_ انت جنيت ! انت جنيت ؟
= بسم الله في شنو ؟
_ ده شنو العملتو ده ! فقدت عقلك خلاص ؟ لالالالا معقولة انا ما بعرفك !
= كدي ما تكوركي وبراحة في شنو ؟
= في شنو ؟ الظاهر اني كنت مخدوعة فيك .. حقيقي انا مصدومة ودي اخر حاجة كنت اتوقعها منك .. انا بجد مصدومة شديد منك
بزهج : يوووووه ياخ مالك ؟
نانا : بسم الله يابت متين وعيتي بعد بتكوركي كدة ؟ في شنو مالك ؟
جرت اتجاه نانا واشرت على تميم الواقف مخلوع : القدامي ده منو ؟
نانا باستغراب ختت يدها في جبهتها : جسمك بارد الشيطان ده طير عقلك مرة واحدة !
= نانا انا بسالك الكائن القدامي ده منو ؟
نانا عاينت ليها ب شفقه وختت يدها في خشمها ..
= جاوبيني ده منو ؟
واشرت ناحية تميم ..
نانا بتعلثم : ت تميم يابتي انتي ما عرفتي ؟
= مع الاسف طلعت ما بعرفو !
نانا بحزن : كدي تعالي ارقيكي بسم الله الجاكي شنو تاني !!
= امشي ارقي ولد ولدك لانو شكلو جنا ومحتاجك جنبه ..
مشت قعدت في السرير ..
نانا قربت من تميم الواقف ما فاهم حاجة وعلامات الاستغراب مالية وشو
نانا بحزن عاينت لليا ووجهت كلامها لتميم : حاتاخد وقت بس ح تتحسن ؛ حامشي اكلم الشيخ بركات واشوف اذا عادي البحصل معاها ده ولا الحاصل شنو بسم الله الرحمن الرحيم دي مصيبة شنو دي !
لفت عجلات الكرسي وطلعت وهي بتتكلم مع نفسها وزعلانه على وضع ليا الجديد .. تميم قرب من ليا وقعد في طرف السرير وهو بعاين ليها ..
تميم : ليا انتي كويسة ؟
عاينت لي من فوق لتحت : امشي يا متحرش ياقليل الادب
تميم باستغراب : الكلام ده لي انا !!
بعصبية : كنت بتفتش في جسمي وانكر الشوفتو .. بجد انا قرفانه منك
تميم حسا باحراج : الموضوع ما زي ما انتي فاهمة ..
ليا جدعت في جك الموية اللي ضربو في جبهتو : اخر حاجة كنت اتوقعه منك ولا بتخطر على بالي حتى تكون بالدنائة دي .. الله يقرفك يا ود عبدالماجد
مسك جبتهو وجا قرب منها وهي زحت بعيد منو ..
تميم وهو بضغط على مكان الضربة بيده : انتي فاهمة غلط ؛ انا ما كنت .. م .. ياخي ما الفي بالك ده .. مجنونة انتي كيف تفكري فيني بالطريقة دي اصلا ؟
