﴿وأمّا بِنِعْمَةِ رَبِّكَ فَحَدِّثْ﴾
.
.
.
من سمعت كلامها تركتلهن الموبايل و أخذت موبايلي و طلعت
نزلت كم درجة شفت النسوان يصلن بالصالة فتراجعت و صعدت للسطح
اول ما دخلته اتفاجأت بكمية النباتات الي بي … مظلل بتول اخضر و فوگ العريشة متسلق الياسمين الابيض
اكو كراسي بنص النباتات رحت گعدت على واحد منهم و اتصلت على امي و يقين
اتصلت خمس مرات بس محد رد فاتصلت على فقّار
رد بسرعة ـ ها عيني سلام عليكم اتذكرتينا و الله
گتله ـ فقّار تعال يمي الله يوفقك مخنوگة هواية
سألني بخوف ـ ليش حبيبتي
بچيت و گتله ـ فقّار گبل چنت أعاني من بيت جدي و شلون يگولون علية بدون أصل… هسة هنا يشوفوني عبارة عن ضيف مو بتهم و منهم
سكت و ما رد فبچيت
اتحسر و سألني ـ بالضبط منو الي سمّعچ حچي؟
ما جاوبت سؤاله و گتله ـ تعال و رجعني لأهلي ، فقّار آني وحدي هنا
رد علية ـ اولاً آني اجي و هذا وعد ، ثانياً يگول امير المؤمنين : بلاء الانسان من اللسان
يعني يا حبيبتي الي يمچ هُم اهلچ و يحبونچ بس ابليس اليوم حيل ضايج من الرحمة الي انتِ بيها فأكيد راح ينغص عليچ من جهة الايمانهم قليل
اخذت نفس عميق و گمت اتمشى بالسطح يلا گتله ـ فقّار اختي الزغيرة اسمها أماني و هاي عدها صديقة تراويها حساب رجال چبير و تگلها هذا شوگر دادي يحبچ و يعاملچ مثل بنته
ردد فقّار ـ هَههي تاهت المزعطة
ابتسمت و گتله ـ من حاولت احاسبهن طردتني و گلتلي لا تشوفين نفسچ منّا، يمكن الغلط مني چان لازم ادير وجهي و اگول مالي غرض
رد علية بسؤال ـ و هاي شگد عمرها؟
جاوبته ـ 17
سمعت يمه صوت اوراق يلا گال ـ شوفي حبيبتي يمكن هذا همين اختبار من الله تعالى ، يا ترى العائلة الي اتحسرتي عليها سنين راح تنتميلها لو تقصرين وياها؟
شفتچ شنو سويتي علمود يقين يا ترى راح تسوين نفس الشي وية اختچ هاي؟
رديت عليه ـ بس ما راح تتقبل مني مثل يقين
گال ـ و آني وياچ هيچ فكرنا و سولفنا عن وارث وين وارث هسة؟ هاي الخطوة الأولى من خطوات الشيطان
تردينها تكمل لو تخلصيها؟ مو اتجاهلنا خواتنا و بسبب الأغاني طاحن بمصيبة شكبرها
شفت شجرة تين فاستغربت شلون معتنين بيها فوگ السطح
اتقربت عليها و گلت لفقّار ـ فقّار اني فوگ السطح ، حبيبي لو تشوف الزرع و الترتيب و فوگاها بالسطح
