#وجودك_أمان 🤍
الحلقة [29]
سندس : لا كويسة توا أسوء أسبوع مر عليا.
أنيس : الحمدلله جتها خفيفة و الله حتي أنا شغلتني.
سندس : ماما حساسه أي موضوع بسيط ترقالها ، ضغطها يرتفع و سكرها يشيط
أنيس : المهم توا كويسة قولي لخواتك اللي تبي تعارك مع راجلها تجي عندنا هنا تحرج نجيبوه حتى هو و نراضوهم .
سندس ضحكت
أنيس : و الله الله ازح خير ما يمّرضن أمك هنّ ما شاء الله بالصدفة جن مع بعضهن .
سندس : أها و الله لعند شهقت هنّ يحكنلي معش عرفت من نسمع تي حتي أمونه مش مخلياتها في حالها نقولهن خلنها شهادة ثانوية قعدن يقولن لها دبالك تجوزي كلهم حقارة مش عارفه شن لعند حسيت البنت خافت قالت أصلا ما نبيش نجوز .
أنيس : يا عليك قصة ههههه المهم ربي هداهن و انحلن قصصهن.
سندس قربت من أنيس بدلع : شكراً حبيبي تعبتك الأيام اللي فاتن مع هلي .
أنيس يبحت فيها : تعبك راحة كيف ما دايرتيلي قدر قدام هلي مش خسارة فيك شي .
سندس ابتسمت باسته بدلع لين أنيس تلخبط وخرت تحكي و تدلع : شنو حبيبي خيرك
أنيس مسكها : مرايف على غزالي .
سندس بدلع : نبي نقولك أمتى نمشي لرحمه .
أنيس يبحت فيها زين : عدوا لتركيا بعدين نفهمك تعالي هنا توا .
راحوا في خبر كان....
.........
"نحن نتمشوا ع الشط "
أنا : تذكر اليوم اللي درت صور ماما و بابا .
بالقاسم : أها غلفتهن تغليف سفر عشان معش تجي و اتفرجي عليهن تبكي كيف اليوم اللي قبله.
أنا قنطت على يده بحتت فيه ...
بالقاسم : نبي نسألك على مشيتنا البحر فاجأتني كبت القهوة .
أنا ابتسمت تحشمت : جت عفوية لما مديت لك القهوة حسيت نظرتك كأنك تقولي ليش جاية و شن قايل على الحركات هذين أنا نحرك في رجلي بطريقة عفوية و لما نبي نرد بالسفرة ح يشوفن الفنجان مش مشروب ف كبيته ، ما جتني نية نشربه من نظراتك .
بالقاسم يشير على روحه : أنا نظرتي هكي ديما ، لكن وقتها عادي صح ما نحبش الجو هذا بس عادي لو صارت و قمعزتي و قلتي أمي اللي قالت لك خلاص ، لأني ما نبيش إحراج مع هلي .
أنا : ما نبيش نحط روحي في موقف بايخ معاك و لا مع غيرك .
بالقاسم : بس ردة فعلك صدمتني ما توقعتش أنك تكبي القهوة و لما لحقتك نبيك تجيبيها و تشربيها لأن عارفك تحبي قهوة العشية . و أنت لعبتيها دزيتي الفنجان دز .
أنا : أنا فهمتها مسكت صحن الحلو متاعي و فهمت أنك تبيني نجي نشرب القهوة ، بس زعلت و انحرجت و اضايقت لكن حركاتك بعدها هونن عليا .
بالقاسم بحت فيا بنص عين مبتسم : طلعتي تعرفي تمكري ما عد جيتي جيهتنا بكل . بس حتي أنا ذكي خطر عليا الشاهي ما تقدريش أنك ترفضي لي طلب و أكيد ح تصبي تجيبيه ليا .
أنا : مش مكر لكن نبي نحافظ على الإحترام اللي بيناتنا صح علاقتنا جامدة بس بإحترام .
بالقاسم : ما قدرتش نحكي معاك و نحن انتمشوا و ما عرفتش كيف نحكي معاك بس فرحت بيها أنك طلعتي معايا و تمشينا .
أنا : الصراحة حتى أنا فرحت حسيت كأنه ما في حد غيري أنا وياك حسيتك منتبه لي أنا و بس ، إحساسي صح أو لا بس يومها فرحت .
بالقاسم : و الله لحظتها ما نشوف حد إلا فيك و حتى الشاليه حجزته و لبسوني عليه خوتي بذات حمادي سامط الفرخ هذا لكن قلت لهم معاكم اعيال و هرجة قالوا العيال من البحر يطيحوا بدري و يرقدوا بلا طروح ، لكن أنا كنت نبي نقعد معاك بروحي ، كنت نبيك ،
"قرب مني مسك وجهي قعد يبوس في خدي كم مرة "
أنا : حبيبي أنت .
بالقاسم وخر : هيا نردوا للفندق ورانا طلعه أخرى .
أنا ابتسمت : هيا .
روحنا دوشنا تريحنا شوي لبسنا و طلعنا أخرى .
.......
عميمه : إن شاء الله يروح بالقاسم توا هو اللي يقرر .
إسماعيل : السلام عليكم .
عميمه و البنات : عليكم السلام .
" إسماعيل قمعز على كرعين عميمه تنهد "
نزهه : كنك رايح ناقص
إسماعيل ما ردش
زهور فنصت في نزهه .
عميمة تملس على شعر إسماعيل : صبن حطن لخيكن حاجة يأكلها
إسماعيل مغمض عيونه ما يردش نزهه و زهور صبن
رندا خذت اوليد زهور .
عميمه : تعبان من الشغل يا باتي تخش دويرتك تريح فيها .
إسماعيل هز رأسه بمعني أها
عميمه : كول أشبع و خش تريح أمتى ما تنوض تنوض على راحتك
إسماعيل هز رأسه بمعنى باه
نزهه و زهور قعدن يوتن في سفرة دارن شرمولة و بطاطا و بيذنجان و كبدة اسكندراني و جبنة قلن فلفل سخنله الخبزة و طلعن له باكو عصير يساعدن فيهن العاملات طلعن بالسفرة .
عميمه : نوض سلم اوليدي كول بيش تخش تريح .
إسماعيل ناض قمعز قدم السفرة جنب عميمه : تغدوا معايا بيش تجيني نية .
بنات بحتن في بعضهن منصدمات عرفن إسماعيل مش متغدي و وقت عصرية .
عميمة قربت : هي بسم الله تعالن قربن مع خيكن .
قربوا كلهم ع السفرة خش محمد
محمد : إيدك أنت وياه سيب الخبزة
إسماعيل و عميمه و البنات بحتن فيه
محمد : و راس حنكم ما تاكلوا نغسل ايديا و نجي نمرس معاكم حاجة ، إنتِ اطلعي من الموضوع حنك ميته كان تبي تاكلي كولي .
البنات يضحكن .
عميمه : تعال يا رزيل حماتك تحبك
محمد خش مطبخ يغسل : نعليا منها أم أوفتي نجيها و نجي بنتها .
إسماعيل ضحك بشويش : الفرخ هذا تقول مولود على حدود مصر لسانه بكل .
نزهه : دلاله شارطها معاهم كلهم
محمد طلع : إسماعيل فات عليك يومها جت نزهه ساعة 11 في الليل تشلك هيا و راجلها و عويلها انفجعت أزف .
قمعز قعد يأكل .
إسماعيل : باهي
محمد : المهم عاد أنا عقلي يأكل فيا ما هناني نبي نعرف كنها جيتنا في الليل بالقاسم محضن في بونية الحمام حوشه ما يطلعش منها و أنت و ناصر في حوشينكم .
نزهه : قوله شن قلت للراجل الله يفضح بيك قول .
البنات يضحكن ...
محمد : لا حتى أنا نبي نحكي أختك خشت مسكت راجلها قتله كنكم طحنينها الله يسترك امسحها في وجهي روحوا بكرا جيبها توا ناس راقدة قعد يضحك قتله خلاص خليك في المربوعه مش براني نخش نكلمها و نجيك سامحها أنت الكبير بعدين الصبايا عقولهن صغار سكن هو يضحك و أنت عارفه بعد يضحك معش يسكت .
محمد و إسماعيل و رندا و زهور طربقوا ضحك ،،،
نزهه : باهي يا حمادي توا تشوف و أنت المفروض تهزبه تقوله كيف قلت لراجل هكي تضحك .
إسماعيل يضحك : و إنت كنك جايتيهم الساعة 11 في الليل
عميمه تقرأ في المعوذات تبحت فيهم كيف يضحكوا .
نزهه : جايبة لماما من عشانا
محمد : قالها ليا قالي كنا نشووا في المزرعة حسبناكم معانا في العشاء أنا في عقلي لنقانك فاضي قتله أها كنت نبصر معاك قالي عارفك تبصر شكرته عاد على عشاء .
عميمة : لا مش فاضي نسيبك لازم تقدره تكبّر من مقداره زي ما تكبّر من مقدار خيتك هو كبّر من مقدارنا تعب لعند الحوش جانا في الليل .
نزهه : و الله هو بروحه قاللي حاسب عيت عمي مع هلي بيش نحن مروحين نتكوا عليهم .
إسماعيل : منور و الله بارك الله فيه قدره عالي .
نزهه ابتسمت ،،،
محمد : أهي نفختها هيا و راجلها
عميمه : أنت يا ليد متأكد قلت للراجل نبصر
محمد : تي عارفني نبصر يا أمي كلامي معاهم كله بصارة .
زهور : حتى مصطفى بعد يجيبني يقول إن شاء الله نلقى حمادي شفافطي بكل ههههه .
محمد : غير خليه يصلي على نبيه بس خير ما نقلبلهم وجهه ناصر اللي حتى السلام بالتفنيص جو أختي ما أختي أفطن راك تغلط .
رندا : حي بالقاسم كيف يسلم .
محمد : لا بالقا هذا خله بروحه " هز إسماعيل بحت فيه رقصله حواجبه"
إسماعيل ياكل شرق في ضحكته
عميمه مدت له اميه .
محمد يضحك و يدق في إسماعيل على ظهره.
البنات يضحكن
عمي خش معاه ناصر : السلام عليكم .
كلهم : عليكم السلام.
محمد صبى : الحمدلله سفرة دايمة إن شاء الله " قرب من عميمه " قتلك باتي جاء بعد كملنا شكله حني كانت ما تحبه بكل .
وخر بسرعة
عميمه تضحك : و الله نوريك يا احميده ، هي تفضلوا .
عمي : لا صحة جيبولي زميته و زيت زيتون .
محمد : باتي ديرها أنت نصلي مغرب و نجي ناكل معاك
زهور رفعت السفرة بحتت فيه كلهم بحتوا فيه .
عمي : عدي صلي و تعال .
رندا : كيف كليت .
عمي : خليه ياكل أخرى .
محمد : مازلت جعان .
عدا يصلي دار عمي زميته قمعزوا الشباب ياكلوا دار عمي لعميمه و البنات عبود عبود عشان شبعن ما يبن يثقلن .
إسماعيل خش داره من تعب الأيام اللي فاتن نعس .
محمد طلع عمي و عميمه و البنات و ناصر يهدرزوا .
.........
خشينا لمطعم زي جلسة الصالون قمعزنا جنب بعضنا و ماسك إيديا بعيد على عيون الناس إضاءة هادية
أنا : مكان سمح بكل.
بالقاسم : حجزت فيه امبدري في الصبح
أنا ابتسمت : عجبني صراحة.
بالقاسم : قوليلي فيش خاطرك نطلبلك
أنا : عادي أي حاجة أنت تاكلها ناكل زيك .
بالقاسم ابتسم : نبي نطلب حوت مشوي .
أنا ابتسمت : تمام حتى أنا
القارسون جاء ، بالقاسم طلب عصير ليا و قهوة له قبل و بعد نص ساعة الحوت و السلاطات و الشربة
أنا : ليش القهوة حبيبي ليل .
بالقاسم : نبي نصحصحلك .
أنا ابتسمت بحتت خطمت عليا بنت لابسه فستان قصير و الشعر قصير اطقطق معاها راجل لابس لبسه رسمية بحتت في بالقاسم لقيته يبحت فيا : آه القهوة .
بالقاسم : كنها القهوة .
أنا : في فرح رندا بعد بعد خشيت في المطبخ قلت نبي قهوة رغد درتلك عليش ما شربتهش " ابتسمت "
بالقاسم : بعد طلعت جاني تليفون من الشغل جابت القهوة نحسابك إنت تبي تجيبيها شيرتلها تحطها على الطاولة قعدت مصبية معش بت تخش قلتلها عندي مكالمة قعدت تمشي بالشوي فطنتلها صبت قدام المطبخ شوي و خشت كملت المكالمة عرفتها مش قهوتك من شكلها هذا عليش خشيت أخرى قتلك ديري كنت نبيك تطلعي إنت نبيها من إيديك بيش مزاجي يتعدل " باس ايديا و خدي"
أنا منسجمة معاه نسيت حتي المكان بسته في خده .
بالقاسم : لما حمادي قالي دير قيمة لمراتك في فرح حتي هذه نذكرها و الله كنت حاطها في حسابي داز عليهن غير تأخرن من قبل عابي نجيب عاملات وحد لك و وحدة لأمي
عارف الشغل عليك و التعب عليك في فرح عارفك بروحك تتعبي كنت خايف عليك
القارسون جاء حط القهوة و العصير و عدا شربنا و بعدها جانا العشاء
انا : ربي ما يحرمني منك حبيبي
بالقاسم : و لا يحرمني من عيونك وصوتك
انا ابتسمت نبحت فيه
بدينا نتعشوا بالقاسم حكالي على المشية للزردة هو و أصحابه.
أنا نسمع فيه مبتسمه كيف كان يفكر فيا ملاحظ حتي نظامي في حوش تغيراتي . مرة مرة يطبس يبوس خدي
انسجمنا بكل روحنا متأخر دوشنا رقدنا مع بعضنا نحن في حالة حب و انسجام ....
.......
جمال : توا تبي تبقي هك كم أسبوع أخرى و لا شن
سمية دايرة روحها راقدة
جمال : تمام بكل يا سمية ارقدي خليك .
جاء بيطلع
سمية بصوت هادي : جمال .
جمال صبى برم بحت فيها ...
سمية قمعزت بزعل : أصلا الكلام وجعني و قبل ما نبي نحكيلك قلتلي انزلي عشان خاطر أمي تسأل عليك نزلت بس أختك و الله كان مش أمك راه كلتني أختك هذه مش عارفه كنها هكي امسميه مش طالعه لكم بكل مش طبيعية .
جمال قمعز على السرير ساكت
سمية : أنا ما غلطتش فيها هيا تجرح فيا بالكلام عشان جبتلك بنت مش أوليد قالتلي نجوزه نخليك تشوفيه هو كيف متهني أنت كان معش تبيني قولي مش تنزلني للأختك تقولها ليا " قعدت تبكي"
جمال تنهد قرب منها حضنها : اسكتي شن معش نبيك هذه .
سمية حضناته : جمال هو مش بيدي أنا كان نجيب في بنات و الله ما بيدي أنا نحبك و عشانك بدال المرة نحمل عشرة لين نجيبلك أوليد اللي تبيه .
جمال : باهي أهدي اسكتي توا بكاء هذا كله عشان الكلام هذا ننزل نكردهما و لا شن
سمية وخرت : لا ما تنزلش أنت من أول ما نزلت لوداد معش بيت تحكي معايا حتى بعد نرقدوا تعطي فيا بالظهر .
جمال يمسح في دموعها : خلاص اسكتي كنت مضغوط في العمل بس معش تبكي عاد مش قاصد نزعل سامحيني .
سمية قرب منه لين قمعزت في كتره : حبيبي نبي بيبي .
جمال ضحك : ساهلة شن تبي أخرى
سمية مسحت وجهها : شي
جمال غمزلها : صبي طفي الضي و تعالي .
سمية ابتسمت صبت طفت الضي و ردت راحوا في خبر كان...
........
تاني يوم
رنيت على نيروز عشان اطمني على أمها قالتلي كويسة و خلاص ، استغربت بس ما حكيت ما بيتش نضغط عليها هدرزنا شوي و سكرت تغدينا و عدينا لمول اسوقنا خذينا حاجات ليا و له و البنات و عويلهن و عمتي و عمي و محمد و عويل أكرم
ركبنا للغرفة قعدت نتفرج على الهدايا نشوف في الأسعار حسيتهن غاليات شويا .
بالقاسم طلع من الحمام لابس سروال بس ينشف في شعره .
أنا سكرت البلكوني : نعيما حبيبي .
بالقاسم عزق المنشف و كرني : الله ينعم عليك .
أنا قعدت نبحت فيه قلبي يبي يطلع : آه نبي نقولك الهدايا من المول غاليات شوي .
بالقاسم : لا المول هذا سمح فيه كل شي ، ديما نشري منه قريب من الفندق .
أنا : هذا المول اللي شريتهم كلهم و أنا نسيتني .
بالقاسم غمض عيونه عض فمه
أنا لا حكيت و لا تحركت .
بالقاسم فتح عيونه خذاني ع السرير : تعالي نهدرزوا شويا.
طفى الضي خلى الوناسات
أنا مشيت معاه رقدنا ع السرير تغطينا .
بالقاسم : بعد سافرت روحت و قتلك ما جبت لك شي و نسيتك توقعت تنفصلي و تهزبي و تقولي كيف تجيب لهلك و ما تجيب لي أو ع الأقل تقولي كيف تنساني إلا سكوتك كان ضربه بالنسبة لي أنا عارف عينك مليانه بس قلت أكيد ح تتكلم و تناقش بس تفاجأت من هدوئك حسيت كأنك عطيتيني كف مرات السكوت يكسر أكثر من أي كلام إنت هذا اللي درتيه ليا .
أنا : أنا مستحيل نقارن روحي بهلك و نقولك كيف ما جبت لهم كنت تجيب لي ، بس اللي زعلني كلمة نسيتك معقولة ما اذكرتني بككل حتى و أنت تفتح في الشنطة اللي أنا جهزتها لك و لا اذكرتني حتى في الليل وين جيت تبي ترقد صح ممكن مش هالحب الكبير بينا بس ع الأقل كنت نرقد جنبك و اللي زاد كسرني السكوت يا بالقاسم ، سكوتك ما عرفت اللي تبيها من اللي ما تبيها و لا عرفت اللي نديره يعجب فيك و إلا لا و لا عرفت شن شعورك تجاهي وقتها لا عرفت عندي مكان و إلا لا و لا عرفت حضوري يأثر فيك و إلا حضوري كيف غيابي تعبتني و أنا نحلل و نفكر كيف تفكر فيا حتى في لحظاتنا الخاصة و اللي نحس بيه معاك من لهفه و شوق و كيف تحضني و كيف تبوسني و تشمني صوتك نفسك كيف يتغير و الرعشة اللي في يديك و النظرة عيونك كلهن يقولن لي ، أني أنا بس في حياتك و ما فيش حد ينافسني عندك بس تكمل نلقى روحي رديت ع الرف بسكوتك اللي قاتلني أقسم بالله يعدن عليا أيام و أنا دموعي ما يكفن ، و يجن عليا أيام دموعي جفن .
بالقاسم حضني بالقوة : و الله إنت لا فيه قبلك و لا ح يكون بعدك و لا تسيتك يومها و الله ، لكن أنا هكي ما نحبش نحكي واجد طبع تعودت عليه عمري كله فوق من 30 سنة أنا حتى شغلي كله أوراق أو تنفيذ ع الواقع و حتى اللي يشتغلوا معايا عارفيني نحبش الدوة الواجدة نحب نشوف قدامي تنفيذ حسب ما نبي نصدر أوامر نلقاهن على أرض الواقع و إنت نفذتي اللي نبيه من غير ما نقولك و نرسم لك خرائط و لا نعطيك إرشادات بروحك عرفتي يا روحي ، كنتي كل يوم تكبري في عيني و تزيدي غلا فوق غلاك .
طبس قعد يبوس فيا
انا نبادل فيه بهدوء : بالقاسم.
بالقاسم وخر شوي : نعم
أنا : حبيبي على هك توا نحمل هنا
بالقاسم ضحك : لا شديلي روحك لين نروحوا راك تحمليلي هنا.
أنا ضحكت ..
بالقاسم نزل عليا و رحنا في خبر كان....
..........
مرن اسبوعين كانن أجمل أسبوعين في حياتي كلها ما في مكان ما شالني له و ركبنا في التليفريك و شفنا إسطنبول منظر حلو خذا غايته فيا نزلنا يوم لجزر الأميرات و كل يوم الصبح إما مول أو مكان سياحي و المغرب نردوا للفندق و ندوشوا نلبسوا و نتعشوا في مطاعم ذات طابع رومانسي يوم طلعنا لسوق مصر انتيكات و تسوقنا مع بعضنا و الأحلى إنه في المولات يختار لي هو ، ذوقه حلو و زيادة الحاجة من حبيبي غير ...
تغير بالقاسم معايا خلى عندي ثقة في نفسي خلاني نعشقه نحب نفسي بكل حالاتي غيرنا جونا حكينا واجد كل ما تخطر حاجة يقولي عليها و يعتذر...
محمد : الحمدلله على سلامتكم يا عيت الهاي .
بالقاسم ابتسامته من الوذن للوذن حضن محمد .
محمد حس إن بالقاسم فرحان حضنه بالقوة وشوشله في وذنه : مبروك يا صقر .
بالقاسم ضغط عليه : يبارك فيك .
محمد : طمني الجو تمام ؟
بالقاسم : عال العال و الحمدلله .
محمد : ما شاء الله ربي يدوم عليكم .
بالقاسم وخر : إن شاء الله .
أنا مصبية نبحت فيهم ساكتة ،،،
بالقاسم جاني خذا الشناطي
محمد مد يده : خير يا رحمه الحمدلله على سلامتك .
أنا : الله يسلمك كيف حالك؟
محمد : مادام أنتم عال العال أنا نفسكم و إلا لا يا بالقا.
بالقاسم رفع حاجبه : شيل معايا الشناطي بس .
بحت فيا غمزلي ، هيا
ركبنا في السيارة طلعنا للحوش ، محمد و بالقاسم يهدرزوا على حوش محمد وين وصلوا العمال وصلنا نزلنا سلمنا ردينا لحوشنا دوشنا و رقدنا
.......
تاني يوم
في العشية عديت لعميمة نشيللها في الهدايا
عميمة : أبدي شتي سلم بنتي قعدت تصقع .
أنا : لابسه كم فالينيا بس صح صقعت.
عميمه : أيوه دفي روحك.
أنا : حاضر كيف حال البنات يا عميمه
عميمه : الحمدلله طيبيات أكيد توا تزرق نزهه بعدين.
بالقاسم خش لابس قميص و فانيله سبعه و بنطلون جينز كحلي غااامق : السلام عليكم .
نحن : عليكم السلام .
بالقاسم : وين البنات يا أمي
عميمه : إن شاء الله توا يجن بعدين يطلن.
بالقاسم : باه تمام.
عميمه : خش قمعز .
بالقاسم يبحت فيا : لا لا راد لحوش رن عليا صاحبي بكرا جايب مراته .
انا : سندس مرات انيس صح
بالقاسم : اها انيس
انا : تمام تنور
بالقاسم طلع
أنا ما قدرت نصبي سكتت
غاب علينا ربع ساعة عميمة تسأل على هلي و تهدرز أنا نجاوب.
بالقاسم خش لابس كشمير لنص الفخذ .
أنا و عميمة رفعنا عيونا .
بالقاسم منظره كان خيال بكل يلبس في ساعة .
أنا لدرجة فتحت فمي عليه بدون ما ننتبه .
بالقاسم رقص حواجبه عينه في عيني .
أنا انحرجت من عميمة طبست راسي
عميمه تبحت فيه.
أنا ما عاد رفعت عيني في عميمه.
الخادمه : ماما كبير .
عميمه صبت : بسم الله أني جايا.
خشت عميمه للمطبخ
بالقاسم : بست كنك .
أنا : أنت اللي كنك شن الحركات
بالقاسم ابتسم : أنت اللي بديتي و بحتي تحملي ما يجيك.
أنا : أحرجتني.
بالقاسم : أصلا أمي طبست غير أنت مش فاطنه و لبستي روحك بروحك ، معقولة أنا اندير حركة نخليها تفطنلي .
أنا نبحت فيه و خلاص منظره بلبسته خيااال و مش نفس اللي طلع بيها ، بصراحه نبحت و أنا ذاايبة .
بالقاسم غمزلي : طالع تبي حاجة نجيبها لك خاطرك فيها
أنا : سلامتك .
بالقاسم بصوت واطي : باهي تعالي عطينا بوسه سريعه هك .
أنا : خش لجناح توا نجيك .
بالقاسم : طوليش ورايا شغل
طلع .
أنا لحقته.
بالقاسم برم كرني نحن في ممر الجناح قعد يبوس فيا وخر : اااه هكي تمام خلاص خشي .
أنا ابتسمت : تمام تريحت.
بالقاسم عدل كشمير من فوق : أهو بعدين نكمل هي السلام عليكم
أنا ضحكت
بالقاسم طلع
.......
#يتبع....
.
.
.
#Fafy_faa
