اشنگ و اصبّر روحي ، اصبري ذوله اخوانچ الزغار خطية
بس شگد تصير اعمارهم بعد؟ طبو الكلية يمتى يصيرون مثل الأوادم؟
اندگت الباب صحت ـ صخاااام، صخامة الباب تندگ واحد منكم يفتحها
ماكو مستمرين بالصياح و العرك ، گمت غسلت ادية و طلعت للگراج
سألت ـ منو
ردت علية صابرين ـ آني افتحي بسرعة
فتحت الباب دخلت و هي تلفلف بعباتها بوستني وسألتني ـ خبزتو لا؟
نشفت ادية بثوبي و جاوبتها ـ جاي اشنگ هسة اصعد اخبز، شنو عدكم خطار؟
جاوبت ـ اي و الله جماعة اخوي، چا اجي وياچ نطگطگهن بسرعة
سديت الباب و رديت عليها ـ فوتي خية هلا بيچ
دخلت صابرين للمطبخ
دنِگت شالت صينية الشنگات و التفتت علية رافعتلي تك حاجب تسأل ـ چا وين الدولمة مو گلتي عشاكم دولمة
شلت المعجانة و رديت ـ الوالدة الله يسلمها مستغلة نومتي و ماخذة گدر الدولمة و رايحة لبتها، اني اتعب و الف دولمة و كبة و سمبوسة و امي تاخذهن لبتها
اخذت صينية حتى اشنگ الباقي و طلعت وية صابرين للصالة
چانت صابرين تضحك بس من سمعت عرك ذوله راحت البسمة و التفتت علية سألت - شبيهم شعدهم؟
خليت المعجانة على بايات الدرج و نزعت الشبشب و اني اجاوبها ـ مابيهم شي مشتهين دگة قليلين الأدب
دخلت الغرفة لگيت يقين گاعدة بالگاع تبچي و وارث واگف فوگ راسها يگلها ـ لا تبچين عليچ الله و الله انطيچ خمسة بس اسكتي هسة تجي...
گطع كلامه من شافني و گبل ما يحچي رگعته بالشبشب ما لاحه، نزعت الثاني و شمرته بي اجه بايده
صحت ـ الى متى ولكم صرتوا تداومون جامعة شبيكـــــــم زعاطيط؟ الى متــــــــى؟
يقين طلعت من الغرفة و وارث ردالي الشبشب و هو يضحك
جريته من كفشته لزم ايدي و هو يگول ـ آخ آخ و حق ابو فاضل ما مسويلها شي، خوية مغسلة بالشامبو مالتي
التفتت عليها ردت احچي و بطلت، بس احچي تنصبها مناحة و اطلع مدللة وارث اكثر منها
اخذتها صابرين و صعدن لفوگ و اني گلت لوارث ـ فوت للحديقة حوشلي خضرة و لا تسحبهن من الجذور وتخربهن ، و الله اخربلك شكلك اذا تخربهن
مشيت عنه و هو دخل المطبخ ، صحت وراه ـ وين رايح هيچ اخذلك ماعون ، معجانة شنو انتتتتتت؟
يمة يشلعون الگلب ، اني مرأة فد يوم اتزوج و اولي الله يساعد امي عليهم
صعدت لگيت صابرين واگفة تخبز و يقين لازمتلها غطة التنور
