حور الجناد

4

-تعالن يا شفق ورزان عايزاكن في موضوع .

-خير ي أمي .

-رايكن شنو في بت آلاء الكبيرة دي .

-قصدك حُور ي أمي ..مالها يعني !!

-قلت أخطبها لأخوكن .

-يا أمي لكن دي لسه صغيرة .

-صغيرة شنو حلاتها وقوامها مناسب ..وبعدين نخطبها بس أصلاً أخوكن دا لا بعرس الليلة لا بكرة ...عشان كدا نحجزها من بدري قبل م بكرة تتخطب.

-اي والله ي أمي البت عسل شديد لكن هل عمر هيوافق .؟!

.....

الصباح لقيت أمي والبنات بتناقشوا في موضوع وسامعهم بقولوا هل عمر هيوافق طوالي سألتهم ..

-أوافق بشنو ؟

-تعال أقعد ي ولدي ...كنا بنتكلم عنك ..

-عني .!! ليه في شنو ؟

-يا ولدي العمر ماشي وانت للآن م مفكر في العرس ...لمتين هتقعد كدا ي عمر لكن ؟

- يا حاجة لسة الزمن المناسب ..واصلاً م لاقي العروس .

- أخطب ساي ي ولدي وبعدين براحتك تمم عرسك ...وانا زاتي لقيت ليك عروس مناسبة ... لكن بترضى تعرسها ؟

-هي منو أول ؟

-بت آلاء أخت مرت عمك عبد الله ...بنية حلاتها وخدومة ورايقة ...

-طيب بشوف الموضوع.

-خلاص انا بفتح الموضوع مع خالتها صفاء.

-إن شاء الله ... ويلا انا طالع ...

كلام أمي جا في الزمن المناسب الفكرة كانت في راسي وهسي هي سهلت علي امور كتيرة ...في البداية كنت ممشيها ساي ..ولو كان قالت لي بت غير حُور كنت هأرفض ...لكن الحمد لله الأوضاع ماشة مع تخطيطي بالظبط ...

__________

قاعدين انا وامي بنتونس ...أمي جاها إتصال وكانت دي خالتي بعد السلام والونسة العامة..شالت التلفون ودخلت غرفتها وقفلت الباب عليها...إستغربت طبعاً لانو عادي أمي بتتكلم مع خالتي قدامي لكن ليها كم يوم من تتصل ليها بتمشي بعيد مننا ...الشمار حرقني لموضوعهن البحكن عنو دا ...يعني زمان مواضيعهن كلها عن عرس خلود لكن هسي في شنو كمان ...رجعت الغرفة وقعدت أقرا لانو بعد خلاص نازلين إمتحانات نصف العام ...

.......

الامتحانات بدت وكنت مضغوطة شديد...لما خلصت أدونا إجازة اسبوعين ..كنت مبسوطة شديد ..لأني هقضيها كلها من دون قراية ...

بالمساء كنت بحضر في التلفزيون ..امي كانت برا مع ابوي بوشوشو في موضوع ...بعد لحظات جاتني جوة قالت لي تعالي عايزاك في موضوع ...طبعاً إتحمست شديد وقلت ياربي في شنو ؟ دخلنا الغرفة كان فيها آيات ونور طردتهم برا ..وقفلت الباب ..