သီးသန့်အချစ် || ဘာသာပြန် ||『 Completed』

အချပ်ပို ၁ : အပိုင်း ၂

《အချပ်ပို ( ၁ ) : မျှော်လင့်ချက်လမ်းတစ်လျှောက် ( ၂ )》

နှစ်သစ်ကူးပြီးတာနှင့် အလုပ်အသစ် တစ်သုတ်က ပြန်လည်ရောက်ရှိလာချေပြီ။ နှစ်သစ်ကူးပြီးသော် ကျန်းလျိုရှန်းက ဒရာမာအသစ်တစ်ပုဒ် ရိုက်ကူးရမည်ပင်။ အချိန်ဇယားတွေက အလွန်တိုက်နေသော်လည်း သူဟာ 《အနောက်ဖက်လမ်းတစ်လျှောက်》အတွဲ ၂ ကို ရိုက်ကူးနိူင်ရန် အချိန်ဇယားပြင်ထားဆဲဖြစ်သည်။ ရှရှီးအိုက်က " ထားလိုက်တော့ ၊ ကျွန်တော်တို့ မသွားတော့ဘူး " ဟု ကြိမ်ဖန်များစွာ ပြောသော်လည်း အကုန်လုံးကို ပယ်ချခံရလေ​၏။

ဘယ်လောက်ပဲ ကျန်းလျိုရှန်းက သူ့ကို အလိုလိုက်ပါစေ ၊ အနိုင်ကျင့်ပါစေ ၊ လွှမ်းမိုးနိုင်သည့် အရိပ်အယောင်စွန်းစမျှတော့ ရှိနေခဲ့သည်သာ။

ဗင်းနစ် ၊ ဇူးရစ်ချ် ၊ ဗန်ကူးဗားနှင့် ဟော့ကိုင်းဒိုဆိုပြီး မြို့လေးမြို့ ပြောင်းလိုက်တာကလွဲလျှင် အတွဲ ၂​၏ ပုံစံက အတွဲ၁နှင့်တူတူပင်။ ဧည့်သည်တွေလဲ ပြောင်းသွားပါ​၏။ သူတို့နှစ်ယောက်အပြင် စူးကျစ်နှင့် ကျိူးယွီရွှမ်းတို့လဲ ရှိုးကိုပြန်လာခဲ့သည်။ ထောင်ရှောင်ထောင်းကတော့ ဖျော်ဖြေပွဲကျင်းပနေတာကြောင့် အချိန်မရခဲ့။ ယိုချင်အတွက်ကတော့ ပရိုဂရမ်အဖွဲ့က ရှရှီးအိုက်ကို ရွေးလိုက်သဖြင့် သိသိသာသာပဲ သူပါဝင်ဖို့ မဖြစ်နိုင်တော့ပါချေ။

ထို့ကြောင့် ဧည့်သည်အသစ် နှစ်ယောက်ကို ရွေးချယ်ခဲ့​၏ : တစ်ယောက်က လက်ရှိ ရေပန်းစားနေသော တက်သစ်စ အိုင်ဒေါလ်လေး လင်းချန်နှင့် နောက်တစ်ယောက်ကတော့ ဂန္တဝင်ရုပ်ရှင်နှင့် ရုပ်မြင်သံကြားဒရာမာများစွာမှာ ပါဝင်ခဲ့သော ဝါရင့်မင်းသမီးကြီး ထန်မုန့်တို့ပင်။

လင်းချန်ရောက်လာသည်နှင့် ရှရှီးအိုက်က မူလခြောက်ယောက်အဖွဲ့မှာ အငယ်ဆုံး မဟုတ်တော့ပေ။ သူတို့ကသက်တူရွယ်တူလောက်ဖြစ်ပြီး လင်းချန်က ကိုယ်နှုတ်အမူအရာကောင်းမွန်ကာ တက်ကြွသူဖြစ်​၏။ သူတို့တွေ ဗင်းနစ်ကိုသွားတဲ့ လေယာဉ်ပေါ်မှာ စကားပြောရင်းနှင့်ပဲ အချင်းချင်း ရင်းနှီးသွားခဲ့ကြသည်။