قال تعالى ﴿وَلَا نُكَلِّفُ نَفْسًا إِلَّا وُسْعَهَا ۖ وَلَدَيْنَا كِتَابٌ يَنطِقُ بِالْحَقِّ ۚ وَهُمْ لَا يُظْلَمُونَ ﴾
جُعل العدل الالهي ثاني أصول الدين لان من أنكره فقد سلك الخطوة الأولى الى جهنم
.
.
.
گمت ورة العلوية و دخلنا الاستقبال لگينا ابوطالب واگف يم معرض التلفزيون و يمه مزهرية مكسورة
گلتله العلوية ـ اطفر اطفر لا تدوس و تتعور
طفر و راح للمطبخ جابلها مكناسة و مكرافة حتى تنظف و وگف يمي يسألني ـ ليش تسولفن بصوت ناصي شعدچن؟
التفتت العلوية عليه و گلتله ـ يعني چنت تتسمعلنا و كسرتها؟
گامت و رادت تضربه بالمكناسة فشرد و العلوية دخلت للمطبخ و سوت حلاوة
توني استوعبت العلوية ليش چانت تحچي بصوت ناصي
طلعت تدري سالفة و بيها مكياج لازم ابوطالب يلز روحه بالنص
صبتلي العلوية بَلم حلاوة و راحت تصيح ابوطالب يوصلني
تالي طب السيد علينا و گلها ـ البسي عباتچ علوية ذوالفقار وياية
فات السيد للصالة شايل بته و الطفلة نايمة
خلاها على المخدة و گل للعلوية ـ علويتي بتنا فضحتني حسبي الله و نعم الوكيل ، لو ما اخاف من لسانها چا لزگتها براس ذوالفقار و سويتها بته
اخذت البلم و ودعت العلوية
لاگيت ذوالفقار بالباب سلم علية و ما قبل يدخل وية السيد لبيتهم
من درة راجعة للبيت وحدي اجة وياية يوصلني
شاف اللابتوب بيدي فگلي ـ عندي صاحبي يشتغل بمكتب ، ما تراجعون يمه؟
جاوبته ـ الكتابة سهلة نعرف نستخدم برنامج الوورد ، المشكلة بالمواد العملية
باوعت لملابسه و سألته ـ شنو چان عدكم مجلس؟
رد بسرعة ـ لا رحنا للحضرة و شفنا جماعة السيد
ابتسم و گال ـ العلوية الزغيرونة ما خلتنا نرتاح ؛ گعدنا وية جماعة السيد بين الحرمين و هي كل شوية تشرد و واحد منا يطفر وراها
عزمته على الحلاوة يمنا و بقى عدنا لـ11 لان زلمة البيت طالع وية اخوه سامر و عايفنا
گدامه كتبت اسئلة للي رسبو و يعيدون فسألني ـ اروى بس بالفيزياء زينة لو بكل المواد؟
جاوبته ـ كلهن ، اصلا عدها درجات كاملة بس جاي يعانن المدرسات من اسلوبها
ضاج و رد علية ـ داروها و وصي المدرسات عليها ، اروى حبابة و زينة بس مشاكل أهلها مضيعاتها
يقين نامت على متني فززتها و گلتلها تگوم للغرفة ، تالي گامت و اللطمت بالحايط و صارت تبچي
