القاسي والبريئة (قصة جزائرية🇩🇿)

✨الحلقة التاسعة ✨

في الشركة:
مراد: نحتاج جيبلي عليها كل معلومات عليها لحشية يكونو عندي
******: من أمرك سيدي
كوبا عليه
مراد: عن طريقك راح ننتقهم من جهة من باباك لداخل في المافيا لكان فيها بابا ومن جهة نعاقبك على الكف تاعك
دخل أنس عندو
أنس: مراد لحقوني معلومات بلي سليمان راح تكون عندو مهمة في تجارة الأسلحة ليبيعوهم
مراد : وكتاه
أنس: الاسبوع الجاي
مراد : لازم تفشل مهمتهم فهمت مستحيل تنجح
أنس: إيه نديرو هجوم عليهم
مراد : إيه أنا راني رايح عندي شغل اتهلى هنايا واي خبر عيطلي
أنس: إيه روح
خرج مراد من الشركة ولحق لبلاصة ليحب يروحلها ويرتاحلها ولهو حي عادي جدا لتلقا فيه عائلات من طبقة فقيرة ومتوسطة لحق لوجهتو ڨارا طونوبيل ودخل للمطعم تع الحوت لجاي بسيط
مراد : عمي صالح
صالح: أهلين ولدي شرفتنا
حضنو بعضاهم حضن رجولي
( صلاح يكون شيخ كبير في العمر هو أكثر واحد يعرف معاناة مراد وواش عاش ومراد من كان عمرو 18 سنة يعرفو معنتها تربى على يدو وتان صالح كان يعرف بابات مراد)
مراد: واش كاش  حوت بنين واحد مايلحق يطيبو كيما نتا
صالح: باينة ولدي كاين
عيط لواحد يخدم فماك وقالو يجيبلو
صالح: ولدي احوالك مليحة
مراد: شوية شوية
صالح: إن شاء الله تخرج منها بخير نعرفك قدها
مراد: إن شاء الله
صالح: راك تعبان ومهموم ياولدي راني نعرفك
مراد: إيه قلبي راهو كنار شاعلة فيه ونار هاذيك نفسها لراح نحرقها على أعداء تاوعي لمزال مايعرفونيش
صالح: علابالي ولدي راك معمر و علابالي نتي قوي وصابر وانا معاك اي حاجة حبيتها هاني هنايا
مراد: علابالي عمي يكثر خيرك
في القصر:
فاطمة: ولدي مجد توصلني أنا
مجد: عندي خدمة جدة وزبد يسمع مراد يڨلبها علينا مي معليش نوصلك بصح تدخلي وحدك ماتصلحش
فاطمة : ندي معايا سارة لسبيطار وخلاص حتى هيا تحتاج تنظيم في ماكلتها ومشكل تع مراد ملازمش يسمع
مجد: خلاص مالا وجدو رواحكم راني نستنا فيكم في طونوبيل
فاطمة عيطت لسارة وقالتلها تروح معاها لسبيطار وسارة وافقت لبسوا وراحو وصلهم مجد
إيناس: أفف مزية مادار والو سلكنالها على شعرة
منار: ايه قدرت نقنعو
إيناس: ياحمارة نتي حاجة ماتقدرلك شطورة
منار ابتسمت بفخر وثقة
إيناس: هيا منار أنا نروح عندي خدمة
منار : أوك لحشية نتلاقو
دخلت منار للبيرو تاعها وماهي إلا دقايق وسمعت دقديق في الباب ودخلت فاطمة وتفكرتها منار وشافت معاها طفلة
فاطمة : سلام عليكم بنتي
منار: مرحبا بيك جدة شرفتينا عنقتها فاطمة وسارة تصدمت من حب فاطمة لطفلة هاذي باسكو نادرا وين تشوف جدتها تنجذب لطفلة
سارة : أنا سارة
منار: أنا منار تشرفت فيك
ابتسمتلها سارة وحست بلي منار طفلة مليحة من وجهها
قعدو
منار: جدة تنظمتي شوية في ماكلتك
فاطمة : إيه بنتي يعطيك صحة فادني
منار: هيا مليح
فاطمة: هاذي بنت وليدي ربي يرحمو سارة هيا لعرفتني على سبيطار هاذا وقالتلي عليه
منار: ايه مليح
في الحي:
مراد : هيا عمي نخليك عندي خدمة
صالح: ربي يحفظك وليدي
سلملو على راسو مراد وراح
ركب مراد في طونوبيل وصونا تلفونو
*****: سيدي جبنا المعلومات على منار الجابري
مراد : جبهولي للقصر
لحق مراد للقصر ودخل راح ديراكت للبيرو تاعو وجابلو ليخدم عندو المعلومات
مراد: امم مالا طبيبة في تغذية في سبيطار******