#أنا _جواهر

الفصل الرابع عشر

يوم جاء اليوم اللي خالد بياخذ ولدي للرياض يوريه امه وابوه وكانت زوجته اللي بتمسك ولدي بالخط جن جنوني، يعني تخيلو شعوري منظلمة واحس بضيم وجنيني ينوخذ مني بحضن مرت ابوه اللي معترف بها؟ وأنا ولاشي ؟؟ ضاق صدري وكل الوقت اصيح عند امي هو ابوه ولا اقدر امنعه بس بعد غصة بقلبي أول مره اهل زوجي يشوفون ولدي ويدخل عليهم بحضن مرت ابوه اللي ماله كم شهر متزوجها؟ جاء اليوم اللي بياخذه ورتبته امي وجهزت اغراضه وأنا كل شوي اترجا امي تكلمه وتقوله لا يجي ياخذه إذا بيشوفونه نروح للرياض حنا ويمره من عندنا يوريه امه، رفضت امي وتقول ذا ابوه وذولا اهله، انهرت أنا خواتي وامي يقولون لا خلي ياخذه يشوفون حفيدكم، انا بالمستشفى ماجو ليش؟ جلست ٣ شهور بالرياض بعد نفاسي ليش فجأة تذكرو إن عندهم حفيد ولازم يشوفونه؟ كرهت خالد وكرهت نفسي وكرهت حتى اهلي كل همي مابي ولدي يروح لحضن احد غيري
يوم جاء وصل البيت العصر نزل يسلم على امي ويسالها وين الولد وامي ماسكه شنطة فيصل وأنا بالمجلس ماسكة ولدي واشوفهم من الشباك واضح جاي بياخذه وبيمشي، طلعت له أنا وقلت جاي وش تبي ؟ تبي فيصل اللي تترجا امك وابوك بالمستشفى يشوفونه ولا احد عطاك وجه؟ يوم تزوجت بنتهم زان لهم الحفيد ؟ وامي تقول استهدي بالله وعطيه الولد قلت لا والله مايطلع، قال هو أنا ابوه ومثل ماتخافين عليه أنا اخاف عليه قلت تكذب وتخسى من تزوجت مسكر جوالك ولا سالت عنه هو حي ولا ميت ماعندي لك ولد تبيه روح ارفع علي قضية ولا كبر ولدي تعال خذه وده لهم اما بالعمر ذا ما اطلعه مع وحده غريبة قال ذي زوجتي مب غريبة قلت الا غريبه لي ولولدي وحتى اهلك الآن بالنسبة لولدي غرب، تبي تسوي اللي تسوي ولدي مايطلع من البيت بالعمر ذا قال طيب انتي امشي معي وخلك ببيت معززه ومدري ايش
التفت له امي قالت بنتي طلعت من بيتي معززه ورجعت له وهي معززه لاعطيت بنتي حقها كامل ذيك الساعه نقولك خذها لكن الحين بنتي ماتطلع معك، قال هو طيب ولدي بعد باخذه معي قلت اذا كل همك امك وابوك خلهم يجون للبيت واطلعه لهم واذا هم يشوفون نفسهم ملوك وامراء لايدخلون بيتنا عند الباب طلعه لهم لكن اعطي ولدي لغريبه تمسكه بالطريق لا والله ماجاني ولدي هديه ماتعب به الا انا دخل اخوي الكبير على نقاشنا وتعرفون الرجال وحركاتهم نظام ابشر وسم ومالك الا اللي يرضيك جاء اخذ ولدي مني وعطاه ابوه، قال ذا ابوه مايصير تسوين كذا وهاوشني قدامه وأنا دموعي تنزل قهر وغبنه وصرخت وجيت مسرعه وأخد ولدي بالقوة من خالد وكان قلت والله مايطلع لو على جثتي عندك شي روح للمحاكم واخذ ولدي وادخل البيت سيدة على غرفتي اسكر الباب واصيح قهر إن اخوي سوا هالحركة قدامه واخوي مايدري عن شي وهو وش مسوي بي ..
خفت أنزل اقول لأخوي عشان يحس إني ماغلطت ولا هو دلع بنات وانه جحدني أنا وولدي هو واهله بس خفت كثيييير يوقف ضدي ويقول هذا اللي انتي اخترتيه وسويتيه تحملي تجمعت علي الهموم فكرت خالد هو صدق بيقدر ياخذ ولدي مني ؟ وفكرت باخواني لو عرفوا وش بيصير وكل هذا وانا عمري ٢٥ سنه بس والشعور اكبر من إني اتحمله، يوم شفت خالي وامي جنبه ووجهم شاحب ويناظرني بنظرات رحمه على عصبية أول ماشفت دمعت عيوني وأنا اسلم عليه ويخمني ويبوس راسي قال ميخالف ميخالف كل شي له حل والتفت على امي اثرها تبكي ... عرفت إن امي ماقدرت تتحمل كل هذا وعلمت خالي كل شي واجلس عنده ويسالني ويسالني وقالي ولدك ماحد يقدر ياخذه واخوانك خليهم علي انا اقولهم ومو وقت اني اقولك ان اللي سوسيته غلط وكنتي بتاخذين ازين الرجال لكن الوقت فات والحين انتبهي لنفسك وولدك وبس وخلي الباقي علي ولا تفكرين بشي ..