إرتاح منها يا حجه 😂
حمرت ليهو بس و قلت لأمي عايزا مفاتيح عربية أبوي القديمه عشان حأرجع بيها ، قالت لي انتِ ما بتتوبي !.... طبعاً قبل كدا كنت بسوق و عندي رخصه و أي حاجه بس في خوفه بتجيني أثناء السواقه خاصة لمن يجي باص أو شاحنه كبيره ماره بجنبي ، بسبب الخوفه و الرعشه دي عملت حادث قبل سنتين بس كان خفيف و من يومها ما سقت عربيه تاني.....قلت ليها يعني أكيد ما حأقعد عمري كلو من دون سواقه عشان عملت حادث مره وحده!!...رشا قالت لي المشكله انك حـ تخافي و تعيدي الحصل تاني ، زيدان قال لي أنا حأوصلك أرح ، أمي قالت لي اتصلي و شوفي ناصر ، لو لسه ما رجع من شغلو أقعدي ما تمشي ، قلت ليها لا لا بكون رجع ، المهم سلموا لي على أبوي لمن يرجع ، ودعتهم و طلعت مع زيدان و إتحركنا ، قال لي تعامل ناصر معاك كيف ؟؟ قلت ليهو عادي ! قال لي مفروض سؤالي يكون تعاملك معاهو كيف لأنو ناصر ما فيهو كلام أما انتِ كلنا عارفنك 😂 قلت ليهو كوووويس يا أخوي ، المهم بعدها بقينا نتونس مع بعض عن الشغل و كدا ، قال لي القضيه دي شكلها لسه مطوله ، قلت ليهو فعلاً و دي ما أول قضيه تاخد المده دي كلها ، قال لي على فكره الولد دا قريب واحد كان صحبي في الجامعه ، قلت ليهو بالجد ! قال لي اي والله ، عرفت الحاجه دي أمبارح لمن إتلاقيت معاهو صدفه ، قلت ليهو ما جاب ليك سيرة أهل الولد ، أمو و أبوهو !؟ قال لي : أمو و أبوهو في البلد و هو جا الخرطوم عشان يقرا و ياهو ساكن في الشقه ديك لحد ما كتلوهو ، قلت ليهو ما قال ليك أي حاجه تانيه ؟؟
قال لي لا لأنهم ذاتهم ما عارفين عنو حاجه غير إنو جا الخرطوم و ساكن في شقه في بحري ، قلت ليهو ربنا يرحمو و يعوض شبابو الجنه ، قال لي آمين يا رب ....المهم لمن وصلنا البيت رفض ينزل معاي ، قال لي بجيك يوم تاني ، المهم لمن دخلت البيت لقيت ناصر راقد في الهول و خاتي رجل فوق رجل و بتكلم بالتلفون ، سمعتو قال : ولا يهمك أنا عندي كم توته !....جيت قعدت و شلت الريموت و حولت ، عاين لي و رجع يتكلم عادي ، بعد خلص قال لي بكرا أصحابي عازمننا في نادي النيل ، قلت ليهو أمشي من دون ما تستأذن مني ، قال لي بطلي بياخه ، استأذن منك لشنو يعني !...هم عازمننا الإتنين ، قلت ليهو بشوف....
المهم تاني يوم طوالي بعد مشيت الشغل و جيت راجعه ، عملت لي كباية شاي و مشيت فتحت الدولاب و بقيت أختار في اللبس الحـ أمشي بيهو ، طبعاً نهاي ما فكرت ألبس توب ولا بحب ألبسو ، في الآخر طلعت لي بنطلون جينز و قميص أبيض طويل و حزام أبيض ، و طرحه مشجره و هيلز أبيض ، أما الميك اب فأنا ما متعوده أعملو على طول ، و لو عملتو ما بكترو ، قعدت قصاد المرآيه ، اول شي رطبت وشي بعد ما غسلتو و نشفتو ، بعدها عملت حبه من البرايمر ، بعدها مشطت حواجبي و خططتهم بطريقه إحترافيه ، بعدها شلت شويه من الكونسيلر و عملتو تحت عيوني و في جوانب وشي و وزعتو بـ البلاندر ، آخر حاجه الفاونديشن ، طبعاً ما كترتو ، عملتو زي الكأني ما عملتو ، بعدها عملت ايشادو بالألوان الترابيه و ماسكرا و إيلاينر ، آخر حاجه عملت روج عنابي لكن بدرجه هاديه و خفيفه من شيقلام ، المهم لمن نزلت الهول لقيت ناصر منتظرني ، كان لابس بنطلون أسود و قميص بيج و جزمه سوداء ، عاين لي بإستغراب كدا و قال لي ما بدري يا شابه !!
قلت ليهو بالعكس ما اتأخرت ، قال لي يلا ، المهم مشينا و ركبنا ، بعد شويه كدا تلفونو رن ، طوالي رد و قال تُوُتي ، في سري قلت ليهو توتي اليغرقوك فيها ان شاء الله ، قال ليها جاي جاي ، في الطريق والله ....لسه ؟؟....طيب وين انتِ عشان أجيك....تمام تمام ماشي عليك ....بعد قفل ما قلت ليهو حاجه ، ركزت مع تلفوني بس ، لحد ما فجأه وقّف العربيه و نزل القزاز و سلم على بت دلوعه كدا و قال ليها يلا يا توته ، طبعاً أنا كنت بعاين ليها ساي لحد ما ركبت و قالت لي هاي كيفك ، قلت ليها أهلين و سكته خليتها ....طول الطريق كانت بتتونس مع ناصر و أنا كأني ما موجوده معاهم ! أنا احترت في البت دي معقوله ما عارفه إنو ناصر متزوج !و القدامها دي مرتو...لا لا أكيد عارفه بس عشان هي وحده تافهه و رخيصه ما بهمها...
المهم وصلنا و سلمنا على أصحابو ، فيهم المتزوج و معظمهم عزابه و اغلبهم بعرفهم يا قروا معاي يا من معارف أهلي ، المهم لمن قعدنا واحد من أصحابو قال ليهو شكلو العرس نفع معاك يا مان ، ناصر عاين ليهو بغيظ بس ما إتكلم معاهو ، البت الإسمها توته كانت قاعده جنب ناصر في الطرف التاني ، يعني هو قاعد في نصنا ، قالت ليهو ناصر دا أكتر حاجه ما بتنفع معاهو العرس هههه فما عارفه عرس كيف ، وحده زوجة صحبو حبت تغير الموضوع ، قالت لي على فكره يا مها أنا من متابعينك و بفتح القناة مخصوص عشان أشوف نشرتك حقت الأخبار و برامجك ، قلت ليها حبيبتي والله دا شرف لي ، وحده تانيه قالت لي أنا كمان بحبك والله و بحب استايلك ، ملابسك بتشتريها من وين ؟....المهم بدينا نتكلم عن الملابس و الإكسسوارات و الموضه و كدا و نحنا بناكل ، بعدها ناصر جاهو إتصال فقام طوالي و اللصقه ديك لحقتو ، واحد من أصحابو جا قعد جنبي و قال لي ممكن اتونس معاك ، قلت ليهو حالياً نحنا بنتونس ! فـ اتونس معانا عادي !!....إبتسم و قال لي على فكره أنا برضو من متابعينك و مرسل ليك طلب صداقه ليهو شهر ، فلو تكرمتي وافقي عليهو ، قلت ليهو تمام ، قال لي إذا ما فيها مشكله ممكن هسي توافقي عليهو!!
فتحت تلفوني و قلت ليهو اسم حسابك شنو ؟! قال لي مصطفى وليد بالإنجليزي ، المهم بحثت و لقيت صفحتو و قبلت طلب صداقتو ، قال لي تسلمي ، إبتسمت ليهو بس بعدها بقى يفتح معاي مواضيع و أنا صراحة في البدايه كنت بتجاهلو لحد ما اتكلم عن السياسه و الحاصل حالياً في البلد فـ طوالي لقيت نفسي بتناقش معاهو و نسيت كل الناس الحولينا ، بعدها ناصر و البت ديك جوا ، ما قعد في نفس مكانو لأنو جنبي قعدت وحده من البنات ، أثناء ما أنا بتكلم مع صحبو البت الجنبي الإسمها بيان لكزتني ، لمن إتلفت عليها ، همست لي و قالت لي على فكره يا مها مصطفى و ناصر صح هم أصحاب بس في الفتره الآخيره حصلت بيناتهم خلافات و هم هسي ما بطيقوا بعض فـ بس ما عارفه لكن ناصر دا حاساهو إتضايق من ونستك مع مصطفى بسبب خلافاتهم ، مصطفى قال ليها انتِ يا بيان بتقولي ليها في شنو ؟؟
قالت ليهو كلام بنات ، رجعت اتونس تاااااني مع مصطفى كأني ما سمعت بيان قالت شنو و كلو عشان أغيظو و بعدين أنا مالي و مال خلافاتهم !!
بعد شويه كدا ناصر وقف على حيلو و قال ليهم ان شاء الله دائماً عامرين يا شباب نحنا حـ نمشي بعد دا ، عاين لي و قال لي مها يلا....قالوا ليهو لسه بدري و و و ....قال ليهم مره تانيه هسي حـ نمشي ، شلت شنطتي و قلت ليهم شكراً على القعده الظريفه دي يا شباب و على فكره العزومه الجايه علينا ، مصطفى قال لي أكيد حتى لو ما عزمتينا برانا حـ نجيكم 😂
المهم ناصر مشى قدامي و أنا وراهو مبسوطه و بضحك ساي ، لمن وصلنا العربيه البت ديك جات لاحقاهو ، قالت ليهو ناصر انت كويس ؟؟ قال ليها كويس يا توته ، قالت ليهو عارفه انو وجود مصطفى كان مضايقك بس ما تفكر فيهو كتير و إعتبر نفسك ما شفتو ، قال ليها تمام ، ماشه إنتِ ولا لا ؟؟ قالت ليهو لا حأقعد لسه مع الشباب...أنا طوالي ركبت و بقيت أعاين ليهم مستغربه في وقاحتهم دي ، يعني حتى لو كنا أنا و ناصر ما بنطيق بعض على الأقل يحترمني و يحترم الحاجه الإسمها زواج دي !! و البت المتخلفه دي مالا ؟! ليه ما عندها كرامه و إعتبار لنفسها!
أول ما ركب قفل الباب بقوه ، بقى سايق و مركز بس مع سواقتو ، طبعاً ولاااا إتكلمت معاهو ، بقيت مركزه مع تلفوني بس لحد ما فجأه جاتني رساله في الماسنجر ، لمن فتحتها لقيتها من الإسمو مصطفى ، طبعاً شميتو شديد ، أنا كرهتي في الدنيا الراجل اللصقه و العبيط ، خاصة البلصق في زوجة أو خطيبة أو حبيبة صحبو !! ، أنا عارفه كويس إنو دي تفاهه و قلة أدب منو و أساساً الرجال ديل أنا ما عندي ليهم أخلاق ، كان كاتب لي وجع وش مش ؟😅😂
قلت ليهو أيوه...
قال لي صراحتك قاتله ، قريت رسالتو بس ما رديت عليهو ، تاني رسل لي و قال لي آسف لو أزعجتك ، برضو ما رديت عليهو ، قلت تاني لو رسل رساله واحده بس طوالي حـ أحظرو بس تاني ما رسل....
لمن وصلنا البيت ، ناصر قال لي الكان بتونس معاك دا في خلافات بيني و بينو و تاني لو جمعتنا الصدف ما أشوفك بتتكلمي معاهو ، قال كدا و إتحرك من جنبي ، طوالي لحقتو و قلت ليهو و أنا مالي و مال خلافاتكم !! الدخلني شنو بيك ! كونك متشاكل معاهو دا ما سبب يمنعني من الكلام معاهو.... طبعاً أنا بتكلم و ماشه وراهو ، بعد آخر كلام قلتو وقف و إتلفت علي و قال لي ناسيه إنك مرتي !!؟
طبعاً ربعت ليهو يديني و ضحكت ضحكه طويله كدا و قلت ليهو شنوو ؟؟ مرتك يا دودي ؟
قال لي عايني إياك تاني تقولي لي كلمة دودي ولا زفت دي ، قلت ليهو ليه يا دودي ! ما بتطلع مني حلوه !؟
قال لي ما تستفزيني أكتر ، العندي قلتو ليك و تاني ما تتكلمي لا مع مصطفى لا غيرو ، قلت ليهو دقيقه دقيقه ! انت مالك ! الجد شنو فجأه ! مش نحنا متفقين إننا ما نتدخل في حياة بعض !!
ما رد علي ، دخل غرفتو و طوالي قفل الباب...
تاني يوم طوالي مشيت الشغل ، كان في نشرة أخبار مفروض أقدمها ، بعد خلصت مشيت لـ سارا خالتي في مكتبها الإعلامي ، لقيت معاها إلهام صحبتها بتناقشوا في آخر قضيه شغلت الرأي العام ، قعدت اتناقشت معاهم و حللنا قدرتنا ، إلهام قالت أنا شاكه انو واحد من أصحابو أو زملاؤا في الجامعه هو السبب في موتو ، خالتي سارا قالت ليها ما معروف يمكن اتشاكل مع واحد من ناس الشقه الساكن فيها! أو يمكن الزول المؤجر منو الشقه !!....قلت ليهم ماف حاجه بعيده ، إلهام قالت لي حسب كاميرات المراقبه في 3 أنفار ملثمين دخلوا الشقه و ما طلعوا تاني ، قلت ليها و انتِ عرفتي المعلومه دي من وين و الشرطه ليه ما ذكرت حاجه زي دي ، قالت لي دا شغلنا يختي ، قلت ليها طيب ليه الكلام دا ما موجود في الصحف الورقيه و الإلكترونية!! الناس دي كلها متابعه القضيه و من حقهم يعرفوا آخر التطورات ، خالتي قالت لي نحنا معانا سجل كاميرات المراقبه بس بما إنو الشرطه ما جابت سيرتهم نحنا ما حـ نستعجل ، يمكن عندهم هدف من عدم ذكر كاميرات المراقبه دي و غير كدا نحنا محاسبين على أي حاجه بنكتبها و بننشرها ، الشرطه أدرى مننا و أكيد معاهم كاميرات سريه.....المهم قعدت معاهم حكاية ساعتين بعدها رجعت البيت ، طبعاً أنا من إتخرجت ياداب لي سنتين و حاجه ، خالتي من زمان دخلتني في المجال دا و ضمنت لي شغل ، أنا من لمن كنت في الجامعه كنت بقدم برامج في الإذاعة ، بعدها إنتقلت للتلفزيون ، المهم أول ما دخلت البيت لمحت بت بتلعب في الحديقه !!
إستغربت طبعاً ، لمن مشيت عليها ، لقيتها دي دانه بت نازك أخت ناصر ، قلت ليها دندووون يا عسل ، بستها على خدها و سلمت عليها ، قلت ليها جيتي مع منو ، قالت لي جابتني ماما ، مسكتها من يدها و دخلنا جوه ، ناصر جا نازل و قال ليها مشيتي وين انتِ أنا من قبيل بفتش عليك ، قالت ليهو كنت برا ، جا شالها و باسها على خدها مساااافه و قال ليها يا حبيبة خالو انتِ ، طبعاً دانه أكبر بت لأختو ، عمرها 4 سنوات و عندها أخ أصغر منها عمرو سنتين اسمو مؤيد ، قلت ليهو جات مع منو ؟؟
قال لي جابتها نازك و مشت مع نسابتها لـ بكى في بلدهم ، قلت ليهو اهااا ، المهم دخلت إتدوشت و ارتحت شويه و صليت العصر ، لمن جيت نازله لقيتهم ماف ، لمن دخلت المطبخ لقيتهم هناك ، كان مقعدها في المسطبه ، قال ليها عايزا تاكلي شنو ؟؟
قالت ليهو عايزا إندومي يا خالو ، قال ليها إندومي !! طيب حأطلع اشتريها ليك بس بعد ما أطبخ ليك حاجه تانيه لأنو الإندومي براها ما كفايه ، دخلت و مشيت فتحت واحد من الأدراج و طلعت إتنين إندومي ، ناصر قال لي اووو نسيت إنك فاتحه ليك بقاله هنا !!
المهم عملت إتنين إندومي و ختيت الصحن على الصُفره و شلت دندون و قعدتها على السُفره و قعدت جنبها و قلت ليها يلا ناكل ، دانه قالت لـ ناصر خالو تعال أكل معانا ، قلت ليها لا ! خالك ما بياكل إندومي.....طوالي ناصر جا قعد جنب دانه و عاين لي و دخل يدو في صحن الإندومي و قعد ياكل معانا !...قلت ليهو من متين بتاكلها ؟! قال لي من هسي ، لويت ليهو خشمي و قلت ليهو اوكي معناها تاني دي حتبقى وجبتنا الرئيسيه ، قال لي ليه بتطبخي إنتِ ولا أنا !؟ المهم أنا ما واقف على الإندومي دي ، لأني الحمدلله بعرف أطبخ يا دانه ما زي ناااااس كدا 😊
دانه قالت ليهو عايزا مويه الشطه حرقتني ، طوالي جاب ليها مويه و قال ليها كفايه ما تاكلي تاني ، قالت ليهو هي ذاتا إنتهت ، المهم بعدها أنا و دانه قعدنا نتصور و نتهابل و ناصر بطبخ ، قال لـ دانه حأعمل ليك كباب لأنك بتحبيهو ، قالت ليهو اي بحبو ، المهم عمل كباب و بيض ، خت الصحاني و جاب العيش ، قال لينا يلا ابدوا ، غسلنا يدينا و قعدنا ، أول ما ضقت الكباب كشرت وشي و طوالي شربت مويه ، دانه قالت لي مالك ، قلت لـ ناصر ليه عامل كزبره في الكباب ؟؟ قال لي عادي المشكله وين ؟؟ قلت ليهو أنا ما بحب الكزبره ، قال لي خلاص أكلي بيض ! قلت ليهو و ما باكل بيض كمان ، قال لي خلاص إتعلمي تطبخي لنفسك يا ستي ....قمت من مكاني و مشيت فتحت الدرج و تاااااني طلعت إتنين إندومي و عملتهم ، لمن خلصت ناصر كان بكب لـ دانه عصير فراوله بالحليب ، بعدها ملى كبايتين ، ختيت الإندومي و قعدت ، قلت لدانه تأكلي ؟؟ قبل ما ترد ناصر قال لي لا كفاها ، عاين لـ دانه و قال ليها أشربي العصير دا ، قالت ليهو حاضر ، شال كبايه و ختاها قدامي ، زحيتها من جنبي و قلت ليهو أنا بتحسس من الفراوله ، قال لي يا شابه انتِ جايه من أي كوكب أي حاجه ما بتنفع معاك !! قلت ليهو خِلقتي كدا اعمل شنو ! ديل كلهم ما بنفعوا معاي!!...قال لي تمام خليك في الإندومي بتاعتك دي....
المهم خلصت أكل و غسلت صحني ، بعدها مشيت الهول لقيت دانه و ناصر بحضرو في فلم من أفلام ديزني في MBC 3 ، قعدت و بقيت أحضر معاهم ، دانه قالت ليهو خالو أنا نعسانه ، قال ليها تعالي طيب ، شالها وداها غرفتو و جا راجع و غير القناة طوالي ، قلت ليهو دا شنو عدم الذوق دا ما شايفني بحضر !! قال لي شافعه انتِ ؟؟ أنا القناة دي كنت فاتحها عشان دانه..
قلت ليهو على فكره الأفلام دا للكبار برضو ، قال لي للكبار لحد عمر 21 أو 22 ؟؟
قلت ليهو يااااخ انت مالك ! ان شاء الله أحضر توم و جيري ما عندك بي شغله ، قال لي متأكد انك بتحضريهم ، قلت ليهو المهم جيب الفلم ، قال لي في غرفتك في شاشه ولا لا ؟؟
قلت ليهو ياخ يشوي راسك دا و طوالي قمت من مكاني ، من دون ما يتردد جدعني بالمسند و قال لي يشوي رجلينك ، قلت ليهو يشوي يدينك ، قال لي يشويك كلك كدا على بعضك.... طبعاً كلامو غاظني ، رميت المسند عليهو و قلت ليهو يشوك في سقر ان شاء الله ، قال لي أعوذ بالله منك ، عاينت ليهو بغيظ و مشيت غرفتي ، عاينت للشاشه و طلعت رقدت على السرير بس ما جاني نوم ، شلت تلفوني و صورت فيديو و نزلتو في التيك توك ، بعدها إتصلت على رتاج ردت علي طوالي و قالت لي مشتااااقين والله ، قلت ليها لو مشتاقه جد بتتصلي يا معفنه ، ضحكت و قالت لي انشغلت شويه ، المهم انتِ هسي وين ؟ في القناة ؟؟ قلت ليها لا في البيت ، رجعت من قبيل ، قالت لي مش جدولنا كان واحد ؟؟ قلت ليها ايوه بس شكلو في تغيرات حتحصل في الجدول ، قالت لي اها كيف عامله و كيف الحياة بعد الزواج أخبريني 🙈
قلت ليها أحكي ليك شنو يعني يا هبله ! براك عارفه علاقتي بـ ناصر عامله كيف حتى من قبل الزواج ، قالت لي ما معروف يمكن تحبوا بعض ، قلت ليها مستحيل ، قالت لي يا بت كفايه جداً انك معرسه واحد زي ناصر دا ! قلت ليها كفايه شنو !! السمح و الرهيب فيهو شنو !! كلو عيوب و الأفظع انو نسونجي و مفتري ، قالت لي بعد سماحتو دي ليهو حق يفتري ، قلت ليها المهم انسينا منو ، ما اتأخرتي على برنامجك انتِ ؟؟
قالت لي فعلاً فعلاً اتأخرت ، يلا باي يا قلبي ، قلت ليها باي و قفلت الخط....
لمن المغرب أذن صليتو و نزلت تحت ، ناصر كان بتكلم بالتلفون سااااي ، قلت أكيد دي توته ولا زفت بتاعتو ديك ، جيت قعدت و شلت الريموت غيرت القناة ، قال لي يا زوله مالك انتِ ؟؟.... تقريباً البت البتتكلم معاهو قالت ليهو بتتكلم معاي أنا ! لأنو قال ليها لا لا أكيد ما معاك انتِ ، شويه كدا دانه جات نازله ، لمن جات قعدت جنبي ناصر أشر ليها عشان تجي و تقعد جنبو ، قلت ليهو حأبلعها مثلاً لو قعدت جنبي ! ما رد علي و دانه لمن كانت حتمشي ليهو مسكتها من يدها و قعدتها في رجليني ، قال لي نزليها ، ما رديت عليهو و بقيت أعاين للشاشه ، طوالي جا و شالها مني ....حركتو زعجتني و غاظتني شديد ، بس تاني قلت مالك و مالو يا مها ، دي بت أختو و هو حر فيها و تاني ما عندك بيها شغله مدام هو رافض اني اتعامل معاها أو أكون قريبه منها....
في اليوم البعدو كان عندي شغل ، مشيت القناة قبل موعد البرنامج بكتير عشان في نشره حـ أقدمها و بعدها بنص ساعه حـ يبدا برنامجي ، بعد نشرة الأخبار خلصت ، أفنان الأرتيست نادتني ، لمن مشيت ليها لقيت معاها رتاج ، عملوا ليها شعرها و علقوا ليها سماعات الصوت على قميصها ، قلت لأفنان أنا مكياجي كويس بس ظبطي لي حواجبي دي ، قالت لي تمام ، المهم اتظبطنا و طوالي مشينا الإستديو ، طبعاً ضيف الحلقه أتأخر و لسه ما جا ، فـ بس انا و رتاج و التيم العامل قعدنا نتصور و نتونس لحد ما الضيف جا ، بعد ما ظبطوا الإضاءه و زاوية التصوير بدا البث طوالي.....
المهم بعد خلصنا البرنامج الساعه كانت 4 ، رتاج قالت لي نطلع نتغدا برا رايك شنو ؟؟
قلت ليها ما عندي مانع ، قالت لي أنا حاجزه في مطعم الليوان الدمشقي ، قلت ليها سوري صح ؟ قالت لي ايوه ، طبعاً هي سايقه ف طوالي ركبنا و مشينا ، موقع المطعم نهاية شارع المطار قصاد المدينه الرياضيه ، المهم لمن وصلنا ، رتاج قالت لي حابه نقعد في الجلسات الخارجيه ولا الداخليه ؟؟
قلت ليها احسن الخارجيه ، المهم مشينا و قعدنا ، البوفيه حقهم كان فيهو أصناف كتيره من المأكولات و المشروبات ، إحترنا ناكل شنو ، في الآخر أخدنا سلطه شاميه و فطائر و بيتزا ، المهم استمتعنا بطعم الأكل و قضينا حكاية ساعه و حاجه في المطعم ، بعدها طلعنا و بقينا لافين بالعربيه ساي لحد ما جينا مارين بـ عفراء مول ، قلت لـ رتاج خلينا ننزل هنا نتسوق و نصلي المغرب ، المهم نزلنا و طوالي مشينا المصلى ، لمن قعدنا في الوضايات ، فجأه في بت صرخت و قالت مها و رتاااج !!
قلت ليها أهلين بإستغراب
يتبع.....
