دارتلو براسها لالا
ليليان : واش صرا .... كيفاش حتى جبتني لهنا
قصي : كنت جايز حتى لقيتك تجري و كان تابعك واحد موراها جبتك لهنا بارسكو كنتي خابطة راسك
عينيها تعمرو بالدموع و قالتلو
ليليان : كشما دارلي
دارلها براسو لالا و حمحم
قصي : تحبي نهدرو مع لابوليس اذا تحبي تشكي ولا
غمضت عينيها و دارتلو براسها لالا ، سكت شحال منبعد قاللها
قصي : ايه كيما تحبي
ليليان : انا لازم نولي للدار
قصي : علبالي بصح الحال راح دوكا و دوكا عرفت بلي طريق تغلقت يعني لازم نستناو للصباح و نوليو
ليليان : صح ..... تليفوني مكانشو
قصي : يكون طاحلك تما بارسكو كي جبتك مكانش كاين ، كنت راح نقولك تهدري بتليفوني بصح مكانش ريزو هنا
دارتلو براسها ايه بتفهم
قصي : انا نخليك راح نكون برا اذا كشما سحقيتي تقدري تعطيلي
دار جا راح يخرج حتى نطقت
ليليان : يعطيك الصحة خويا ... على كامل واش درت معايا يعني لوكان كاش واحد كان قادر بلاك ميجيش يعاوني و ...
قصي : بلا مزية ، انا تاني عندي ختي و كيما منحبش عليها منحبش على بنات الناس ... المهم انا نخليك
خرج لبرا و هي قعدت لداخل
ليليان : شحال ناس ملاح هاد السيد .... اههه لوكان مخرجش فطريقي ليوم لوكان رحت فيها .... بصح هداك فريد يخلصها غالية ولا منتسماش
.......
جازت الليلة هادي و حال الدوار عالم بيه ربي ..... لحق الصباح و غير تفتحت الطريق رجعت ليليان لدارهم مع قصي .... الطريق كامل كان غير السكات حتى قطعتو وقت سقساتو
ليليان : نتا لي كنت مع بابا لبارح لالا
قصي : ايه
قعدت تستنى فيه يقوللها منين جا و وعلاش بصح هو قال ايه و سكت
ليليان : جامي شفتك هنا وقيلا مراكش منا
قصي : جيت على جال لخدمة برك
ليليان : امممم
فضلت تسكت وقت لقاتو محبش يهدر .... مسافة طريق كانت وصلت قدام دارهم ..... شكرتو و هبطت .... هي مع هبطت تشوف فالناس يخزرو فيها و يتهامسو عليها عقدت حواجبها ما فاهمة والو حتى تشوف باباها جاي مع ملك .... تبسمت بصح التبسيمة راحت وقت لحق عندها باباها و ضربها بسقلة
ملك : بابا لالا
اما قصي لي كان راح يديماري حتى يشوف فالحس قوا و باباها ضربها قدام الناس
قصي : ايهيه spectacle جديد
فريد : عمي هدا هدا هو لي قتلك عليه
و كان يشير على قصي لي فالطونوبيل
ابراهيم : و جايبك لهنا تاني
ليليان : بابا واش راك تهدر مفهمت والو
قصي لي عقد حواجبو وقت شاف فريد و زيد كان يهدر عليه .... هبط من الطونوبيل و وقف مقابلو
قصي : خير ان شاء الله
ابراهيم : هذا نتا !!
فريد : ايه عمي ايه .... وعلاش درتي فينا هكا يا بنت عمي .... عييت نحلل فيها البارح متروحش معاه بصح والو ركبت معاه و راحت و كي وقفت فطريقهم هذا ضربني منعرف وين جوزوا الليل كامل و دوكا وجههم صحيح و جايين
ليليان : كي ... كيفاش بابا مكانش منها هاد الهدرة
ابراهيم : ادخلي للدار
ليليان : بابا
ابراهيم : ادخلييي
ملك لي دخلت ختها ... اما قصي جاه ضحك من الصدمة لي صراتلو كيفاش فريد قلب كلش
فريد : على واش راك تضحك
ابراهيم لي راح عندو و قالو
ابراهيم : راح تتزوج بيها و تستر لفضيحة لي صرات
قصي : قول و الله وعلاش ان شاء الله نتزوجها
ابراهيم : مزالو يهدر
فريد : عمي كيفاش ....
ابراهيم : مدخلش روحك و نتا ( رفد صبعو ) ... اسمعني مليح
قصي : نتا لي سمعني مليح يدك هادي .... ( هبطهالو ) تهبطها ..... راني محترمك كي كبير فهمت و فبلاصة ما جاي تضارب معايا ننصحك تسقسي بنتك و تفهم منها لي صرا
دور راسو و ركب فالطونوبيل و راح
قصي : درنا الخير ولينا حاصلين ....
شعل قارو يتكيف و كمل طريقو
اما فالدار عند بطلتنا .... العياط كان يتسمع من بعيد من مور ما جا فريد فليل و قلب لحكاية كامل لصالحو و الدوار كامل سمع و سيرة ليليان ولات على كل لسان .... باباها لي مامنش بصح وقت خوه كان يحكيلو و زيد الطفلة لي مجاتش ليل كامل لالا و زيد جات معاه لقا روحو مامن حكاية فريد كيما هو كيما كامل الناس لي هنا
جميلة ( اخت ابراهيم ) : يا يمااا على تبهديل ولينا على سيرة كل لسان
ليليان : بابا وعلاش مراكش حاب تامني مصرات حتى حاجة كيما لي راهي فراسكم .... فف ... فريد راهو يكذب وعلاش انا ندير حاجة كيما هكا
جميلة : ههه مليح وليتي تكذبي ففريد شوف خويا متسمعلهاش بلاك تبلعطك بزوج دمعات هادو خرجتي شيطانة و عضيتي اليد لي وكلاتك هذا حق الخير لي درناه معاك
ليليان : نتي مدخليش روحك
جميلة : قليلة التربية
ليليان : بابا
طاحت على رجليه تبكي
ليليان : بواش نحلفلك يا بابا ما صرا والو .... مكانش منها اسيد هذا عاوني و ....
ابراهيم : روحي مرانيش حاب نشوفك .... روحي
جميلة : قلتلك مالاول متربيهاش مدخلناش ناس ماشي من دمنا للعايلة هاك شوف
ملك : ليليان هيا .....
شدت ختها و طلعتها للشمبرة .... قعدت ساعة و هي تبكي و ملك تسكت فيها فالاخر حكاتلها كلش كل حاجة صرات البارح
ملك : كيفاش ... رخيس ميحشمش ليليان لازم تحكي لبابا
ليليان : ...... معندها حتى فايدة ملك ..... شكون لي راح يامني مكنتش كامل حاطة بلي راح يصرا هكا
ملك : بصح قولي لبابا
ليليان : واش نقولو .... ههه بلي وليد خوه حب يغتصبني و كذب عليهم
ملك : تعرفيه يامنك
ليليان : بصح دار باباك مراحش يامنو
ملك : واش دخلك فيهم
ليليان : بابا راح تخسر علاقتو مع خوه و دارهم من كبيرهم لصغيرهم ملك .... هكا نكون جازيت الراجل لي كبرني قولي
ملك : ليليان
ليليان : ... ملك مرانيش قادرة نهدر ... و لي هدرناه يموت هنا فهمتي .... فهمتي
ملك : ايه خلاص
يتبع 💜💜💜 ......
أنت تقرأ
تزوجت منقذي _ باللهجة الجزائرية _
Romanceالكرونيك هادي تحكي على ليليان و قصي لي حتمت عليهم الظروف يتزوجوا مع عدة احداث و مشاكل فالكرو ملاحظة : الحكاية من وحي الخيال معندها حتى علاقة بالواقع و هي من تاليفي
