و هكذا جازوا اليامات .... خمس ايام على اخر حدث جاز ....... و هاوليك ابراهيم قاعد فالصالون و ملك تقيسلو فلاطونسيون لي طلعتلو مور لي سمعو وقت خرج للمارشي بيانسور على ليليان و هي لي ولات سيرة الدوار فالمارشيات و القهاوي و بين الجارات لي غاضتو و لي يقطع فيها و لي يستشفى فيها و خلي و خلي .... هنا هكا اصغر خبر يمشي بالزربة بين الناس و زيد هنا جايين محافظيين بزاف سما غير لي يرمي سمو على باباها حتى ولى ميتحملش الهدرة الزايدة لي يسمع فيها كل يوم
جميلة : اههه يا خويا واش صرا فيك اههه
فريد : عمي تحب نجيبلك كاش حاجة
ابراهيم : راني مليح قلتلكم
دخلت تمشي بلعقل و يدها لي مزيرة بيها على روبتها
ليليان : .... بابا راك مليح
دور راسو و جميلة خزرت فيها
جميلة : استغفر الله .... متفهميش نتي روحي يا واحد الرخيسة متخليناش نشوفوك
ابراهيم : جميلة
جميلة : وشنو غلطت
خزرت فيها ببرود و قالتلها
ليليان : نتي كنتي تحوسي على السبة هووب راهي جاتك برجليها ياك
جميلة : و مزالو فمك مشرك فبلاصة ما تطلبي منا السماح جاية تصححي في وجهك
ليليان : البنادم الوحيد لي يستاهل نطلب منو السماح بابا نتي وعلاش ... و زيد انا ما غلطتش باش نطلب السماح ..... بابا مدام راك كل يوم تتعذب بسبتي سمحلي نروح .... خليني نروح و نبعد نوعدكم متزيدوش تشوفوا وجهي كامل
خزر فيها ابراهيم خزرة تقتل حتى هبطت راسها
ابراهيم : راح نشوف اذا لقيت شاري نبيع الدار و نروحو لولاية واحد اخرى
جميلة : مليح تبعد على دارك و ناسك على جال هادي
ابراهيم : جميلة خلاص راهي لاحقتلي هنا خلااص
فريد : عمي انا عندي ليك الحل
ليليان غمضت عينيها و تمتمت
ليليان : راهو نطق le super héro
فريد : انا قابل نتزوج بنتك ... و نسترها و نغطيو على الفضيحة لي صرات
جميلة لي ضربت على فخادها
جميلة : يا يما على وليد خويا وشبيك هبببلت خلاصو البنات باش تدي وحدة كيما هادي .... فريد كامل يدي مسودة السعد تاع ليليان مليح
ليليان : وعلاش شكون راح يدي ايه حقا يدي نتاجاتك
جميلة : اههه يا قليلة التربية لا والديك لي جابوك للدنيا ولا جداتك قدرو يربيوك و مع لخر بعتوك للمسكين تاع خويا لي حصل فيك
ليليان : وقت الواحد ميكونش مربي ميستناش الناس يكونوا مربيين معاه معندكش الحق تهدري على ناس راهم تحت التراب هكذا فهمتي .... و انا لوكان يخيروني بين الموت و لا الزواج بهذا نخير الموت خيرلي
جميلة : ايه قوليلي وقيلا راكي تستناي فالسبع تاعك يجي يعاونك ههه سيد ممبا محوسش عليك
ابراهيم : يا تسكتو يا انا نوض
فريد : عمي خمم فلي قولتهولك
جميلة : حاب تقتل يماك ياك
ابراهيم : فريد .... مراحش ننسى لي درتوه نتا و يماك و كيفاش بشعتو بالطفلة لكامل الدوار بلاك تقول كي راني ساكت معنتها نسيت
فريد : عمي ياك قتلك يما لي ....
ابراهيم : خلاص خلاص
ليليان لي رفدت روحها و راحت للكوزينة .... مسحت دموعها لي طاحو و حطت كاس ما تشربو مع هي واقفة حتى شافت واحد الكارت مرمي فالزبل لي قدامها حشاكم .... رفدتو حتى لقات فيه اسم قصي °°°°°°
ليليان : هذا هو .... قالو اسمو قصي .....
شدت الكارت و طلعت للشمبرة تاعها
ليليان : انا مراحش نسكت و نخليهم يعايرو فيا كيما حبو
كتبت نيميرو و قعدت تخزر فيه ترددت بزاف اذا تعيط ولا لالا .... فالاخر عيطت
.........
عند البطل تاعنا لي كان فالبيرو تاعو خدام بحكم عندهم شركة للبناء ..... شوية و صونا تليفونو
قصي : شكون هذا
رفدو و ريبوندا
قصي : الو ..... الو شكون معايا
ليليان : ....... قصي °°°°°°
قصي : انعم ايه
ليليان : ..... انا بنت ابراهيم .... الطفلة لي كنت عاونتها
قصي : ..... ايه
ليليان : ......
قصي : نقدر نعرف واش تسحقي
ليليان : ...... يعني نتا عاونتني و وقفت معايا و فالاخر حطيتك فموقف عيان ..... بصح مقعدلي حتى حل .... حابتك تعاوني .... اذا تقدر ..... اذا تقدر جي تهدر مع بابا و تفهمو .... لي هنا كامل حسبتلهم بلي هربت معاك و سيرتي ولات على كل لسان .... و
قصي : شوفي ختي .... بلاك صح راكي فمشاكل كبار بصح انا تاني عندي مشاكل و شغالات مراحش نقدر نزيد على روحي مشاكل كثر
ليليان : فهمت ..... عندك الحق .... سمحلي بزاف اذا قلقتك معايا ....
دورت راسها على صوت الباب لي تفتح حتى وقفت
ليليان : واش راك دير هنا اخرج
غلق الباب بالمفتاح و دخل
ليليان : اخرج ولا نبدا نعيط
فريد : وشبيك همجية هكذا بعقلك
قعد فوق البونك مرجع راسو للور و يضحك
فريد : ههه قريب تولي مرتي علبالك
ليليان : احلام العصر تاع فريد ليليان ولات مرتو شحال تتخايل بسلامتك
فريد : لالا وشبيك انا جبتلك واشراهم يهدرو ياك تعرفني نعرف نقنع الناس و هدرت مع بابا و دوكا راهم يتشاورو
قعد يضحك بهستيرية شغل واحد مريض و هي الما هبطلها للركايب كيما يقولوا
ليليان : اخرج برا و كمل تخايل ... براااا قتلك
فريد : خلاص بعقلك ههه متتقلقيش مرتي لعزيزة هههه
هو مع فتح الباب قابلتو جميلة لي خزرت فيهم خزرة تخوف .... هو حنحن و راح و جميلة دخلت ليها
جميلة : دوكا درتي لوليد خويا ياك درتي درتي و قنعتيه يتزوجك
ليليان : قوليلي برك واش فيه يصلح باش نتزوج بيه يرحم باباك
جميلة : اسمعي
غلقت الباب و دخلت عنها شدتها من الشعر تنتف فيها
جميلة : عندك الزهر لي راهو حاب يتزوجك مفهمتش واش دايرتلو سينون لوكان راني رميتك هذا شحال فهمتي
طلقتها فالارض و خرجت
ليليان لي غمضت عينيها شادة دموعها
ليليان : متبكيش ميستاهلوش دموعك
أنت تقرأ
تزوجت منقذي _ باللهجة الجزائرية _
Romanceالكرونيك هادي تحكي على ليليان و قصي لي حتمت عليهم الظروف يتزوجوا مع عدة احداث و مشاكل فالكرو ملاحظة : الحكاية من وحي الخيال معندها حتى علاقة بالواقع و هي من تاليفي
