جمع النبي الأكرم امير المؤمنين علي و ابنته فاطمة في يوم زفافهما و رفع يده بالدعاء و قال : اللهم انهما أحب خلقك إلي فأحبهما، وبارك في ذريتهما، واجعل عليهما منك حافظا، واني أعيذهما بك وذريتهما من الشيطان الرجيم
.
.
.
ردت عليها اختها ام أروى ـ غسق عيب احچي عدل
التفتت ام اروى للعلوية و گلتلها ـ الله يوفقهم و يهدي اهلنا عليهم ، كلمن هنا راد لبيته و ناسي كلشي الا هم خطية فرحتهم ناقصة
ردت عليها مرأت خال فقار ـ تكمل فرحتهم إن شاء الله و يرضون اهلهم، بس ادعولهم انتو يلا نترخص احنا
يقين گامت و طلعت من الاستقبال صاحت وراها أسيل اخت فقّار ما ردت عليها
أسيل التفتت لمرأت خالها و گلتلها ـ شفتي خالة هَم زعلت مني عود ليش آني دوم اوگع بيها؟
رديت عليها ـ يمعودة الصبح تنسى ليش زعلت، دراما كوين ما تعرفيها
فتحنا النيشان و شفناه على السرعة، لان اليوم ولادة الامام الجواد عليه السلام و هاي أول مرة فقّار يقرأ مواليد فــرحت وية العلوية بعد ما اتوسلت امي الف مرة
قرا ورة السيد و بالبداية چان مرتبك هواية و عود يقرا هوسات بس هواية غلط من الارتباك بس من قرا قصيدة و لا غلطة و تجنن قرايته
لأول مرة اخوته و گرايبه يحضرون فبيومها كلها مصورته و ناشرتله ستوريات
اتمنى لو عندي الاخلاص الي عند فقّار خلة كل عمله لله و ما خالطه شي من حب مدح النفس و حب السُمعة
كلها نشرتله ستوريات و سووله تاكات بس ما شارك و لا منشور واحد منهم
راقبت بالدوام و من خلصت مريت بالخياطة جبت فستان العقد و چادره
شگد چنت خايفة ما تجيبه عدل بس لا طلع مثل ما اتصورته
ما خلت بي بس دانتيل على طرف العباية حسب طلبي و لگيتها مشتريتلي تاج ورد هدية
اخذته و مريت للعلوية لگيتها منشولة و تعبانة فبلغت امي و بالليل مرينالها
تلگانا السيد سلم علينا و گعد بالصالة يدرس جهاله
صاحت العلوية ـ منو اجة؟ ما تجيني بس گلي اعديك إذا تحاچيني من بعيد؟
دخلنا لگيناها منشولة و متمددة سلمنا و فتنا يمها
جاي نسولف وياها و دخل السيد شايل صينية چاي انطانا الچاي و راد يطلع سألته العلوية ـ صدگ و الله هيچ تدور وجهك عني؟
ضحك السيد و رد عليها ـ إذا عديتيني منو يظل للجهال؟ عايز آني
العلوية اختنگت بعبرتها و گلتله ـ يگولون الزلم ترابط يم نسوانهم للصبح من يتخربطن... هذا اليخلي كمادات و هذا اليحير بحرارتها و آني رجلي عايفني و خايف لا اعديه ، ربي صبرك على هالابتلاء
