#وجودك_أمان 🤍
الحلقة [11]
زهور : سامحيني يارحمه
عميمه : الله يرزيني فيكن يا بنياتي المراة عروس خاشه المطبخ ليش
أنا مسحت دموعي : لا ياعميمه ما تدعيش أنا نبي نساعدها
بالقاسم خش : أمي زهور
رندا طلعته
بالقاسم : من اللي فتحت يدها ما فهمت شي وين أمي كويسه
رندا : كويسه ماما بس
بالقاسم طول قص عليها : زهور كويسه
رندا : بالقاسم رحمه اللي فتحت يدها
بالقاسم قرن حواجبه : وينها طلعيها ليا
عميمه مسكتني من ايديا اللي أنا ضغطتهن ع بعضهن : امسك نلبس جلبابي و نجيك بيش نسعفوها
بالقاسم بحت في عيوني و بعدها ايديها : لا خليك رندا جيبي عباية بسرعه
رندا عدت تجري جابتلي عباية جتني لبستها ليا بشويش
خالته : ربي يطمنكم عليها يا اوليدي
بالقاسم : إن شاء الله خير " بحت فيا " هيا
طلع و أنا وراءه ركبت السيارة طول طريق ساكتين لا قالي من شن و لا كيف انفتحت يدك وصلنا نزل و نزلني خشينا للعيادة دفع طول للطواري خشيت ع الدكتورة قعدت نشرحلها قلتلها خياطة 8 بونتو نظفت الجرح و خيطت عرفتني دكتورة شوي وطلعت لقيت بالقاسم عيونه في التليفون قارن حواجبه
أنا صبيت جنبه : كملت
بالقاسم فطن : حمدلله على سلامتك
أنا نزلت راسي : الله يسلمك
بالقاسم مسكني من مرفقي : هيا
طلعنا و الحق ما عطيتش إهتمام عشان واضح أنه مش معدل عليا طلعت لا بحتت فيه و لا حكيت حرف لين وصلت للحوش نزلنا خشينا بالقاسم تليفونه رن وخر و أنا لقيتهم كلهم في الجنان مشغولين لدرجة لقيت نزهه بعويلها و خالتهم نجية ما روحتش عشان تطمن التمن عليا
عميمه : حمدلله علي سلامتك يا بنيتي إن شاء الله هذا حد السو
أنا : الله يسلمك عميمه ساهلة
نجية : حمدلله على السلامتك عوينه و طارت
ريحان ضحكت نزهه و رندا و زهور كشخن عليها
أنا مابيتش نبحت فيها : الله يسلمك
زهور قربت مني تبحت في يدي مع جيت بالقاسم
عميمه : كم بونتو يا بالقاسم
بالقاسم ارتبك عشان مش معايا و لا سألني بحت فيا كانوا كلهم يبحو فيه
أنا حكيت بدون صوت : ثمانية
بالقاسم ركز ع فمي عرف رقم طول رد : احم ثمانية بونتو
عميمه : يا نعلاي بنيتي سلامتك كبيرة
أنا ابتسمت فوق النفس
محمد خش بحت لقانا في جنان : إن شاء الله طالعين تستقبلوا فيا كلكم
بنات ضحكن عويل نزهه عدوله يجروا
محمد رفعهم هما الاثنين : هوووباااا يا وووحوش
بالقاسم يبحت فيا و أنا نبحت في محمد
محمد قرب منا : و الله احرجتوني يا جماعة الخير يا خالتي إن شاء الله قالولك تعالي استقبلي حمادي معانا
نجية : هههههه ، وينك يا رزيل لا تجيني و لا تسأل ع خالتك
محمد نفخ روحه : أشغال يا خالتي أشغال
نجية و بنات يضحكن
عميمه و نزهه يوشوشن
ساجده ضحكت : خير يا حمادي حمدلله على سلامتك
محمد : الله يسلمك أصلية و الله بجوده بيك
رندا : رحمه كانت في مستشفي
محمد انفجع بحت في بالقاسم و بعدها فيا : شن في إن شاء الله خير
بالقاسم : يدها انفتحت
محمد : درتو طحنه بطبابيق و سواطير و إلا كيف
بنات يضحكن
زهور : لا تغسل في مواعين يدها انفتحت
محمد : لا تبيلها حولي يا بالقا سلامتها كبيرة
بالقاسم ابتسم و هز رأسه
عميمه : مش خسارة فيها جمل مش حولي
محمد : اوووه لا حمدلله على السلامة يا دكتورتنا
الباب دق بالقاسم عدا يفتح
أنا : الله يسلمك تسلم
بالقاسم : خالتي هذا عمي يونس قالك هيا
عميمه : خليك خيتي مازال بدري تعشي معانا
نجية : بدري من عمرك هذاك هو " بحت في بناتها " عدن البسن جيبلي جلبابي
بالقاسم و محمد طلعوا مع راجل خالتهم و البنات كلهن خشن و خشيت معاهم لبست خالتي نجية و بناتها و طلعوا مع خشت عمي و سمعها و انفجع حمدلي ع السلامه قعدت معاهم للعشاء و جاء اسماعيل سلم عليا و حمد ع السلامه قعدوا يهدرزوا مع بعضهم و عميمه ما خلتني اندير شي تعشينا و روحنا...
بالقاسم دوش و رقد أنا وجعتني حركته عديت للدار اللي جنب جناحنا قعدت فيها و نبحت في يدي بكيت بكيت لين تريحت صبيت غسلت وجهي و أفكار تعبني رديت للدار لقيته راقد قعدت نبحت فيه لين نعست
.........
سادس يوم ليا كان مع بالقاسم نضت بدري ع صوت و هو يفتح
في الهدية اللي جبتها له طاقم حلاقة كهربائي و مرطبات و عطور و ساعة و دبلة فضة خذا طاقم الحلاقة و خش للحمام
أنا ما تحركتش مادرتش فطور ما عنديش نية قعدت في السرير
بالقاسم طلع من الحمام بحت فيا لقاني واعية : صباح الخير
أنا صبيت : صباح النور
خشيت للحمام بالقاسم يلبس أنا طلعت و نزلت درتله قهوة و الفطور له هو بس بالقاسم نزل فطر و طلع أنا رديت رقدت بالقاسم طلع ع الغداء دزولي رندا بالسفرة حطتها لقت مواعين الفطور حلفت تغسلهن علي ما درت فيها بس غسلتهن و طلعت رجيت بالقاسم لين جاء تغذينا ما خلانيش نغسل المواعين شالهن للهله و رد رقد لعند الساعة 7 و ناض خش للحمام و نزل لقانى نتفرج
بالقاسم : احم
أنا فطنتله بحتت فيه
بالقاسم : ديرلي قهوه
أنا صبيت بالسيف : حاضر
بالقاسم قمعز أنا درت قهوة و جيته حطيتها و قمعزت ع الكنبه أخرى
بالقاسم خذا الفنجال : بكرا نعدوا لهلك و إلا يدك نأجلوها
أنا فرحت : لا نبي نعدي عادي
بالقاسم شرب قهوة : تمام نطلع توا عندي موضوع نكمله و نجي نلقاك واتية
أنا ابتسمت و فرحت : وين نمشوا
بالقاسم صبي في يده الفنجان : احم نغيروا ع الجرح
أنا تلاشت ابتسامتي طول : لا بكرا الموعد مش اليوم
بالقاسم شرب أخرى و حطه في السفرة : عارف بكرا بس بكرا صعب عشان هلك نحن ماشين في العشية
أنا صبيت هزيت راسي : تمام كيف ما تبي حاضر قلتها لأعميمه
بالقاسم : أكيد من أول أمس قلتلها
أنا اندهشت أنا آخر من يعلم ع اليوم قالي الأسبوع الجاي بس ما حدد يوم : باه تمام
بالقاسم : إن شاء الله مش ح نطول
ركب لبس توته كاملة و كويش و طلع خذيت السفرة غسلتها رديت قمعزت غاب ساعتين و نص نسمع في حد يضبح بإسمي لبست بدلة الصلاة طلعت نجري لقيت عميمه و البنات في وجي ميتات ضحك ع محمد راكب فوق الحولي و منظره متبهدل و يضحك و بالقاسم كيف ما طلع رد مش ملبز حتي كويش
أنا فنصت و ابتسمت : كنكم
محمد : امسكي راجلك علينا وين هذا و الله بهدلني بهدله عمرها ما صارت معايا
أنا ضحكت بحتت في بالقاسم لقيته نظيف
عميمه : أنت كنك معفن روحك مش كيف خوك
محمد : أنا حمادي الفلاني نبقي نبرم بين الزرايب في نص الليل عشان حولي ما نذوق منه إلا قطعة لحمه
أنا و البنات نضحكوا
عميمه تفنص : حمادي اسكت المراه
محمد : ما فيها اسكت لا و يقولي اشمر شوفه يا حمادي الحولي نبي نشيله لانسابتي يا عليك معيلة
أنا بحتت في بالقاسم و ابتسمت
بالقاسم مصبي بعيد شوي بس يسمع فينا : كملت تشفيط انت
محمد : و الله يا باشا ع راحتك كان تبيني نحكيلهم كيف طحت و أنا نجري وراء الحولي اللي جت عليه عينك عادي نحن في الخدمه
بالقاسم ضحك بحت في عميمه و البنات : صح طاح في نص زريبة الراعي السوداني قعد يضحك عليه
بنات اطربقن ضحك
عميمه تضحك : طيح سعدك تقول ما باتك عنده مزرعة فيها غنم
محمد : بالله عليك سكرلي فمك خير ما نطلق عليك كبش اللي ما عاد ثبت
أنا ساكته ونبحت
محمد تلفونه رن طلعه بحت فيه داره صامت و رده بحت فيا و في بالقاسم
محمد : وين نحطوا لكم يا عيت الهاي
بالقاسم : اربطه في الجنان الخلفي و نزل المصروف حطه هنا و بكرا توا نوض أنا نجيبها الخضرة
محمد : ما تبيش نشيل عليك المدام لهلها بالمرة
بالقاسم بحت فيه بنص عين عدا شور شيشمه يغسل في ايديه
زهور ضحكت : فيش تغسل بس
محمد يكر في حولي بحت فيا رقص حواجبه : يجامل في روحه فوتيه
أنا ابتسمت فوق النفس بالقاسم فطنلي رفع حاجبه و سكر الشيشمه و طلع خشش المصروف
محمد بحت في رندا : وتيلي دبش بسرعة نبي نطلع عندي موضوع
رندا خشت
عميمه : بالقاسم عمتك عفاف قالت اعذروني مش جايا معنا
بالقاسم : تمام براحتها
رندا أضبح : زهوووووور تلفوووونك يرن
زهور خشت تجري
محمد : معش تبي شي
بالقاسم : لا منور خش
محمد خش : هي اوكي
عميمه حست جو فاضي : هي تصبحوا ع خير
أنا و بالقاسم : و إنت بخير
بالقاسم : وتي روحك أنا قاعد في السيارة
أنا هزيت راسي و خشيت للحوش ركبت لبست و طلعت طلعنا طول للعيادة غيرت ع الجرح روح بيا طول سهرنا شوي و أنا رقدت قبله بعدها بالقاسم قدم مخدته رقد كان متقرب مني صح في مسافة بس قريب ...
........
نزهه : خيال بدلتك
أنا : تسلمي ما تغلش عليك
نزهه مبتسمة : عليك أحلى يا رحومه
بالقاسم خش لقانى لابسه و امكيجه قعد يبحت فيا زمط ريقه
أنا مسكت الخمار طول قعدت نبحت فيه كان لابس بنطلون قماش و قميص شكله أنيق
بالقاسم فطن لروحه : واتين
نزهه مبتسمه : أها كملنا
بالقاسم برم : هي أنا لوطى
أنا لبست عبايتي بسرعة عشان ما نطولش عليه
نزهه فرحانه : شفتيه كيف بحت فيك
أنا بحتت فيها : أكيد قصده ع الخمار أصلا بدون ما يحكي أنا مانطلعش هكي
نزهه : الله ع التفسير بالله اسكتي شكلك ما تفهميش في نظرات الرجاله
أنا تنهدت،،، لأن صح أنا ما نفهمش و بالقاسم ما يوضحش عشان نفهم نظراته ليا
نزهه : هيا تأخرنا
نزلنا و لقينه ماشي جاي في الصالة أول ما سمع الكعب رفع عيونه طول بحت فيا لقاني بالخمار بحت في نزهه
بالقاسم : احم هي
طلعنا
عميمه : عدي أنت و مراتك أنا توا نركب مع ناصر
بالقاسم : بالك ضيق
عميمه : لا لا اسماعيل في اىطريق هو مراته
بالقاسم : تمام
عمي جاي شوري بالعكوز : رحمه
أنا برمت شوره : نعم
عمي طلع علبتين : هذه مني لك هدية
أنا نبحت في العلب زمطت ريقي : تسلم يا عمي ربي يطول في عمرك
عميمه و بنات مبتسمات
أنا خذيتهن : شكراً
عمي : إنت قدرك أكبر من هكي
أنا انحرجت الحق فرحت بكل بالكلام كل مرة نحس ربي يعوض فيا بهل بالقاسم حتي لو بالقاسم كلامه محدود و جاف في معاملته معايا : ربي يطول بعمرك و يديمك لنا
عميمه و البنات : يارب إن شاء الله
عمي : هي نربحوا
بالقاسم بحت فيا : ااه هي اطلعي من هنا
طلعنا و أنا وراه فتحلي الباب و يبحت في الشارع سكر الباب برم ركب
بالقاسم : احم بسم الله
درس اسماعيل و طلعوا كلهم
عمي و عميمه ركبوا مع ناصر و مراته عويلهم عند هلها
و البنات ركبن مع اسماعيل و أميمه محمد بروحه
أنا فرحانه عشان نبي نشوف خوتي وصلنا نزلت دقيت بالقاسم في سيارة ماهر فتحلي رفعت خماري
ماهر : يا مرحبتين " قرن حواجبه " كنها يدك
أنا ابتسمت حضنته : غير سلم ساهله
ماهر حضني : شن جوك شن دايره
أنا وخرت : حمدلله
ماهر : و كنها يدك
أنا : انكسرت في يدي طاسة ساهله كيف حالكم انتم طمني وين باقي خوتي
ماهر : تمام قاعدين كلهم جوا وين بالقاسم
أنا : برا و عربي حتي هما
عميمه : السلام عليكم
فتحية طلعت : يا مرحبتين بيكم تفضلوا
ماهر برم طول و وخر و عميمه و البنات و سالمين و أميمه خشن
فتحية تسلم و ترحب طلعن آمال و نجوى و سمية و بشرى مراة الحسن و رشا مراة الحسين يسلمن
خشينا و طلعوا خوتي خششوا عمي و بالقاسم و ناصر و اسماعيل و محمد للمربوعة كان استقبال جميل جداً الكل فرحان
نجوى : كنها يدك
أنا حاضنه حمد : بعدين نحكيلك
نجوى فهمت : و الله فقدناك كيف حالك
أنا نبوس في حمد : الحمدلله كويسه طمنوني أنتم كيف حالكم و كيف حال خوتي
نجوي : الحمدلله بخير
فتحية : نوروتنا يا خيرية زارتنا البركة
عميمه : الله يبارك فيكم و ينجيك
بشرى : ما تبيش تطلع شن اندير
رشا : نعنها ماطلعت نحن شن دخلنا تفاهم معاها آمال أختها
بشرى : طيح سعدها حسدية بكل
سمية : ما شاء الله يا رحمه طالعة تهبلي
أنا بحتت في زهور : لمسات زهور
سمية بحتت في زهور : لا شكلك إبداع في المكياج
زهور ضحكت : عيوني جو هذا المكياج و الدبش
قعدن يهدرزن بدن صبايا خوتي في العزومه كانوا دايرن كل حاجه فخمة في كل شي سوا قبل العشاء و إلا العشاء و بعد عشاء
هدرزنا و غيرنا جو طلعت لخوتي سلمت عليهم هدرزت معاهم في الصالة و انفجعوا ع يدي قلتلهم كيف أنكسرت طاسة و وداد تشوف فيهم كيف خايفين عليا كلهم كشخت عليا و خشت قمعزت مع عربي و لا سلمت عليا و لا عبرتني بدن صبايا خوتي و آمال خشن للمطبخ عشان العشاء خوتي طلعوا و أنا خشيت مع عربي وداد طلعت كلمتني نجوى
أنا : ديري اللي يريحك بس كان ثلاثة اسفر خير بيش يخاذوا راحتهم
نجوي : حتي أنا قلتلها مادام بسلامتهم واجد 10 رجاله
وداد : صراحه الصرف اللي صرفناه في ه المناسبة السوده حاجة خيالية
آمال تفنص توشوش : أسسس
أنا كنت نشرب في اميه شرقت صبايا خوتي الأثنين و معاهم نجوي مصبيات ساكتات
جمال خش يستعجل بالعشاء
وداد ما فطنتش بجمال علا صوتها شوي : عليش تفنصي إنت هذا كلام الحق عليك كر كروه خوتي ع البيان و الدفع و الفرح و توا عشان الزوره دفعتهم مح كبدوهم علي هالزيزة السوده
جمال انفصل : ودااااد " قرب مسكها من مرفقها" اقسم بالله اقسم بالله نسمع حسك طالع نكرك من شعرك و نمد عليك يدي
وداد خافت : مش قصدي حاجة أنا عليكم أنتم بس كلكم فاتحين حواشين صرف عليكم هما جو بتراب الدار
جمال دفها : و إنت شن دخل ### أمك الراجل جاي بقدره جايب حاجته كلها نحن اللي عزمناهم كلهم و أصرينا يجوا
آمال : اسكتوا خلاص الضيوف برا
أنا قعدت نرعش مع بعضي خفت جمال يضربي ردلي إحساس قبل ما نزوج قعدت نتخايل في جمال يبي يقرب مني يضربني دمعتي نزلت طول حسيت بطني تلوي فيا
آمال : الله يربحك جمال خلاص فوتها
الحسن و الحسين خشوا : كنكم
أنا زرقت جيت وراه خوتي
الحسن فطن قرن حواجبه فنص في جمال طول
آمال : ما في شي غير جمال يستعجل فينا بالعشاء
الحسين : صح طولتوا هيا الناس ترجى
قعدن يحطن و وداد طلعت تكشخ عليا طلعوا خوتي للمربوعة و أنا طلعت قمعزت جنب عربي معش تحركت لين تعشينا كملت العزومه بعد العشاء
أميمه : أها إنت أختها من بوها
وداد : أها للأسف
أميمه ابتسمت : عليش للأسف
وداد : و الله ماني عارفه كيف خذوها عربك يضحكوا
أميمه تبي تعرف أي حاجة عليا : عليش كنها هيا
وداد : كانت مخطوبة لولد عمي بعدها عقل سيبها هههه
أميمه ضحكت : كيف ما فهمتش
وداد عجبتها و انسجمت معاها : نبي نسألك قبل شن جوه بالقاسم
أميمه : تبي الحق لنقانه فلوس بس حصلة بكل مُعقد عنده حدود في كل شي إلا مع سلفي الصغير محمد جوهم مع بعضهم غير و خوه هذا يشغل فيه معاه
وداد رقتلها شوي : أها
أميمه : قلتيلي كانت مخطوبه يعرفوا اعربي
وداد : و الله ماني عارفة
آمال خشت قالتلي قالوا هيا قبل ما نروح أكرم عطاني مردود انسيانه ذهب ثقيلة سلمت عليهم و طلعنا...
..........
أنا أول ما وصلنا حولت العابية طول خشيت للحمام عشان عرفت أني مرضت غسلت جلدي و غسلت المكياج و لبست بجامه و طلعت لقيت بالقاسم كيف خاش للدار جاء مقابلني انفجعت
بالقاسم خطم من جنبي ارتبك رد مسكني من مرفقي : ما ترقديش نبيك
أنا من قربه ليا خفت حتي نطلع صوت سكتت
بالقاسم خش للحمام
أنا قمعزت ع السرير خايفة و نتألم بكل ومتحشمه نقوله اني مريضة
بعد ربع ساعة طلع بالقاسم من الحمام صلى و جاء جنبي في السرير قرب مني حط راسه على رقبتي يشم فيها و يحرك في خشمه على رقبتي و مغمض عيونه يقرب فيا له نفسه في رقبتي
بالقاسم يفتح في ابطم البجامه
أنا مغمضه عيوني قلبي يبي يطلع : ب بالقاسم
بالقاسم وخر راسه بس بحت فيا
أنا فتحت عيوني بشويش لقيته قريب شكله تقول يقولي احكي بسرعة
أنا نزلت عيوني بحتت فيه اخرى : أنا " زمطت ريقي " أنا مريضة
بالقاسم وخر بكل قرن حواجبه : و كنك ما تحكي باهي
أنا نزلت عيوني
بالقاسم قمعز عطاني بالظهر تعصب : مرة أخرى قوليلي قبلها ما تخلينيش هكي
أنا ساكته
بالقاسم برم عليا بسرعه : فااااهمه
أنا انفجعت نطيت بحتت فيه : حاضر
بالقاسم خذا الدخان : نبوا نبدوا في الحركات شكلنا
و طلع من الدار نزل للمطبخ شرب اميه فتح باب المطبخ اللي ع جنان بشويش و طلع صبي قعد يسمع
أميمه مقمعزة على كرسي في الجنان : تعرفوا أنها كانت مخطوبه
رندا : من هذه
أميمه ضحكت : رحمه كانت مخطوبه للولد عمها اسمه حميد قالوا
رندا : أها نعرفوا و باهي
أميمه : سمعت بعد خطبة كم سنة هذ هو اللي فسخ
رندا تنرفزت صبت : و إنت شن دخلك أصلا
اميمه : بشويش يا حنه هذا وين سكرت أسبوع و أنتم قريب ترقدوها على ذهب
اسماعيل خش : اووي هيا سيارة والعة عويل راقدين في سيارة
رندا : راجلك جاء بالسلامة
أميمه تكشخ : تصبحوا على خير
رندا ما ردتش أميمه روحت
بالقاسم طلع و ماعدلش ع كلام أميمه قمعز يدخن
أنا غمضت قعدت نبكي
بالقاسم قعد ساعة هو يدخن برا خش و ركب قعد حايس طلع خاش ما تريحش لين دوش اخري قعد نص ساعة و رقد
.......
محمد : صباح النور
عميمه : خوك طالع من امبدري
محمد : باهي يا أمي نفطر
عميمه : لا افطر يا باتي غير استغربته طالع من ال7
محمد : أكيد ماشي للمكتب يعني .
البنات ناضن قمعزن يحوسن و محمد طلع
......
رندا : أهلا
أنا : اهلين تفضلي
رندا : لا جبتلك غذاء و قالتلك ماما رنيتي ع عيت جدك عشان نمشولهم بكرا
أنا : أها أمس رنت عليهم أمي
رندا : تمام معناها زهور توا تجيك عشان تمكيجك
أنا : باه
رندا : خلاص باي بالقاسم ع خشته
أنا هزيت راسي رندا عدت بعد عشرة دقائق جاء تغذا ماحكش معايا حرف خش قيل شويا لعند المغرب ناض توضى و صلى شرب قهوة
بالقاسم : ألبسي عشان غيار الجرح
أنا صبيت بالسيف لبسنا و طلعنا غيرت ع الجرح شراء عشاء من برا و روحنا حطني و طلع جاء في الليل لقاني راقده أنا في الأصل ما تحركتش من الفراش عشان أنا رقيقه فمرضتي بالمرضات
غير و تعشي و رقد جنبي ثاني يوم جتني زهور مكيجتني و لبست و عديت للعيت جدي أنا و عميمه و بالقاسم تكى شراء قاتو طبقين و كم نوع معاه صندوقين مشروب و علبة شوكولاطة كبيرة و منظرها خيال و الواضح من شكلها غالية وصلنا لقينهم يرجوا فيا كلهم في جنينة المزرعة
بالقاسم نزل جاء عند بابي فتحه ليا و نزلني أنا تفجأت و أصلا مافيش مساحة بين السيارة و الباب سكتت
بالقاسم ماسكني : أي منهن حوش جدك
عميمه ورانا
أنا : اللي في النص
شباب كلهم وخروا من الباب و حميد يبحت فينا
بالقاسم ركبني من ع الدروج وصلني عند باب عيت جدي : خليكي هنا بيش نجيبلك الحاجة اللي تبي تخشي بيها
أنا ابتسمت : تمام
بالقاسم نزل بحت في جيهه خوتي و عمامي يهرول شور سيارته : السلام عليكم
ردوا كلهم ما عادا حميد : عليكم السلام
بالقاسم نزل الحاجات و حطهن ليا و عدا و أنا قعدت ندق فتحتلي اجديده و فرحت بيا بكل تحضن و تبوس فيا و عميمه خششنها صبايا عمامي و عماتي و تسلم عليهن سلمت عليهم كلهم نحضن فيهم إلا عيت عمي فوزي سلمن عليا باليد ما عدلتش
أنا : عميمه بالقاسم حطلي الحاجة كلمي وحده من البنات تخششها
حليمه صبت : باهي توا نجيك
اجديده : اسلحي عبايتك حبيبتي تريحي
أنا نسلح : كيف حالك يا اجديده طمنيني ع صحتك
اجديده : الحمدلله اكويسه طمنيني إنت وكنها يدك
أنا قعدت نحكيلها و عميمه تهدرز مع عماتي و فتحية
بالقاسم سلم على جدي باس ع راسه و سلم على عمامي و خوتي قمعزوا يهدرزوا
بدن البنات في العزومه طلعت قلتلهم كلمولي جدي من المربوعه الخارجية
جدي جاني : مرحبتين ببنيتي مرحبتين
أنا حضنته باست ع راسه و يده : كيف حالك يا جدي شن دايره صحتك
جدي : الحمدلله الحمدلله
حميد رفع التليفون ع أساس يكلم لحق جدي قعد مقابلني يبحت فيا
بالقاسم فطنله صبي
الحسن : كنك
بالقاسم : احم لا غير في حاجة في سيارة نسيتها
الحسن : اه تفضل
بالقاسم طلع من المربوعه و السيارة درسها جنب المربوعة تباعد عشان يشوفني خطم من جنب حميد رفع حاجبه فيه
أنا كنت نهدرز مع جدي حميد ماركزتش بعد جاء بس بالقاسم فطنتله بحتت فيه
بالقاسم شير براسه كان متعقد
أنا وخرت ع الباب : إن شاء الله ديما طيب يا جدي
جدي : الله يسلمك بنتي خشي خلاص
أنا خشيت لقينتهن دايرين عشاء تعشينا قعدنا شوي و روحنا
......
بالقاسم صبي مع باته برا أنا خشيت طول من التعب طول للحمام غسلت و غيرت و ظهري يوجع فيا رقدت ع السرير
عمي : أعزمهم قبل ما يسافروا خليها تشبع من خوتها
بالقاسم : إن شاء الله توا نكلمهم يوم كامل بكرا طالع لخوالها يسكنوا برا بنغازي واخذ معايا أمي
عمي : أنت أعزم خوتها قبل ما تسافر أنت و إياها و بكرا اطلعوا بدري روحوا بدري
بالقاسم : أها عارف
عمي : قلت لأمك
بالقاسم : سألتني امبدري قلتلها
عمي : باه هي تصبح على خير
بالقاسم خش و وراه باته : و انت بخير يا حاج
خش عمي لحوشه و بالقاسم لحوشنا ركب طول شافني راقده و نتألم مابش يقرب مني غير دبشه و رقد ..
.....
عميمه : درت غذاء لخوتك لعند ما جبت سيارتك هذه
بالقاسم : قلت نعدي بهذه خير
أنا كنت راكبه من لاوره و ساكته
عميمه : رحومه جدودك هذوما حتي هم مزارع
أنا : لا حواشين و جنان مش كبير بس هما من زمان يسكنوا برا بنغازي
عميمه : أها ما شاء الله ربي يزيدهم
أنا اتكيت ع ظهري شوي : إن شاء الله
بالقاسم فطنلي فتح تلاجة امتاع السيارة طلع شكاره برم عليا : هاكي هذا و في شكارة تحت كرعيك خوذيها
أنا خذيت شكارة اللي عطها ليا لقيت فيها مسكن انحرجت بس فرحت و لخرى لقيت فيها عصير راوخ و شيشه اميه و طرفين شوكولاطه كبار ابتسمت : احم
بالقاسم يسوق و ساكت
أنا خذيت مسكن و شربت اميه
بالقاسم درس جنب المطعم نزلنا تغذينا قبل ما نركبوا السيارة : تبيش الحمام
أنا تحشمت : لا لا ما نخشش لحمامات هذينا
بالقاسم هز رأسه و ركب
و طلعنا أخرى كان مشوار بعدها وصلنا ساعة 4 لقينا الحسن و الحسين بعويلهم و صبايهم و بالقاسم عزمهم ع الجمعة غداء و العشاء حتى باقي خوتي قاللهم كلموهم عشان طيارتهم السبت قعدنا لعند 9 تعشينا و روحنا خشينا لبنغازي ساعة 11 و نص من تعب الطريق بالقاسم دوش و أنا غسلت و غيرت طول رقدنا...
......
يوم الجمعة نضت بدري عديت لحوش عيت عمي و لقيت سالمين و أميمه و عميمه حلفت ع الغداء و العشاء و حوسه كلها في حوشهم عشان ناخذ راحتي مع هلي و نهدرز علي ما درت فيهن عشان نساعدهم ما خلنيش عميمه و البنات و نزهه جت روحوا الرجالة من صلاة الجمعة قعدوا في مربوعة حوشي ساعة واحد و نص جو الحسن و الحسين و بشرى و رشا و عويلهم جابين معاهم سقيطه كاملة و مشروب و بكلاوه خششهم بالقاسم للحوشنا جاني ولد ناصر قالي تعالي عديت سلمت ع خوتي و صبايهم قعدت معاهن جتنا عميمه هدرزنا شوي و حطوا الغداء تغذينا و بنات يحوسن بروحهن عمي و الشباب طلعوا للحوش لآخر بالقاسم قعد مع خوتي أنا مرة مع صبايهم و مرة مع خوتي شوي بالقاسم استأذن عشان نقعدوا بروحنا فعلاً طلع قعدت أنا و خوتي عشية كلها مع المغرب جو أكرم و نجوي و فتحية و آمال و العويل الصغار بالقاسم رن ع ماهر قاله تعال نرجوا فيك كان متحشم مايبيش يجي لقيت هلي كلهم قاعدين و بالقاسم يحوس طرحن البنات الجنان و دارن جو سلاطات بدوا الرجاله يشووا أنا كنت فرحانة بكل قعدوا معانا لعند 11 و روحوا
أنا دوشت و رقدت و بالقاسم كذلك ثاني يوم طلع بالقاسم حجز لتركيا أسبوع و منها لمصر قالي أسبوعين وتينا الشناطي يوم الأحد عدينا للتركيا...
.......
#يتبع...
.
.
.
Fafy fa#وجودك_أمان 🤍
الحلقة [12]
