حور الجناد

3

يوم الجمعة اللي هو يوم العرس ..من الصباح مشينا كلنا بيت ناس خالتي إلا أبوي خليناه في البيت قال بجي بحضر العقد بعدين..

أمي عزمت جيرانا وعماتي للعرس ...بيتهم كان مزحوم شديد وجوطة ...اي زول شغال في حاجة ..انا ومعاي بنات أهلها لخلود وشفق كنا شغالين في حاجات العقد ..العصير وشيالات الضيافة..كلهم رتبناهم ...بعد خلصنا شفق جرتني من يدي وقالت لي أمي من قبيل بتسأل عنك ، قلت في نفسي تسأل عني لشنو !..مشيت معاها لقت أمها معاها مجموعة نسوان وكانوا شغالين في الفطور ...سحبتها من يدها...

-أمي هدي حُور ..

إلتفتت علي ببشاشة وحضنتني ..سلمت علي حلو لما استغربت ..

-إزيك ي بتي إن شاء الله كويسة ..

-كويسة الحمد لله.

-لقيت أمك قبل شوية ومعاها أخوانك لكن إنتي م لقيتك .

-اي كنت شغالة مع البنات.

-كيف مع القراية والمدرسة .؟

-والله الحمد لله تمام .

-يا أمي اتونسوا بعدين هسي الناس بعقدو واحنا ماشين نضيفهم ..

-(ضحكت)..خلاص أمشو ...

سبحان الله خالتو أماني وبناتها ديل ظريفات شديد وبدخلوا في الناس طوالي عكس نسوان الأسرة التانيات ...

الساعة 9 عقدو ...مشينا وزعنا الضيافة على الموجودين ...وتاني بدينا في موضوع الفطور ..وزعنا صواني الفطور على النسوان كلهم حتى شلنا لينا صينية ومشينا أكلنا ...كل شوية أمي تناديني عشان تعرفني على مرأة ...أو تلاقيني وحدة وتسألني..إنتي بت منو ..؟ م بحب اللمات عشان جنس الحركات دي ....

بعد العقد ..الرجال والعربات ملو البيت ...العريس جا بارك لخلود وطوالي هي مشت الكوفير مع صحباتها لانو الزفاف المساء في الصالة ...

انا ونجود بت خالتي وشفق بت عمها ورؤى بت جيرانا إتلمينا كلنا مع بعض وشلنا حاجاتنا ودخلناهم غرفة نجود وقفلناها علينا عشان نجهز براحتنا ...بعد شوية أمي جاتنا وكانت بتفتش علي ..قالت لي أنا شغالة سريع جهزي أخواتك ديل ولبسيهم فساتينهم ...كالعادة طبعاً لازم يعملوا لي بيهم موضوع في اي شي ...بمساعدة البنات خلصناهم سرعة وطردناهن برا ..حتى بدينا نجهز في نفسنا ...

فستاني لونو كحلي غامق...قصيت قص عشان مقاسو يكون مظبوط معاي .. وفعلاً طلع رهيب ..وفكيت شعري لكن شلت معاي طرحة للاحتياط عشان لو لمحت أبوي طوالي ألم شعري وألبسها قبل م يض*بحني قدام الناس🤣 طبعاً ولا فكرت أعمل مكياج زاتوو ..لانو امي م بتخليني وانا م بحبه ... حتى شفق لبست ليها طرحة وحجبتها كمان ..قالت أخوها عمر صعب شديد وم حصل خلاها تطلع مكان بدون طرحة ...المهم إتظبطنا تمام حتى طلعنا ...