تزوجت منقذي _ باللهجة الجزائرية _

بارت 21

البنات لليوم وجدتلكم 3 حلقات ان شاء الله ، و فالحلقة 3 راح تتعرفو على يمات بطلتنا سوو مدابيكم تتفاعلو باش نحطهملكم بالخف و نزيد نحطلكم 3 حلقات سينون نحط حلقتين برك كيما موالفة ... قراءة ممتعة
💜

فتحت عينيها وقت دخل الضوء تاع شميسة لعينيها
حكت عينيها و تقعدت .... قعدت تخزر فالشمبرة .... تفكرت وقت جاو البارح لهنا للدار لي كانت قعدت فيها فالاول .... خرجت للصالون لقاتو راقد على الفوتاي .... سقمتلو الغطا و جوزت يدها على شعرو .... شوية و راحت للسالدوبان غسلت وجهها و قعدت تشوف فانعكاسها فالمراية .... وجهها لي كان مصفار و عينيها منفخين بالدموع ..... رجعت للشمبرة و غلقت الباب .... قعدت فوق البونك و قاعدة تخزر فالتليفون شحال منبعد رفدتو و عيطت لباباها .... ثواني كان ريبوندا

ابراهيم : الو ليليان ..... خير بنتي
ليليان : راح نسقسيك حاجة و متكذبش عليا
ابراهيم : خير
ليليان : ..... شكون هي ماما
ابراهيم : كيفاش شكون مفهمتكش واش راكي تهدري
ليليان : ماشي سمية رباتني برك و لي ولدتني خلاتني
ابراهيم : منين جبتي هاد الهدرة
ليليان : مدام راك تهدر هكذا يعني صح .... وعلاش كذبتو عليا قول
ابراهيم : ..... ليليان متحكميش علينا بلا ما تسمعي
ليليان : 24 سنة و نتوما تشوفو فيا و تكذبو فوجهي و نوورمال ....
ابراهيم : ليليان
ليليان : منسحقكمش تزيدو تعيطو و تحوسو عليا

كوبات و رمات تليفونها فوق البونك

..........

عند قصي لي كان راقد حتى صونا تليفونو .... تفاطن و رفدو

قصي : الو
اسمهان : قصي وين راك وليدي ملبارح و حنا نعيطو حتى لانيفارسار و مجيتش
قصي : يما راني فداري .... منبعد و نجيو
اسمهان : بصح و ....
قصي : يما هداوين نضت راني مدوخ و نتي طايحة عليا بال les questions

كوبا و حط التليفون قدامو ..... مسح على وجهو و ناض غسل و راح لعندها طبطب و دخل لقاها قاعدة

قصي : نضتي
ليليان : امممم

شدلها وجهها بيدو

قصي : راكي مليحة
ليليان : امممم .... نروحو ؟
قصي : كيما تحبي
ليليان : .... نروحو خير
قصي : داكور

........

فالطونوبيل ، كان غير السكات حتى تقطع وقت صونا تليفون ليليان كانت ملك .... شافت فيه منبعد طفاتو

قصي : مراحش تريبوندي
ليليان : ... مرانيش حابة نهدر معاهم
قصي : و ختك واش دارتلك
ليليان : ... هكا قصي مراني حابة نهدر مع حتى واحد فيهم
قصي : كيما تحبي

وصلو للفيلا و طلعو لشمبرة ليليان ... حطت ساكها و دارت عندو

ليليان : صحا .... على وقفتك معايا
قصي : بلا مزية ليليان