" ليا "
قفلوا لي عيوني وكركوني دخلوني في غرفة طويلة .. بابها زي باب السجن فيها مروحة واحدة شغالة بطيء .. علقوني من يديني ومشوا !!
صرختا و شتمتا من غير اي نتيجة .. حلقي وجعني من الكواريك والصريخ .. سكتا واتلفتا يمين وشمال مافي غير شباك صغير واحد مستطيل قريب من سقف الغرفة بسرق لي نور شمس .. الغرفة كاتمة ونفسي كتم معاها كنت حاسة روحي بموت بس شوية شوية رئتي اتعودت على كمية الهواء الجديدة .
الباب كان بيفتح مرة واحدة في اليوم .. بجي راجل اسود ضخم بكشح فيني جردل موية وبمشي .. وقدر ما نبزتو وكوركتا فيه ما ابدا اي ردة فعل بل كان ابرد من جردل الموية البكشحه فيني !
استمرت الحالة دي خمسة ايام عرفتا الزمن من اشعة الشمس البتتسرب لي من الشباك المقاصدني .. اذا نور الاشعة اختفى معناها جاء اليل اذا النور جاء قوي معناها الظهر او الصباح وهكذا .. الخمسة ايام الاولى ما ادوني اي اكل .. بجي الراجل ده بكشح فيني الموية وبمشي ومرات مرات بقطر لي موية في خشمي بيده بحقنه صغيرة بجيبه معاها .. في المرتين الاوائل قطر لي 2سيسي من الموية بس في اليوم الاخير قطر لي حقنه ال5سيسي كاملة .. كنت بموت من العطش والجوع حيلي ما شايلني اقيف وعضلات يديني اتشدت من الربطة .. بسبب السخانة والموية الباردة البتتكشح فيني جاتني حمة .. بقيت بشوف اتنين اتنين وبهلوس وفقدت قدرت التمييز بين النهار واليل .. راسي داخ ونفسي كتم بالمعنى الحرفي حاولتا انادي على الراجل الاسود بس ما قدرتا .. جسمي برد وعضلاتي ارتخت وخلاص حسيت روحي بتطلع وبحتضر حقيقي .. ما تميت ثواني وبعدها ما حسيت باي شي تاني ..
فتحتا عيوني في مكان كله ابيض .. اظن لي موتا وده البرزخ .. انا دخلتا الجنة ؟ ده شنو المكان الابيض ده .. هم البموتوا بشوفوا شنو بالضبط ؟ اكيد لو كنت من اصحاب النار ما كان حايكون عندي فرش حلو كدة وجنبه جك وموية وكباية قزاز مختوتة في الارض .. يااااه اكل اخيرا اكل .. جريت جري على الكورية
عدس!
شوربة عدس !!
ده اكل اصحاب الجنة !؟
انا في الدنيا ما كنت بحبو كيف حاحبو هنا !؟
ااااي صااااح العدس مذكور في القران !
كدي اضوقوا اكيد عدسهم ما زي عدسنا اكيد حايكون احلا مليون مرة ..
شلتا منه ملعقة وطلع حلو فعلاً .. ختيت الملعقة بالجنبة انا جعانه شديد ملعقة شنو ؟ شفطتا الكورية كلها في جغمة واحدة .. وحمدتا ربنا على النعمة ؛ اول مرة احس يعني شنو يكون عندك اكل تاكله .. دي نعمة فعلاً بس نحنا إتلفناها واتعودنا عليها ..
مشيت اتجاه الباب افتحوا اشوف باقي المكان .. هو الانسان بخش الجنة طوالي ؟ مش في حساب ؟ بس انا سمعتا ان الاموات بتلاقوا .. بس وين ملائكة الحساب !!
