اعين لا تمطر 🫀

15

فريزات🍓

🌪️أعـيـــن لا تــمـطـر 🌪️

|°• مسندي وسندي وأتكائيَ عُمقي وقوّتي ومُلكي ومَملكتيَ وضلعي الثَابت الذي لا يَميلُ أنتَ •°|

جـــزء 15:

وهي زادت كتزرب باغا غا إيمتا توصل لي شافها يقول مجريين عليها.. خطاويها مثابتينش رجل كتمشي فالشرق ورجل تابعاها بحال لا غطيح نسات الإستقامة وقتها! تلفات نييت.. غي وصلات للدار حلات الباب وطلعات كتجري تا دخلات لبيتها وسدات عليها.. تكات على الباب وحطات يديها على قلبها كتحس بداتها سخوونة العرق هابط مع ظهرها كتحس بييه!! يديها تنملو عليها إحساس غريب وتفسيرو غريب واش حيت شافت أخيرا الراجل لي كتبغي بعد غيابو وهي كانت كضن غيطوّل.. ويمكن حيت ذوقها فشي حاجة.. اه فشي حااجة!! تفكرات اش هازة معاها وقفات حدا السرير وبدات كتلوح داكشي تما وكتقلب فيه غرقات زعما! ما كاينش لي يعتقها من هادشي.. جلسات كتشوف فداكشي وتقاد جوانها لدرجة نساات اسامة نسات راسها فين نسات بلي هي بنت وهادشي مديالهاش نسات بلي غتندم.. تقدر تكون نسات حتى سميتها وعلاش لا.. بدااو يديها يترعدو عاود قادات داكشي كمات على خاطرها بردات على روحها تكحب وتعاود ودوز بديك الكانيطة دكوكا شافت فداك نص فنيدة مطولا ودارتها ففمها صرطاتها ودوزتها بجغيمة.. وراها تلاحت على ظهرها كتشوف فالسقف بعد دقائق معدودة بدات كيبان ليها السقف كيعواج الحيط بحالا جاي غيطيح عليها شي حيوانات حداها أصوات فرااسها لدرجة انها ناضت مفزوعة باغا تهرب كتحل فالباب وماقاداش تغوت نسات انها سداتو.. نسات حياتها بقا غا الساروت مبغاش يتحل وهي ترجع للسرير تقنتات وحطات يديها على ودنيها وكتحس براسها بحالا غطيح وهي جالسة! نفس الإحساس فاش كنا كنلعبو "دواخة" فالصغر وكنحسو براسنا غنطيحو وحنا واقفين نفسو داك الإحساس بقات هكاك ساعات عينيها ضروها السيدة ولات باغا تبكي والله دموعها ما رحموها باش يهبطو بقات هكاك ساااااعااات

#يتبع
أرائكم كبيدات 🌹