(إنّا غير مهملين لمراعاتكم، ولا ناسين لذكركم، ولولا ذلك لنزل بكم اللأواء أو اصطلمكم الأعداء)
الامام المهدي المنتظر (عجل الله فرجه)
.
.
.
رگع جعفر موبايله بالچكمچة و غلط على عمي
سألته ـ شصاير عليك الله وگعت گلبي
رد ـ اخوچ بالتوقيف متعارك وية جماعة و موقفيه
رددت ـ يا الله يا الله
گال جعفر ـ سهلة يطلعوه بكفالة راح اوصلچ و اطلع لبغداد ، لا تخوفين امچ و سولفيلها على كيفچ
خليت ادية على راسي و رددت ـ كلها من وراية ، كله مني
رد علية جعفر ـ شني كلها منچ؟ رجال صار عمره 20 سنة الى متى تركضين وراه؟
گتله ـ اخذني وياك
وگف السيارة و رد ـ بس اوصل اخابرچ و اسمعچ صوته انزلي
ما نزلت گلي ـ و الله اخابرچ، خيتي إذا رحتي منو يبقى وية امچ؟
دخلت البيت و ما عرفت شلون اگل لأمي ظليت احوص بالبيت حتى ما تنتبهلي
اخذت سلة و طلعت للحديقة حصدت سلگ و بتيتية و جزر و من شفت امي طلعت وراي صار بودي مو احصد لا اطم راسي بالگاع
وگفت امي فوگ راسي و سألتني ـ چا مو گلتي الجزر بعده ليش تحصدي؟
صفنت على الحصدتهن و رجعت اتلمستهن بيدي صدگ بعد يرادلهن شوية
هاي عمايل وارث حتى و هو برا لاعب جولة بـنباتاتي
دخلت للبيت و امي اجت وراية
وگفت على السنگي اغسل السلگ فگابلتني و سألتني ـ شنو فقّار بطل ما يخطب شو ماكو خبر؟
رديت ـ يا فقّار؟
فتحت امي عيونها على وسعهن و گلتلي ـ هسة ما تعرفينه ! هاا بطل مو؟
اجت يقين بيدها موبايلي و تصيح ـ وينچ سمانة جعفر يدگ
عفت الماي مفتوح و ركضت اخذت الموبايل و رديت عليه
قبل ما احچي گلي ـ هاچ اسمعي صوته
فتت للغرفة و اسمع وارث يگول ـ ها سومة شلونچ
رديت عليه ـ شلوني يمصخم بس ارجع إذا ما أربيك من جديد ، ولك تدري ما اعرف اسولف كلمتين وية امك؟ ولك المرأة لسة ما تعرف بيك
جعفر گال ـ احسن جبته و جايچ ماعليه شي لا تخوفيها
دخلت امي للغرفة تگول ـ هااا بطل؟ ما تحچولي ليش تضمون علية
انطيتها موبايلي و گلتلها ـ يمة شنو كلشي يصير تذبي بفقّار المسكين؟ هذا ابنچ ، ابنچ ابو البلاوي
عفتها تسألهم شكو و رجعت للمطبخ
غسلت السلگ و صفنت على حالي
صدگ اريد اسويله دولمة؟ خيولي راجع من العسكرية لو من التوقيف
