💜 41 💜
ဥဒဟို သွားလာနေကြတဲ့ ရောင်စုံကားတွေရဲ့ကြား ပုံမှန်ထက် အနည်းငယ် မြန်နေတဲ့ အရှိန်နှုန်းနဲ့ ပြေးလွှားနေတဲ့ အနက်ရောင်ပြောင်လက်နေတဲ့ နောက်ဆုံးပေါ် Model မြင့် ကားတစ်စီး။
ထိုကားထဲမှာတော့ တိတ်ဆိတ်ခြင်းကသာ ကြီးစိုးနေကာ မောင်းသူနေရာက ကောင်လေးကလဲ မျက်မှောင်တွေ ကုတ်ချထား၍ ရှေ့တူရှူကိုသာ အာရုံစိုက်ပြီး မောင်းနှင်နေသလို...
ဘေးခုံမှာ ထိုင်နေတဲ့ ကောင်လေးဟာလဲ ခပ်မှိုင်းမှိုင်း မျက်ဝန်းတွေနဲ့ ကားပြတင်းကနေ အဝေးသို့ ငေးကြည့်နေလေသည်။
ခဏအကြာမှာတော့ ဘေးက ကောင်ကလေးက ဘာပြောလိုက်ရယ်မသိ။ ကားလေးဟာ လမ်းကြောင်း ပြောင်းသွားကာ ဆိုင်လေးတစ်ဆိုင်ရှေ့သို့ ထိုးရပ်သွားလေသည်။
ကားပေါ်ကနေ ရှေ့ဆင့်နောက်ဆင့် ဆင်းလာကြပြီး ဆိုင်ထဲသို့ ဝင်သွားတဲ့ အမျိုးသား နှစ်ယောက်ရဲ့ ထင်ပေါ်နေတဲ့ ပုံပန်းသဏ္ဍန်တွေကြောင့် ဘေးနားက ဖြတ်သွားဖြတ်လာ လူတွေရဲ့ မျက်ဝန်းအကြည့်တွေဟာ ထို ကောင်လေးနှစ်ယောက်နောက်မှာ ကပ်ငြိ လို့။
တစ်ယောက်ကလည်း ရင့်ကျက်တည်ကြည်တဲ့အသွင်ကို ဆောင်၍ ချောမောခန့်ညားနေသလောက် နောက်တစ်ယောက်ဟာလည်း ငယ်ရွယ်ပျိုမြစ်၍ တက်ကြွလန်းဆန်းတဲ့ အသွင်ကို ဆောင်နေလေသည်။
နှစ်ယောက်သား တူညီနေတဲ့ အချက်တစ်ချက်ကတော့ ဘေးဘက်ကို ယောင်လို့တောင် လှည့်မကြည့်တဲ့ သူတို့ရဲ့ မျက်ဝန်းတွေပေါ့။
ခန့်ညားတဲ့ အမျိုးသားရဲ့ သိမ်းငှက်လို အကြည့်စူးစူးတွေကလဲ ရှေ့ကိုသာ စူးစိုက်ကြည့်နေသလို ငယ်ရွယ်တဲ့ အသွင်နဲ့ ကောင်ချောလေးရဲ့ ညှို့အားပြင်းပြင်း မျက်ဝန်းအစုံဟာလဲ ရှေ့လားရာကိုမှ လွဲ ဘေးကို ချော်မထွက်ခဲ့။
ဆိုင်လေးရဲ့ ထောင့်ကျကျ စားပွဲမှာ နေရာယူလိုက်ကြပြီး နေရာတကျ ထိုင်ပြီးတဲ့နောက်မှာ waiter လေးကို မှာစရာရှိတာ မှာကြားနေလေသည်။
