ليليان : واش نسمع واش .... قاعدة هنا حاملتك و حاملة الهبال تاع يماك و دوكا خصتني غير صاحبتك ياك باش لي يسوا و لي ميسواش يجي يتمسخر بيا .... بنت عمك لي حاطتني بهلولة جاية ترميلي فالكلام عليك و على صاحبتها و هادي تاني راني حاملتها ..... مدام عندك وحدة فحياتك طلقني .... ياك خلاص هكا تفاهمنا فالاول سيبون طلقني خليني نولي منين جيت
قصي : نهار لي تنفحلي نطلقك نطلقك مراحش نستنى فيك جي توريلي
ليليان : مرانيش لعبة بين يديك فهمت
قصي : و دوكا وعلاش راكي مقلقة مفهمتش
ليليان : لي عايش مع واحد كيما نتا ماشي غير يتقلق
دورت راسها باش تروح حتى نطق
قصي : حكايتي خلاصت معاها قبل منتزوج بيك اصلا
ليليان : ميهمنيش
قصي : لوكان جا ما يهمكش لوكان مراكيش هنا
دارت عندو و عوجت فمها
ليليان : ريحتني علبالك مكنتش راح نرقد لوكان مقتليش
قصي : علبالي علبالي
ليليان : دايها في روحك بزاف
راحت لشمبرتها و هو زاد شوية و طلع
.........
و هكذا نقولو صباح جديد و احداث جديدة :
مور ما شربو قهوتهم .... ليليان خرجت للجنينة مع اية هي تلعب و ليلي تعس فيها حتى جات بتول
بتول : ليليان ... راني بعتهالك .... هاكي
ليليان : يعطيك الصحة بتول
بتول : بلا مزية ، ياك معدباتكش اية
ليليان : لالا اية عويقلة الله يبارك عليها
بتول : عويقلة معاك برك مالا مع يماها واااعرة
ليليان : ههه
قعدو يقسرو حتى نطقت بتول
بتول : اههه شكون هادو
دورت راسها بعفوية حتى شهقت
ليليان : ملك بابا
راحت تجري عندهم تعنق و تبوس فيهم
ليليان : ملك توحشتكم بزاف وقتاش جيتو و كيفاش
بتول : صباح الخير
ليليان : ملك هادي بتول بتول هادي ختي ملك و هذا بابا
ابراهيم : صباح الخير بنتي
بتول : متشرفين
خرجت عندهم زهرة و نبيل و جنان و تلمو تما منبعد ليليان طلعت معاها ملك لشمبرتها
ملك : الشمبرة بزاف شابة
ليليان : امممم .... اقعدي
ملك : ... ايه احكيلي
ليليان : قوليلي نتوما كيفاش حتى جيتو
ملك : معلباليش كي نضنا الصباح لقينا الطونوبيل تستنانا قدام الدار قلت بلاك نتي قلتي نجيو
ليليان : امممم
ملك : قوليلي كيفاش راهو عاجبك الحال هنا
ليليان : يعني .... لي هنا نقولو ملاح معايا من غير يماه لي وين تلقى تنبزني
ملك : شفتي .... صحا و نسيبي
ليليان : .... حتى هو مليح معايا و بزاااف .... صح يقلقني مرات بصح جاي انتيك
ملك : هههه كيفاش انتيك
ليليان : معلباليش بصح عقليتو هايلة و سورتو جامي اذاني ولا قالي حاجة عيانة اوكونترار يعني ملي جيت لهنا و هو يعاملني مليح و عرفت عليه حاجة جاي بزاف حنين بكيلو يبكي معاك
ملك : صح ..... ملييح .... و زيد عليها شباب و لباس بيه انا ليا غير شدي فيه بزوج يدين
ليليان : ههه لالا ماشي لهاد الدرجة يعني .... période و نتهناو من بعضنا على كل نتمنالو غير الخير ان شاء الله يتلاقى ببنت الحلال
ملك : تعيي علبالك و زيد جايحة اههه لوكان نترزق براجل كيما هذا منزيدش نحوس
ليليان : قوليلي كيفاش راكم دايرين نتوما
ملك : الدار سماطت بلا بيك بابا نهار كامل برا و زيد شفتيه كيفاش شيان حزن بزااف عليك
ليليان : مزالو هاز فخاطرو شفتيه لتحت كيفاش كان يتعامل معايا
ملك : تبانلك برك صباح فرح بزاف كي كنا جايين
ليليان : صح
ملك : ايه
ليليان : ياك تقعدو تباتو
ملك : بابا محبش قالي نشوفوها و نوليو
ليليان : وعلاش
ملك : انا تاني مدابيا نزيد نقعد معاك بصح واش تحبي ..... حقا هاكي هادو
ليليان : وشنو هادو
ملك : دراهم ... وصاني بابا نمدهملك
ليليان : لالا شديهم منديش
ملك : حبسي مالجياحة
ليليان : لالا ملك نتوما علبالي تسحقوهم عندكم الما و التريسيتي و الماكلة و الدوا تاع بابا بزاف عليكم و انا هنا كلش عندي و زيد .... عندي دراهم لحاجة لي نحوس عليها تكون عندي
ملك : سوور
ليليان : ايه سوور
و كيما كان الحال قعدو فطرو كيف كيف و كي كملو نطق ابراهيم
ابراهيم : ملك بنتي هداك هو نروحو
زهرة : ياخاه اقعدو تباتو
ابراهيم : لالا يعطيك الصحة بصح لازم نروحو يعطيكم الصحة على الفطور
تسالمو منبعد ليليان كي لحقت عند باباها عنقاتو و هبطو دموعها
ليليان : لوكان غير قعدتو
ابراهيم : معليش مرة واحد اخرى
مسحلها دموعها و قاللها
ابراهيم : متبكيش .... بلاكي تنساي بلي مزال عندك باباك فوق راسك ياك ... و سمحيلي اذا غلطت معاك انا درت كامل واش قدرت باش نعوضك و نعيشك احسن عيشة
ليليان : نتا لي سمحلي بابا
باستلو يديه و توادعو و كل واحد راح لبلاصتو ....... ليليان لي ملي راحو و هي تبكي حلفت لا هي سكتت .... كانت حابة تروح معاهم بصح مقدرتش
....... اما فالصالون فكان عياط اخر
زهرة : الله يعطيني وجهك يا قليلة لحيا
اسمهان : هدوما حاجاو خاطيينك خالتي مدخليش روحك فيهم
زهرة : ندخل روحي فهمتي .... لوكان اوموان خرجتي سلمتي عليهم برك الناس جاو طريق بعيدة حتى لهنا و نتي ممبا مقابلتيهمش حتى الفطور محبيتيش تفطري معاهم عيب عيب
اسمهان : مالاول قلتهالكم منسحقش هديك الطفلة لا هي و لا دارهم ولا حتى حاجة تخصها
زهرة : وليدك يخصها
اسمهان : ميخصهاش و غدوة ولا غير غدوة يطلقها فهمتي
زهرة : ايه راح يطلقها و بزاف
اسمهان : كي تخرج هديك الطفلة من حياتو وقتها نشوفك واش ديري
زهرة : مراحش تخرج حبيتي ولا كرهتي وليدك راح يشد فيها و ما يطلقهاش و قولي زهرة قالت و نتي خسري كامل ناسك و حبابك على جال انانيتك
..........
مسحت دموعها وقت سمعت الباب .....
ليليان : انععم
فتح الباب و دخل
قصي : انا قالولي راهي تبكي بصح قتلهم المعزة هديك محال تكون تبكي
دنا عندها
قصي : وشبيك
طلعت كتافها و هبطتهم
ليليان : مرانيش حابة نقعد هنا
قصي : وعلاش
ليليان : ..... حابة نروح لدارنا قصي افهم .... مرانيش حابة نقعد بعيدة عليهم مقدرتش نوالف
قصي : وليتي ديري كيما الدراري صغار
ليليان : نتا عندك الحق راك مع داركم و انا ..... انا معندي حتى واحد فهاد الدنيا من غير ملك و بابا والديا و ماني ماتو و مقعدلي حتى واحد من غيرهم
سكت و قعد يخزر فيها
قصي : و انا واش ندير دوكا
ليليان : والو
قصي : ..... البسي حوايجك تشوو
ليليان : وعلاش وشبيهم حوايجي
قصي : راح نخرجو
ليليان : لوين
قصي : بديتي
ليليان : ..... صحا خمس دقايق نكون واجدة
قصي : هيا مالا
ليليان : اخرج خليني نلبس
قصي : ياك مرتي
رمات عليه المخدة
قصي : ههه خلاص راني برا مطوليش برك
هدو حلقات اليوم ان شاء الله يكونوا عجبوكم متنساوش تخليولي ارائكم و اقترحاتكم فالتعليقات و الى الملتقى ان شاء الله في بارت اخر 💚💜💚
أنت تقرأ
تزوجت منقذي _ باللهجة الجزائرية _
Romansaالكرونيك هادي تحكي على ليليان و قصي لي حتمت عليهم الظروف يتزوجوا مع عدة احداث و مشاكل فالكرو ملاحظة : الحكاية من وحي الخيال معندها حتى علاقة بالواقع و هي من تاليفي
