قصي : مقصدتش نهدر معاك مقبيل هكاك ..... كنت قراف عيان و مقلق و نتي جيتيني فالنص
ليليان : بصح انا منحبش لي يهدر معايا هكاك
قصي : بصح قتلك مرانيش حاب نهدر مورالي كان عيان و نتي محبيتيش تطلقي
ليليان : اممم
قصي : مدام تصافينا انا مقعدلي غير نقولك تصبحي بخير
ليليان : تصبح بخير راجلي
ضحك و ناض .... هو مع خرج هي نطقت
ليليان : تسقم السيد تسق ....
سكتت و وقفت بزربة
ليليان : انا مكانش علبالي بلي راح يدير هكا ..... و انا لي قطعتلو حوايجو
قاعدة تاكل فظفارتيها و تروح و جي فالشمبرة .. ..... لي داها لي جابها
ليليان : اليوم يقتلني ..... اليوم يقتلني
راحت غلقت الباب بالمفتاح
ليليان : باينة مشافهمش .... سووور مكانش حسو .... اكذبي ليليان متقوليش بلي نتي لي قطعتيهم
راحت ترقد و قعدت غير تتقلب النعاس حلف ميجيها
لحق الصباح و ناضت دوشت طلقت شعرها و لبست جبتها و هبطت ..... قعدت فالطابلة و بداو يهبطو كي العادة واحد بواحد و هي غير تستنى فيه يهبط ..... حتى ترعدت فبلاصتها وقت سمعتو يعيط
قصي : رققققية
........
رقية : ...... انعم مسيو
قصي : الحوايج لي مديتهملك البارح وعلاش راهم مقطعين
رقية : اههه كيفاش .... معلباليش انا كيما مديتهملي حطيتهم مسيو
زهرة : اهاه وليدي شكون راح يدخل لشمبرتك و يقطعلك حوايجك
بتول : بعدااا هذا كاش طفل صغير دارها ولا واحد ماشي فعقلو
ليليان ( تمتم ) : انا ماشي فعقلي سما
هي لي كانت جامدة فبلاصتها و مخبية راسها بشعرها عليه
اسمهان : عيطو للخدامين نسقسيوهم
ضيق عينيه و هو يخزر فيها
قصي : منبعد انا نفريها يما
شد بلاصتو بالسكات و هي كيفكيف قعدت ساكتة
اسمهان : بصح وليدي خلي .......
قصي : خلاص يما منبعد انا نشوف سيبون
كملت هديك القهوة غير بسيف منبعد تسرسبت بلعقل و طلعت ... هي مع لحقت للشمبرة تاعها حتى حكمها
قصي : وين راكي هاربة
جبدها و داها لشمبرتو و خبط الباب
قصي : نتي درتي هكا ( و ورالها الحوايج )
ليليان : شكون انا .... جامي ... وعلاش نديرلك هكاك
قصي : حبسي متكذبي
ليليان : قتلك ماشي انا وعلاش راك شاك فيا اصلا
قصي : مرانيش شاك راني سوور ..... ( بدا يعيط ) بارسكو لعب الذر ميخرج غير من راسك راكي في عقلك نتي قولي
زيرت على يدها و قالتلو
ليليان : ايه انا ..... انا درتها .... درتها .... كنت بزاف مقلقة منك .... و زيد نتا لي هدرت معايا هكاك
قصي : انا مرانيش صاحبك ولا وليدك باش تلعبي معاه لعب تاع دراري .... لالة تقلقت قطعت الحوايج غدوة تكسر الدار ماشي محال تلحق للعباد
ليليان : لالا بعيد الشر
قصي : راكي تشوفي هاد الحوايج كيما راهم كل حاجة فسدتيها نجي لعشية نلقاك شريتي منها و رجعتيها فهمتي
أنت تقرأ
تزوجت منقذي _ باللهجة الجزائرية _
Romanceالكرونيك هادي تحكي على ليليان و قصي لي حتمت عليهم الظروف يتزوجوا مع عدة احداث و مشاكل فالكرو ملاحظة : الحكاية من وحي الخيال معندها حتى علاقة بالواقع و هي من تاليفي
