" حور "
بعد اول مقابلة لينا مع الشيخ وبعد خلصت عناب علاجها .. في اخر يوم لينا جراني بالطرف بعيد عن عناب وهدباء .. وقال لي
شيخ بركات : اختك علاجها طويل وعويص .. هي مبدئيًا بتقدر تمارس حياتها بشكل عادي بس اللهي فيه واللي وصلت ليه ما ساهل وعلاجه حاياخد وقت .. انتوا لازم تكونوا متفهمين وانا حاكلم امك واشرح ليها الموضوع اكتر ..
_ امي عقلها شوية ما كويس ؛ ممكن تشرح لي انا وانا حاعرف اتعامل مع الموضوع ؛ شنو حاصل مع عناب بالضبط ؟
سكت مسافة وقال لي : طيب اسمعي يابتي .. اختك كانت عايشة مع ساحر والساحر ده مارس عليها كل انواع الطلاسيم البعرفها .. وشكلو حفظها طلسم حماية عشان كدة ما فقدت عضو من اعضاءها ..
= ما فاهمة كلامك يا شيخ !
_ حاشرح ليكي بشكل مبسط ؛ طلسم الحماية ؛ هو تعوذيذة بستخدموها السحرة عشان يحموا روحهم من اثار الطلاسيم اللي ممكن العدو يإذيهم بيها .. وشكلو الساحر ده كان عايز يجند اختك عشان كدة حفظها الطلسم تحمي بيه نفسها .. الكلمات الغريبة البتمتم بيها دي طلاسم وتعاويذ فهمتي ؟
هزيت راسي : طيب وهي حاتتعالج صح ؟
_ أن شاءالله تعالى؛ بس اذا رجعت للراجل داك مح تتعالج ابدًا تاني ويمكن تفقد عقلها مرة واحدة .. عشان كدة خلوا بالكم منها وابعدوها عنه انتي قولتي انو هو زوجها صح ؟
هزيت راسي : صح
= كيف بتزوجوها من شخص زي ده !
_ ما كنا عارفين ..
= كلو ابتلاء من الله وراءهُ حكمه وإن لم ندركها .. الاهم تحافظ على فروضها الخمسة و اذكار الصباح والمساء .. ما تنقطع منهم ولا يوم واتعاملوا معاهم تعامل الادوية الطبية ذكر صباح وذكر مساء .. والاهم من ده كلو وقت الدورة الشهرية بذات تحرص حرص تام على الاذكار .. عشان بتكون وسخانة ومعرضة للشيطان اكتر من اي وقت .. تبعد عن الاغاني ؛ الاغاني بتقوي الشيطان وبتضعف الرقية .. باختصار حاوطيها ببيئة ايمانية .. اذا قوى الايمان ضعف كيد الشيطان يابتي ♡
سمعت كلامو بالنص وبقيت بصلي معاها واقول الاذكار معاها عشان اشجعها وما تضعف .. استمريت اول اسبوعين والصلاة تقيله علي بس بصلي عشان عناب ما تضعف .. ما كنت فاهمه شعور الراحة البيجني وقت اصلي ما بتذكر ان ابوي او امي صلوا يوم او علمونا الصلاة !
في فترة تعافي عناب انا كنت حاسة قدر ايه كنت بعيدة عن ربنا والدنيا واخداني .. ما كنت فاهمة الشعور لاني ما فكرت انو موجود !!
شوية شوية بقيت من وقت للتاني بقرأ قرآن .. والقران تقيل علي اكتر من الصلاة .
ولسه كلام الشيخ في بالي وان راجل عناب اللي ما حصل شوفناه بعيونا .. كان ساحر و بمارس سحرو عليها .. كنت مستناياها تشد حيلها عشان افتح معاها الموضوع وافهم منها الحاصل معاها .. الوقت ماشي بطيء وابتديت اشوف حقيقة ابوي وافتش وراه .. فتشت مكتبو اللي ما بخش عليه حد غيره .. ما كان في شي مهم بس في مرة وانا بفتش وقع في يدي كتاب للسحر .. معقولة ابوي ساحر سؤال عقلي ما قدر يستحمل اجابته !!
