သီးသန့်အချစ် || ဘာသာပြန် ||『 Completed』

အခန်း - ၇၀

『Unicode』

မနက်ခင်းစောစောအချိန် ၊ နေရောင်က မျက်ခွံပေါ်သို့ ထိမှန်လာခိုက် ရှရှီးအိုက်မှာ တံခါးဘဲလ်ကြောင့်နိုးလာခဲ့သည်။ သူမျက်လုံးတွေပွတ်ရင်း ဖုန်းကို စမ်းကာ အချိန်ကြည့်ရန် ကြိုးစားလိုက်သော်လည်း ဖုန်းက ဘက်ထရီကုန်နေတာကို တွေ့လိုက်ရ​၏။

မနေ့ညက ... သူ ကျန်းလျိုရှန်းက ဗွီဒီယိုကောလ်ခေါ်ခဲ့တာကို ခပ်ရေးရေးမှတ်မိသော်လည်း သူဘာတွေပြောခဲ့သလဲဆိုတာကို လုံးဝမမှတ်မိပါချေ။

ရှရှီးအိုက် ထထိုင်လိုက်ပြီး သမ်းဝေရင်း အောက်ငုံ့ကြည့်မိရာ သူဟာ လုံးဝတွန့်ကြေနေသည့် မနေ့ကရှပ်အင်္ကျီကို ဝတ်ထားဆဲဖြစ်ကြောင်း သိလိုက်ရသည်။ သူ့ ဆံပင်တွေမှာလည်း ရှုပ်ပွနေလိမ့်မည်ဖြစ်သည့်တိုင် တံခါးဘဲလ် အရေးတကြီးမြည်နေသဖြင့် သူ့အဖို့ သပ်သပ်ရပ်ရပ်လုပ်ချိန်မရတော့​။ သူ ရွေးစရာမရှိပဲ ဖိနပ်ပါးလေးစီး၍ အပေါက်ဝသို့အလျင်စလိုပြေးသွားကြည့်ရာ မော်နီတာစခရင်ပေါ်မှာ ရွှီထုံကို တွေ့လိုက်ရသဖြင့် ယုံကြည်မှုရှိရှိနှင့် တံခါးဖွင့်ပေးလိုက်တော့သည်။

ရွှီထုံက အဆောတလျင်ဖြစ်နေဟန်ပေါ်ပြီး တံခါးမှ မဝင်လာသေးခင် မေး​​၏ : " ဘာလို့ နင့်ဖုန်းက ပိတ်ထားရတာလဲ ? "

" မပိတ်ပါဘူး အဟွတ် အဟွတ် ! " ရှရှီးအိုက်မှာ လည်ချောင်းက မသက်မသာဖြစ်လာပြီး ဘယ်အချိန်ကအအေးမိသွားသလဲပင် မသိတော့ : " ဘက်ထရီကုန်သွားလို့ပါ။ နင်က ဘာလိုလို့လဲ ? "

" မနေ့ညက အိပ်လို့ပျော်ရဲ့လားလို့ ကြည့်ရတာ " ရွှီထုံက ပြောရင်း သူမဖုန်းကို ထုတ်လိုက်ပြီး : " ပြီးတော့ အင်တာနက်မှာ နင့်အကြောင်း သွားပုတ်လေလွင့်မှတ်ချက်တွေရှိနေတယ်။ အကြမ်းအားဖြင့်တော့ ငါဖိထားပြီးပေမယ့် ငါနင့်ကိုသတိပေးရတော့မယ်။ လတ်တလော ဂရုစိုက်ဦး တချို့က နင့်ကို ပစ်မှတ်ထားနေတယ်။ "

ရှရှီးအိုက်မှာ သူမ​၏ အမူအရာမှ အခြေအနေသည် အနည်းငယ် ပြင်းထန်နေကြောင်း အကဲဖြတ်လိုက်ရသည်။ ထို့ကြောင့်သူ ချက်ချင်းဖုန်းကို ယူ၍ ရွှီထုံ​၏ စခရင်ရှော့တွေကို ယူကြည့်လိုက်​၏။