#وجودك_أمان🤍
الحلقة [9]
وداد انجمطت و سكتت كلهم فرحانين بالدفع و نيروز جتني
و نحن نحوسوا و المنظومة ع الآخر كمل الدفع روحوا الرجالة و أكرم عطاني الدفع ثاني يوم الفاتحة و البيان و خوتي ماقصروش معايا و داروه ليا كبير و عزمنا أقارب و شوي من الجيران بعد الفاتحة رن تلفوني و أنا في المزين ..
أنا فرحت : ألو
الحسن : يا مرحبا بالهندية
أنا ابتسمت : أهلين كيف حالكم
الحسين : الحمدلله ألف مبروك عليك إن شاء الله تبقي متريحة
أنا : الله يبارك فيك إن شاء الله
الحسن : مبارك إن شاء الله
أنا : يبارك فيك
الحسن : شنو كل شي جاء ع مزاجك ناقصتك حاجة
أنا بصوت مخنوق : ناقصيني أنتم و بابا و ماما
الحسين تنهد : الله يرحمهم إن شاء الله أكيد توا فرحانين بيك
الحسن : إن شاء الله توا نجوك في العرس قبل حتى الموعد
أنا : لا بالك ما تبوش تجوني
الحسين ضحك : عمك رن ع الحسن قاله حدده أنت و رن حتى بالقاسم تعرفنا عليه تبارك الرحمن ع الأسلوب رزين و مثقف شرطنا كيف ما اتفقنا تكملي دبلوم و العمل تشتغلي يعني تعبك ك معيدة لازم تكمليه
أنا ابتسمت : تمام بكل
الحسن : اندزولك فلوس أخرى
أنا : لا خلاص و الله اللي ادزيتوه جبت به حاجتي كلها و بالزايده كل شيء شروه ليا أكرم و جمال و ماهر
الحسن و الحسين : باهي ما شاء الله
أنا : كيف حال العويل كلهم
الحسن : كويسين كلهم الحمد لله قتلك حاجتك كلها نجيبوها لك من هنا ما تشريش دبش من بنغازي بكل توا نشروه لك من هنا ما تخممي في شيء
أنا : ربي ما يحرمني منكم يارب
الحسين : تنقصك حاجة قولي و اندزولك فلوس اشري حاجات الثقيلة
أنا : حاضر إن شاء الله
المزين : دكتورة رحمه اتفضلي
الحسن : خلاص كملي حاجتك بعدين في الليل نرنوا عليك
أنا : تمام إن شاء الله
بعد أربعة ساعات جاني ماهر و آمال خذوني من المزين و عديت للحوش قمعزت كل مرة جايا وحدة من الضيوف تسلم لمحت صفاء و عمتي فجرية مقمعزات و يبحتن فيا نيروز ما تحركتش من جنبي شوي جو هل بالقاسم جايبين معاهم أربعة سالات و صندوق مشروب و علبة كبيرة شوكولاطة سلموا قمعزوا
عميمه تشير : هذه مرات ناصر و هذه مرات اسماعيل و هذه زهور بنتي مخطوبة و هذه رندا الصغيرة في بناتي و عندي حمادي آخر العنقود ههههه بالقاسم يقعد الثالث في ضنايا
أنا مبتسمه : ما شاء الله ربي يحفظهم
عميمه : و يحفظك و يتملك ع الخير إنت و بالقاسم يارب
نزهه : ماما كان مرات بلقا تبي تشبطي فيها " بحتت في صبايا خوتها" جماعه يحرقوا راه
عميمه ضحكت : خلي اللي يبي يحرق يحرق
زهور جت : أهلين رحمه
أنا ابتسمت : اهلين زهور كيف حالك
زهور : الحمدلله مبروك إن شاء الله بهناك
أنا : تسلمي إن شاء الله
رندا : مبروك يا رحمه
انا : يبارك فيك عقبالك إن شاء الله
آمال تقدم و نيروز و بنات عمامي يساعدن إلا وداد مقمعزة كيف البرانيه
أنا قعدت بروحي إذاعة عالية و الكل يهدرزوا شوي و خشت ليلي لابسه فستان قصييييير بكل و مبتسمه سلمت ع الجيران بحتت فيا و قمعزت
نيروز خذت الدربوكه آمال سكرت الإذاعة : هي سخنلي ايديكن هذا بيان رحمه رااه
بدت ادربك و بنات يصفقن
نيروز : العين غلاها مو تلفيق العين غلاها
بنات : يا مو تلفيق
نيروز : العين غلاها
بنات : يا مو تلفيق
نيروز : مفصل لا وسعة لا ضيق مفصل
آمال : ابروحهه جانا م جيناه ابروحه جانا
بنات : يا ماجيناااه
امال : عرف يختار خوال ضناه عرف يختار
بنات : خوال ضناه
نجوي : طـاح علـي غـلا من عـينـه طاح علي
بنات : غلا من عينه
نيروز : طيـحـة يانـاس مـطر زيـنـة
نزهه تزغرت
حليمه : رحمه راهي بنت اجواد رحومه راهي بنت اجواد
بنات : تلم العايلة ع براد
نيروز بحتت في ليلي : ياريته ما صار غلاهم ياريته ما صار
آمال : وووي ووي ووي
بنات : ياريته ماصار
نيروز كشخت ع صفاء : اطرطش في نص المشوار
نسرين ترقص : خان عزيز ودرنا غيره خان عزيز
بنات : ودرنا غيره
نسرين : ودرنا غيره ريتن هالحاجة كبيرة
آمال تزعرت
نيروز : جدي الريم خذوها هلها و اللي وخر يستاهلها
امال : حي حي حي
نيروز : سلم خيك علا شطك
بنات : علا شطك
نيروز : ما خلا الأمواج تلطك
أنا كنت متخزرطه مش قادرة نحول عيوني من نيروز
زهور صبت ترقص امعاها عميمه و نزهه : يا نجي لباس الخايل يا نجي
بنات : لباس الخايل
زهور تخمس : خشاشات لكل قبائل خشاشات لكل قبائل
رندا تبحت فيا و ترقص في حواجبها و تصفق : دز عليه العقل يريده مهندس مسطرته ف يده
عميمه صبت قربت الذهب تلبس فيا الطاقم و الدبلة و المحبس
نزهه : أنا خويا ما كيفه والي أنا خويا
بنات : ما كيفه والي
نزهه : ما كيفه والي كنز ذهب و سومه عالي كنز ذهب و سومه عالي
زهور تزغرت
آمال توشوش للنيروز : غلبنا التافهات ههههه
نيروز :الحوت الحوت ع بنيتنا الحوت الحوت
بنات : ع بنيتنا
نيروز : والشينه ماهي صنعتنـا
نزهه : عنده صيت طويل يسده ما عمره ع جار تعده
آمال : و النوار خذا نواره و المقهور قعد في داره
كريمة : حشانا ما انديروش العيب نهابو من اللحية و الشيب
آمال : وووي ووووي وي
رندا : يا رحمه عندك فرتونه يا رحمه عندك فرتونه
قريباتها : عندك فرتونه
رندا : خويا باهي و أمي حنونه
أنا ابتسمت
فتحية : العين تمنت يا لوكان ما يغيب عليها حبان
اجديده : عيني عزوتها رجاله موش بحر يغرف من ياله
نجوي تشير للبنات وقفن و فتحن الإذاعة و ردن يحوسن تعشوا كلهم روحوا
رديت للعمل و القرايا كنت نوعا ما متريحة حتي لو كان فيه خوف بس حاسة براحة.
........
بعد فترة اسبوعين
فتحية : هي حاضر توا نكلمها ، رحمه تعالي عمتك ع خط
أنا طلعت من المطبخ مع خشت جمال : ألو
عميمه : خير عليك
أنا : اهلين عميمه كيف حالك
عميمه : الحمدلله كيف حالك إنت قلت نرن عشان نسأل عليك و نطمن
أنا : لا الحمد لله كويسه
عميمه : يسلمن عليك البنات و بالقاسم
أنا تحشمت : الله يسلمك سلمي عليهم
عميمه : يوصل سلميلي ع حنك و عماتك
أنا : يوصل إن شاء الله
عميمه : بالسلامه توا
أنا : سلام
سكرت لقيت جمال يبحت فيا
جمال : أم بالقاسم هذه
أنا : اها رنت تطمن عليا
جمال : كنها ما رنت ع رقمك
أنا : بعد طلبوا الرقم عطيت رقم أمي
جمال أبتسم بفخر : لا خلاص أعطي رقمك و احكي عادي هذا راجلك توا
أنا تحشمت
جمال بحت في فتحية : نبي نركب نتريح تبوا حاجة
فتحية : لا سلامتك اركب تريح
جمال ركب و أنا خشيت للمطبخ قعدت نفكر في بالقاسم صح لا رن و لا سأل عليا و لا بارك ع الفاتحة و لا صدر منه موقف زعما قراري خطأ أنا تسرعت في الموافقة استغفر الله العظيم استغفر الله العظيم
.......
حكيم : ايوه
ليلي : وينك ليا يومين عند هلي تعال روح بيا
حكيم : خليك عندهم غيري جو كنك مليتي من هلك
ليلي : لا مش مليت بعدين كنه حوش هلي
حكيم : لا ما كنه شي خليك حتى أسبوع كان عليا أنا
ليلي بدلع : كنك ما ترايفش عليا
حكيم : مش تبي هلك شلتك خلاص
ليلي : تعال مرايفه عليك
حكيم : مش فاضي
ليلي : وين قاعد أنت
حكيم : كيف مروح من الشغل
ليلي : كان جيت تغذيت عندنا روحت معاك
حكيم : مروح تاعب نبي نتريح
ليلي تعصبت : حكيم كنك تحكي معايا ببرود هذا كله ليش تعامل فيا هكي
حكيم : توا نجي نروح بيك خلاص
ليلي بزعل : مش مرايف ع لولي و لا كيف يا عيوني
حكيم فوق نفس : لا مرايف عليك توا نجي بس البسي بسرعه انزلي ما نبيش نخش
ليلى ابتسمت : حاضر
حكيم سكر التليفون قعد ينفخ شن درت في روحك يا حكيم شن درت في روحك
...........
يوم الخميس جاء أكرم و نجوي و العويل كسدت معاهم شوي و ركبت نقرأ بعد ساعة ..
آمال دقت وخشت ماسكة تليفون : رحمه نزهه ترن
أنا خذيت ردت : ايوه
نزهه : أهلا كيف حالك
أنا : الحمدلله كيف حالك إنت و كيف حال مريومه
نزهه : الحمدلله كويسين
أنا : كيف حال عميمه و البنات
نزهه : الحمدلله في شخص أهم ينسأل عليه هههه
أنا ابتسمت : كيف حاله
نزهه : اهو جنبي اليوم جاني في حوشي قلت نرن عليك هدرزوا شوي
أنا انصدمت قمعزت
نزهه : اسمعي قبلها رني عليا برقمك عشان نعطيه الرقم
أنا : احم هي شوي و نرن برقمي
نزهه : تمام
أنا سكرت
بالقاسم يضغط ع سنونه : كنك تصرفي من عندك إنت قتلك نبي نحكي معاها أنا
نزهه خافت : بالقاسم كنك نبيك تعرف عليها و تباركلها و الله كويسه و تهبل هادية
أنا رنيت
نزهه عطاته تلفون بتردد : ترد و لا
بالقاسم خذا تلفون بالقوه متعععصب ع الآخر طلع للشارع نقل الرقم في تلفونه دز مسج
" أنا بالقاسم "
رن
أنا نرعش فتحت الخط
بالقاسم : ألو
أنا زمطت ريقي و خايفه صوته يفرق ع الناس من أول كلمه له حسيت أنه غير الناس : أيوه
بالقاسم : كيف حالك
أنا : الحمدلله كيف حالك أنت
بالقاسم : ميه ميه و ألف مبروك
أنا : الله يبارك فيك
سكتنا شوي
بالقاسم : احم شن جو القرايا
أنا : تمام ماشية فيها كويس عندي دبلوم هذا كان خذيته بالتفوق يعطوني دبلوم ثاني مدته 9 شهور يعادل الماجستير
بالقاسم : أها ما شاء الله ربي يوفقك
أنا : إن شاء الله
بالقاسم : تبي حاجة ناقصتك حاجة
أنا : لا سلامتك
بالقاسم : تنقصك حاجه رني عليا
أنا : تسلم
بالقاسم : هيا اوكي
أنا : سلام
سكرت عزقت روحي ع سرير مبتسمه
.........
بعد اسبوعين بالقاسم معش رن عليا و أنا تحشمت نرن عليه قعدت نشتغل و نقرأ لين نيروز جت لحوش هلها بس مشيتلها أنا كسدت معاها و روحت كانت حامل و مريضة شويا.....
عميمه حليمة جوها عرب و قعدوا عمامي فترة يسالوا ع الراجل طلع كويس جوا عطوا كلمة رسمية بعدها الدفع و تحدد البيان الأسبوع الجاي
.....
جمال يتعشي : أها قالي جدي
ماهر يشرب في مشروب : سألت حتي انت
جمال : لا عمامي و عويلهم قالوا فصفصنه كويس الراجل
فتحية : ربي يكمل عليها
ماهر : حتي أنا في ولد صاحب قالي نبي أناسبك و قلتله ماعنديش خوات
جمال : كنك عليش
ماهر : هك مش مناسب لنا عارفه مش حيعجبك
جمال : أنت عارف شروطي كان مش عاجبك فوته
ماهر : لا هو كويس غير أنا مانبيش جو نسبة و أصحاب و عنده خوه مش تمام نشهد بالله هو محترم
رن تليفوني بحتوا فيا كلهم صبيت
أنا : ألو
بالقاسم : أيوه شن الجو
أنا ركبت : الحمدلله كيف حالك أنت
بالقاسم : تمام حال الخدمه
أنا : ربي يساعدك
بالقاسم : إن شاء الله إنت شن جوك في القرايا و العمل
أنا : الحمدلله ماشية كويس نضغط شويا بس عادي أهم شي نتفوق
بالقاسم ابتسم : ما شاء الله ربي يوفقك
أنا : إن شاء الله
سكتنا شوي
أنا : قتلك ان الأسبوع الجاي الجمعه تقريبا بيان عميمه عادي نمشي صح
بالقاسم : أها امشي عادي و إن شاء الله الف مبروك
أنا ابتسم : الله يبارك فيك امبدري رنت عليا نزهه قلتها لها
بالقاسم ببرود : أها الحق أنا ران عليك ع كم حاجة في الحوش يعني كان تبي حاجة معينه أو ديكور معين قوليلي بيش انديرها لك
أنا : زي شنو مثلا
بالقاسم : زي المطبخ شن تبي لون الدولاب زي الصالون زي دار النوم تبيها ديمياطي و لا تركي ولا سويسري بجوك يعني
أنا قعدت نفكر : اممممم
بالقاسم ولع سبسي : نخليك تفكري
أنا قبل نبي نحكي بس حسيته يبي ينهي المكالمة : تمام
بالقاسم : تصبحي على خير
أنا : و أنت بخير
........
يوم الاربعاء ..
نزهه : تي قالتلك بيان عمتها لحلح روحك دير موقف
بالقاسم يفنص : نزهه عارفتيني جو هذا ما نحبش
نزهه خافت : مش قصدي حاجة أنا اللي نعرفه عليك كريم وبعدين هيا ع ذمتك يعني مراتك مفروض حاجتها تجيها بدون ما تطلبها و نحن الصبايا في المناسبات قصتنا قصه
عميمه : اجبر بخاطرها سلم اوليدي أنت عارف بنية وحيده سألت و عرفت و سمعت شن قالت عمتك عفاف
نزهه : مش طالبين منك شي هو فستان و كعب و معاه شوي حاجات توا عرفنهن زهور و رندا غير طلعهن بس
بالقاسم صبي : إن شاء الله خير بكرا ساهل توا مش فاضي
نزهه فرحت : عادي حتي بكرا المهم تجيبلها
بالقاسم طلع
رندا : و الله ماسكه بطني من بالقاسم خاطب بس يعامل فيها هك جفاف أمالا بعدين كيف
زهور : مش منا خيي اسمالا عليه من هالاشكال المعفنه مرات اسماعيل بذااات
صبت قعدت تقلد عليها
زهور : سمعوووو تعال خوذ السفره ثقيلة يا سمعووو
نزهه و رندا و عميمه قعدن يضحكن
عميمه : هههه ربي يهدي خوكن و خلاص
نزهه : مره مره نرن عليها رحمه ع أساس نسأل ع حاجات طبية و هك بس ما عمرها حكتلي عليه حاجة نقوللها كيف حاله بالقاسم معاك تقولي كويس الحمدلله و تسكت
رندا : أكيد خوكن مهددها أنتن عارفات شروطه
عمي صالح : السلام عليكم
هنا : عليكم السلام
عميمه تفنص في بنات عشان يسكتن : صبن ديرن للبوكن شاهي
رندا صبت بصوت واطي و تمتم : طبعا إلا قسومه
........
يوم الخميس...
زهور : رن عليها قوللها نحن قريب نوصلوا فيك
بالقاسم درس قدام حوشنا : مش لازم هيا انزلن
رندا خذت الأكياس : عليك احراج هيا زهور
نزلن دقن ع الباب فتحت نجوي
زهور : السلام عليكم
نجوي مبتسمه : عليكم السلام تفضلن
زهور و رندا خشن : سامحونا ع الجاية المفاجأة
نجوي : و لا يهمكن تفضلن الحوش حوشكم
رندا : تسلمي
خشن غرفة الضيوف سلمن ع أمي و آمال سلمت ركبتلي تجري
زهور : رحمه وين
نجوي : شوي و تنزل
فتحية : كيف حال خيرية إن شاء الله طيبه
زهور : الحمدلله كويسه
فتحية : كنها ما جت معاكم
زهور : و الله يا عميمه نحن طلعنا بسرعة بسرعه مرة اخرى نجوا
أنا كنت لابسه بنطلون و قميص لافه شعري فوق : أهلين
زهور و رندا صبن يسلمن : اهلا اهلا
آمال خشت بسفرة العصير و الشوكولاطه
زهور : رحمه قيسي الفستان هذا كان عجبك طبعا عشان بالقاسم برا كان ما عجبكش نردوا نرده للمحل
أنا : متعبين أرواحهم و الله
زهور : تعبك راحه يا حنه بالقاسم مفضي روحه خذانا معاه عشان نختارولك حاجة سمحه عشان بيان عمتك إن شاء الله يعجبك
أنا ابتسمت براحه : أكيد سمح
رندا مدتلي الأكياس : تفضلي
ا٦نا خذيتهن ركبت قستهن كان فستان قصير لعند ركبه أبيض ضابط عليا كان شبه كم من فوق فيه زي المربع المقلوب بالون الأسود مربعات مفتوحات مع اكتاف فيه مربعات مفتوحات الحق عجبني بكل كان خيال عليه كعب أسود و شوي ميك آب و عطر خيال معاه بروش بسيط و سمح لبست الفستان و كعب و نزلت
رندا : أو ماي قاد خياااال
أنا ابتسمت
زهور : تجنني جسمك تحفه اقسم بالله
أنا : ههههه تسلمي
زهور : اطلقي شعرك خاطري نشوفه
أنا حولت قبصه طاح شعري نزل بعد ظهري بواجد
رندا فتحت فمها : تبارك الرحمن
زهور ربي يعينك ع خويا و خلاص : أحم ما شاء الله ربي يحفظك
رندا : جبتلك بروش ديري لفه بسيطه
نجوي : قليل و نادر ماتطلق شعرها في المناسبات
تليفون زهور رن
زهور : حي علينا هذا بالقاسم
رندا صبت : تبيديه بالهناء إن شاء الله
أنا : خليكن مازال بدري
زهور : لا وين مرة اخرى إن شاء الله هي بالسلامه
سلمنا و طلعن ماهر خاش بسفرة القهوة كان مع بالقاسم
بالقاسم : ها شن جاء عليها
رندا : تقول مفصل عليها الله أكبر
..........
رن الحسن ع بالقاسم حدد الفرح بعد خمس شهور ع نزلتهم و ع امتحانتي دزولي فلوس قعدت ناخذ في الحاجات الثقيلة و الآلات الكهربائية خذاهن أكرم و نجوي هدية و جمال و سمية خذوا تنسيق الحنه و القاعة قعدوا خوتي يحجزوا في الحاجات و قبلها يصورلي عشان نختار علقت نت ع لابتوب جايبه ليا بابا الله يرحمه اخترت الفيلو و اكسسوارات الفيلو و فساتين كويس دبش عادي ودبش طلعه وكم ورغان و طاقم الحمام و مناظر للحوش خذيت كرستال كل شي نبيها من امريكا كنت مضغوطه في القرايا و الشغل و تجيهزات الفرح بالقاسم طول خمس شهور يشتغل ع الحوش و قبل الفرح بشهر سافر للمغرب رنت نزهه عليه وصاته ع حاجات بعد روح قالته يجبهن ليا كلهن جابهن عطاهن لماهر و عدا بعدها معش رن عليا ....
خوتي وصلو قبل الفرح جابولي كل شي طلبته كانت فرحتي بجيتهم ما توصفش
.........
يوم الحنة الصغيرة في الحوش لبست فستان أحمر داكن و لبست عليه طاقم ذهب خليجي عليه تاج ذهب بعدها بالساعتين جو عربي حنوني بخاتم ذهب جابولي كسوتي كاملة تعشوا و روحوا جني عماتي خشني للدار لبسني البودري جايبها ليا أكرم من طرابلس لبست عليه ذهب ماما
التاج و الشناقيل و طرف واحد من نبيلة ماما و خلخال و العقد متوسط
كملوا حوسه طرحلي الفراش عشان الحنه كان أحساسي عادي فاقده ماما و بابا مع هذا كله خوتي الأربعة مش مقصرين معايا نهائي حنوني سهرن بنات و أنا كانت عيني ع تليفون بس بالقاسم مارنش عليا نهائي رقدت في الصبح
ثاني يوم حولولي الحنه كانن خالاتي و عماتي معايا و فتحية قايمه بالواجب و فرح كان كبير مافيش و لا حاجة ناقصة وداد كيف برانية بضبط و آمال تحوس بس ما جتش شوري و لا سالتني ع حالي نبي نطلع للمزين رن تلفوني ابتسمت خشيت دار سكرتها
أنا : أيوه صباح الخير
بالقاسم : صباح النور شن جو
أنا : الحمدلله كيف حالك أنت
بالقاسم : تمام قالولي نجي أنا ناخذك من حوش هلك توا أنا طالع للمزرعة مع الشباب توا نجي مع ال8 تمام
أنا : تمام
بالقاسم : هيا اوكي
أنا : سلام
سكرت تنهدت نزلت عديت للمزين شالوني الحسن و الحسين بروحي خشيت قمعزت
.........
نزهه : رنيت عليه قالي في طريق إنت وصلتي
آمال : اها وصلت
نزهه : خلاص شويا و يجيها.
آمال سكرت طبست عليا : قالتلك في طريق
أنا هزيت راسي أنا نرعش بعد نص ساعه سمعت البيبات و الألعاب النارية وراء بعضهن زدت خفت
هلي قعدوا يركبوا في السيارات نجوي لبستني و نزلن لي الطرحه طلعت آخر وحده طلعتني لعند جنان
بالقاسم خش : احمم
أنا برمت نرعش مع بعضي جسمي مش حاسه بيه نهائي
بالقاسم مسك مرفقي و قعد يمشي فيا و ساكت
أنا خايفه ركبت في السيارة برم ركب جنبي كان في شاب قدام يسوق فاتح أغاني ع الآخر ساكتين طريق كلها وصلنا نزل و نزلني معاه خشينا انقلبت القاعة تزغريت و غناء
نزهه قربت من بالقاسم : تبي تخششها أنت
بالقاسم هز رأسه معني اها
خشينا للقاعة ركبنا للمسرح
بالقاسم حول الطرحه قرب جنب وذني : مبروك
أنا نرعش : يبارك فيك
المصوراتية و هله جوا قعدت تصور فينا و الفرقة قالبه القاعة و البنات يتعايطن معاها
جن اجديده أم بابا و أم ماما صورن معانا كملنا تصوير قمعزنا أنا واضح عليا الخوف من شكلي و رعشت ايديا
نزهه ركبت توشوش لبالقاسم : قتلك هدرز مع بنت شويا شوف وجهه قريب تموت من الحشمه و أنت مش معبرها بكل ابتسم في وجها ع الأقل تقول مغصبينك
بالقاسم يهز في رأسه و يضغط على سنونه و خلاص
نزهه نزلت بالقاسم بحت فيا
بالقاسم : كنك
أنا نرعش : لا شي
بالقاسم حط ايده علي ايديا : مصقعه نخففوا التكييف و لا شنو
انا اول ما حط ايده ع ايديا تقول جمره طاحت في اميه ابتسمت شويا : لا تمام
بالقاسم ضغط ع ايديا بخفه : خايفة و لا مرتبكة ارخي روحك ما تخافيش
أنا هديت ابتسمت
بالقاسم حول ايده نزهه ركبت بالطاقم اللازوردي بدلنا دبل سلحلي طاقمي و لبسني الطاقم اللي جايبه ليا كل ما يده تلمس رقبتي و إلا أيدي جسمي ينتفض مع بعضه قربت نزهه بالتورته قصيناها
بالقاسم : خلاص هكي
أنا قربت : شنو
بالقاسم حط فمه جنب وذني : خلاص معش فيه شي انديره
أنا هزيت راسي اها
بالقاسم : معناها هي نروحوا
أنا يبست
بالقاسم صبى
نزهه جت : تبي تروح
بالقاسم مسك يدي و صباني و عطيها بالظهر يهز في رأسه
نزهه : بس بالقاسم
بالقاسم و لا معبرها : جيبلي اللي كانت لابسته بسرعه
نزلنا و البنات ورانا
بنات : اجعل ليلتها ضاوية كيف طريق الزاوية، اجعل طريق ضي في شي ما يشمت فيكي حي
نيروز بصوت عالي معاها بنات عميمه كريمة : العين اللي عزوتها خوت .. تعيش عزيزة نين تموت
عميمه حليمة لابسه عباية و خمار : ديري بالك من روحك كيف ما فهمناك كل شي بشويش و ما تطلع منك العيبه أي حاجة يقولك عليها جاوبك نعم و حاضر خليك كيف أمك بنت أصول ما يحكو عليك الا بالخير
أنا قعدت نبكي : حاضر
عميمه كريمة : اسسس ما تبكيش
بالقاسم طلع خشوا خوتي الخمسه في الريسبشن حضنتهم قعدت نبكي معاهم جسمي يرعش جبتلي نسرين عصير شربته عدلت ميك آب طلعوني خوتي ركبوني في السيارة
الحسن و الحسين : ديري بالك على روحك
جمال : أي حاجة تصير معاك نحن في ظهرك ماتخافيش
أكرم : تنقصك حاجه رني عليا
ماهر : ربي يهنيك ان شاء الله
أنا : إن شاء الله ان شاء الله
بالقاسم قدم خوتي وخروا من السيارة
الحسن : حطها في عيونك خذيت أغلي حاجة عندنا
الحسين حط يده ع كتف بالقاسم : امانه هذه
بالقاسم : حاضر إن شاء الله
أكرم : دير بالك منها يا بالقاسم
بالقاسم : إن شاء الله
خوتي وخروا بالقاسم ركب طلع ساكت طول الطريق وصلنا نزل جاء نزلني معاه ماسكني قعدنا نمشوا لين خشينا للحوش كان بالقاسم يبي حوش لا فندق و لا منتجع فتح الباب
بالقاسم : تفضلي
انا خشيت متريحه بس نرعش مع بعضي : ششكرا
بالقاسم يمشي و أنا وراءه قمعز في الصالة قمعزت مقابلته مازالت فيا الرعشه
بالقاسم سلح الجاكة : نبي انبهك ع كم حاجة يا ريت يتنفذن قبل كل شي
أنا هزيت راسي نرعش
بالقاسم : اللي تصير في الحوش تموت في الحوش أي حاجة بيني و بينك ممنوع حد ثاني يسمع بيها
أنا : حاضر
بالقاسم : ثاني شي نحن عايلة فيها بنات و كنات لا نبي حد يقولي مراتك قالت لا مراتك دارت و لا نبيك تجيني تقولي فلانة قالتلي أو دارتلي اقطاف صبايا ما نحبش نهائي
أنا : حاضر
بالقاسم : و حوش هلي ما فيش داعي للمكياج و بالنسبة لدبشك أنا متأكد من أنك مُحتشمة فيه تمام هكي
أنا هزيت راسي : حاضر
بالقاسم : الدور الثاني للمنامة كان تبي تركبي تغيري دبشك تفضلي أركبي خوذي راحتك أنا دبشي قاعد معايا
أنا سلحت الكعب و صبيت خذيته و ركبت للدار
خشت سلحت و دوشت و غسلت المكياج و طلقت شعرها يجف و دارت عليه منشف و لبست روبي سكري طويل حرير الطرف الفوقي مستور نزلت عليه و معايا بدلة الصلاة
حولت المنشف عن شعري و حطيت توكة فيه لكن مطلوق على طوله قبل ما نبدوا في الصلاة رن بالتلفون حكي و سكر و أنا كنت نبحت فيه من بعيد
بالقاسم : هي نصلوا
أنا لبست بدلة الصلاة
صلينا قرب مني قعدت يدعي
و رن الجرس الباب طلع بالقاسم خش في يده سفره العشاء ساخن
تعشينا و أنا كنت ناكل بشويش بالقاسم ما يبحتش فيا بكل كملت صبيت
بالقاسم : توه نرن ياخذوا السفرة خليها
أنا قعدت نمسح في الطاولة و نرتب : تمام ع راحتك
رن بالقاسم خذا سفرة و طلع بيها حذوها
أنا درت عصير و عطيته له و أنا ميته من الخوف و ما قدرتش نرفع عيني فيه بس حسيته مرتبك
بالقاسم : هلك شن برنامجهم يبوا الموضوع يتم اليوم و يكلموك و إلا كيف
أنا تحشمت بكل معش قدرت نتحرك بصوت دوبك يستمع : مش عارفه محد حكي معايا
بالقاسم : معناها نتموا اليوم حتى كان كلموك تبقي متريحة
أنا سكتت
بالقاسم : هيا نركبوا للدار
ركبنا خشينا للدار كل مرة واحد يخش للحمام أنا متحشمه و بالقاسم مرتبك
طولنا ونحن في حالة هدو قمعزنا ع السرير
بالقاسم برم عليا : احم ارقدي على ظهرك
برم دار إضاءة خفيفة
أنا خايفة موووت رقدت قرب مني ....
بعد نص ساعه وخر
بالقاسم : رحمه ارخي روحك ما تخافيش
أنا نبكي هزيت راسي
بالقاسم رد قرب مني ...
و وخر بعد ساعه و عشر دقائق
بالقاسم تنهد : مايصير شي هك راه ارخيلي روحك قلتلك تسمعي فيا إنت
أنا نبكي مغمضه عيوني : أها نسمع فيك حاضر باه
بالقاسم رد نزل عليا مابش يبحت فيا و انا نبكي رحنا في خبر كان ....
بعد نص ساعة وخر
بالقاسم براحه : مبروك
أنا مارديتش نبكي
بالقاسم بحت فيا : آسف كان وجعتك
عطاني منديل وغطاني وخر لبس و طلع جابلي امية خش للحمام الضيوف
أنا مسحت دموعي صبيت شربت اميه و خشيت دوشت و لميت السرير قعدت نغير في الفوط بشويش
بالقاسم خش خذا الفوطه طرحها ع سرير : ارقدي تريحي
أنا تمددت ع السرير بالقاسم رقد
أنا من الألم و تغيير المكان عليا قعدت لعند طلوع الشمس واعية حاطة مخدات رافعة روحي بعد أذن الفجر بالقاسم ناض
بالقاسم : تصلي و لا
أنا صبيت : لا نبي نصلي
و صلينا رد رقدنا كل حد فينا ع طرف السرير
........
#يتبع...
تأخير مش بيدي تعكر مزاجي الحق بنت صاحبتي في
المستشفى و خالو حتي هو و امس خالتي خشت و حالتها خطيرة
#Fafy fa
