#وجودك_أمان🤍
الحلقة [8]
يوم الاربعاء
جمال : ايوه ناصر
ناصر : كيف حالك جمال
جمال : الله يسلمك خيي كيف حالك أنت و الحاج و الشباب
ناصر : الحمدلله كويسين قتلك
جمال : نسمع فيك
ناصر : الحاجة جايا يوم الخميس كيف ما اتفقنا قلت نقولك جايا تخطب للخويا بالقاسم و الموضوع إن الصبايا شافن البنت بعد عرفناها شوركم توكلنا قلنا نجوكم
جمال سكت شويا : لا مرحبتين بيكم تمام ، قول للخوك يجي حتي هو نقمعز معاه الخميس و الباقي ساهل
ناصر : إن شاء الله ربي يتمم ع الخير
جمال : إن شاء الله
ناصر : سلملي ع أكرم واجد بالله دزلي رقمه و لا تصغر .
جمال ضحك : يوصل سلامك إن شاء الله توا اندزه لك توا
........
يوم الخميس روحت من العيادة بدري طول للمطبخ درت أربع أنواع مالح وداد جت فرحانه جايبه الحلو و تضم في حوش تمسح و تسيق أنا استغرب بس فتتها قلت منها تساعد فينا
وداد تغمز و تهمس : خلاص ع خشتهم عدي كيف ما قلتلك
آمال مبتسمه : شن رايك نلبس الفستان أسود
وداد : لا شن أسود يقولوا خاشه علينا بالأسود
فتحية : تي تخرفن من روسكن أنتن من قاللكن خطّاب بس جمال قال واحد نعرفه جايب هله يتعرفوا علينا
وداد : أكيد يبي يقولوا هكي يا ماما عدي يا آمال وتي روحك ما تفكريش في الباقي
أنا كملت الحوسه عديت غسلت مشطت شعري لبست بنطلون و قميص عاديات نزلت لقيتهم جايين خشيت للمطبخ حطيت القهوة ع النار
آمال : هيا بالقهوة
وداد توتي في الحلو و فرحانه : شوفي الناس الذوق حتي جيبتهم تفرق ع الغير ما شاء الله " كشخت عليا " ربي يهنيك يا خيتي مرة هذه جاك المصوقر
أنا نصب في القهوة : آمال سقمي شعرك
آمال سقماته طلعت بالقهوة و الحلو معاها وداد و أنا قعدت نرتب في حاجات العصير قمعزت
نزهه : سامحونا ع التعب
فتحية : تعبكم راحة ريت هالحاجة الكبيرة
آمال ابتسمت : تفضلي عميمه
خيرية : يزيد فضلك
آمال : صحه ، تفضلي
نزهه : يزيد فضلك
عفاف تشرب في القهوه : كيف حال رحمه يا فتحية
نزهه ابتسمت
فتحية : الله يسلمك كويسة
آمال قدمت ع أمها و سمية و طلعت
خيرية : و الله يا حاجة شن نقولك الحق راه نحن سألنا عليكم و مالقينا عليكم الا الصيت الطيب جايين مع بنت بنت عمتكم عفاف تقعد قريبة شايبي الحق بعد قلنا نبوا نخطبوا لبالقاسم بنت حمد قالت خوذوها و أنتم مغمضين تعرفكم هي عاد
فتحية فرحانه مبتسمه : بارك الله فيك و الصيت يقعد أطول من العمر و نحن نتشرفوا بيكم مرحبتين
نزهه و خيرية : الله يسلمك
خيرية : نحن جاين نخطبوا في الدكتورة رحمه كانت عندها نزهه مريضه
فتحية ابتسمت صبت : توا نكلمها و نجي بعد اذنكن
خيرية فرحانه : تفضلي
فتحية طلعت جتنا في المطبخ : رحمه سقمي روحك و تعالي ورايا الناس جايا تخطب فيك .
أنا و آمال انصدمنا
وداد تعصبت : شن تنخطب رحمه قبل و آمال كنها
فتحية تفنص : نقصي حسك يا وسخه الناس برا راه تسمع فينا " بحتت فيا " رحمه ألحقيني
أنا لحقتها طول عشان وداد ما تهزبنيش
فتحية برمت عليا سقمتلي شعري ابتسمت : هي
أنا خذيت نفس و خشيت ابتسمت شوي : السلام عليكم
نزهه و خيرية و عفاف صبن : عليكم السلام
أنا قدمت : أهلين
خيرية حضنتني : مرحبتين بكنتي
نزهه ضحكت : بشويش عالبنت يا ماما خليه ينولد و نسموه
خيرية : مش شورك إنت
نزهه تسلم عليا : كيف حالك دكتورة
أنا : الحمدلله كيف حالك إنت
نزهه : الحمدلله
أنا : خير يا عميمه عفاف
عفاف تسلم عليا : مرحبتين ببنت الغالية
أنا ابتسمت
خيرية : تعالي قمعزي جنبي
أنا قمعزت بحتت في سمية لقيتها مبتسمه و نزهه كل مرة تحكي و تشكر فيا و على تصبايتي معاها و فتحية مبتسمه و مفتخرة بيا قعدت حتي هيا تشكر فيا سمية حكت أني كنت نعالج فيها و حامل شوي و صبيت قعدنا نكملوا في العزومه
.......
جمال : عليكم سلام تفضل
بالقاسم يكح خش : بسم الله
قمعز بكل ثقة فارد ظهره
جمال : كيف حالك كيف حال عمي صالح
بالقاسم : الحمدلله بخير
ماهر خش بالقهوة : تفضل
بالقاسم خذا قهوه : تسلم لا منور و الله الحلو ما عنديش عليه
ماهر : ههههه كيف صار
بالقاسم ابتسم
جمال خذا قهوة : مازالتو تسكنوا في ####
بالقاسم : أها مازالنا خوتي الأثنين الكبار طلعوا و أنا حوشي في نفس السور مع هلي
جمال : ما شاء الله ربي يبارك شن تشتغل أنت
بالقاسم حط الفنجال : أنا مهندس معماري و عندي شركة عقارات الرئيسية في طرابلس و عندي فرع هنا في بنغازي نمشي بين طرابلس و بنغازي
جمال : ما شاء الله
........
أنا نزهه كلمتني اخرى طلعت
خيرية : يا حنه هذا بالقاسم الثالث في خوته الأثنين الكبار مجوزتهم عندي الصغير مازال قلتله نخطبوا للخيك بالقاسم قبل طول في الجيزة شويا عشان شروطه يبها بنت هادية ما يحب المشاكل بكل هو واعر شوي بس حن الدنيا في وليدي هذا دون خيينا حنين ع خياته و عليا و على بوه ، بعد نزهه حكتلنا علي رحمه سألنا عليكم و طلع شايبي يعرف المرحوم الله يرحمه و عويلي عرفوا عويلك قالوا طاح وين استراح الحق شهادة الناس فيكم كيف الذهب و كلام بنتي نزهه فرحني و الحاج فرح بيكم قلنا نجوكم نتوكلوا على الله
فتحية : مرحبتين بيكم ربي يخليهم لك العويل عزوة
خيرية : الله يسلمك و يخليلك اعويلتك نحن جاينكم هي الجية رانا موافقين لنا فترة طارحين الموضوع نازلين قرمه بالخير فيكم ههههه
فتحية و عفاف ضحكن
خيرية : بعد تردوا علينا بالموافقة إن شاء الله يجوا الرجاله للدفع بعدها نتفقوا ع البيان إن شاء الله
فتحية : إن شاء الله خير إن شاء الله
خيرية : كان توقضي هالشباب يخلوها النظرة الشرعية لهم بالمرة هو أكيد وصل
فتحية صبت : حاضر هي
نزهه توشوشلي : شوفي يارحمه خويا بالقاسم صح واعر بس حنون الحق و كريم و اللي في يده مش له حالته المادية متريحه و متعلم هو مهندس مواليد 75 حوشه شبه واتي هو مش طالب منك شي توا تطلعي و تعرفي شروطه ما تخافيش طيب بكل راه ما تقوليش تشكر في خوها هههههه بس و الله بالقاسم معزته خاصة
أنا ابتسمت مرتبكه الأمور تمشي بسرعه قعدت نفكر و بصراحه ترددت يعني أكبر مني ب 12 سنة و يعني كيف واعر زعما نفس جمال يارب انر لي حياتي
طلعت فتحية كلمت جمال
جمال : وصل
فتحية طلعت و خشت للمطبخ : جمال الحاجة خيرية قالت النظرة الشرعية نخلوها اليوم و خلاص دابينه جاء العريس
جمال يبحت فيا : شويا بس نتفاهموا معاه
فتحية : باهي بعد تكملوا مع راجل قول للخيتك عشان تطلع
جمال هز رأسه : شوي و يجي ماهر عطوها له
آمال : باه
جمال طلع طلع ماهر
........
ماهر : كلمي رحمه
آمال توتي في العصير
وداد : ماهر شن شكله العريس
ماهر : كيف شن شكله راجل كيف الرجاله
وداد : قصدي شن نظرتك له من أسلوبه و حركاته كويس و لا مشي حالك
ماهر : صراحه الراجل شخصية تحسيه محنك في كلامه مرتب أسلوبه راقي
آمال طلعت
وداد بشويش : خزي هالحيوانه إن شاء الله ما يكون نصيبها
أنا جيت لابسه عباية و وشاح
ماهر : بلا منه العصير خليه شويا هيا إنت
أنا طلعت وراه كنت متحشمه بكل عيوني في الوطى خشيت للمربوعة
بالقاسم صبي
أنا من التوتر حتي السلام نسيته
ماهر : سلمي ع الراجل هههههه
بالقاسم مد يده : و عليكم السلام
أنا مارفعتش عيني مديت يدي
ماهر قمعز : قمعزوا
قمعزنا
بالقاسم : كيف حالك
أنا مطبسه راسي متوترة : الحمدلله
بالقاسم : نعرفك بروحي و لا هلي حكولك عليا
أنا : حكولي
بالقاسم : تمام نختصروا الوقت و نخشوا ع الشروط طول
ماهر صبي : نستأذن نخليكم ع راحتكم
بالقاسم : تفضل
أنا زدت خفت و ارتبكت
ماهر طلع
بالقاسم : شروطي واضحات كان صار نصيب مانبيش منك شي إلا شروطي يتنفذن تمام
أنا : إن شاء الله
بالقاسم رقتله عشان ما بحتش فيه بكل و لا هو شاف وجهي
أنا مشبكة ايديا الأثنين في بعضهن مطبسه راسي
بالقاسم ضغط ع سنونه : أول حاجة و أهم حاجة عندي هلي باتي و أمي في عيونك بما إن أنا نسافر واجد عشان الشركة سفري بين طرابلس و بنغازي ياخذ في فترة ف حتكون حياتك مع هلي أكثر مني و خواتي حتي هنا ما نبيش ناخذ وحده أتعبهم و تعبني أنا طبعي ما نحبش المشاكل و لا قيل و قال بذات كلام الصبايا ثاني حاجة ما نحبش العناد كلمتي ما تكررش و لا نحب كلمتي تنكسر مرة وحده نقول لا معناها لا كلمتي وحده ثالث حاجة و أخيرا أي حاجة تصير بينا ما تطلعش من الحوش
أنا ساكتة نسمع ما رفعتش عيني نهائي
بالقاسم : ها شنو
ماهر خش ماسك سفرة العصير : هي تفضل
بالقاسم خذا : تسلم
ماهر قمعز : شن اتفقتوا
بالقاسم بحت فيا : عندك شروط
أنا بصوت واضح شوي : شروطي من شروط خوتي ماعنديش كلام بعد كلامهم
بالقاسم عجبه الكلام : نرجى الموافقة على شروطي بعد موافقة هلك إن شاء الله
ماهر : رحمه ارفعي راسك
بالقاسم ركز فيا أكثر
أنا رفعت شوي لمحته و نزلت راسي طول قلبي يبي يوقف : إن شاء الله
بالقاسم يبحت فيا و يدقق
جمال خش قمعز
أنا صبيت : نستأذن
بالقاسم : إذنك معاك
أنا طلعت
جمال : أنت عارف إن عندها خوت برا ليبيا
بالقاسم : اها عارف
جمال : وكانت مخطوبه من قبل للولد عمها ماصارش نصيب فسخت قلت نعطيك علم بيش نبقوا واضحين
بالقاسم : لا تمام عندي علم
جمال : تمام نشاوروا إن شاء الله و نردوا عليكم رقم ناصر عندي
بالقاسم صبي : إن شاء الله " بحت في ماهر " خوذلنا طريق
جمال و ماهر صبوا : هي تفضل
طلعوا و شوي هله طلعو وراه
......
وداد تكشخ عليا و تمتم
آمال مبتسمه : إن شاء الله ربي يتمملك ع الخير
فتحية : مازال نشاور خوتها و أكرم حتي هو
وداد تهزب : أكرم ماعندش علم
فتحية : جمال قايله مايدس عليه في شي توا طالع يرن عليه
سمية : ربي يكمل عليك بالخير يارب
أنا : تسلمي
وداد صبت تنفتر صبيت و ركبت للدار غيرت دبشي و قعزت نفكر
أنا : كنهم هما مستعجلين هكي أنا نبي نفكر هل هو يصلح بيا و إلا لا باه و خوتي شن رأيهم اسمعي يارحمه خليك حقانيه أول ما خشتي للمربوعة تريحتي رغم الخوف حسيت #بالأمان باهي حتي كان لازم نفكر أمه و أخته فرحانات بيا بكل "ابتسمت" مش نفس مرات عمو فوزي هيا وبناتها ااااه ياربي يسر لي امري
.......
أكرم : باهي وشن قالك
جمال : ماقالش شي الراجل قلتله نشاوره و نردوا عليكم
أكرم : تمام توا بكرا نرن ع الحسن و الحسين و نقولك شن يصير
جمال : اسمع بيني و بينك لنقاني الراجل ما شاء الله عليه مناسب لرحمه
اكرم : وسعلي بالك فكني من الزر خلينا نتفاهموا و أنت ابدأ أسأل عليه في شغله في شارعهم إن شاء الله حتي عند أصحابه جيبلي معلومات تامه خلال شهر
جمال : تم إن شاء الله هي تصبح على خير
أكرم : قدامك الخير
.......
سمية : قتلك منحرجة رحمه ام الراجل تشكر غير فيها أن تصبايتها مع بنتها
جمال : أها باهي الحمدلله أهم حاجة السمعه الطيبه
سمية : ربي يكمل عليها
جمال يتلصق في سمية : حبيبي
سمية ابتسمت : اممم
جمال : شنو مازال ولا كيف مرايف أنا
سمية : الصراحه مش عارفه حبيبي
جمال : باهي تعالي
سمية : لا جمال البيبي
جمال : ماتخافيش والله ع خفيف هههههههه
سمية ضحكت بدلع : انباه
جمال نزل عليها وراحو في خبر كان....
........
أنا : صباح الخير يا نوزي
نيروز : صباح النور وين يا حنه لا ترني لا تسألي كل ما نحكي معاك مش فاضية تقول ما حملت الا هالسمية
أنا ضحكت : حرام عليك بعدين قعدت معايا كويسه
نيروز : ما قدا وجهه كان مازال كيف وداد
أنا : خلاص توا فوتيهن رنيت نبي نحكيلك
نيروز : احكي نسمع فيك سراج طلع
أنا قعدت نحكليلها ع مواقف نزهه ع جيت هلها و على بالقاسم : فاهمتيني متردد شوي ع العمر وكذا
نيروز تمت تزغرت
أنا : اسسكتي طيح و الله سعدك
نيروز : قتلك يجيك سيد الرجاله أنا و إلا لا اهو مهندس و عاقل جاي من الباب و إن شاء الله يطلع كيف ما تبي حن الدنيا فيه يا الله يقعد أحن حتي من سيرجو " تنهدت "
أنا ضحكت : الله الله وين ع الحب
نيروز : نشهد بالله أنه شايلني ع كفوف راحه صح هله واعرين في طبعهم و نظامهم بس هو غير توا تجوزي تحسي بيا بعد نقعد مع سراج و الله نبحت في عيونه بس نتريح و نذوب بعد يلفني يحضني
أنا ابتسمت : ربي يخليكم لبعضكم إن شاء الله
نيروز : إن شاء الله المهم خلينا من سراجكان نحكي عليه معش نسكت هههههه خلينا توا في بالقاسم يانعليا حتي اسمه فيه رجوله امالا شكله كيف
أنا قعدت نذكر فيه : عيونه مش صغار و مش كبار و سود رموشه واجد لاحضتهن هذينا عشان جت عيني في عينه و شعره واجد لحيته مساويها و شكله طويل و عريض شوي تعرفي مش هذك التدقيق مابحتش واجد كنت خايفة
نيروز : أكيد هو مفصفصك
أنا : ماعندي ما اندير خلاص توا خليني نكمل شغلي و نرد عليك
نيروز : خزي نبي نهدرز
أنا : بعد نفضي توا نرن عليك نقولك
نيروز : تمام باي
........
أكرم : ها شن رأيكم أنتم
الحسن : اسألو عليه كان كويس محترم اسألها هيا كان موافقه توكل و كان لا ارفض بس ماتزروش عليها خليها براحتها
الحسين : أكرم نعبوه عليك دير بالك عليها
أكرم : تي عيب يا راجل رحمه اختي
الحسن : نحن عابين عليك وعارفينك ربي يحفظك و يخليك لنا
أكرم : وأنتم شن جوكم
الحسن : الحمدلله بخير امور ماشية
أكرم : باهي الحمدلله خلاص نسأل و نرد عليكم
الحسن : تمام اوكي
الحسين سكر المايك : ها شن رأيك
الحسن : إن شاء الله يتمم ع خير
الحسين : إن شاء الله
.......
بعد اسبوع جمال و ماهر و أكرم جاء لبنغازي هما يسألوا على بالقاسم كلهم يشكروا فيه في كل مكان يمشوا سمعته سابقته بالخير و الإحترام والكرم وأنا طول الأسبوع نصلي في استخارة
اكرم : كيف حالك
أنا : الحمدلله
اكرم : شوفي يا رحمه إنت عارفه ان الشاب الي جاي يخطب إن فرق العمر الي بينكم بس يشهد عليا ربي أني سألت عليه في كل مكان حتي في طرابلس درت تلفوناتي شباب نعرفهم غادي كل ما يرد عليا واحد ما يقول عليه إلا كل خير و هنا كذلك وأنا جاي ناخذ في رأيك إنت موافقة
أنا تحشمت
اكرم : احكي أنا مش متقدم خطوه في الموضوع إلا و أنا سامع الموافقة او الرفض
أنا هزيت راسي
أكرم : موافقة
أنا : موافقة
أكرم ابتسم : ما شاء الله ربي يهنيك إن شاء الله توا نرن ع الحسن و الحسين ونقولهم تبي حاجة إنت
أنا : سلامتك
أكرم طلع
.......
الحاج صالح : كيف حالك يا اوليدي
الحسن : الله يسلمك يا عمي صالح كيف حال صحتك أنت إن شاء الله بخير
الحاج صالح : الحمدلله ربي العالمين
الحسن : ربي يطول في عمرك إن شاء الله
الحاج صالح : تسلم و يرحم بوك كان شخص محترم
الحسن : اتعيش وترحم
الحاج صالح : انت عارفني عليش ران نخطب منكم رسمي و نبي نحدد دفع الرجالة و الفاتحة كان موافقين
الحسن : نشرفوا بيك يا عمي أكيد موافقين و في أي وقت تفضلوا
الحاج صالح :الله يسلمك
الحسن : الله يكبر مقدارك إن شاء الله أكرم يحددلكم يوم تفضلوا
الحاج صالح : ان٦ شاء الله أما الفرح حددوه أنتم على حسب إجازتكم
الحسن : إن شاء الله قتلك يا عمي نحن عندنا شرط قبل ما تصير حاجة رسمية
عمي صالح فتح المايك : تفضل مش ح نتخالفوا شنو الشرط
الحسن : رحمه معيدة في جامعة و دكتورة و الحق كانت تاخذ فيها امتياز شرطنا تكمل قرايتها و تشتغل
بالقاسم هز رأسه بالموافقة
عمي صالح : نحن موافقين
الحسن تريح : على البركة الله
........
قبل الدفع بيوم جمال رن ع جدي وع خوالي و رجاله خالاتي وعزمهم وعدا أكرم للاجديده و جدي و عمامي و حكى لهم و فرحوا و يوم الدفع جو كلهم من الصبح نحن حايسين و نوتوا الحاجات للعزومه
جمال خاش بالشكاير
وداد : عليش هذا كله و صرف زايد ساد حاجات الي شريتوهن ع البيان عليش تشروا اليوم و بكرا مش لازم
فتحية : لا لازم اندير الحاجة اللي تشرف بينا ما انديريش حاجة اي كلام قدام الناس
وداد تهزب علاته صوتها شوي : لا تشرفي لا عمه يحزنون هذا اسمه صرف صرررف
جمال بعصبية : وداااااااد
وداد خافت سكتت
جمال : سكري فمك و معش تناقشي في أمور ما تخصكش و اللي نجيبه تحطوه هذا دفع رجاله نبي حاجة تشرف بينا
طلع طربق الباب
فتحية : تستهليها يا مهزبة بيش معش تحكي في حاجة ما تخصك
وداد انجمطت و سكتت كلهم فرحانين بالدفع و نيروز جتني
و نحن نحوسوا و المنظومه ع الآخر كمل الدفع روحوا الرجاله و أكرم عطاني الدفع ثاني يوم الفاتحة و البيان و خوتي ماقصروش معايا و داروه ليا كبير و عزمنا اقارب و شوي من الجيران بعد الفاتحة رن تلفوني و أنا في المزين
........
#يتبع..
ملاحظة : تم تغير اسم البطل #بالقاسم🤍
#Fafy_faa
