" حور "
مع مرور الايام توتر ستو بقا ظاهر شديد .. وباين ان في موضوع اكبر من قصة زاكاريا .. مستحيل زاكاريا يوصل ستو الباردة للدرجة دي من التوتر .. لازم افهم في شنو واعرف القصة
.. قعدتا جنبها اثناء ما هي ماسكة اوراق في يدها ..
= ستو ..!
من غير ما تعاين لي حتى : جهزي نفسك حانطلع منها في اسرع وقت ..
= نطلع نمشي وين وليه ؟
_ حور ما وقت اسألتك لازم نطلع من هنا ..
= انتي حاتهربي من زاكاريا ؟ للدرجة دي بشكل تهديد عليكي ؟ كيف حاتمسكي الرئاسة اذا انتي ..
قاطعتني بعصبية : انتي ما فاهمة شي الموضوع اكبر من كدة بكتيير ونحنا في خطر حقيقي انتي ما فاهمة ما فاهمة ..
وضربت بالورق على التربيزة الخشبية بقوة ..
= اذا انا مافاهمة فهميني يمكن نصل لحل ! في شنو وليه انتي متوترة كدة !
طلعت النظارة : ما عارفة احكي ليكي شنو ولا شنو .. الدنيا كلها قايمة وقاعدة في رائد اسمو عصمت اتقتل وباين انو وراهو ناس كتار وتُقال داعمنه .. شيوخ و نخبة من الضباط الكبار والموضوع كلو جا في راسنا ..
= شيوخ ! مش الشيوخ معاكم وفي صفكم !
_ لا يا حور شيخ من شيخ يفرق .. نحنا المعانا ناس بتدعي التشيخ عشان تجذب الناس حواليها ويبقى عندها شعبية وسيط بينهم .. على مدار السنوات الفاتت كلها زرعنا جذورنا واتقربنا من الناس بتوب الدين ونحنا ابعد ما نكون عنه .. الناس ما بتقبلنا بشكلنا الحقيقي وهويتنا الحقيقية كسحرة .. كان لازم نلاقي بديل سريع نمكّن بيه نفسنا بينهم .. والا حانفضل منبوذين للابد .. لبسنا توب الدين ووقفنا قدامهم وبالفعل اتقبلونا .. الخطوة البعدها اننا نبعدهم هم زاتهم عن دينهم .. دي كانت طلبات الخُدام و المردة والشياطين حقننا .. وفعلاً بيننا الضرايح و خليناهم يصلوا فيها بدل المساجد .. يلهموا ويدعوا باسم الشيخ بدل ربهم .. ننجم ليهم و نعمل ليهم الاعمال ونرضي نواياهم السيئة اتجاه بعض .. ابتدعنا في الدين نفسه ومشوا معانا بكل هدوء .. وشوية شوية قدرنا نجرهم للشرك وهم ما عارفين زاتو انهم مشركين وبقوا اتباعنا و ما برضوا فينا كلمة ..واي شيخ بجي بقول بغير البنقولوا نحنا الناس بتهاجموا .. بقينا محبوبين بيناتهم ولينا مكانه وقيمة يمكن اكتر مما كانت في السنين المضت .. فغيرنا حتى التاريخ وتايستي بقت رسميًا تجمع لاكبر السحرة
