"ليا"
ابوي جا داخل وشو جايب الوان ونفسه كاتم يدوب قادر يصلنا ..ختيت كباية الموية من يدي في التربيزة و جريت عليه .. قعدتو في كنبة الصالة وشلت كباية الموية الباردة جبرتو عليها .. خاتي يده في قلبه وضاغط عليها شديد ..
= خلينا نمشي المستشفى نفحص ليك ..
_ انا ؛ انا ضيعتي اولادي ، ضيعت امك ضيعتا اختك انا السبب ، انا السبب ، انا السبب
= بابا لو سمحتا لازم نمشي المستشفى حالتك ماشة اسوء نفسك ماشي ينقص
اتلفت علي بانفعال جدع بيه الكباية من يدي : امك واختك ضاعوا بسببي انتي ما بتسمعي مستشفى شنو ياخ ان شاءالله اموت وارتاح انا ده كلو مني ، كلو بسببي
_ ضاعوا كيف يعني حصل شنو ؟
= ستو عملت منهم كبش فداء ؛ امي انا قتلت اولادي ؛ امي انا شيطان يا ليا امي شيطان قصت ظهري ..
_ حانلاقيهم انت ما تخاف هم ما ماتو ما تشيل هم
= كويسين كيف يعني ؟ ستو قتلتهم
عاين لي مسافة وكمل : انتي مخبية عني شنو ؟
اتوترتا شديد من سؤالو ونظراتو : انت روق واهدا وانا حا احكي ليك ..
شلت عصير الليمون من الشغالة ومديتو ليه : هاك اشرب العصير ده يهديك شوية .. بالحالة دي قلبك حايتعب
بزهج : ما عايز اشرب اي حاجة
= عشان خاطري يا بابا عشان خاطري اشربو انا مالي لي غيرك في الدنيا دي اذا ما بتفكر في نفسك فكر فيني على الاقل ..
دموعي نزلت وابوي لمن سمع كلامي وشاف دموعي هدا وشال مني العصير .. شربو دفعة واحدة و ختا الكباية في التربيزة بعد عملت صوت
= هداني شربتو وهديت احكي لي اختك وامك وين ؟ عارفه مكانهم ؟
اتوترتا وعاينتا لنانا المستنياني زي ابوي اتكلم
= انا كان حلمتا بيهم والحلم خوفني طلبتا من همام يجي يشوفوهم يطمني عليهم .. وفعلا جا ولقى ستو واخداهم وما قدر يلحقهم وينقذهم وهم ما ماتو عايشين بس محبوسين وقريبا حاعرف وين .. ستو قالت كدة عشان تخوفك وتكسر شوكتك وهسي اطمن هم عايشين
=معناها حاتقتلهم ..
قاطعتو ومسكت يدو : بابا حانلاقيهم ثق فيني .. همام بنفسه مستلم شغال على الموضوع وتحت اي لحظة حايجينا خبرهم انت اطمن وما تزعل لو سمحتا روق
= نحنا لازم نلاقيهم ، لازم
_ حانلاقيهم ان شاءالله انت بس روق طيب ؟ عشان خاطري
ضماني عليه بقوة : ما عايزك تدخلي بخاف افقدك انتي التانية خليكي بعيدة منها .. وطالما هم عايشين وفي امل نلاقيهم خلي الباقي علي وانتي لهنا وكفاية ..
